ಐಪಿಎಲ್​ 17ನೇ ಆವೃತ್ತಿಗೆ ಚೆನ್ನೈನಲ್ಲಿ ಚಾಲನೆ; ಈ ಬಾರಿ ಬೆಂಗಳೂರಿನ ಮೊದಲ ಪಂದ್ಯ ಯಾವಾಗ ಗೊತ್ತೇ?

ಬೆಂಗಳೂರು: ಬಹುನಿರೀತ ಐಪಿಎಲ್​ 17ನೇ ಆವೃತ್ತಿಯ ಆರಂಭಿಕ 17 ದಿನಗಳ ವೇಳಾಪಟ್ಟಿಯನ್ನು ಬಿಸಿಸಿಐ ಗುರುವಾರ ಬಿಡುಗಡೆಗೊಳಿಸಿದ್ದು, ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡ ಈ ಬಾರಿ ಉದ್ಘಾಟನಾ ಪಂದ್ಯದಲ್ಲೇ ಕಣಕ್ಕಿಳಿಯಲಿದೆ. ಆರ್​ಸಿಬಿ ಟೂರ್ನಿಯ ಮೊದಲ ಪಂದ್ಯದಲ್ಲಿ ಹಾಲಿ ಚಾಂಪಿಯನ್​ ಚೆನ್ನೈ ಸೂಪರ್​ಕಿಂಗ್ಸ್​ ತಂಡವನ್ನು ಎದುರಿಸಲಿದೆ. ಮಾರ್ಚ್​ 22ರಂದು ಚೆನ್ನೈನ ಎಂಎ ಚಿದಂಬರಂ ಸ್ಟೇಡಿಯಂನಲ್ಲಿ ಉದ್ಘಾಟನಾ ಪಂದ್ಯ ನಡೆಯಲಿದೆ. ಹಾಗಾದರೆ ಕರ್ನಾಟಕದ ಕ್ರಿಕೆಟ್​ ಪ್ರೇಮಿಗಳು ಆರ್​ಸಿಬಿ ತಂಡದ ತವರಿನಲ್ಲಿ ಮೊದಲ ಪಂದ್ಯವನ್ನು ಸವಿಯುವುದು ಯಾವಾಗ ಗೊತ್ತೇ?

ಮಾ.25ಕ್ಕೆ ಬೆಂಗಳೂರಿನಲ್ಲಿ ಮೊದಲ ಪಂದ್ಯ

ಐಪಿಎಲ್​-17ರಲ್ಲಿ ಮಾರ್ಚ್​ 25ರಂದು ಬೆಂಗಳೂರಿನಲ್ಲಿ ಮೊದಲ ಪಂದ್ಯ ನಡೆಯಲಿದ್ದು, ಆರ್​ಸಿಬಿ ತಂಡ ಪಂಜಾಬ್​ ಕಿಂಗ್ಸ್​ ವಿರುದ್ಧ ಆಡಲಿದೆ. ಆರಂಭಿಕ 21 ಪಂದ್ಯಗಳ ಪೈಕಿ ಬೆಂಗಳೂರಿನಲ್ಲಿ 3 ಪಂದ್ಯಗಳು ನಿಗದಿಯಾಗಿದ್ದು, ಮಾರ್ಚ್​ 29ರಂದು ಕೆಕೆಆರ್​ ಮತ್ತು ಏಪ್ರಿಲ್​ 2ರಂದು ಲಖನೌ ವಿರುದ್ಧ ಪಂದ್ಯ ನಡೆಯಲಿವೆ. ಈ ಮೊದಲ ಹಂತದ ವೇಳಾಪಟ್ಟಿಯಲ್ಲಿ ಆರ್​ಸಿಬಿ 5 ಪಂದ್ಯಗಳನ್ನು ಆಡಲಿದೆ. ಆರ್​ಸಿಬಿ ತಂಡ ತವರಿನಲ್ಲಿ ಇನ್ನೂ 4 ಲೀಗ್​ ಪಂದ್ಯಗಳನ್ನು ಆಡಲಿದ್ದು ಅದರ ವೇಳಾಪಟ್ಟಿ, ಚುನಾವಣೆ ದಿನಾಂಕ ಘೋಷಣೆಯಾದ ಬಳಿಕ ಪ್ರಕಟಗೊಳ್ಳಲಿದೆ.

ಮೊದಲ ಪಂದ್ಯ ಮಾತ್ರ ರಾತ್ರಿ 8 ಗಂಟೆಗೆ ಆರಂಭ

ಐಪಿಎಲ್​ನಲ್ಲಿ ಈ ಸಲವೂ ಎಲ್ಲ ಪಂದ್ಯಗಳು ರಾತ್ರಿ 7.30ರಿಂದ ನಡೆಯಲಿದ್ದು, 2 ಪಂದ್ಯಗಳಿದ್ದಾಗ ಮೊದಲ ಪಂದ್ಯ ಮಧ್ಯಾಹ್ನ 3.30ರಿಂದ ನಡೆಯಲಿದೆ. ಆದರೆ ಟೂರ್ನಿಯ ಮೊದಲ ಪಂದ್ಯ ಮಾತ್ರ ರಾತ್ರಿ 8 ಗಂಟೆಗೆ ಶುರುವಾಗಲಿದೆ. ಪಂದ್ಯಕ್ಕೆ ಮುನ್ನ ನಡೆಯಲಿರುವ ಅದ್ದೂರಿ ಉದ್ಘಾಟನಾ ಸಮಾರಂಭದ ಹಿನ್ನೆಲೆಯಲ್ಲಿ ಈ ಬದಲಾವಣೆ ಮಾಡಲಾಗಿದೆ ಎನ್ನಲಾಗಿದೆ.

ವೈಜಾಗ್​ನಲ್ಲಿ ಡೆಲ್ಲಿ ತವರಿನ ಪಂದ್ಯ

ನವದೆಹಲಿಯ ಅರುಣ್​ ಜೇಟ್ಲಿ ಸ್ಟೇಡಿಯಂ ಮಾರ್ಚ್​ 17ರವರೆಗೂ ಡಬ್ಲ್ಯುಪಿಎಲ್​ ಪಂದ್ಯಗಳ ಆತಿಥ್ಯ ವಹಿಸಿಕೊಳ್ಳಲಿದೆ. ಹೀಗಾಗಿ ನಂತರದಲ್ಲಿ ಕ್ರೀಡಾಂಗಣವನ್ನು ಐಪಿಎಲ್​ಗೆ ಸಜ್ಜುಗೊಳಿಸಲು ಸಮಯ ಬೇಕಾಗಿರುವುದರಿಂದ, ಡೆಲ್ಲಿ ಕ್ಯಾಪಿಟಲ್ಸ್​ ತಂಡ ತನ್ನ ಆರಂಭಿಕ 2 ಲೀಗ್​ ಪಂದ್ಯಗಳನ್ನು ಆಂಧ್ರದ ವಿಶಾಖಪಟ್ಟಣದಲ್ಲಿ ಆಡಲಿದೆ. ಡೆಲ್ಲಿ ತಂಡ ತನ್ನ ತವರಿನ ಕೊನೇ 5 ಲೀಗ್​ ಪಂದ್ಯಗಳನ್ನು ಜೇಟ್ಲಿ ಸ್ಟೇಡಿಯಂನಲ್ಲೇ ಆಡುವ ನಿರೀಕ್ಷೆ ಇದೆ.

https://www.vijayavani.net/famous-model-tania-singh-suicide-police-summon-ipl-star-srh-opener-abhishek-sharma