Vaibhav Sooryavanshi: ನಿನ್ನೆ (ನ.15) ಅಲ್ ಅಮೆರಾತ್ ಕ್ರೀಡಾಂಗಣದಲ್ಲಿ ನಡೆದ ಅಂಡರ್-19 ಏಷ್ಯಾಕಪ್ ಫೈನಲ್ನಲ್ಲಿ ಪಾಕಿಸ್ತಾನವನ್ನು 1 ವಿಕೆಟ್ನಿಂದ ಬಗ್ಗುಬಡಿದು, ಕೊನೆಯ ಓವರ್ನಲ್ಲಿ ರೋಚಕ ಗೆಲುವು ಸಾಧಿಸಿದ ಟೀಮ್ ಇಂಡಿಯಾಗೆ ಇದೀಗ ವಿಶ್ವ ಕ್ರಿಕೆಟ್ ಅಭಿಮಾನಿಗಳಿಂದ ಮೆಚ್ಚುಗೆ, ಅಭಿನಂದನೆಗಳ ಮಹಾಪೂರವೇ ಹರಿದುಬರುತ್ತಿದೆ. ಈ ಮಧ್ಯೆ, ಟೀಮ್ ಇಂಡಿಯಾದ ಯುವ ಬ್ಯಾಟಿಂಗ್ ಸೆನ್ಸೇಷನ್ ವೈಭವ್ ಸೂರ್ಯವಂಶಿಯನ್ನು ಏಕೆ ಆಡಿಸಲಿಲ್ಲ? ಯಾವ ಕಾರಣಕ್ಕೆ ಅವರನ್ನು ಕೈಬಿಡಲಾಯಿತು? ಎಂಬ ಪ್ರಶ್ನೆಗಳು ಸದ್ಯ ಕ್ರಿಕೆಟ್ ವಲಯದಲ್ಲಿ ಭಾರಿ ಚರ್ಚೆಗಳಿಗೆ ಕಾರಣವಾಗಿದೆ.
ಕೇವಲ 15ನೇ ವಯಸ್ಸಿನಲ್ಲೇ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ಕ್ರಿಕೆಟ್ ಲೋಕದ ಗಮನ ಸೆಳೆದಿರುವ ಈ ಯುವ ಆಟಗಾರ, 2026ರ ಅಂಡರ್-19 ಏಷ್ಯಾಕಪ್ ಟೂರ್ನಿಯಲ್ಲಿ ಭಾರತ ತಂಡದಲ್ಲಿ ಏಕೆ ಕಾಣಿಸಿಕೊಳ್ಳಲಿಲ್ಲ. ವಯಸ್ಸಿನ ಅರ್ಹತೆ ಇದ್ದರೂ ತಂಡದಲ್ಲಿ ಸ್ಥಾನ ಸಿಗದಿರುವುದಕ್ಕೆ, ಇದಕ್ಕೆ ಬಿಸಿಸಿಐ ಕಟ್ಟುನಿಟ್ಟಿನ ನಿಯಮ ಏನಾದರೂ ಇತ್ತಾ? ಇದ್ದರೆ, ಆ ನಿಯಮ ಏನು? ವೈಭವ್‌ಗೆ ಮತ್ತೆ ಅಂಡರ್-19 ಏಷ್ಯಾಕಪ್ ಆಡುವ ಅವಕಾಶ ಏಕೆ ಕೊಡಲಿಲ್ಲ ಎಂಬ ಅನೇಕ ಕ್ರಿಕೆಟ್ ಪ್ರೇಮಿಗಳಿಗೆ ಇಲ್ಲಿದೆ ನೋಡಿ ವಿವರವಾದ ಉತ್ತರ.
ಈ ವರ್ಷದ ಅಂಡರ್-19 ಏಷ್ಯಾಕಪ್ನಲ್ಲಿ ಭಾರತ ಪರ ವೈಭವ್ ಆಡದಿರಲು ಒಂದು ಬಲವಾದ ಕಾರಣವಿದೆ. ಮಾರ್ಚ್ 2026ರಲ್ಲಿ 15ನೇ ವರ್ಷಕ್ಕೆ ಕಾಲಿಟ್ಟ ವೈಭವ್, ಟೂರ್ನಿಯಲ್ಲಿ ಆಡಲು ವಯಸ್ಸಿನ ಅರ್ಹತೆ ಹೊಂದಿದ್ದರೂ ತಂಡದಲ್ಲಿ ಕಾಣಿಸಿಕೊಳ್ಳದಿರುವುದು ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿತ್ತು. ಇದಕ್ಕೆ ಪ್ರಮುಖ ಕಾರಣ ಬಿಸಿಸಿಐ 2016ರಲ್ಲಿ ಜಾರಿಗೆ ತಂದಿರುವ ಅಂಡರ್-19 ವಿಶ್ವಕಪ್‌ಗೆ ಸಂಬಂಧಿಸಿದ ನಿಯಮಾವಳಿಗಳು ಎನ್ನಲಾಗಿದೆ.
ಬಿಸಿಸಿಐನ ಒಂದು ವಿಶ್ವಕಪ್ ನಿಯಮವೇನು?
ಬಿಸಿಸಿಐ 2016ರಲ್ಲಿ ಕಿರಿಯರ ಕ್ರಿಕೆಟ್‌ನಲ್ಲಿ ವಯಸ್ಸಿಗೆ ಸಂಬಂಧಿಸಿದ ಅಕ್ರಮಗಳನ್ನು ತಡೆಯುವ ಉದ್ದೇಶದಿಂದ ಈ ನಿಯಮವನ್ನು ಜಾರಿಗೊಳಿಸಿತು. 2015-16ರ ವಾರ್ಷಿಕ ವರದಿಯ ಪ್ರಕಾರ, ಬಿಸಿಸಿಐನ ದೇಶೀಯ ಕ್ರಿಕೆಟ್ ವ್ಯವಸ್ಥೆಗೆ ನೇರವಾಗಿ ಅಂಡರ್-19 ಹಂತದಲ್ಲಿ ಪ್ರವೇಶಿಸುವ ಆಟಗಾರರು ಗರಿಷ್ಠ ಎರಡು ವರ್ಷಗಳ ಕಾಲ ಮಾತ್ರ ಅದರ ಅಂಡರ್-19 ಟೂರ್ನಿಗಳಲ್ಲಿ ಭಾಗವಹಿಸಬಹುದು ಎಂಬ ನೀತಿ ಇದೆ.
ಇದರೊಂದಿಗೆ, ಆಟಗಾರನಿಗೆ ಐಸಿಸಿ ಅಂಡರ್-19 ವಿಶ್ವಕಪ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಲು ಒಂದು ಬಾರಿ ಮಾತ್ರ ಅವಕಾಶವಿದೆ ಎಂಬ ನಿರ್ಬಂಧವೂ ಇದೆ. ಹೀಗಾಗಿ, 2026ರ ಅಂಡರ್-19 ವಿಶ್ವಕಪ್‌ನಲ್ಲಿ ಆಡಿರುವ ವೈಭವ್, ವಯಸ್ಸಿನ ಅರ್ಹತೆ ಉಳಿದಿದ್ದರೂ ಮತ್ತೊಂದು ಐಸಿಸಿ ಅಂಡರ್-19 ಟೂರ್ನಿಯಲ್ಲಿ ಟೀಮ್ ಇಂಡಿಯಾವನ್ನು ಪ್ರತಿನಿಧಿಸಲು ಸಾಧ್ಯವಾಗುವುದಿಲ್ಲ.
