ರಾಹುಲ್​ ದ್ರಾವಿಡ್​ಗೆ ಭಾರತರತ್ನ ನೀಡಿ: ಸುನೀಲ್​ ಗಾವಸ್ಕರ್​ ಒತ್ತಾಯ

ಮುಂಬೈ: ಭಾರತ ತಂಡಕ್ಕೆ 17 ವರ್ಷಗಳ ಬಳಿಕ ಟಿ20 ವಿಶ್ವಕಪ್​ ಗೆದ್ದುಕೊಟ್ಟ ಕೋಚ್​ ರಾಹುಲ್​ ದ್ರಾವಿಡ್​ಗೆ ದೇಶದ ಅತ್ಯುನ್ನತ ನಾಗರಿಕ ಪ್ರಶಸ್ತಿಯಾದ "ಭಾರತರತ್ನ' ನೀಡಿ ಗೌರವಿಸಬೇಕೆಂದು ಮಾಜಿ ನಾಯಕ ಸುನೀಲ್​ ಗಾವಸ್ಕರ್​ ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದ್ದಾರೆ.

"ದ್ರಾವಿಡ್​ ಸಾಧನೆ ದೇಶದ ಎಲ್ಲರಿಗೂ ಸಂತೋಷ ತಂದಿದೆ. ಭಾರತೀಯ ಕ್ರಿಕೆಟ್​ಗೆ ಅವರು ಆಟಗಾರ ಮತ್ತು ಕೋಚ್​ ಆಗಿ ನಿಸ್ವಾರ್ಥ ಸೇವೆ ಸಲ್ಲಿಸಿದ್ದಾರೆ. ಹೀಗಾಗಿ ಅವರು ದೇಶದ ಅತ್ಯುನ್ನತ ಗೌರವಕ್ಕೆ ಅರ್ಹರಾಗಿದ್ದಾರೆ. ಜನಸಾಮಾನ್ಯರಿಂದ ಹಿಡಿದು ಎಲ್ಲರೂ ನನ್ನ ಈ ಮಾತಿಗೆ ಧ್ವನಿಗೂಡಿಸಬೇಕು. "ಭಾರತರತ್ನ ರಾಹುಲ್​ ಶರದ್​ ದ್ರಾವಿಡ್​' ಎಂಬುದನ್ನು ಕೇಳಲು ಆಹ್ಲಾದಕರ ಎನಿಸುತ್ತಿದೆ' ಎಂದು ಗಾವಸ್ಕರ್​ ಪತ್ರಿಕಾ ಅಂಕಣವೊಂದರಲ್ಲಿ ಬರೆದಿದ್ದಾರೆ.

ದ್ರಾವಿಡ್​ ಮಾರ್ಗದರ್ಶನದಲ್ಲಿ ಭಾರತ ತಂಡ ಕಳೆದ ವರ್ಷ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್ ಫೈನಲ್​ ಮತ್ತು ಏಕದಿನ ವಿಶ್ವಕಪ್ ಫೈನಲ್​ನಲ್ಲೂ ಆಡಿ ರನ್ನರ್​ಅಪ್​ ಆಗಿತ್ತು. "ದ್ರಾವಿಡ್​ ಆಟಗಾರರಾಗಿದ್ದಾಗಲೂ ವೈಯಕ್ತಿಕ ಸಾಧನೆಗಿಂತ ತಂಡಕ್ಕೆ ಆದ್ಯತೆ ನೀಡುತ್ತಿದ್ದರು. ತಂಡದ ಒಳಿತಿಗಾಗಿ ಅವರು ವಿಕೆಟ್​ ಕೀಪಿಂಗ್​ ಜವಾಬ್ದಾರಿಯನ್ನೂ ಹೊತ್ತುಕೊಂಡಿದ್ದರು' ಎಂದು ಗಾವಸ್ಕರ್​ ವಿವರಿಸಿದ್ದಾರೆ.

https://www.vijayavani.net/no-1-ranked-iga-swiatek-again-faltered-at-wimbledon-losing-in-the-third-round-to-yulia-putintseva-3-6-6-1-6-2-here-on-saturday