ತವರು ಭೂಮಿಯಲ್ಲೇ ಪಾಕ್​ ಮಿಸ್ಟರಿ ಸ್ಪಿನ್ನರ್​ ಉಸ್ಮಾನ್​ ತಾರಿಕ್​ಗೆ ಅವಮಾನ! ಮಿಚೆಲ್​ ತೋರಿದ ವರ್ತನೆ ವೈರಲ್​... Usman Tariq

Usman Tariq : ಪಾಕಿಸ್ತಾನ ಸ್ಪಿನ್ನರ್ ಉಸ್ಮಾನ್ ತಾರಿಕ್ ಅವರ ಬೌಲಿಂಗ್ ಶೈಲಿ ಇದೀಗ ಮತ್ತೊಮ್ಮೆ ಚರ್ಚೆಯ ವಿಷಯವಾಗಿದೆ. ನ್ಯೂಜಿಲೆಂಡ್‌ನ ಸ್ಟಾರ್ ಬ್ಯಾಟ್ಸ್‌ಮನ್ ಡ್ಯಾರಿಲ್ ಮಿಚೆಲ್ ಅವರು ಮೈದಾನದಲ್ಲಿ ತಾರಿಕ್​ ಬೌಲಿಂಗ್ ಶೈಲಿಯ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದರು. ಕೊನೆಗೆ ಅಂಪೈರ್ ಮಧ್ಯೆ ಪ್ರವೇಶಿಸಿ ಪರಿಸ್ಥಿತಿಯನ್ನು ಸರಿಪಡಿಸಬೇಕಾದ ಪ್ರಸಂಗ ಜರುಗಿದ್ದು, ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿ ಜಾಲತಾಣದಲ್ಲಿ ವೈರಲ್​ ಆಗುತ್ತಿದೆ.

ಅಂದಹಾಗೆ, ಡ್ಯಾರಿಲ್ ಮಿಚೆಲ್ ಅವರು ಪಾಕಿಸ್ತಾನ ಸೂಪರ್ ಲೀಗ್ ( PSL )-2026 ಟೂರ್ನಮೆಂಟ್‌ನಲ್ಲಿ ರಾವಲ್ಪಿಂಡಿಯನ್ನು ಪ್ರತಿನಿಧಿಸುತ್ತಿದ್ದಾರೆ. ಮತ್ತೊಂದೆಡೆ, ಉಸ್ಮಾನ್ ತಾರಿಕ್ ಕ್ವೆಟ್ಟಾ ಗ್ಲಾಡಿಯೇಟರ್ಸ್ ಪರ ಆಡುತ್ತಿದ್ದಾರೆ. ಶುಕ್ರವಾರ ಕರಾಚಿಯಲ್ಲಿ ನಡೆದ ಪಂದ್ಯದಲ್ಲಿ ಎರಡೂ ತಂಡಗಳು ಮುಖಾಮುಖಿಯಾದವು. ಟಾಸ್ ಗೆದ್ದ ನಂತರ, ರಾವಲ್ಪಿಂಡಿ ಮೊದಲು ಬೌಲಿಂಗ್ ಮಾಡಲು ಆಯ್ಕೆ ಮಾಡಿಕೊಂಡಿತು. ಹೀಗಾಗಿ, ಗ್ಲಾಡಿಯೇಟರ್ಸ್ ಬ್ಯಾಟಿಂಗ್ ಮಾಡಬೇಕಾಯಿತು.

ಗ್ಲಾಡಿಯೇಟರ್ಸ್ ತಂಡ ನಿಗದಿತ 20 ಓವರ್‌ಗಳಲ್ಲಿ 6 ವಿಕೆಟ್‌ಗಳ ನಷ್ಟಕ್ಕೆ 182 ರನ್ ಗಳಿಸಿತು. ಗುರಿಯನ್ನು ಬೆನ್ನಟ್ಟಿದ ರಾವಲ್ಪಿಂಡಿ 17.3 ಓವರ್‌ಗಳಲ್ಲಿ ಕೇವಲ 121 ರನ್‌ಗಳಿಗೆ ಆಲೌಟ್ ಆಯಿತು. ಹೀಗಾಗಿ, ಅವರು ಗ್ಲಾಡಿಯೇಟರ್ಸ್ ವಿರುದ್ಧ 61 ರನ್‌ಗಳ ಬೃಹತ್ ಅಂತರದಿಂದ ಸೋತರು.

ಚೇಸಿಂಗ್‌ನಲ್ಲಿ ನಾಲ್ಕನೇ ಸ್ಥಾನದಲ್ಲಿ ಬ್ಯಾಟಿಂಗ್ ಮಾಡಲು ಬಂದ ರಾವಲ್ಪಿಂಡಿ ಸ್ಟಾರ್ ಬ್ಯಾಟರ್​ ಡ್ಯಾರಿಲ್ ಮಿಚೆಲ್, ಗ್ಲಾಡಿಯೇಟರ್ಸ್ ಬೌಲರ್ ಉಸ್ಮಾನ್ ತಾರಿಕ್ ಅವರ ಬೌಲಿಂಗ್ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು. ತಾರಿಕ್​ ಬೌಲಿಂಗ್ ಮಾಡಿದ ಮೊದಲ ಎಸೆತದಲ್ಲಿ ಮಿಚೆಲ್​ ಅವರು ಪ್ಯಾಡಲ್ ಸ್ವೀಪ್ ಶಾಟ್ ಆಡಿದರು. ಉಸ್ಮಾನ್​ ಅವರು ಬೌಲಿಂಗ್​ ಮಾಡುವಾಗ ಎರಡ್ಮೂರು ಸೆಕೆಂಡ್​ಗಳ ಕಾಲ ನಿಂತು ಬೌಲಿಂಗ್​ ಮಾಡುತ್ತಾರೆ ಅನ್ನೋದು ನಿಮಗೆಲ್ಲರಿಗೂ ಗೊತ್ತೇ ಇದೆ. ಅದೇ ರೀತಿ ವಿರಾಮ ತೆಗೆದುಕೊಂಡು ತಮ್ಮದೇ ಆದ ಶೈಲಿಯಲ್ಲಿ ಉಸ್ಮಾನ್​ ಬೌಲಿಂಗ್ ಮಾಡಿದರು. ಬಾಲ್​ ಎಸೆಯಲು ಕ್ರೀಸ್​ ಬಂದು ವಿರಾಮ್​ ನೀಡುತ್ತಿದ್ದಂತೆ ಮಿಚೆಲ್​ ಅವರು ವಿಕೆಟ್‌ಗಳಿಂದ ಹೊರನಡೆದರು. ಈ ರೀತಿ ಎರಡು ಬಾರಿ ಮಿಚೆಲ್​ ಕ್ರೀಸ್​ನಿಂದ ಹೊರಗೆ ಹೋದರು.

ಎರಡು ಬಾರಿ ಕ್ರೀಸ್​ನಿಂದ ಹೊರಹೋಗಿ ನಾನಿನ್ನೂ ಸಿದ್ಧವಾಗಿಲ್ಲ ಎಂದು ಸೂಚಿಸಿದರು. ಈ ವೇಳೆ ಸ್ವತಃ ಅಂಪೈರ್, ಮಿಚೆಲ್​ ಬಳಿ ಓಡಿಬಂದು ಆಟವನ್ನು ಮುಂದುವರಿಸಲು ಕೇಳಿದರು. ಬಳಿಕ ಮಿಚೆಲ್​ ಅವರು ಇಷ್ಟವಿಲ್ಲದಿದ್ದರೂ ಒಪ್ಪಿಕೊಂಡರು. ಇದರ ವಿಡಿಯೋಗಳು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿವೆ. ಮಿಚೆಲ್​ ಅವರ ಈ ವರ್ತನೆ ಪಾಕಿಸ್ತಾನಿ ಬೌಲರ್‌ಗೆ ಮಾಡಿದ ಅವಮಾನ ಎಂದು ನೆಟ್ಟಿಗರು ಕಾಮೆಂಟ್ ಮಾಡುತ್ತಿದ್ದಾರೆ. ಈ ಪಂದ್ಯದಲ್ಲಿ, ಮಿಚೆಲ್ ಅವರು 32 ಎಸೆತಗಳಲ್ಲಿ 30 ರನ್ ಗಳಿಸಿದರು ಮತ್ತು ಅವರನ್ನು ಸೌದ್ ಶಕೀಲ್ ಔಟ್ ಮಾಡಿದರು.