ಕಳೆದ ಕೆಲ ವಾರಗಳಿಂದ ಡೆಲ್ಲಿ ತಂಡ ಕೆಲ ಸವಾಲುಗಳನ್ನು ಎದುರಿಸಿದೆ. ತಂಡದೊಳಗೆ ಕೆಲ ಕರೊನಾ ಪ್ರಕರಣಗಳು ಕಾಣಿಸಿಕೊಂಡಿದ್ದಲ್ಲದೆ, ನೋಬಾಲ್ ವಿವಾದದಲ್ಲಿ ಆಟಗಾರರು ದಂಡ ಶಿಕ್ಷೆಗೂ ಗುರಿಯಾದರು. ಇದರ ನಡುವೆಯೂ ಕಳೆದ 3 ಪಂದ್ಯಗಳಲ್ಲಿ 2ರಲ್ಲಿ ಗೆದ್ದಿರುವ ಡೆಲ್ಲಿ, ಒಟ್ಟಾರೆ 8 ಪಂದ್ಯಗಳಲ್ಲಿ ತಲಾ 4 ಜಯ-ಸೋಲು ಅನುಭವಿಸಿದೆ. ಚೇಸಿಂಗ್ನಲ್ಲಿ ಎಡವಿರುವುದು ಡೆಲ್ಲಿಗೆ ಹಿನ್ನಡೆ ತಂದಿದೆ. ಆಲ್ರೌಂಡರ್ ಮಿಚೆಲ್ ಮಾರ್ಷ್ ನಿರೀಕ್ಷಿತ ನಿರ್ವಹಣೆ ತೋರದಿರುವುದು ಕೂಡ ಪಂತ್ ಪಡೆಯನ್ನು ಇಕ್ಕಟ್ಟಿಗೆ ಸಿಲುಕಿಸಿದೆ. ಸ್ಪಿನ್ನರ್ ಕುಲದೀಪ್ ಯಾದವ್ ಡೆಲ್ಲಿ ಇದುವರೆಗೆ ಗೆದ್ದ 4 ಪಂದ್ಯಗಳಲ್ಲೂ ಪಂದ್ಯಶ್ರೇಷ್ಠರಾಗಿದ್ದು, 5ನೇ ಗೆಲುವಿಗೂ ನೆರವಾಗುವರೇ ಎಂಬ ಕುತೂಹಲವಿದೆ.
