ಲೋಕಸಭಾ ಚುನಾವಣೆಯಿಂದಾಗಿ ಉತ್ತರ ಪ್ರದೇಶ, ಬಂಗಾಳದಲ್ಲಿ ಐಪಿಎಲ್​ ಪಂದ್ಯಗಳ ಆಯೋಜನೆಗೆ ಕಠಿಣ ಸವಾಲು!

ನವದೆಹಲಿ: ಬಿಸಿಸಿಐಗೆ ಲೋಕಸಭಾ ಚುನಾವಣೆಯ ನಡುವೆ ಲಖನೌದಲ್ಲಿ ಲಖನೌ ಸೂಪರ್​ಜೈಂಟ್ಸ್​ ಮತ್ತು ಕೋಲ್ಕತದಲ್ಲಿ ಕೋಲ್ಕತ ನೈಟ್​ರೈಡರ್ಸ್​ ತಂಡಗಳ ಪಂದ್ಯಗಳನ್ನು ಆಯೋಜಿಸುವುದು ಕಠಿಣ ಸವಾಲೆನಿಸಿದೆ. ಯಾಕೆಂದರೆ ಉತ್ತರ ಪ್ರದೇಶ ಮತ್ತು ಪಶ್ಚಿಮ ಬಂಗಾಳದಲ್ಲಿ ಎಲ್ಲ 7 ಹಂತಗಳಲ್ಲೂ (ಏಪಿಲ್​ 19, 26, ಮೇ 7, 13, 20, 25, ಜೂನ್​ 1) ಮತದಾನ ನಡೆಯಲಿದೆ. ಈ ದಿನಾಂಕಗಳ ಜತೆ ಸಂರ್ಷ ಏರ್ಪಡದಂತೆ ಬಿಸಿಸಿಐ, ಲಖನೌ&ಕೋಲ್ಕತದಲ್ಲಿ ಪಂದ್ಯಗಳನ್ನು ನಿಗದಿಪಡಿಸಬೇಕಿದೆ.

ಇನ್ನು ಮುಂಬೈ ಇಂಡಿಯನ್ಸ್​ ಪಂದ್ಯ ನಡೆಯಲಿರುವ ಮಹಾರಾಷ್ಟ್ರದಲ್ಲಿ (ಮುಂಬೈ) 5 ಹಂತಗಳಲ್ಲಿ (ಏಪ್ರಿಲ್​ 19, 26, ಮೇ 7, 13, 20) ಮತದಾನ ನಡೆಯಲಿದೆ. ಆರ್​ಸಿಬಿ ಪಂದ್ಯ ನಡೆಯುವ ಕರ್ನಾಟಕದಲ್ಲಿ (ಬೆಂಗಳೂರು) ಮತ್ತು ರಾಜಸ್ಥಾನ ರಾಯಲ್ಸ್​ನ ಪಂದ್ಯ ನಡೆಯಲಿರುವ ರಾಜಸ್ಥಾನದಲ್ಲಿ (ಜೈಪುರ) 2 ಹಂತಗಳಲ್ಲಿ ಮತದಾನ ನಡೆಯಲಿದೆ. ಕರ್ನಾಟಕದಲ್ಲಿ ಏಪ್ರಿಲ್​ 26, ಮೇ 7ರಂದು ಮತದಾನ ನಡೆದರೆ, ರಾಜಸ್ಥಾನದಲ್ಲಿ ಏಪ್ರಿಲ್​ 19, 26ರಂದು ನಡೆಯಲಿದೆ.

ಇನ್ನು ಚೆನ್ನೈ ಸೂಪರ್​ಕಿಂಗ್ಸ್​ (ತಮಿಳುನಾಡು-ಚೆನ್ನೈ), ಗುಜರಾತ್​ ಟೈಟಾನ್ಸ್​ (ಗುಜರಾತ್​-ಅಹಮದಾಬಾದ್​), ಡೆಲ್ಲಿ ಕ್ಯಾಪಿಟಲ್ಸ್​ (ದೆಹಲಿ), ಪಂಜಾಬ್​ ಕಿಂಗ್ಸ್​ (ಪಂಜಾಬ್​-ಮೊಹಾಲಿ) ಮತ್ತು ಸನ್​ರೈಸರ್ಸ್​ ಹೈದರಾಬಾದ್​ (ತೆಲಂಗಾಣ-ಆಂಧ್ರ) ತಂಡಗಳ ಪಂದ್ಯ ಆಯೋಜನೆ ಕಠಿಣವಲ್ಲ. ಯಾಕೆಂದರೆ ಈ ರಾಜ್ಯಗಳಲ್ಲಿ ಏಪ್ರಿಲ್​ 19ರಂದು ಒಂದೇ ಹಂತದಲ್ಲಿ ಮತದಾನ ಪ್ರಕ್ರಿಯೆ ಮುಗಿದುಹೋಗಲಿದೆ.

ಮುಂದಿನ ವಾರ ಎರಡನೇ ಚರಣದ ವೇಳಾಪಟ್ಟಿ ಪ್ರಕಟ?

ಏಪ್ರಿಲ್​ 8ರಿಂದ ನಡೆಯಲಿರುವ ಐಪಿಎಲ್​ 2ನೇ ಚರಣದ ಉಳಿದ 53 ಪಂದ್ಯಗಳ ವೇಳಾಪಟ್ಟಿ ಮುಂದಿನ ವಾರ ಪ್ರಕಟಗೊಳ್ಳುವ ನಿರೀಕ್ಷೆ ಇದೆ. ಮೇ 26ರಂದು ಫೈನಲ್​ ಪಂದ್ಯ ನಿಗದಿಯಾಗುವ ನಿರೀಕ್ಷೆ ಇದೆ. ಇದರಿಂದ ಈ ಸಲವೂ ಲೋಕಸಭಾ ಚುನಾವಣಾ ಫಲಿತಾಂಶ ಪ್ರಕಟಕ್ಕೆ (ಜೂನ್​ 4) ಮುನ್ನವೇ ಐಪಿಎಲ್​ ಮುಗಿಯಲಿದೆ. 2019ರಲ್ಲೂ ಲೋಕಸಭಾ ಚುನಾವಣಾ ಫಲಿತಾಂಶ (ಮೇ 19) ಪ್ರಕಟಕ್ಕೆ ಮುನ್ನವೇ ಐಪಿಎಲ್​ (ಮೇ 12) ಮುಕ್ತಾಯ ಕಂಡಿತ್ತು. ಆಗ ಐಪಿಎಲ್​ ಮಾರ್ಚ್​ 23ಕ್ಕೆ ಶುರುವಾಗಿದ್ದರೆ, ಮೊದಲ ಹಂತದ ಮತದಾನ ಏಪ್ರಿಲ್​ 11ಕ್ಕೆ ನಡೆದಿತ್ತು. ಈ ಬಾರಿ ಮೊದಲ ಹಂತದ ಚುನಾವಣೆ ಏಪ್ರಿಲ್​ 19ಕ್ಕೆ ನಿಗದಿಯಾಗಿದೆ.

https://www.vijayavani.net/ticket-sales-for-rcb-home-matches-have-started-fans-who-are-tired-of-the-expensive-price