IPL: ಇಂಪ್ಯಾಕ್ಟ್ ಪ್ಲೇಯರ್ ನಿಯಮಕ್ಕೆ ಕತ್ತರಿ? ಹತ್ತು ತಂಡಗಳ ಅಭಿಪ್ರಾಯ ಕೇಳಿದ BCCI! Impact Player

ಐಪಿಎಲ್​: ಕ್ರಿಕೆಟ್ ಲೋಕದಲ್ಲಿ ಸದಾ ಚರ್ಚೆಗೆ ಗ್ರಾಸವಾಗುವ, ಅತಿ ಹೆಚ್ಚು ವಿವಾದ ಸೃಷ್ಟಿಸಿರುವ ಇಂಡಿಯನ್ ಪ್ರೀಮಿಯರ್ ಲೀಗ್‌ (IPL) ನ ಇಂಪ್ಯಾಕ್ಟ್ ಪ್ಲೇಯರ್ (Impact Player) ನಿಯಮದ ಅಳಿವು-ಉಳಿವಿನ ಪ್ರಶ್ನೆ ಈಗ ಗಂಭೀರ ಹಂತ ತಲುಪಿದೆ.

ಈ ವಿವಾದಾತ್ಮಕ ನಿಯಮವನ್ನು ಮುಂದಿನ ಸೀಸನ್‌ಗಳಲ್ಲೂ ಮುಂದುವರಿಸಬೇಕೇ? ಅಥವಾ ಬೇಡವೇ? ಎಂಬುದರ ಬಗ್ಗೆ ಅಂತಿಮ ನಿರ್ಧಾರ ಕೈಗೊಳ್ಳಲು ಬಿಸಿಸಿಐ (BCCI) ಮುಂದಾಗಿದ್ದು, ಎಲ್ಲಾ 10 ಫ್ರಾಂಚೈಸಿಗಳಿಂದ ಲಿಖಿತ ಅಭಿಪ್ರಾಯ ಹಾಗೂ ಪ್ರತಿಕ್ರಿಯೆ ನೀಡುವಂತೆ ಕೋರಿದೆ.

2023ರಲ್ಲಿ ಐಪಿಎಲ್‌ಗೆ ಅಳವಡಿಸಲ್ಪಟ್ಟ ಈ ನಿಯಮ, ಬಂದ ಕೇವಲ ಕೆಲವೇ ದಿನಗಳಲ್ಲಿ ತೀವ್ರ ಪರ-ವಿರೋಧ ಚರ್ಚೆಗಳಿಗೆ ಕಾರಣವಾಗಿತ್ತು. ತಂಡಗಳಿಗೆ ರಣತಂತ್ರ ರೂಪಿಸಲು ದೊಡ್ಡ ಮಟ್ಟದ ಸ್ವಾತಂತ್ರ್ಯ ನೀಡಿದೆ ಎಂದು ಕೆಲವರು ಇದನ್ನು ಸಮರ್ಥಿಸಿದರೆ, ಇದು ಕ್ರಿಕೆಟ್‌ನ ಅಸಲಿ ರೋಚಕತೆಯನ್ನು ಹಾಳುಮಾಡುತ್ತಿದೆ ಎಂದು ದಿಗ್ಗಜ ಆಟಗಾರರು ಮತ್ತು ವಿಮರ್ಶಕರು ಆಕ್ರೋಶ ಹೊರಹಾಕಿದ್ದರು.

ಮಾಹಿತಿ ಪ್ರಕಾರ, ಬಿಸಿಸಿಐ ಎಲ್ಲಾ ಫ್ರಾಂಚೈಸಿಗಳಿಗೆ ಆಗಸ್ಟ್ 31ರ ಸೋಮವಾರದ ಗಡುವು ನೀಡಿ, ಇಂಪ್ಯಾಕ್ಟ್ ಪ್ಲೇಯರ್ ನಿಯಮದ ಸಾಧಕ-ಬಾಧಕಗಳ ಬಗ್ಗೆ ವಿಸ್ತೃತ ಮೌಲ್ಯಮಾಪನವನ್ನು ಸಲ್ಲಿಸುವಂತೆ ಸೂಚಿಸಿದೆ. ಮಂಡಳಿಯ ಈ ನಡೆ ಐಪಿಎಲ್ ಇತಿಹಾಸದಲ್ಲೇ ಅತ್ಯಂತ ಮಹತ್ವದ ಬದಲಾವಣೆಗೆ ಮುನ್ಸೂಚನೆ ನೀಡುವ ಸಾಧ್ಯತೆಯಿದೆ.

ಈ ವ್ಯವಸ್ಥೆಯಡಿ ಪ್ರತಿ ತಂಡವು ಟಾಸ್ ಮಾಡುವ ವೇಳೆ ಪ್ಲೇಯಿಂಗ್ ಇಲೆವೆನ್ ಜತೆಗೆ ಐದು ಮಂದಿ ಬದಲಿ ಆಟಗಾರರ ಪಟ್ಟಿಯನ್ನು ನೀಡಬೇಕಾಗುತ್ತದೆ. ಪಂದ್ಯದ ಸಂದರ್ಭದಲ್ಲಿ, ಅಂದರೆ ಓವರ್ ಮುಗಿದ ಬಳಿಕ, ವಿಕೆಟ್ ಬಿದ್ದಾಗ ಅಥವಾ ಇನ್ನಿಂಗ್ಸ್ ಮಧ್ಯದಲ್ಲಿ ಈ ಪಟ್ಟಿಯಿಂದ ಯಾವುದೇ ಆಟಗಾರನನ್ನು 'ಇಂಪ್ಯಾಕ್ಟ್ ಪ್ಲೇಯರ್' ಆಗಿ ಕಣಕ್ಕಿಳಿಸಬಹುದು. ಒಮ್ಮೆ ಮೈದಾನಕ್ಕಿಳಿದ ಆಟಗಾರ ಇಡೀ ಪಂದ್ಯವನ್ನಾಡಿದರೆ, ಹೊರಡುವ ಆಟಗಾರ ಮತ್ತೆ ಮೈದಾನಕ್ಕೆ ಮರಳಲು ಅವಕಾಶವಿರುವುದಿಲ್ಲ.

ಟಿ20 ಕ್ರಿಕೆಟ್‌ಗೆ ಹೊಸ ಆಯಾಮ ನೀಡುವ ಉದ್ದೇಶದಿಂದ ಈ ತಂತ್ರಜ್ಞಾನ ತರಲಾಗಿದ್ದರೂ, ಇದು ಸಾಂಪ್ರದಾಯಿಕ ಆಲ್‌ರೌಂಡರ್‌ಗಳ ಮೌಲ್ಯವನ್ನು ಸಂಪೂರ್ಣವಾಗಿ ಹಳ್ಳ ಹಿಡಿಸುತ್ತಿದೆ ಎಂಬ ಆರೋಪವಿದೆ.

ತಂಡಗಳಿಗೆ ಹೆಚ್ಚುವರಿ ಬ್ಯಾಟ್ಸ್‌ಮನ್ ಅಥವಾ ಬೌಲರ್ ಸಿಗುವುದರಿಂದ ಮೈದಾನದಲ್ಲಿ ಆಲ್‌ರೌಂಡರ್‌ಗಳ ಪಾತ್ರ ದಿನದಿಂದ ದಿನಕ್ಕೆ ಕಂದಿಹೋಗುತ್ತಿದೆ. ಅದರಲ್ಲೂ ಬೌಲರ್‌ಗಳ ಪಾಲಿಗೆ ಐಪಿಎಲ್ ಅಂದರೆ ಅಕ್ಷರಶಃ ನರಕದಂತಾಗಿದೆ ಎಂದು ಹಲವರು ಬೇಸರ ವ್ಯಕ್ತಪಡಿಸಿದ್ದಾರೆ.

ಈ ಹಿಂದೆ ಕನಿಷ್ಠ ಇನ್ನೊಂದು ಸೀಸನ್‌ವರೆಗೆ ಈ ನಿಯಮ ಮುಂದುವರಿಯಲಿದೆ ಎಂದೇ ಭಾವಿಸಲಾಗಿತ್ತು. ಆದರೆ, ಈಗ ಫ್ರಾಂಚೈಸಿಗಳಿಂದಲೇ ನೇರವಾಗಿ ಪ್ರತಿಕ್ರಿಯೆ ಕೇಳಿರುವುದು ಬಿಸಿಸಿಐ ಮಂಡಳಿಯು ತನ್ನ ಹಳೆಯ ನಿರ್ಧಾರವನ್ನು ಮರುಪರಿಶೀಲಿಸಲು ಗಂಭೀರವಾಗಿ ಸಿದ್ಧವಾಗಿದೆ ಎಂಬುದನ್ನು ತೋರಿಸಿಕೊಟ್ಟಿದೆ.

ಅಭಿಮಾನಿಗಳು ಕೂಡ ಈ ನಿಯಮ ಬದಲಾಗಬೇಕು ಎಂದು ಸೋಷಿಯಲ್ ಮೀಡಿಯಾದಲ್ಲಿ ಆಗಾಗ್ಗೆ ಧ್ವನಿ ಎತ್ತುತ್ತಿದ್ದು, ಬಿಸಿಸಿಐ ಅಂತಿಮವಾಗಿ ಯಾವ ತೀರ್ಪು ನೀಡಲಿದೆ ಎಂಬುದನ್ನು ಕಾದು ನೋಡಬೇಕಿದೆ, (ಏಜನ್ಸೀಸ್​).