2ನೇ ಟೆಸ್ಟ್​ ಪಂದ್ಯದಲ್ಲಿ ಸೋಲು ಕಂಡ ವೆಸ್ಟ್​ ಇಂಡೀಸ್​, ಸರಣಿ ಸಮಬಲ ಸಾಧಿಸಿದ ಇಂಗ್ಲೆಂಡ್​

ಮ್ಯಾಂಚೆಸ್ಟರ್: ಆತಿಥೇಯ ಇಂಗ್ಲೆಂಡ್ ತಂಡ ವಿಸ್ಡನ್ ಟ್ರೋಫಿಯ 2ನೇ ಟೆಸ್ಟ್ ಪಂದ್ಯದಲ್ಲಿ ಪ್ರವಾಸಿ ವೆಸ್ಟ್ ಇಂಡೀಸ್ ತಂಡವನ್ನು 113 ರನ್​ಗಳಿಂದ ಮಣಿಸಿದೆ. 312 ರನ್​ಗಳ ಸವಾಲೊಡ್ಡಿದ ಇಂಗ್ಲೆಂಡ್​ ತಂಡ, ವೆಸ್ಟ್​ ಇಂಡೀಸ್​ ತಂಡವನ್ನು 2ನೇ ಇನಿಂಗ್ಸ್​ನಲ್ಲಿ 70.1 ಓವರ್​ಗಳಲ್ಲಿ 198 ರನ್​ಗಳಿಗೆ ನಿಯಂತ್ರಿಸಿತು. ಈ ಮೂಲಕ 3 ಪಂದ್ಯಗಳ ಸರಣಿಯಲ್ಲಿ ಇಂಗ್ಲೆಂಡ್​ 1-1 ಸಮಬಲ ಸಾಧಿಸಿದೆ. ಸರಣಿಯ ನಿರ್ಣಾಯಕ ಟೆಸ್ಟ್​ ಶುಕ್ರವಾರದಿಂದ ಓಲ್ಡ್​ ಟ್ರಾಫೋರ್ಡ್​ ಮೈದಾನದಲ್ಲೇ ನಡೆಯಲಿದೆ.

ಸೋಮವಾರ 2 ವಿಕೆಟ್‌ಗೆ 37 ರನ್‌ಗಳಿಂದ 2ನೇ ಇನಿಂಗ್ಸ್ ಮುಂದುವರಿಸಿದ ಇಂಗ್ಲೆಂಡ್ ತಂಡ 3 ವಿಕೆಟ್‌ಗೆ 129 ರನ್ ಗಳಿಸಿ ಡಿಕ್ಲೇರ್ ಮಾಡಿಕೊಂಡಿತು. ಆರಂಭಿಕರಾಗಿ ಕಣಕ್ಕಿಳಿದ ಬೆನ್ ಸ್ಟೋಕ್ಸ್ ಬಿರುಸಿನ ಅಜೇಯ 78 ರನ್ (57 ಎಸೆತ, 4 ಬೌಂಡರಿ, 3 ಸಿಕ್ಸರ್) ಸಿಡಿಸಿದರು. ಅವರಿಗೆ ನಾಯಕ ಜೋ ರೂಟ್ (22) ಮತ್ತು ಒಲಿವರ್ ಪೋಪ್ (12*) ಸೂಕ್ತ ಬೆಂಬಲ ಒದಗಿಸಿದರು. ಸ್ಟೋಕ್ಸ್ 36 ಎಸೆತಗಳಲ್ಲೇ ಅರ್ಧಶತಕ ಪೂರೈಸಿದರು. ಇದು ಟೆಸ್ಟ್ ಕ್ರಿಕೆಟ್‌ನಲ್ಲಿ ಇಂಗ್ಲೆಂಡ್ ಆರಂಭಿಕನ ಅತಿವೇಗದ ಅರ್ಧಶತಕವಾಗಿದೆ.

ವೆಸ್ಟ್​ ಇಂಡೀಸ್​ ತಂಡ 2ನೇ ಇನಿಂಗ್ಸ್​ನ ಮೊದಲ ಓವರ್​ನಲ್ಲೇ ಆರಂಭಿಕ ಜಾನ್​ ಕ್ಯಾಂಪ್​ಬೆಲ್ (4)​ ವಿಕೆಟ್​ ಕಳೆದುಕೊಂಡು ಆಘಾತ ಎದುರಿಸಿದೆ. ಸ್ಟುವರ್ಟ್​ ಬ್ರಾಡ್​ ಎಸೆತದಲ್ಲಿ ಕೀಪರ್​ ಬಟ್ಲರ್​ಗೆ ಕ್ಯಾಚ್​ ನೀಡಿ ಅವರು ನಿರ್ಗಮಿಸಿದರು. ಬಳಿಕ ಕ್ರೇಗ್​ ಬ್ರಾಥ್​ವೇಟ್​ (12) ವೋಕ್ಸ್​ಗೆ ವಿಕೆಟ್​ ಒಪ್ಪಿಸಿದರೆ, ಶೈ ಹೋಪ್ (7) ಬ್ರಾಡ್​ ಎಸೆತದಲ್ಲಿ ಬೌಲ್ಡ್​ ಆದರು. ಬಳಿಕ ಶಮರಾಹ್​ ಬ್ರೂಕ್ಸ್ (62) ಮತ್ತು ಕಳೆದ ಪಂದ್ಯದ ಹೀರೋ ಜರ್ಮೈನ್​ ಬ್ಲ್ಯಾಕ್​ವುಡ್ (55) ಕೆಲಕಾಲ ಪ್ರತಿರೋಧ ಒಡ್ಡಿದರು. ಬ್ಲ್ಯಾಕ್​ವುಡ್​ ವಿಕೆಟ್​ ಕಬಳಿಸಿದ ಸ್ಟೋಕ್ಸ್​ ಆಂಗ್ಲರ ಗೆಲುವಿನ ಆಸೆಗೆ ಬಲ ತುಂಬಿದರು. ಬ್ರೂಕ್ಸ್ ಕೂಡ ನಿರ್ಗಮಿಸಿದ ಬಳಿಕ ಕೊನೆಯಲ್ಲಿ ನಾಯಕ ಜೇಸನ್​ ಹೋಲ್ಡರ್​ (35) ತಂಡದ ಸೋಲಿನ ಅಂತರ ತಗ್ಗಿಸಲು ಹೋರಾಡಿದರು. ಕೊನೆಯಲ್ಲಿ ಕೇಮಾರ್​ ರೋಚ್​ (5) ವಿಕೆಟ್​ ಕಬಳಿಸುವ ಮೂಲಕ ಸ್ಪಿನ್ನರ್​ ಡೊಮಿನಿಕ್ ಬೆಸ್​ ಇಂಗ್ಲೆಂಡ್​ ತಂಡದ ಗೆಲುವನ್ನು ಸಾರಿದರು. ಕರೊನಾ ಹಾವಳಿಯ ನಡುವೆ ಕ್ರಿಕೆಟ್​ ಪುನರಾರಂಭಗೊಂಡ ಬಳಿಕ ಮೊದಲ ಟೆಸ್ಟ್​ನಲ್ಲಿ ಗೆಲುವು ದಾಖಲಿಸಿದ್ದ ವಿಂಡೀಸ್​ ತಂಡ 2ನೇ ಟೆಸ್ಟ್​ನಲ್ಲಿ ನೀರಸ ನಿರ್ವಹಣೆ ತೋರಿತು. ಪಂದ್ಯದ 3ನೇ ದಿನದಾಟ ಮಳೆಯಿಂದಾಗಿ ಸಂಪೂರ್ಣವಾಗಿ ರದ್ದುಗೊಂಡ ನಡುವೆಯೂ ಇಂಗ್ಲೆಂಡ್​ ಗೆಲುವು ದಾಖಲಿಸಿದ್ದು ಗಮನಾರ್ಹ.

ಇದನ್ನೂ ಓದಿ: VIDEO: ಕರೊನಾದಿಂದ ಗುಣಮುಖರಾದ ಜೋಕೊವಿಕ್, ಅಭ್ಯಾಸಕ್ಕೆ ವಾಪಸ್

ಇಂಗ್ಲೆಂಡ್: 9 ವಿಕೆಟ್‌ಗೆ 469 ಡಿಕ್ಲೇರ್ ಮತ್ತು 19 ಓವರ್‌ಗಳಲ್ಲಿ 3 ವಿಕೆಟ್‌ಗೆ 129 ಡಿಕ್ಲೇರ್ (ಸ್ಟೋಕ್ಸ್ 78*, ಕ್ರೌಲಿ 11, ರೂಟ್ 22, ಒಲಿವರ್ ಪೋಪ್ 12*, ರೋಚ್ 37ಕ್ಕೆ 2), ವೆಸ್ಟ್ ಇಂಡೀಸ್: 287 ಮತ್ತು 70.1 ಓವರ್​ಗಳಲ್ಲಿ 198 (ಜಾನ್​ ಕ್ಯಾಂಪ್​ಬೆಲ್​ 4, ಬ್ರಾಥ್​ವೇಟ್​ 12, ಶೈ ಹೋಪ್​ 7, ಬ್ರೂಕ್ಸ್​ 62, ಬ್ಲ್ಯಾಕ್​ವುಡ್​ 55, ಹೋಲ್ಡರ್ 35, ಬ್ರಾಡ್​ 42ಕ್ಕೆ 3, ವೋಕ್ಸ್​ 34ಕ್ಕೆ 2, ಕರ್ರನ್​ 30ಕ್ಕೆ 1, ಬೆಸ್​ 59ಕ್ಕೆ 2, ಸ್ಟೋಕ್ಸ್​ 30ಕ್ಕೆ 2).

https://www.vijayavani.net/wwe-jon-cena-share-aishwaraya-rai-photo-in-his-instragram-post/