ಮನಲ್ ಚೌಹಾಣ್ ಮತ್ತು ವೆಂಕಟ ಬೆಂಬಲಕ್ಕೆ ಶ್ಲಾಘನೆ
ಭಾರತ 254 ರನ್‌ಗಳಿಗೆ 8 ವಿಕೆಟ್ ಕಳೆದುಕೊಂಡು ಸೋಲಿನ ಸುಳಿಯಲ್ಲಿದ್ದಾಗ, 10ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಇಳಿದ ಮೋಹಿತ್ ಉಲ್ವಾ ಅವರಿಗೆ ಮನಲ್ ಚೌಹಾಣ್ (32 ಎಸೆತಗಳಲ್ಲಿ 47 ರನ್) ಮತ್ತು ಕೊನೆಯ ವಿಕೆಟ್‌ಗೆ ಚಿಗುರುಪಾಟಿ ವೆಂಕಟ (ಅಜೇಯ 11 ರನ್) ಉತ್ತಮ ಸಾಥ್ ನೀಡಿದರು. 47ನೇ ಓವರ್‌ನಲ್ಲಿ ಔಟಾಗುವ ಮುನ್ನ ಮನಲ್ ಚೌಹಾಣ್ ಅವರು ಮೋಹಿತ್ ಜೊತೆಗೂಡಿ 57 ರನ್ಗಳ ನಿರ್ಣಾಯಕ ಜೊತೆಯಾಟವಾಡಿದರು.
ನನಗಿಂತ ಮುಂಚಿತವಾಗಿ ಕ್ರೀಸ್‌ಗೆ ಬಂದು ಮನಲ್ ಚೌಹಾಣ್ ನಿರ್ಮಿಸಿದ ವಾತಾವರಣ ಅದ್ಭುತವಾಗಿತ್ತು. ನಾನು ಹೋಗಿ ಆಟವನ್ನು ಪೂರ್ಣಗೊಳಿಸುವ ಜವಾಬ್ದಾರಿ ಮಾತ್ರ ಇತ್ತು ಎಂದು ಮೋಹಿತ್ ಶ್ಲಾಘಿಸಿದರು. ಅಲ್ಲದೆ, ಅಂತಿಮ ಕ್ಷಣದಲ್ಲಿ ನಾನ್-ಸ್ಟ್ರೈಕರ್ ತುದಿಯಲ್ಲಿದ್ದ ವೆಂಕಟ ಅವರ ಪ್ರೋತ್ಸಾಹವನ್ನು ಸ್ಮರಿಸಿದ ಮೋಹಿತ್, ಇಲ್ಲ, ನಿನ್ನಿಂದ ಸಾಧ್ಯವಿದೆ, ಹೋಗಿ ಆಡು, ನೀನೇ ಪಂದ್ಯ ಮುಗಿಸುತ್ತೀಯ ಎಂದು ವೆಂಕಟ ನಿರಂತರವಾಗಿ ಧೈರ್ಯ ತುಂಬುತ್ತಿದ್ದರು. ಕೊನೆಯ ಎಸೆತದಲ್ಲೂ ನಾವು ಗೆಲ್ಲಬಲ್ಲೆವು ಎಂಬ ಅವರ ನಂಬಿಕೆ ನನ್ನ ಆತ್ಮವಿಶ್ವಾಸವನ್ನು ಇಮ್ಮಡಿಗೊಳಿಸಿತು ಎಂದರು.
10ನೇ ಕ್ರಮಾಂಕದ ಅದೃಷ್ಟ!
ತಮಗೆ 10ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವುದು ಅದೃಷ್ಟದ ಸ್ಥಾನವಾಗಿದೆ ಎಂದು ಹೇಳಿದ ಮೋಹಿತ್, ಪಿಚ್ ಬ್ಯಾಟಿಂಗ್‌ಗೆ ಪೂರಕವಾಗಿದ್ದರಿಂದ ಬೃಹತ್ ಗುರಿ ಬೆನ್ನಟ್ಟುವ ವಿಶ್ವಾಸ ತಂಡದಲ್ಲಿತ್ತು ಎಂದರು. ಆರಂಭದಲ್ಲಿ ನಾಯಕ ಲಕ್ಷ್ಯ ರಾಯ್‌ಚಂದಾನಿ (80 ರನ್) ಮತ್ತು ಆರ್ಯವೀರ್ ಸೆಹ್ವಾಗ್ (58 ರನ್) ಭದ್ರ ಬುನಾದಿ ಹಾಕಿಕೊಟ್ಟಿದ್ದರು. ನಾನು ಬ್ಯಾಟಿಂಗ್‌ಗೆ ಹೋಗುವ ಮುನ್ನ ಕೋಚ್ ನನ್ನ ಬಳಿ ಬಂದು, ನಿನ್ನಿಂದ ಸಾಧ್ಯವಿದೆ, ನಿನ್ನ ಮೇಲೆ ನಂಬಿಕೆಯಿಡು ಎಂದು ಹೇಳಿದ್ದರು. ಹೀಗಾಗಿ ನಾನು ಮೈದಾನದಲ್ಲಿ ಏನಾಗುತ್ತಿದೆ ಅಥವಾ ಮುಂದೇನಾಗಬಹುದು ಎಂದು ಅತಿಯಾಗಿ ಯೋಚಿಸಲಿಲ್ಲ. ಕೇವಲ ಚೆಂಡನ್ನು ನೋಡುತ್ತಾ ನನ್ನ ಶಾಟ್‌ಗಳನ್ನು ಆಡಿದೆ ಎಂದು ತಮ್ಮ ಯಶಸ್ಸಿನ ಗುಟ್ಟನ್ನು ಬಿಚ್ಚಿಟ್ಟರು.
ಇದಕ್ಕೂ ಮುನ್ನ ಬ್ಯಾಟಿಂಗ್ ಮಾಡಿದ್ದ ಪಾಕಿಸ್ತಾನ, ಉಸ್ಮಾನ್ ಖಾನ್ (107), ಅಬ್ದುಲ್ ಖಾದಿರ್ (80) ಮತ್ತು ನಾಯಕ ಫರ್ಹಾನ್ ಯೂಸುಫ್ (63) ಅವರ ಬ್ಯಾಟಿಂಗ್ ಬಲದಿಂದ 337/9 ರನ್ ಗಳಿಸಿತ್ತು. ಭಾರತದ ಪರ ಕಾವ್ಯಾ ಪಟೇಲ್ 4 ಮತ್ತು ಚಿಗುರುಪಾಟಿ ವೆಂಕಟ 3 ವಿಕೆಟ್ ಪಡೆದಿದ್ದರು. ಪಾಕ್ ಪರ ರಿಜ್ವಾನುಲ್ಲಾ 3 ಹಾಗೂ ನಿಕಾಬ್ ಶಫೀಕ್ 2 ವಿಕೆಟ್ ಪಡೆದರೂ ತಂಡವನ್ನು ಸೋಲಿನಿಂದ ಪಾರುಮಾಡಲು ಸಾಧ್ಯವಾಗಲಿಲ್ಲ(ಏಜೆನ್ಸೀಸ್).
