ದಕ್ಷಿಣ ಆಫ್ರಿಕಾದಲ್ಲಿ ಏಕದಿನ ಸರಣಿಗೆ ಕೋಚಿಂಗ್​ ನೀಡಲ್ಲ ದ್ರಾವಿಡ್​! ಹೀಗಿದೆ ಕಾರಣ...

ಜೊಹಾನ್ಸ್​​ಬರ್ಗ್​: ದಕ್ಷಿಣ ಆಫ್ರಿಕಾ ವಿರುದ್ಧ ಡಿಸೆಂಬರ್​ 26ರಿಂದ ನಡೆಯಲಿರುವ ಟೆಸ್ಟ್​ ಸರಣಿಯ ಸಿದ್ಧತೆಯತ್ತ ಗಮನ ಹರಿಸಿರುವ ಮುಖ್ಯ ಕೋಚ್​ ರಾಹುಲ್​ ದ್ರಾವಿಡ್​ ಭಾನುವಾರ ಆರಂಭವಾಗಲಿರುವ ಏಕದಿನ ಸರಣಿಯ ವೇಳೆ ಭಾರತ ತಂಡಕ್ಕೆ ತರಬೇತಿ ನೀಡಲು ಅಲಭ್ಯರಾಗಿದ್ದಾರೆ. ಬ್ಯಾಟಿಂಗ್​ ಕೋಚ್​ ವಿಕ್ರಮ್​ ರಾಥೋಡ್​, ಬೌಲಿಂಗ್​ ಕೋಚ್​ ಪರಾಸ್​ ಮಹಾಂಬ್ರೆ ಮತ್ತು ಫೀಲ್ಡಿಂಗ್​ ಕೋಚ್​ ಟಿ. ದಿಲೀಪ್​ ಕೂಡ ಟೆಸ್ಟ್​ ತಂಡಕ್ಕೆ ಮಾತ್ರ ಆಯ್ಕೆಯಾಗಿರುವ ಪ್ರಮುಖ ಆಟಗಾರರ ಸಿದ್ಧತೆಗೆ ಸಹಕರಿಸಲಿದ್ದಾರೆ. ಇವರ ಗೈರಿನಲ್ಲಿ ಭಾರತ ಎ ತಂಡದ ಬ್ಯಾಟಿಂಗ್​ ಕೋಚ್​ ಸಿತಾಂಶು ಕೋಟಕ್​, ಬೌಲಿಂಗ್​ ರಜಿಬ್​ ದತ್ತ ಮತ್ತು ಫೀಲ್ಡಿಂಗ್​ ಕೋಚ್​ ಅಜಯ್​ ರಾತ್ರಾ ಏಕದಿನ ಸರಣಿಯ ವೇಳೆ ಕೆಎಲ್​ ರಾಹುಲ್​ ಬಳಗದ ಮೇಲ್ವಿಚಾರಣೆ ವಹಿಸಿಕೊಳ್ಳಲಿದ್ದಾರೆ.

ಟೆಸ್ಟ್​ಗೆ ಶಮಿ, ಏಕದಿನಕ್ಕೆ ದೀಪಕ್​ ಅಲಭ್ಯ

ಏಕದಿನ ವಿಶ್ವಕಪ್​ನಲ್ಲಿ ಗರಿಷ್ಠ ವಿಕೆಟ್​ ಕಬಳಿಸಿ ಮಿಂಚಿದ್ದ ವೇಗಿ ಮೊಹಮದ್​ ಶಮಿ ಮೊಣಕಾಲು ಗಾಯದಿಂದ ಸಂಪೂರ್ಣ ಚೇತರಿಕೆ ಕಾಣದ ಹಿನ್ನೆಲೆಯಲ್ಲಿ ದಕ್ಷಿಣ ಆಫ್ರಿಕಾ ಪ್ರವಾಸದ ಟೆಸ್ಟ್​ ಸರಣಿಯಿಂದ ಹೊರಗುಳಿಯಲಿದ್ದಾರೆ. ಬಿಸಿಸಿಐ ವೈದ್ಯಕಿಯ ತಂಡ ಹಸಿರು ನಿಶಾನೆ ತೋರಿಸದ ಕಾರಣ ಶಮಿ ದಣ ಆಫ್ರಿಕಾಕ್ಕೆ ವಿಮಾನ ಏರಿಲ್ಲ. ಇದೇ ವೇಳೆ ತಂದೆಯ ಅನಾರೋಗ್ಯದಿಂದಾಗಿ ದಕ್ಷಿಣ ಆಫ್ರಿಕಾ ಪ್ರವಾಸದ ಟಿ20 ಸರಣಿ ತಪ್ಪಿಸಿಕೊಂಡಿದ್ದ ಮತ್ತೋರ್ವ ವೇಗಿ ದೀಪಕ್​ ಚಹರ್​, ಏಕದಿನ ಸರಣಿಯನ್ನೂ ತಪ್ಪಿಸಿಕೊಳ್ಳಲಿದ್ದಾರೆ. ತಂದೆಯ ಆರೋಗ್ಯ ಇನ್ನೂ ಸುಧಾರಿಸದಿರುವ ಕಾರಣ ಚಹರ್​ ಪ್ರವಾಸಕ್ಕೆ ತೆರಳುತ್ತಿಲ್ಲ ಎಂದು ಬಿಸಿಸಿಐಗೆ ಮಾಹಿತಿ ನೀಡಿದ್ದಾರೆ. ದೀಪಕ್​ ಚಹರ್​ ಬದಲಿಗೆ ಬಂಗಾಳದ ವೇಗಿ ಆಕಾಶ್​ ದೀಪ್​ರನ್ನು ಏಕದಿನ ತಂಡಕ್ಕೆ ಸೇರ್ಪಡೆಗೊಳಿಸಲಾಗಿದೆ.

ಟೆಸ್ಟ್​ ತಂಡದಲ್ಲಿ ಈಗಾಗಲೆ ಐವರು ವೇಗಿಗಳು (ಜಸ್​ಪ್ರೀತ್​ ಬುಮ್ರಾ, ಮೊಹಮದ್​ ಸಿರಾಜ್​, ಪ್ರಸಿದ್ಧಕೃಷ್ಣ, ಮುಕೇಶ್​ ಕುಮಾರ್​, ಶಾರ್ದೂಲ್​ ಠಾಕೂರ್​) ಇರುವುದರಿಂದ ಶಮಿ ಬದಲಿಗೆ ಬೇರೆ ವೇಗಿಯನ್ನು ಹೆಸರಿಸಲಾಗಿಲ್ಲ.

ಶ್ರೇಯಸ್​ ಮೊದಲ ಏಕದಿನಕ್ಕೆ ಮಾತ್ರ

ಬ್ಯಾಟರ್​ ಶ್ರೇಯಸ್​ ಅಯ್ಯರ್​ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ಮಾತ್ರ ಆಡಲಿದ್ದು, ನಂತರ ಟೆಸ್ಟ್​ ಸರಣಿಯ ಸಿದ್ಧತೆಗೆ ತೆರಳಲಿದ್ದಾರೆ. ಇದರಿಂದಾಗಿ 2 ಮತ್ತು 3ನೇ ಏಕದಿನ ಪಂದ್ಯಗಳಿಗೆ ಅವರು ಅಲಭ್ಯರಾಗಿದ್ದಾರೆ.

https://www.vijayavani.net/to-honour-dhonis-contribution-to-indian-cricket-no-7-jersey-retired-rajeev-shukla