ಮಾಜಿ ದೇಶೀಯ ಕ್ರಿಕೆಟ್​ ತಾರೆ ಈಗ ಭಾರತ ಮಹಿಳಾ ಕ್ರಿಕೆಟ್​ ತಂಡಕ್ಕೆ ನೂತನ ಮುಖ್ಯ ಕೋಚ್​

ನವದೆಹಲಿ: ಮಾಜಿ ದೇಶೀಯ ಕ್ರಿಕೆಟ್​ ತಾರೆ ಹಾಗೂ ಮುಂಬೈ ಮಾಜಿ ನಾಯಕ ಅಮೋಲ್​ ಮುಜುಮ್ದಾರ್​ ಭಾರತದ ಮಹಿಳಾ ಕ್ರಿಕೆಟ್​ ತಂಡದ ನೂತನ ಮುಖ್ಯ ಕೋಚ್​ ಆಗಿ ಬುಧವಾರ ಬಿಸಿಸಿಐನಿಂದ ಅಧಿಕೃತವಾಗಿ ನೇಮಕಗೊಂಡಿದ್ದಾರೆ. ಇದರಿಂದಾಗಿ ಭಾರತೀಯ ಕ್ರಿಕೆಟ್​ನಲ್ಲಿ ಸುದೀರ್ ಸಮಯದಿಂದ ಖಾಲಿ ಉಳಿದಿದ್ದ ಹುದ್ದೆಯೊಂದು ಭರ್ತಿಗೊಂಡಂತಾಗಿದೆ.

ಸುಲಕ್ಷಣಾ ನಾಯ್ಕ್​, ಅಶೋಕ್​ ಮಲ್ಹೋತ್ರಾ ಮತ್ತು ಜತಿನ್​ ಪರಾಂಜಪೆ ಒಳಗೊಂಡ ಕ್ರಿಕೆಟ್​ ಸಲಹಾ ಸಮಿತಿ (ಸಿಎಸಿ) ಕೆಲ ತಿಂಗಳ ಹಿಂದೆಯೇ 48 ವರ್ಷದ ಮುಜುಮ್ದಾರ್​ ಹೆಸರನ್ನು ಅವಿರೋಧವಾಗಿ ಶಿಾರಸು ಮಾಡಿತ್ತು. ಆದರೂ ಅವರ ನೇಮಕಾತಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ಬಿಸಿಸಿಐ ಹೆಚ್ಚಿನ ಸಮಯ ತೆಗೆದುಕೊಂಡಿದೆ.

ರಮೇಶ್​ ಪೊವಾರ್​ 10 ತಿಂಗಳ ಹಿಂದೆಯೇ ಕೋಚ್​ ಹುದ್ದೆಯಿಂದ ಬಿಡುಗಡೆಗೊಂಡು ಬೆಂಗಳೂರಿನ ಎನ್​ಸಿಎಗೆ ಸ್ಪಿನ್​ ಬೌಲಿಂಗ್​ ಸಲಹೆಗಾರರಾಗಿ ಕಳುಹಿಸಲ್ಪಟ್ಟಿದ್ದರು. ನಂತರದಲ್ಲಿ ಮಾಜಿ ಬ್ಯಾಟರ್​ ಹೃಷಿಕೇಶ್​ ಕಾನಿಟ್ಕರ್​ ಮಹಿಳಾ ತಂಡದ ಹಂಗಾಮಿ ಕೋಚ್​ ಆಗಿ ಕಾರ್ಯನಿರ್ವಹಿಸುತ್ತಿದ್ದರು.

ಮುಂದಿನ ವರ್ಷ ಬಾಂಗ್ಲಾದೇಶದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್​ ಮತ್ತು 2025ರಲ್ಲಿ ಭಾರತದ ಆತಿಥ್ಯದಲ್ಲೇ ನಡೆಯಲಿರುವ ಏಕದಿನ ವಿಶ್ವಕಪ್​ ಟೂರ್ನಿ ಮುಜುಮ್ದಾರ್​ ಮುಂದಿರುವ ಎರಡು ಪ್ರಮುಖ ಸವಾಲುಗಳಾಗಿವೆ.

ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ 171 ಪಂದ್ಯಗಳಲ್ಲಿ 30 ಶತಕಗಳ ಸಹಿತ 11 ಸಾವಿರಕ್ಕೂ ಅಧಿಕ ರನ್​ ಬಾರಿಸಿರುವ ಮುಜುಮ್ದಾರ್​, 100 ಲಿಸ್ಟ್​ ಎ ಏಕದಿನ ಪಂದ್ಯಗಳಲ್ಲೂ ಆಡಿದ ಅನುಭವ ಹೊಂದಿದ್ದಾರೆ. 21 ವರ್ಷಗಳ ಕಾಲ ದೇಶೀಯ ಕ್ರಿಕೆಟ್​ನಲ್ಲಿ ಆಡಿರುವ ಅವರು, ಮುಂಬೈ ಪರ ಹಲವು ಬಾರಿ ರಣಜಿ ಟ್ರೋಫಿ ಪ್ರಶಸ್ತಿ ಗೆಲುವು ಕಂಡಿದ್ದಾರೆ. ದಿಗ್ಗಜ ಸಚಿನ್​ ತೆಂಡುಲ್ಕರ್​ರ ಬಾಲ್ಯದ ಗುರು ರಮಾಕಾಂತ್​ ಆಚ್ರೇಕರ್​, ಮುಜುಮ್ದಾರ್​ಗೂ ಕೋಚ್​ ಆಗಿದ್ದರು. ಮುಜುಮ್ದಾರ್​ ಐಪಿಎಲ್​ನಲ್ಲಿ ರಾಜಸ್ಥಾನ ರಾಯಲ್ಸ್​ ಮತ್ತು ಭಾರತ ಪ್ರವಾಸದ ವೇಳೆ ದಕ್ಷಿಣ ಆಫ್ರಿಕಾ ತಂಡಕ್ಕೂ ಬ್ಯಾಟಿಂಗ್​ ಕೋಚ್​ ಆಗಿ ಕಾರ್ಯನಿರ್ವಹಿಸಿದ್ದಾರೆ.

*ಭಾರತೀಯ ಮಹಿಳಾ ತಂಡದ ಮುಖ್ಯ ಕೋಚ್​ ಆಗಿ ನೇಮಕಗೊಂಡಿರುವುದು ನನಗೆ ಗೌರವವೆನಿಸಿದೆ. ಸಿಎಸಿ ಮತ್ತು ಬಿಸಿಸಿಐ ನನ್ನ ಮೇಲೆ ನಂಬಿಕೆ ಇಟ್ಟಿದೆ ಮತ್ತು ಭಾರತ ತಂಡದ ಭವಿಷ್ಯದ ಬಗೆಗಿನ ನನ್ನ ರೂಪುರೇಷೆಗೂ ಮನ್ನಣೆ ನೀಡಿದಂತಾಗಿದೆ. ಇದೊಂದು ದೊಡ್ಡ ಜವಾಬ್ದಾರಿ. ಪ್ರತಿಭಾನ್ವಿತ ಆಟಗಾರ್ತಿಯರೊಂದಿಗೆ ಕಾರ್ಯನಿರ್ವಹಿಸುವುದನ್ನು ನಾನೀಗ ಎದುರು ನೋಡುತ್ತಿರುವೆ.

| ಅಮೋಲ್​ ಮುಜುಮ್ದಾರ್​

https://www.vijayavani.net/champion-england-wordl-cup-semifinal-root