ಪಾಕ್ ಆಟಗಾರ್ತಿಯರ ಕಾಲಲ್ಲಿ ವಿರಾಟ್ ಕೊಹ್ಲಿ ಬ್ರ್ಯಾಂಡ್: ಏಷ್ಯಾಕಪ್‌ನಲ್ಲಿ ವೈರಲ್ ಆದ ‘One8’ ಶೂ! One8 Shoes in Asia Cup

ಕ್ರಿಕೆಟ್​: ಮೈದಾನದಲ್ಲಿ ಪಾಕಿಸ್ತಾನ ಹಾಗೂ ಭಾರತದ ಆಟಗಾರರ ನಡುವೆ ಅಥವಾ ಗಡಿಯಾಚೆ ಏನೇ ವೈಷಮ್ಯವಿರಲಿ, ಆದರೆ ಕ್ರಿಕೆಟ್ ಪ್ರೀತಿ ಮತ್ತು ಫ್ಯಾಷನ್ ವಿಚಾರದಲ್ಲಿ ಯಾವುದೇ ಸಮಸ್ಯೆಯಿಲ್ಲ ಎಂದು ಈಗ ಮತ್ತೊಮ್ಮೆ ಸಾಬೀತಾಗಿದೆ.

ದುಬೈ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಏಷ್ಯಾಕಪ್‌ ಪಂದ್ಯಾವಳಿಯಲ್ಲಿ ಪಾಕಿಸ್ತಾನ ಮಹಿಳಾ ಕ್ರಿಕೆಟ್ ತಂಡದ ಆಟಗಾರ್ತಿಯರು ಟೀಮ್ ಇಂಡಿಯಾದ ಸ್ಟಾರ್‌ ಆಟಗಾರ ವಿರಾಟ್ ಕೊಹ್ಲಿ ಒಡೆತನದ 'One8' ಶೂ (One8 Shoes in Asia Cup) ಗಳನ್ನು ಧರಿಸಿ ಮೈದಾನಕ್ಕಿಳಿದಿರುವುದು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.

ಸೋಮವಾರ (ಸೆ.7) ದುಬೈ ಮೈದಾನದಲ್ಲಿ ನಡೆದ ನಿರ್ಣಾಯಕ ಪಂದ್ಯದಲ್ಲಿ ಪಾಕಿಸ್ತಾನ ತಂಡವು ಹಾಂಗ್ ಕಾಂಗ್ ವಿರುದ್ಧ ಭರ್ಜರಿ ಪ್ರದರ್ಶನ ನೀಡಿತು. ಮೊದಲು ಬ್ಯಾಟ್ ಮಾಡಿದ ಪಾಕಿಸ್ತಾನ ತಂಡವು ನಿಗದಿತ ಓವರ್‌ಗಳಲ್ಲಿ 143 ರನ್ ಕಲೆಹಾಕಿತು.

ಈ ಗುರಿ ಬೆನ್ನಟ್ಟಿದ ಹಾಂಗ್ ಕಾಂಗ್ ತಂಡ ಪಾಕಿಸ್ತಾನದ ಬೌಲಿಂಗ್ ದಾಳಿಯನ್ನು ಎದುರಿಸಲಾಗದೆ ಕೇವಲ 71 ರನ್‌ಗಳಿಗೆ ಶರಣಾಯಿತು. ಪಾಕ್ ಪರ ಮಾರಕ ಬೌಲಿಂಗ್ ದಾಳಿ ನಡೆಸಿದ ನಶ್ರಾ ಸಂಧು ಕೇವಲ 7 ರನ್ ನೀಡಿ ಪ್ರಮುಖ 6 ವಿಕೆಟ್‌ಗಳನ್ನು ಉರುಳಿಸಿ ಮಿಂಚಿದರು.

ಹಾಂಗ್ ಕಾಂಗ್ ವಿರುದ್ಧದ ಈ ಪಂದ್ಯದಲ್ಲಿ ಪಾಕಿಸ್ತಾನಿ ಆಟಗಾರ್ತಿಯರು ಧರಿಸಿದ್ದ ಶೂಗಳೇ ಈಗ ಎಲ್ಲಡೆ ಹೈಲೈಟ್ ಆಗಿವೆ. ಕ್ರಿಕೆಟಿಗರು ವಿರಾಟ್ ಕೊಹ್ಲಿಯ ಬ್ರ್ಯಾಂಡ್‌ಗೆ ಸೇರಿದ One8 ಕವರ್ ಡ್ರೈವ್ 18 X ಕ್ರಿಕೆಟ್ ಶೂಗಳನ್ನು ಧರಿಸಿ ಕಣಕ್ಕಿಳಿದಿದ್ದರು.

ಸೋನಿಕ್ ಬ್ಲೂ, ಜೆರ್ಸಿ ವೈಟ್ ಮತ್ತು ಟ್ರೋಫಿ ಗೋಲ್ಡ್ ಬಣ್ಣಗಳಲ್ಲಿ ಲಭ್ಯವಿರುವ ಈ ಶೂಗಳ ಬೆಲೆ ಸುಮಾರು 13,999 ರೂಪಾಯಿಗಳಷ್ಟಿದೆ. ಉಸಿರಾಡುವ ಮೆಶ್ ಮೇಲ್ಭಾಗ, ಕಾಲ್ಬೆರಳಿನ ಸುತ್ತ ರಕ್ಷಣೆ ಮತ್ತು 11 ಸ್ಪೈಕ್‌ಗಳನ್ನು ಹೊಂದಿರುವ ಈ ಶೂಗಳ ಗುಣಮಟ್ಟದ ಬಗ್ಗೆ ಈಗ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಆದರೆ, ಪಾಕ್ ಆಟಗಾರ್ತಿಯರು ಕೊಹ್ಲಿ ಬ್ರ್ಯಾಂಡ್ ಶೂ ಧರಿಸಿರುವುದನ್ನು ನೋಡಿ ನೆಟ್ಟಿಗರು ತರಹೇವಾರಿ ಕಾಮೆಂಟ್‌ಗಳನ್ನು ಮಾಡುತ್ತಿದ್ದಾರೆ. ಕೆಲವರು ಕ್ರೀಡೆಗೆ ರಾಜಕೀಯವಿಲ್ಲ ಎಂದು ಪ್ರಶಂಸಿಸುತ್ತಿದ್ದರೆ, ಇನ್ನು ಕೆಲವರು ಪಾಕ್​ ಆಟಗಾರ್ತಿಯರನ್ನು ಟ್ರೋಲ್ ಮಾಡುತ್ತಿದ್ದಾರೆ. ಒಟ್ಟಿನಲ್ಲಿ ಈ ಶೂಗಳ ಫೋಟೋಗಳು ಮತ್ತು ವೀಡಿಯೊಗಳು ಈಗ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ಟ್ರೆಂಡ್‌ ಆಗಿವೆ, (ಏಜನ್ಸೀಸ್​).