ಅಪ್ಪಾ, ನಾನು 'ಸೀತಾ ರಾಮ್' ಜಪ ಮಾಡ್ತಿದ್ರೆ, ಪಾಕ್​ ಫ್ಯಾನ್ಸ್ ನಿನ್ನ ಹೆಸ್ರು ಕೂಗ್ತಿದ್ರು: ಕೊನೆಯ ಓವರ್‌ನ ರೋಚಕತೆ ಬಿಚ್ಚಿಟ್ಟ ಸೆಹ್ವಾಗ್ ಪುತ್ರ | Aaryavir Sehwag

Aaryavir Sehwag: ಭಾರತದ 19 ವರ್ಷದೊಳಗಿನವರ (U19) ಕ್ರಿಕೆಟ್ ತಂಡ ಏಷ್ಯಾ ಕಪ್ ಫೈನಲ್‌ನಲ್ಲಿ ಬದ್ಧ ಎದುರಾಳಿ ಪಾಕಿಸ್ತಾನದ ವಿರುದ್ಧ ಕೊನೆಯ ಎಸೆತದಲ್ಲಿ ಒಂದು ವಿಕೆಟ್‌ನ ರೋಚಕ ಜಯ ಸಾಧಿಸಿ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಈ ಐತಿಹಾಸಿಕ ಗೆಲುವಿನ ಸಂಭ್ರಮದ ನಡುವೆ, ಟೀಮ್​ ಇಂಡಿಯಾ ಮಾಜಿ ಆಟಗಾರ ವೀರೇಂದ್ರ ಸೆಹ್ವಾಗ್ ಅವರ ಪುತ್ರ 15 ವರ್ಷದ ಆರ್ಯವೀರ್ ಸೆಹ್ವಾಗ್ ತಮ್ಮ ತಂದೆಯೊಂದಿಗೆ ನಡೆಸಿದ ವಿಡಿಯೋ ಕಾಲ್​ ಸಂಭಾಷಣೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಗಮನ ಸೆಳೆದಿದೆ.

ಪಂದ್ಯ ಮುಗಿದ ಬಳಿಕ ವೀರೇಂದ್ರ ಸೆಹ್ವಾಗ್ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಮಗನೊಂದಿಗಿನ ವಿಡಿಯೋ ಕರೆಯ ತುಣುಕನ್ನು ಹಂಚಿಕೊಂಡಿದ್ದಾರೆ. ವೀರೂ ತಮ್ಮ ಮಗನಿಗೆ ಅಭಿನಂದನೆ ಸಲ್ಲಿಸುತ್ತಿದ್ದಂತೆಯೇ, ಆರ್ಯವೀರ್ ತಮ್ಮ ಸಂತಸವನ್ನು ಹಂಚಿಕೊಂಡರು. ವಿಶೇಷವೆಂದರೆ, ಎದುರಾಳಿ ತಂಡದ ಪ್ರೇಕ್ಷಕರ ಗ್ಯಾಲರಿಯಿಂದಲೂ ಸೆಹ್ವಾಗ್, ಸೆಹ್ವಾಗ್ ಎಂಬ ಘೋಷಣೆಗಳು ಕೇಳಿಬಂದಿದ್ದನ್ನು ಕಂಡು ತಾನು ಆಶ್ಚರ್ಯಚಕಿತನಾದೆ ಎಂದು ಆರ್ಯವೀರ್ ತಮ್ಮ ಅಪ್ಪನ ಬಳಿ ಹೆಮ್ಮೆಯಿಂದ ಹೇಳಿಕೊಂಡರು.

ಒತ್ತಡ ನಿಭಾಯಿಸಲು ಸೀತಾ ರಾಮ್ ಜಪ!

338 ರನ್‌ಗಳ ಬೃಹತ್ ಗುರಿಯನ್ನು ಬೆನ್ನಟ್ಟಿದ ಭಾರತಕ್ಕೆ ಪಂದ್ಯದ ಅಂತಿಮ ಓವರ್​ಗಳು ತುಂಬಾ ಒತ್ತಡದಿಂದ ಕೂಡಿದ್ದವು. ಕೊನೆಯ ಎಸೆತದಲ್ಲಿ ಗೆಲುವಿಗೆ ಮೂರು ರನ್‌ಗಳ ಅವಶ್ಯಕತೆಯಿದ್ದಾಗ ಆಪದ್ಬಾಂಧವನಾಗಿ ಬಂದ ಮೋಹಿತ್ ಉಲ್ವಾ ಬೌಂಡರಿ ಬಾರಿಸುವ ಮೂಲಕ ಟೀಮ್​ ಇಂಡಿಯಾಗೆ ಸ್ಮರಣೀಯ ಗೆಲುವು ತಂದುಕೊಟ್ಟರು.

ಪಂದ್ಯದ ಕೊನೆಯ ಓವರ್‌ನಲ್ಲಿದ್ದಾಗಿನ ದೊಡ್ಡ ಒತ್ತಡವನ್ನು ನಿಭಾಯಿಸಿದ ಬಗ್ಗೆ ಆರ್ಯವೀರ್ ತಂದೆಯೊಂದಿಗೆ ಅನುಭವವನ್ನು ಹಂಚಿಕೊಂಡಿದ್ದಾರೆ. ಕೊನೆಯ ಓವರ್ ನಡೆಯುತ್ತಿದ್ದಾಗ ನಾನು ನಿರಂತರವಾಗಿ ಸೀತಾ ರಾಮ್, ಸೀತಾ ರಾಮ್ ಎಂದು ಜಪಿಸುತ್ತಿದ್ದೆ. ಹೇಗಾದರೂ ಮಾಡಿ ಒಂದು ಬೌಂಡರಿ ಬರಲಿ ಎಂದು ನಾವೆಲ್ಲರೂ ಪ್ರಾರ್ಥಿಸುತ್ತಿದ್ದೆವು ಮತ್ತು ಅದು ಕೊನೆಯ ಎಸೆತದಲ್ಲೇ ಬಂತು ಎಂದು ಆರ್ಯವೀರ್ ವಿಡಿಯೋ ಕರೆಯಲ್ಲಿ ತಮ್ಮ ಮನದಾಳವನ್ನು ಬಿಚ್ಚಿಟ್ಟಿದ್ದಾರೆ. ಮೈದಾನದಲ್ಲಿ ಶಾಂತಚಿತ್ತದಿಂದ ಬ್ಯಾಟಿಂಗ್ ಮಾಡುವ ಆರ್ಯವೀರ್, ಡ್ರೆಸ್ಸಿಂಗ್ ರೂಮ್‌ನಲ್ಲಿ ಪಂದ್ಯದ ರೋಚಕತೆಗೆ ಎಷ್ಟರಮಟ್ಟಿಗೆ ಒಳಗಾಗಿದ್ದರು ಎಂಬುದು ಈ ಮಾತಿನಿಂದ ಸ್ಪಷ್ಟವಾಗುತ್ತದೆ.

ವೀರೂ ಪುತ್ರನಿಗೆ ಸ್ಮರಣೀಯ ಟೂರ್ನಿ!

ಇಡೀ ಏಷ್ಯಾ ಕಪ್ ಟೂರ್ನಿಯಲ್ಲಿ ಆರ್ಯವೀರ್ ಸೆಹ್ವಾಗ್ ಭಾರತದ ಪರ ಅತ್ಯುತ್ತಮ ಪ್ರದರ್ಶನ ನೀಡಿದ ಆಟಗಾರನಾಗಿ ಹೊರಹೊಮ್ಮಿದರು. ಆಡಿದ ಐದು ಇನ್ನಿಂಗ್ಸ್‌ಗಳಿಂದ 90.25ರ ಅದ್ಭುತ ಸರಾಸರಿಯಲ್ಲಿ ಒಟ್ಟು 361 ರನ್ ಕಲೆಹಾಕುವ ಮೂಲಕ ಟೂರ್ನಿಯ ಗರಿಷ್ಠ ರನ್ ಸ್ಕೋರರ್ ಎನಿಸಿಕೊಂಡರು. ಇದರಲ್ಲಿ ಒಂದು ಭರ್ಜರಿ ಶತಕ ಮತ್ತು ಮೂರು ಅರ್ಧಶತಕಗಳು ಸೇರಿವೆ. ಈ ಅಮೋಘ ಪ್ರದರ್ಶನಕ್ಕಾಗಿ ಅವರಿಗೆ ಸರಣಿ ಶ್ರೇಷ್ಠ ಪ್ರಶಸ್ತಿ ಒಲಿದುಬಂದಿದೆ.

ಯುಎಇ ವಿರುದ್ಧದ ಪಂದ್ಯದಲ್ಲಿ 160 ರನ್ ಸಿಡಿಸಿದ್ದ ಆರ್ಯವೀರ್, ಟೂರ್ನಿಯ ಅತ್ಯಧಿಕ ವೈಯಕ್ತಿಕ ಮೊತ್ತ ದಾಖಲಿಸಿದ್ದರು. ನಂತರ ಮಲೇಷ್ಯಾ ವಿರುದ್ಧ ಅಜೇಯ 70 ರನ್ ಹಾಗೂ ಅಫ್ಘಾನಿಸ್ತಾನ ವಿರುದ್ಧದ ಸೆಮಿಫೈನಲ್‌ನಲ್ಲಿ 51 ರನ್ ಗಳಿಸಿ ತಂಡವನ್ನು ಫೈನಲ್‌ಗೆ ಕೊಂಡೊಯ್ಯುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಪಾಕಿಸ್ತಾನ ವಿರುದ್ಧದ ಅಂತಿಮ ಹಣಾಹಣಿಯಲ್ಲಿ ಆರ್ಯವೀರ್ 61 ಎಸೆತಗಳಲ್ಲಿ 9 ಬೌಂಡರಿಗಳ ನೆರವಿನಿಂದ 58 ರನ್ ಗಳಿಸಿದರು. ಪಾಕಿಸ್ತಾನದ ವೇಗಿ ಅಲಿ ರಜಾ ಅವರ ಎಸೆತವೊಂದು ಮುಂಗೈಗೆ ಬಡಿದು ನೋವಾದರೂ, ಅದಕ್ಕೆ ಜಗ್ಗದೆ ಬ್ಯಾಟಿಂಗ್ ಮುಂದುವರಿಸಿ, ನಾಯಕ ಲಕ್ಷ್ಯ ರಾಯಚಂದಾನಿ ಅವರೊಂದಿಗೆ ಮೊದಲ ವಿಕೆಟ್‌ಗೆ 97 ರನ್‌ಗಳ ಭದ್ರ ಬುನಾದಿ ಹಾಕಿಕೊಟ್ಟರು.

ಕೊಹ್ಲಿ ಸ್ಟೈಲ್​ ಕಾಪಿ!

ಫೈನಲ್ ಪಂದ್ಯದಲ್ಲಿ ಅರ್ಧಶತಕ ಪೂರೈಸಿದ ತಕ್ಷಣ ಆರ್ಯವೀರ್ ಮಾಡಿದ ಸಂಭ್ರಮಾಚರಣೆ ಕ್ರಿಕೆಟ್ ಅಭಿಮಾನಿಗಳ ಮನಗೆದ್ದಿದೆ. 2018ರಲ್ಲಿ ಪರ್ತ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ತಮ್ಮ 25ನೇ ಟೆಸ್ಟ್ ಶತಕ ಬಾರಿಸಿದಾಗ ವಿರಾಟ್ ಕೊಹ್ಲಿ ನನ್ನ ಬ್ಯಾಟ್ ಮಾತನಾಡಲಿ ಎಂಬಂತೆ ಕೈಸನ್ನೆ ಮಾಡಿ ಸಂಭ್ರಮಿಸಿದ್ದರು. ಅದೇ ಐಕಾನಿಕ್ ಶೈಲಿಯನ್ನು ಆರ್ಯವೀರ್ ಕಾಪಿ ಮಾಡುವ ಮೂಲಕ ಗಮನ ಸೆಳೆದರು. ಒಟ್ಟಾರೆಯಾಗಿ, 15ರ ಹರೆಯದಲ್ಲೇ ಅಂತಾರಾಷ್ಟ್ರೀಯ ಮಟ್ಟದ ಒತ್ತಡವನ್ನು ಸಮರ್ಥವಾಗಿ ಎದುರಿಸಿ, ತಂಡದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿರುವ ಆರ್ಯವೀರ್ ಸೆಹ್ವಾಗ್ ಭಾರತೀಯ ಕ್ರಿಕೆಟ್‌ನ ಭವಿಷ್ಯದ ಭರವಸೆಯ ತಾರೆಯಾಗಿ ಹೊರಹೊಮ್ಮಿದ್ದಾರೆ ಎಂದರೆ ಅತಿಶಯೋಕ್ತಿ ಆಗದು(ಏಜೆನ್ಸೀಸ್).