ಫ್ರಾನ್ಸ್​​ನಲ್ಲಿ ಫೇಕ್​ ಕ್ರಿಕೆಟ್ ಹಗರಣ​! ಪಂದ್ಯ ಆಡದಿದ್ದರೂ ಸ್ಕೋರ್​ಕಾರ್ಡ್​ ಪ್ರಕಟ! ಐಸಿಸಿಯಿಂದ ತನಿಖೆ

ಬೆಂಗಳೂರು: ಕ್ರಿಕೆಟ್​ ಆಟವನ್ನು 2028ರ ಲಾಸ್​ ಏಂಜಲಿಸ್​ ಒಲಿಂಪಿಕ್ಸ್​ಗೆ ಸೇರ್ಪಡೆಗೊಳಿಸಿದ ಬಳಿಕ ವಿಶ್ವದೆಲ್ಲೆಡೆ ಈ ಕ್ರೀಡೆ ಹರಡಲಾರಂಭಿಸಿದೆ. ಇದರ ನಡುವೆ ಮೋಸದಾಟವೂ ಹೆಚ್ಚಾದಂತಿದೆ! ಹೌದು, ಫ್ರಾನ್ಸ್​ನಲ್ಲಿ ಕ್ರಿಕೆಟ್​ ಪಂದ್ಯಗಳು ನಡೆದಿರುವ ಫ್ರಾನ್ಸ್​ ಕ್ರಿಕೆಟ್​ ಮಂಡಳಿ (ಎಫ್​​ಸಿ) ತನ್ನ ವೆಬ್​ಸೈಟ್​ಗಳಲ್ಲಿ ಸ್ಕೋರ್​ಕಾರ್ಡ್​ಗಳನ್ನು ಪ್ರಕಟಿಸುತ್ತಿದೆ. ಆದರೆ ವಾಸ್ತವವಾಗಿ ಅಲ್ಲಿ ಆ ಕ್ರಿಕೆಟ್​ ಪಂದ್ಯಗಳೇ ನಡೆದಿಲ್ಲ! ಹಾಗಾದರೆ ಸ್ಕೋರ್​ಕಾರ್ಡ್​ ಸಿದ್ಧವಾಗಿದೆ. ಇದುವೇ ಫೇಕ್​ ಕ್ರಿಕೆಟ್​!

ಈ ರೀತಿಯ ನಕಲಿ ಕ್ರಿಕೆಟ್​ಗೆ ಕಾರಣ, ಕ್ರಿಕೆಟ್​ ಅಭಿವೃತ್ತಿಗಾಗಿ ಐಸಿಸಿಯಿಂದ ಸಿಗುವ ಅನುದಾನ. ಐಸಿಸಿಯಿಂದ ಹಣವನ್ನು ಪಡೆದುಕೊಳ್ಳುವುದಕ್ಕಾಗಿ ಈ ರೀತಿ, ಪಂದ್ಯಗಳು ನಡೆಯದಿದ್ದರೂ, ಅದರ ಸ್ಕೋರ್​ಕಾರ್ಡ್​ಗಳನ್ನು ನಕಲಿಯಾಗಿ ಸಿದ್ಧಪಡಿಸಲಾಗುತ್ತಿದೆ. ಹೀಗೆಂದು ಫ್ರಾನ್ಸ್​ ಕ್ರಿಕೆಟ್​ ಮಂಡಳಿ ವಿರುದ್ಧ ದೂರುಗಳು ಕೇಳಬಂದ ಬೆನ್ನಲ್ಲೇ ಐಸಿಸಿ ಈ ಪ್ರಕರಣದ ತನಿಖೆಗೆ ಮುಂದಾಗಿದೆ.

ಫ್ರಾನ್ಸ್​ನ ಮಾಜಿ ಮಹಿಳಾ ಕ್ರಿಕೆಟರ್​ ಹಾಗೂ ಕ್ರಿಕೆಟ್​ ಮಂಡಳಿ ಸದಸ್ಯೆ ಟ್ರಾಸಿ ರೋಡ್ರಿಗಸ್​, ಫ್ರಾನ್ಸ್​24 ವಾಹಿನಿಯಲ್ಲಿ ಇಂಥದ್ದೊಂದು ಆರೋಪವನ್ನು ಮಾಡಿದ್ದಾರೆ. ಮಂಡಳಿ ವತಿಯಿಂದ ಕ್ರಿಕೆಟ್​ ಪಂದ್ಯಗಳು ನಡೆಯುತ್ತಿವೆ ಎಂದು ಹೇಳಲಾದ ಪ್ಯಾರಿಸ್​ ಮೈದಾನಕ್ಕೆ ಅವರು ಹೋದಾಗ ಅಲ್ಲಿ ಯಾವುದೇ ಪಂದ್ಯಗಳು ನಡೆಯುತ್ತಿರಲಿಲ್ಲವಂತೆ! ಆದರೆ, ಕೆಲದಿನಗಳ ಬಳಿಕ ಅದೇ ಮೈದಾನದಲ್ಲಿ ಪಂದ್ಯಗಳು ನಡೆದಿರುವ ಬಗ್ಗೆ ಆನ್​ಲೈನ್​ನಲ್ಲಿ ಸ್ಕೋರ್​ಕಾರ್ಡ್​ಗಳು ಪ್ರಕಟಗೊಂಡಿದ್ದವಂತೆ!

ಫ್ರಾನ್ಸ್​ ಕ್ರಿಕೆಟ್​ ಮಂಡಳಿ ಐಸಿಸಿಯ ಅಸೋಸಿಯೇಟ್​ ಸದಸ್ಯನಾಗಿದ್ದು, ಮಹಿಳಾ ಮತ್ತು ಜೂನಿಯರ್​ ಕ್ರಿಕೆಟ್​ ಅಭಿವೃದ್ಧಿಗಾಗಿ ಅನುದಾನವನ್ನೂ ಪಡೆದುಕೊಳ್ಳುತ್ತದೆ. 2022ರಲ್ಲಿ ಫ್ರಾನ್ಸ್​ ಕ್ರಿಕೆಟ್​ ಅಭಿವೃದ್ಧಿಗಾಗಿ ಐಸಿಸಿ, 3.20 ಲಕ್ಷ ಡಾಲರ್​ ಅಂದರೆ 2.66 ಕೋಟಿ ರೂ. ಅನುದಾನ ನೀಡಿತ್ತು. ಹೀಗಾಗಿ ಐಸಿಸಿ ಈ ಆರೋಪವನ್ನು ಗಂಭೀರವಾಗಿ ಪರಿಗಣಿಸಿದ್ದು, ತನಿಖೆ ನಡೆಸಲು ಮುಂದಾಗಿದೆ.

https://www.vijayavani.net/gill-and-siraj-attain-top-spots-in-icc-odi-rankings