ಇಂದಿನಿಂದ ಭಾರತಕ್ಕೆ ಅಹರ್ನಿಶಿ ಟೆಸ್ಟ್​; ಆಸೀಸ್​ ಎದುರು ಗೆಲುವಿನ ಲಯ ಕಾಯ್ದುಕೊಳ್ಳುವ ತವಕ

ಅಡಿಲೇಡ್​: ತವರಿನಲ್ಲಿ ನ್ಯೂಜಿಲೆಂಡ್​ ಎದುರು ವೈಟ್​ವಾಷ್​ ಎದುರಿಸಿದ ಹಿನ್ನಡೆಯ ನಡುವೆ ಕಾಂಗರೂ ನೆಲಕ್ಕೆ ಕಾಲಿಟ್ಟಿದ್ದ ಭಾರತ ತಂಡ ಪರ್ತ್​ನಲ್ಲಿ ಅಮೋಘ ನಿರ್ವಹಣೆ ತೋರುವ ಮೂಲಕ ಆತಿಥೇಯರನ್ನು ಬಗ್ಗುಬಡಿದು ಬೀಗಿದೆ. ಬಾರ್ಡರ್​-ಗಾವಸ್ಕರ್​ ಟ್ರೋಫಿಯ ಎರಡನೇ ಟೆಸ್ಟ್​ ಪಂದ್ಯಕ್ಕೂ ಟೀಮ್​ ಇಂಡಿಯಾ ಇದೇ ವಿಶ್ವಾಸದಲ್ಲಿ ಸಜ್ಜಾಗಿದ್ದು, ನಾಯಕ ರೋಹಿತ್​ ಶರ್ಮ ಸೇರ್ಪಡೆ ಮತ್ತಷ್ಟು ಬಲ ತುಂಬಿದೆ. ಆಸ್ಟ್ರೆಲಿಯಾ ಎದುರು ಅಡಿಲೇಡ್​ ಓವಲ್​ ಅಂಗಣದ ಹೊನಲು ಬೆಳಕಿನಲ್ಲಿ ನಸುಗೆಂಪು ಬಣ್ಣದ ಚೆಂಡಿನಲ್ಲಿ ನಡೆಯಲಿರುವ ಪಂದ್ಯದಲ್ಲೂ ಗೆಲುವಿನ ಓಟ ಮುಂದುವರಿಸುವುದು ಭಾರತ ತಂಡದ ಹಂಬಲವಾಗಿದೆ.

ಹಂಗಾಮಿ ನಾಯಕರಾಗಿ ಜಸ್​ಪ್ರೀತ್​ ಬುಮ್ರಾ ಪರ್ತ್​ನಲ್ಲಿ ಉತ್ತಮ ನಿರ್ವಹಣೆ ತೋರಿಸಿದ್ದು, ರೋಹಿತ್​ ಶರ್ಮ ಮೇಲೂ ಈಗ ನಿರೀಕ್ಷೆಗಳು ಹೆಚ್ಚಿವೆ. 4 ವರ್ಷಗಳ ಹಿಂದೆ ಅಡಿಲೇಡ್​ನಲ್ಲೇ ಆಡಿದ ಕೊನೇ ಪಿಂಕ್​ಬಾಲ್​ ಟೆಸ್ಟ್​ನಲ್ಲಿ ಭಾರತ ಕೇವಲ 36 ರನ್​ಗಳಿಗೆ ಆಲೌಟ್​ ಆಗಿ ಮುಗ್ಗರಿಸಿತ್ತು. ಆ ಕಹಿ ನೆನಪು ಮರೆಸಲು ಭಾರತಕ್ಕೆ ಇದು ಉತ್ತಮ ಅವಕಾಶವೆನಿಸಿದೆ. ಜತೆಗೆ ಪಿಂಕ್​ಬಾಲ್​ನಲ್ಲಿ ಬಲಿಷ್ಠ ದಾಖಲೆ ಹೊಂದಿರುವ ಆಸ್ಟ್ರೆಲಿಯಾ ಈ ಬಾರಿ ಮತ್ತಷ್ಟು ಸವಾಲೆನಿಸಲಿದೆ. ರೋಹಿತ್​ ಜತೆಗೆ ಕೈ ಹೆಬ್ಬೆರಳು ಗಾಯದಿಂದ ಚೇತರಿಸಿಕೊಂಡಿರುವ ಶುಭಮಾನ್​ ಗಿಲ್​ ಕೂಡ ಈ ಬಾರಿ ಭಾರತದ ಬ್ಯಾಟಿಂಗ್​ ವಿಭಾಗಕ್ಕೆ ಬಲ ತುಂಬಲಿದ್ದಾರೆ. ಪರ್ತ್​ನಲ್ಲಿ ಶತಕ ಸಿಡಿಸಿ ಲಯಕ್ಕೆ ಮರಳಿರುವ ವಿರಾಟ್​ ಕೊಹ್ಲಿ ಈಗಾಗಲೆ ಆಸೀಸ್​ ತಲೆನೋವು ಹೆಚ್ಚಿಸಿದ್ದಾರೆ.

ಒತ್ತಡದಲ್ಲಿ ಆಸ್ಟ್ರೆಲಿಯಾ: ಸರಣಿಗೆ ಮುನ್ನ ಭಾರತ ತಂಡ ತವರಿನ ಸೋಲಿನಿಂದಾಗಿ ಒತ್ತಡದಲ್ಲಿದ್ದರೆ, ಇದೀಗ 2ನೇ ಟೆಸ್ಟ್​ಗೆ ಮುನ್ನ ಆತಿಥೇಯ ಆಸೀಸ್​ ಹೆಚ್ಚಿನ ಒತ್ತಡದಲ್ಲಿದೆ. ಸ್ಟೀವನ್​ ಸ್ಮಿತ್​, ಮಾರ್ನಸ್​ ಲಬುಶೇನ್​ ಸಹಿತ ಬ್ಯಾಟರ್​ಗಳ ನೀರಸ ನಿರ್ವಹಣೆ ನಡುವೆ ಪ್ರಮುಖ ವೇಗಿ ಹ್ಯಾಸಲ್​ವುಡ್​ ಗಾಯದಿಂದ ಅಲಭ್ಯರಾಗಿದ್ದಾರೆ. ಇದರ ನಡುವೆ ಸರಣಿಯಲ್ಲಿ ಸಮಬಲ ಸಾಧಿಸಲು ಆಸೀಸ್​ ತನ್ನ ನೆಚ್ಚಿನ ಪಿಂಕ್​ಬಾಲ್​ ಅನ್ನು ನೆಚ್ಚಿಕೊಂಡಿದೆ.

ರಾಹುಲ್​ ಆರಂಭಿಕನಾಗಿ ಮುಂದುವರಿಕೆ ಖಚಿತ

ಮೊದಲ ಟೆಸ್ಟ್​ನಲ್ಲಿ ಸದೃಢ ಮತ್ತು ತಾಂತ್ರಿಕತೆಯ ಬ್ಯಾಟಿಂಗ್​ ಪ್ರದರ್ಶಿಸಿ ಗಮನಸೆಳೆದ ಕನ್ನಡಿಗ ಕೆಎಲ್​ ರಾಹುಲ್​ ಅವರನ್ನು ಅಡಿಲೇಡ್​ನಲ್ಲೂ ಆರಂಭಿಕರಾಗಿ ಮುಂದುವರಿಸಲಾಗುವುದು ಎಂದು ನಾಯಕ ರೋಹಿತ್​ ಶರ್ಮ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಖಚಿತಪಡಿಸಿದ್ದಾರೆ. ಈ ಮೂಲಕ ತಾನು ಮಧ್ಯಮ ಕ್ರಮಾಂಕದಲ್ಲಿ ಆಡುವುದಾಗಿಯೂ ತಿಳಿಸಿದ್ದಾರೆ. 2ನೇ ಮಗುವಿನ ಆಗಮನದಿಂದಾಗಿ ರೋಹಿತ್​ ತವರಿನಲ್ಲೇ ಉಳಿದಾಗ ರಾಹುಲ್​ ಬದಲಿ ವ್ಯವಸ್ಥೆಯಾಗಿ ಪರ್ತ್​ನಲ್ಲಿ ಇನಿಂಗ್ಸ್​ ಆರಂಭಿಸುವ ಅವಕಾಶ ಪಡೆದುಕೊಂಡಿದ್ದರು. 26 ಮತ್ತು 77 ರನ್​ ಗಳಿಸುವ ಮೂಲಕ ಅವರು ಪರ್ತ್​ ಗೆಲುವಿಗೆ ಉತ್ತಮ ಕೊಡುಗೆ ನೀಡಿದ್ದರು. "ರಾಹುಲ್​ ಇನಿಂಗ್ಸ್​ ಆರಂಭಿಸಲಿದ್ದಾರೆ. ನಾನು ಮಧ್ಯಮ ಕ್ರಮಾಂಕದಲ್ಲಿ ಎಲ್ಲಾದರೂ ಆಡಲಿದ್ದೇನೆ. ಮೊದಲ ಟೆಸ್ಟ್​ನಲ್ಲಿ ರಾಹುಲ್​ ಆಡಿದ ಆಟವನ್ನು ನಾನು ತವರಿನಲ್ಲಿ ನನ್ನ ನವಜಾತ ಶಿಶುವನ್ನು ತೋಳಿನಲ್ಲಿ ಹಿಡಿದುಕೊಂಡು ವೀಕ್ಷಿಸಿದೆ. ರಾಹುಲ್​ ಅಮೋಘ ಆಟವಾಡಿದರು. ಹೀಗಾಗಿ ಸದ್ಯ ಅವರ ಕ್ರಮಾಂಕದಲ್ಲಿ ಬದಲಾವಣೆ ಬೇಡ. ಭವಿಷ್ಯದಲ್ಲಿ ಬದಲಾದ ಸಂದರ್ಭ ಎದುರಾದರೆ ನೋಡೋಣ' ಎಂದು ರೋಹಿತ್​ ವಿವರಿಸಿದರು.

*ಅಹರ್ನಿಶಿ ಟೆಸ್ಟ್​ನಲ್ಲಿ ಬಳಸುವ ಪಿಂಕ್​ಬಾಲ್​, ಸಾಂಪ್ರದಾಯಿಕ ಕೆಂಪು ಚೆಂಡಿಗಿಂತ ಭಿನ್ನವಾಗಿ ವರ್ತಿಸುತ್ತದೆ. ಹೆಚ್ಚಿನ ಸ್ವಿಂಗ್​, ವೇಗ, ಬೌನ್ಸ್​ನಿಂದ ಕೂಡಿದೆ. ಕಳೆದ 3 ದಿನಗಳಿಂದ ಪಿಂಕ್​ಬಾಲ್​ನಲ್ಲೇ ಅಭ್ಯಾಸ ನಡೆಸಿದ್ದೇನೆ. ಅದರಲ್ಲಿ ಹೆಚ್ಚು ಆಡಿದಷ್ಟು ಸುಲಭವೂ ಎನಿಸುತ್ತಿದೆ.

| ರೋಹಿತ್​ ಶರ್ಮ, ಟೀಮ್​ ಇಂಡಿಯಾ ನಾಯಕ

*ನಮ್ಮ ತಂಡದ ಹೆಚ್ಚಿನ ಆಟಗಾರರು ಬಹುತೇಕ ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ. ಆದರೆ ತಂಡದ ಅರ್ಧದಷ್ಟು ಆಟಗಾರರು ಬಾರ್ಡರ್​&ಗಾವಸ್ಕರ್​ ಟ್ರೋಫಿ ಗೆದ್ದಿಲ್ಲ. ಇದೊಂದೇ ನಮ್ಮಲ್ಲಿ ಹೆಚ್ಚಿನವರನ್ನು ಕಾಡುತ್ತಿರುವ ಕೊರತೆಯಾಗಿದೆ. ಇದೊಂದು ಸುದೀರ್ಘ ಸರಣಿಯಾಗಿದ್ದು, ಪುಟಿದೇಳುವ ವಿಶ್ವಾಸವಿದೆ.

| ಪ್ಯಾಟ್​ ಕಮ್ಮಿನ್ಸ್​, ಆಸೀಸ್​ ನಾಯಕ

ಡಬ್ಲ್ಯುಟಿಸಿ ಫೈನಲ್​ ಚಾನ್ಸ್​

ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ನಲ್ಲಿ (ಡಬ್ಲ್ಯುಟಿಸಿ) ನೇರ ಫೈನಲ್​ ಪ್ರವೇಶಕ್ಕೆ ಭಾರತ ತಂಡ ಸರಣಿಗೆ ಮುನ್ನ 4-0 ಅಥವಾ 5-0ಯಿಂದ ಗೆಲ್ಲಬೇಕಾದ ಒತ್ತಡವಿತ್ತು. ಆದರೆ ಸರಣಿ ಶುರುವಾದ ಬಳಿಕ ಕಿವೀಸ್​ ತಂಡ ತವರಿನಲ್ಲಿ ಇಂಗ್ಲೆಂಡ್​ ವಿರುದ್ಧದ ಮೊದಲ ಟೆಸ್ಟ್​ ಸೋತಿರುವುದರಿಂದ ಭಾರತ ಈಗ 4-1 ಅಥವಾ 3-0ಯಿಂದ ಸರಣಿ ಗೆದ್ದರೂ ನೇರವಾಗಿ ಡಬ್ಲ್ಯುಟಿಸಿ ಫೈನಲ್​ಗೇರುವ ಅವಕಾಶ ಹೊಂದಿದೆ. ಇದಲ್ಲದೆ 3-2 ಅಥವಾ 3-1ರಿಂದ ಗೆದ್ದರೂ ಭಾರತ ಫೈನಲ್​ಗೇರುವ ಅವಕಾಶ ಹೆಚ್ಚಲಿದೆ. ಅಂದರೆ ಡಬ್ಲ್ಯುಟಿಸಿ ಫೈನಲ್​ಗೇರಲು ಭಾರತ ಸರಣಿಯಲ್ಲಿ ಇನ್ನೂ 2 ಪಂದ್ಯ ಗೆಲ್ಲುವ ಅಗತ್ಯವಿದೆ.

ಟೀಮ್​ ನ್ಯೂಸ್​:

ಭಾರತ: ಜೈಸ್ವಾಲ್​ ಜತೆ ರಾಹುಲ್​ ಆರಂಭಿಕರಾಗಿ ಮುಂದುವರಿಯುವುದರೊಂದಿಗೆ ರೋಹಿತ್​ ಶರ್ಮ ಮಧ್ಯಮ ಕ್ರಮಾಂಕದಲ್ಲಿ ಆಡುವುದು ಕೂಡ ಖಚಿತಗೊಂಡಿದೆ. ಆದರೆ ಎಷ್ಟನೇ ಕ್ರಮಾಂಕ ಎಂಬುದು ಮಾತ್ರ ಸ್ಪಷ್ಟವಾಗಿಲ್ಲ. ಶುಭಮಾನ್​ ಗಿಲ್​ ಫಿಟ್​ ಆಗಿ 3ನೇ ಕ್ರಮಾಂಕಕ್ಕೆ ಮರಳಿದರೆ, ಕೊಹ್ಲಿ 4ನೇ ಕ್ರಮಾಂಕದಲ್ಲಿ ಮುಂದುವರಿಯಲಿದ್ದಾರೆ. ಹೀಗಾಗಿ ರೋಹಿತ್​ 5ನೇ ಕ್ರಮಾಂಕದಲ್ಲಿ ಆಡಬಹುದು ಮತ್ತು ಪಂತ್​ 6ನೇ ಕ್ರಮಾಂಕಕ್ಕೆ ಹಿಂಬಡ್ತಿ ಪಡೆಯಬಹುದು. ಆರ್​. ಅಶ್ವಿನ್​ ಅಡಿಲೇಡ್​ನಲ್ಲಿ ಉತ್ತಮ ಬೌಲಿಂಗ್​ ದಾಖಲೆ ಹೊಂದಿದ್ದರೂ, ವಾಷಿಂಗ್ಟನ್​ ಬ್ಯಾಟಿಂಗ್​ನಲ್ಲೂ ಉಪಯುಕ್ತ ಆಗುವ ಕಾರಣ ಸ್ಥಾನ ಉಳಿಸಿಕೊಳ್ಳಬಹುದು.

ಆಸ್ಟ್ರೆಲಿಯಾ: ಪರ್ತ್​ ಟೆಸ್ಟ್​ ಸೋಲಿನ ನಡುವೆ ಆಸೀಸ್​ ತನ್ನ ತಂಡದಲ್ಲಿ ಹೆಚ್ಚಿನ ಬದಲಾವಣೆ ಮಾಡುತ್ತಿಲ್ಲ. ಪಂದ್ಯಕ್ಕೆ ಮುನ್ನಾದಿನವೇ ಆಸೀಸ್​ ತನ್ನ ಆಡುವ 11ರ ಬಳಗವನ್ನು ಪ್ರಕಟಿಸಿದ್ದು, ಅನಿವಾರ್ಯ ಕಾರಣಗಳಿಂದಾಗಿ ಏಕೈಕ ಬದಲಾವಣೆ ಮಾಡಿದೆ. ವೇಗಿ ಹ್ಯಾಸಲ್​ವುಡ್​ ಗಾಯದಿಂದಾಗಿ ಪಂದ್ಯಕ್ಕೆ ಅಲಭ್ಯರಾಗಿರುವುದರಿಂದ ಮತ್ತೋರ್ವ ವೇಗಿ ಸ್ಕಾಟ್​ ಬೋಲ್ಯಾಂಡ್​ ಕಣಕ್ಕಿಳಿಯಲಿದ್ದಾರೆ. ಬೋಲ್ಯಾಂಡ್​ 2 ವರ್ಷಗಳ ಬಳಿಕ ತವರಿನಲ್ಲಿ ಟೆಸ್ಟ್​ ಆಡಲಿದ್ದಾರೆ. ಆಲ್ರೌಂಡರ್​ ಮಿಚೆಲ್​ ಮಾರ್ಷ್​ ಫಿಟ್​ ಆಗಿದ್ದು, ಬೌಲಿಂಗ್​ ಕೂಡ ಮಾಡಲಿದ್ದಾರೆ ಎಂದು ನಾಯಕ ಕಮ್ಮಿನ್ಸ್​ ಸ್ಪಷ್ಟಪಡಿಸಿದ್ದಾರೆ.

*ಆರಂಭ: ಬೆಳಗ್ಗೆ 9.30, ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​

*ಪ್ರತಿ ದಿನದಾಟ ಹೀಗಿರಲಿದೆ:

ಮೊದಲ ಅವಧಿ: ಬೆಳಗ್ಗೆ 9.30-11.30

2ನೇ ಅವಧಿ: ಮಧ್ಯಾಹ್ನ 12.10-2.10

3ನೇ ಅವಧಿ: ಮಧ್ಯಾಹ್ನ 2.30-4.30

ಅಡಿಲೇಡ್​ ಪಿಂಕ್​ ಟೆಸ್ಟ್​ನಲ್ಲಿ ಆಸೀಸ್​ ಅಜೇಯ

ಅಡಿಲೇಡ್​ ಟೆಸ್ಟ್​ನಲ್ಲೂ ಭಾರತ ಗೆದ್ದರೆ ಹೊಸ ದಾಖಲೆ ನಿರ್ಮಾಣವಾಗಲಿದೆ. ಯಾಕೆಂದರೆ 2015ರಿಂದ ಆಸೀಸ್​ ಅಡಿಲೇಡ್​ನಲ್ಲಿ ಆಡಿರುವ ಎಲ್ಲ 7 ಅಹರ್ನಿಶಿ ಟೆಸ್ಟ್​ಗಳಲ್ಲಿ ಗೆದ್ದ ಅಜೇಯ ದಾಖಲೆ ಹೊಂದಿದೆ. 2015ರಲ್ಲಿ ಕಿವೀಸ್​ ವಿರುದ್ಧ 3 ವಿಕೆಟ್​ಗಳಿಂದ ಗೆದ್ದಿದ್ದೇ ಇಲ್ಲಿ ಆಸೀಸ್​ ಎದುರಿಸಿದ ಅತ್ಯಂತ ನಿಕಟ ಪ್ರತಿರೋಧವಾಗಿದೆ. ಆಸೀಸ್​ ಆಡಿರುವ ಒಟ್ಟಾರೆ 12 ಅಹರ್ನಿಶಿ ಟೆಸ್ಟ್​ಗಳಲ್ಲಿ 11ರಲ್ಲಿ ಗೆದ್ದು, 1ರಲ್ಲಷ್ಟೇ ಸೋತಿದೆ. ಭಾರತ ಇದುವರೆಗೆ 4 ಅಹರ್ನಿಶಿ ಟೆಸ್ಟ್​ ಆಡಿದ್ದು, 3ರಲ್ಲಿ ಗೆದ್ದು, 1ರಲ್ಲಿ ಸೋತಿದೆ.

*1: ಬುಮ್ರಾ ಇನ್ನೊಂದು ವಿಕೆಟ್​ ಪಡೆದರೆ, ಹಾಲಿ ವರ್ಷ ಟೆಸ್ಟ್​ನಲ್ಲಿ 50 ವಿಕೆಟ್​ ಕಬಳಿಸಿದ ಮೊದಲ ಬೌಲರ್​ ಎನಿಸಲಿದ್ದಾರೆ.

ಪಿಚ್​ ರಿಪೋರ್ಟ್​

ಅಡಿಲೇಡ್​ ಓವಲ್​ ಪಿಚ್​ ಮೇಲೆ 6 ಎಂಎಂ ಹುಲ್ಲು ಉಳಿಸಲಾಗಿದ್ದು, ಇದು ಆಸೀಸ್​ ನೆಲದ ಟಿಪಿಕಲ್​​ ಟೆಸ್ಟ್​ ಕ್ರಿಕೆಟ್​ ಪಿಚ್​ನಂತೆಯೇ ವರ್ತಿಸಲಿದೆ. ಅಂದರೆ ಎಂದಿನಂತೆ ವೇಗಿಗಳಿಗೆ ಹೆಚ್ಚಿನ ನೆರವು ಲಭಿಸಲಿದೆ. ಇನ್ನು ಪಂದ್ಯ ಹೊನಲು ಬೆಳಕಿನಲ್ಲಿ ಪಿಂಕ್​ಬಾಲ್​ನಲ್ಲಿ ನಡೆಯಲಿರುವುದರಿಂದ ಸಂಜೆ ಸೂರ್ಯಾಸ್ತದ ನಂತರ ಹೊಸ ಚೆಂಡು ಇನ್ನಷ್ಟು ಪರಿಣಾಮಕಾರಿಯಾಗಿ ಕೆಲಸ ಮಾಡಲಿದೆ. ಪಂದ್ಯದ ಮೊದಲ ದಿನದಾಟಕ್ಕೆ ಮಳೆ ಅಡಚಣೆಯ ಭೀತಿಯೂ ಇದೆ. ನಂತರ 2ನೇ ದಿನವೂ ಮಳೆ ಸ್ವಲ್ಪ ಕಾಡಬಹುದು. ಆದರೆ ಕೊನೇ 3 ದಿನ ಮಳೆ ಭೀತಿ ಇಲ್ಲದಿರುವುದರಿಂದ ಪಂದ್ಯದಲ್ಲಿ ಸ್ಪಷ್ಟ ಫಲಿತಾಂಶಕ್ಕೆ ಅಡ್ಡಿಯಾಗದು.

https://www.vijayavani.net/two-time-olympic-medallist-shuttler-pv-sindhu-will-tie-the-knot-on-december