ಬೆಂಗಳೂರು: ಹಾಲಿ ಚಾಂಪಿಯನ್ ಆಗಿ ಅಭಿಯಾನ ಆರಂಭಿಸಿರುವ ಇಂಗ್ಲೆಂಡ್ ತಂಡ ಆಡಿದ ಮೊದಲ 4 ಪಂದ್ಯಗಳಲ್ಲಿ 3ರಲ್ಲಿ ಸೋತು ತೀವ್ರ ಇಕ್ಕಟ್ಟಿಗೆ ಸಿಲುಕಿದೆ. ಕೇವಲ ಒಂದು ಪಂದ್ಯದಲ್ಲಷ್ಟೇ (ಬಾಂಗ್ಲಾ ವಿರುದ್ಧ) ಗೆದ್ದಿರುವ ಜೋಸ್ ಬಟ್ಲರ್ ಬಳಗ, ನ್ಯೂಜಿಲೆಂಡ್, ಅಫ್ಘಾನಿಸ್ತಾನ ಮತ್ತು ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯಗಳಲ್ಲಿ ಭಾರಿ ಅಂತರದಿಂದ ಸೋತಿದೆ. ಇದರಿಂದ ಆಂಗ್ಲರ ರನ್ರೇಟ್ (-1.250) ಕೂಡ ಭಾರಿ ಕುಸಿತ ಕಂಡಿದ್ದು, ಸದ್ಯ ಅಂಕಪಟ್ಟಿಯಲ್ಲಿ 9ನೇ ಸ್ಥಾನದಲ್ಲಿದೆ. ಕಳೆದ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ದಾಖಲೆಯ 229 ರನ್ಗಳಿಂದ ಸೋತಿದ್ದ ಇಂಗ್ಲೆಂಡ್, ಇನ್ನೂ 2 ರನ್ ಹೆಚ್ಚು ಅಂತರದಿಂದ ಸೋತಿದ್ದರೆ ಈಗ ಅಂಕಪಟ್ಟಿಯಲ್ಲಿ ಕೊನೇ ಸ್ಥಾನದಲ್ಲಿರುತ್ತಿತ್ತು!
ಸೆಮೀಸ್ ಹಾದಿ ಹೀಗಿದೆ: ಇಂಗ್ಲೆಂಡ್ ತಂಡಕ್ಕೆ ಇನ್ನು ವಿಶ್ವಕಪ್ ಲೀಗ್ ಹಂತದಲ್ಲಿ 5 ಪಂದ್ಯಗಳು ಬಾಕಿ ಉಳಿದಿದ್ದು, ಪ್ರಶಸ್ತಿ ಉಳಿಸಿಕೊಳ್ಳುವ ಆಸೆಯನ್ನು ಜೀವಂತ ಇಟ್ಟುಕೊಳ್ಳಬೇಕಾದರೆ ಇನ್ನು ಪ್ರತಿ ಪಂದ್ಯವನ್ನೂ ಗೆಲ್ಲಬೇಕಾಗುತ್ತದೆ. ಸದ್ಯ ಇಂಗ್ಲೆಂಡ್ಗೆ ಗರಿಷ್ಠ 12 ಅಂಕ ಕಲೆಹಾಕುವ ಅವಕಾಶವಿದ್ದು, ಇದರಿಂದ 3 ಅಥವಾ 4ನೇ ಸ್ಥಾನದೊಂದಿಗೆ ಸೆಮಿಫೈನಲ್ಗೇರಬಹುದಾಗಿದೆ. ಆದರೆ ಇದೇ ವೇಳೆ ಅದರ ರನ್ರೇಟ್ ಕೂಡ ಭಾರಿ ಸುಧಾರಣೆ ಕಾಣಬೇಕಾದ ಅಗತ್ಯವಿದೆ.
ಆಂಗ್ಲರ ಮುಂದಿನ 5 ಎದುರಾಳಿಗಳೆಂದರೆ ಶ್ರೀಲಂಕಾ (ಅ.26, ಬೆಂಗಳೂರು), ಭಾರತ (ಅ.29, ಲಖನೌ), ಆಸ್ಟ್ರೆಲಿಯಾ (ನ.4, ಅಹಮದಾಬಾದ್), ನೆದರ್ಲೆಂಡ್ (ನ. 8, ಪುಣೆ), ಪಾಕಿಸ್ತಾನ (ನ. 11, ಕೋಲ್ಕತ). ಈ ಐದು ಪಂದ್ಯಗಳೂ ಇಂಗ್ಲೆಂಡ್ಗೆ “ಕ್ವಾರ್ಟರ್ಫೈನಲ್’ ಆಗಿದ್ದು, ಇದರಲ್ಲಿ ಒಂದರಲ್ಲಿ ಸೋತರೂ ಹೊಸ ಚಾಂಪಿಯನ್ಗೆ ದಾರಿ ಬಿಟ್ಟುಕೊಡಬೇಕಾಗುತ್ತದೆ.
*ನಮಗಿನ್ನು ಸೆಮಿಫೈನಲ್ಗೇರುವುದು ಬಹಳ ಕಠಿಣವಾಗಿದೆ. ಆದರೆ ನಾವು ನಂಬಿಕೆ ಕಳೆದುಕೊಳ್ಳುವುದಿಲ್ಲ. ಟೂರ್ನಿಯಲ್ಲಿ ಇನ್ನು ನಾವು ಯಾವುದೇ ತಪ್ಪು ಮಾಡಲು ಅವಕಾಶವಿಲ್ಲ. ಈ ಪರಿಸ್ಥಿತಿಯಿಂದ ಹೊರಬರಲು ಸೂಕ್ತ ಯೋಜನೆ ರೂಪಿಸುತ್ತೇವೆ.
| ಜೋಸ್ ಬಟ್ಲರ್, ಇಂಗ್ಲೆಂಡ್ ನಾಯಕ
ಟಾಪ್ಲೆ ಔಟ್, ಆರ್ಚರ್ ಇನ್?
ಮೊದಲ 4 ಪಂದ್ಯಗಳಲ್ಲಿ ಇಂಗ್ಲೆಂಡ್ ಪರ ಗರಿಷ್ಠ 8 ವಿಕೆಟ್ ಕಬಳಿಸಿದ ಬೌಲರ್ ಎನಿಸಿರುವ ವೇಗಿ ರೀಸ್ ಟಾಪ್ಲೆ, ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯದ ವೇಳೆ ಕೈಬೆರಳು ಮುರಿತಕ್ಕೆ ಒಳಗಾಗಿದ್ದು ವಿಶ್ವಕಪ್ನಿಂದ ಹೊರಬಿದ್ದಿದ್ದಾರೆ. ಅವರ ಸ್ಥಾನಕ್ಕೆ ಪ್ರಮುಖ ವೇಗಿ ಜೋಫ್ರಾ ಆರ್ಚರ್ರನ್ನು ತಂಡಕ್ಕೆ ಸೇರ್ಪಡೆಗೊಳಿಸುವ ಬಗ್ಗೆ ಇಂಗ್ಲೆಂಡ್ ಚಿಂತನೆ ನಡೆಸಿದೆ. ಫಿಟ್ನೆಸ್ ಸಮಸ್ಯೆಯಿಂದಾಗಿ ಆರ್ಚರ್ ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆದಿರಲಿಲ್ಲ. ಆದರೆ ಇದೀಗ ಬಹುತೇಕ ಫಿಟ್ ಆಗಿರುವ ಆರ್ಚರ್ ಕಳೆದ ವಾರ ಮುಂಬೈನಲ್ಲಿ ತಂಡವನ್ನು ಕೂಡಿಕೊಂಡಿದ್ದಾರೆ. ಮತ್ತೊಂದೆಡೆ ಆಲ್ರೌಂಡರ್ ಲಿಯಾಮ್ ಡಾಸನ್, ಬ್ಯಾಟರ್ ಜೇಸನ್ ರಾಯ್, ಬೆನ್ ಡಕೆಟ್ ಕೂಡ ಟಾಪ್ಲೆ ಸ್ಥಾನ ತುಂಬುವ ರೇಸ್ನಲ್ಲಿದ್ದಾರೆ ಎನ್ನಲಾಗಿದೆ.
VIDEO| ಸಿಂಧುಗೆ ಮತ್ತೆ ಸೆಮೀಸ್ನಲ್ಲಿ ಶಾಕ್; ಮರಿನ್ ಜತೆ ಮಾತಿನ ಚಕಮಕಿಗೆ ಹಳದಿ ಕಾರ್ಡ್!