ಸಿಎಸ್ಕೆ ತಂಡದ ಕರೊನಾ ಪ್ರಕರಣಗಳಿಂದಾಗಿ ಈಗಾಗಲೆ ತಂಡದ ವಿದೇಶಿ ಆಟಗಾರರು ಕೂಡ ಕಳವಳ ವ್ಯಕ್ತಪಡಿಸಿದ್ದಾರೆ ಎನ್ನಲಾಗುತ್ತಿದೆ. ಆಸ್ಟ್ರೇಲಿಯಾದ ವೇಗಿ ಜೋಶ್ ಹ್ಯಾಸಲ್ವುಡ್ ಕೂಡ ಚೆನ್ನೈ ತಂಡವನ್ನು ಕೂಡಿಕೊಳ್ಳುವ ಬಗ್ಗೆ ಹಿಂದೇಟು ಹಾಕಿದ್ದು, ಸದ್ಯ ಇಂಗ್ಲೆಂಡ್ ಪ್ರವಾಸದಲ್ಲಿರುವ ಅವರು ಏಕದಿನ, ಟಿ20 ಸರಣಿಯ ಬಗ್ಗೆ ಮಾತ್ರ ಗಮನಹರಿಸಿದ್ದಾರೆ. ಐಪಿಎಲ್ ಹತ್ತಿರ ಬಂದಾಗ, ಆಡುವುದೇ-ಬೇಡವೇ ಎಂದು ನಿರ್ಧರಿಸುವುದಾಗಿ ತಿಳಿಸಿದ್ದಾರೆ. ಸಿಎಸ್ಕೆ ತಂಡದ ಆಟಗಾರರಾದ ದೀಪಕ್ ಚಹರ್ ಮತ್ತು ಋತುರಾಜ್ ಗಾಯಕ್ವಾಡ್ ಸಹಿತ ತಂಡದ ಒಟ್ಟು 13 ಮಂದಿಗೆ ಕರೊನಾ ಸೋಂಕು ದೃಢಪಟ್ಟಿದ್ದು, ತಂಡದ ಕ್ವಾರಂಟೈನ್ ಅವಧಿಯೂ ಮತ್ತೆ 7 ದಿನಗಳಿಗೆ ವಿಸ್ತರಿಸಿದೆ. ಇದರಿಂದಾಗಿ, ಟೂರ್ನಿಯ ಇತರೆಲ್ಲ ತಂಡಗಳು ಈಗಾಗಲೆ ಅಭ್ಯಾಸ ಆರಂಭಿಸಿದ್ದರೂ, ಸಿಎಸ್ಕೆ ತಂಡ ಮಾತ್ರ ಇನ್ನೂ ಕ್ವಾರಂಟೈನ್ನಲ್ಲೇ ಇದೆ.
