ನಿನ್ನೆ ಪಂದ್ಯದಲ್ಲಿ ನೀವಿದನ್ನು ಗಮನಿಸಿದ್ರಾ? ಎಲ್ಲರನ್ನೂ ಅಚ್ಚರಿಗೆ ದೂಡಿದ ಕೊಹ್ಲಿಯ ಈ ಮ್ಯಾಜಿಕ್​! ಸುಮ್ನೇ ಕಿಂಗ್ ಅಂತಾರಾ? Virat Kohli ​

ತಿರುವನಂತಪುರಂ: ನಿನ್ನೆ (ಸೆ.27) ವೆಸ್ಟ್ ಇಂಡೀಸ್ ವಿರುದ್ಧ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ಟೀಮ್​ ಇಂಡಿಯಾ ಭರ್ಜರಿ ಜಯ ದಾಖಲಿಸಿತು. ಚೇಸ್​ ಮಾಸ್ಟರ್​, ದಾಖಲೆಗಳ ಸರದಾರ ಹಾಗೂ ರನ್​ ಮೆಷಿನ್​ ವಿರಾಟ್​​ ಕೊಹ್ಲಿ ಮತ್ತು ನಾಯಕ ಶುಭಮಾನ್​ ಗಿಲ್ ಅವರ ಅದ್ಭುತ ಶತಕಗಳ ಮೂಲಕ ಟೀಮ್ ಇಂಡಿಯಾ ಗೆಲುವು ದಾಖಲಿಸಿತು. ಇದು ಒಂದು ಕಡೆಯಾದರೆ, ಈ ಪಂದ್ಯದ ವೇಳೆ ನಡೆದ ಒಂದು ವಿಶೇಷ ಹಾಗೂ ಅಚ್ಚರಿಯ ಸಂಗತಿಯು ಇನ್ನೊಂದೆಡೆ ಎಲ್ಲರ ಗಮನ ಸೆಳೆದಿದೆ.

ಅಂದಹಾಗೆ, ಭಾರತ ಹಾಗೂ ವೆಸ್ಟ್ ಇಂಡೀಸ್ ನಡುವೆ ನಡೆಯುತ್ತಿರುವ ಮೂರು ಪಂದ್ಯಗಳ ಏಕದಿನ ಸರಣಿಯನ್ನು ಅಭಿಮಾನಿಗಳು ವಿಶ್ವಕಪ್ ಪಂದ್ಯಗಳಂತೆ ಭಾವಿಸುತ್ತಿದ್ದಾರೆ. ಇದಕ್ಕೆ ಮುಖ್ಯ ಕಾರಣ ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ. ಏಕೆಂದರೆ, ಈ ಜೋಡಿ ಏಕದಿನ ಮಾದರಿಯಲ್ಲಿ ಮಾತ್ರ ಆಡುತ್ತಿದ್ದು, ಟಿ20 ಮತ್ತು ಟೆಸ್ಟ್​ ಕ್ರಿಕೆಟ್​ಗೆ ಗುಡ್​ಬೈ ಹೇಳಿದೆ.

ನಿನ್ನೆಯ ಪಂದ್ಯದಲ್ಲಿ ಎಂದಿನಂತೆ ಅಬ್ಬರಿಸಿದ ವಿರಾಟ್ ಕೊಹ್ಲಿ ಕೇವಲ 88 ಎಸೆತಗಳಲ್ಲಿ 10 ಬೌಂಡರಿ ಹಾಗೂ 9 ಭರ್ಜರಿ ಸಿಕ್ಸರ್‌ಗಳ ನೆರವಿನಿಂದ ಅಜೇಯ 139 ರನ್ ಸಿಡಿಸಿ ತಂಡವನ್ನು ಏಕಾಂಗಿಯಾಗಿ ಗೆಲುವಿನ ದಡ ಸೇರಿಸಿದರು. ಇದರೊಂದಿಗೆ ನಾಯಕ ಶುಭಮಾನ್ ಗಿಲ್ ಕೂಡ ಭರ್ಜರಿ ಶತಕ ಸಿಡಿಸಿ ಮಿಂಚಿದರು.

ಗಿಲ್ ಶತಕಕ್ಕಿಂತಲೂ ವಿರಾಟ್ ಕೊಹ್ಲಿ ಅವರ ಆಕ್ರಮಣಕಾರಿ ಆಟ ಹಾಗೂ ಶತಕವೇ ಪಂದ್ಯದಲ್ಲಿ ಹೆಚ್ಚು ಹೈಲೈಟ್ ಆಯಿತು. ಇಬ್ಬರೂ ಆಟಗಾರರು ಆರಂಭದಲ್ಲಿ 50 ಓವರ್‌ಗಳ ಕಾಲ ಫೀಲ್ಡಿಂಗ್ ಮಾಡಿದ್ದರು. ನಂತರ ಓಪನರ್ ಆಗಿ ಕಣಕ್ಕಿಳಿದ ಗಿಲ್ ಹೆಚ್ಚು ಹೊತ್ತು ಕ್ರೀಸ್‌ನಲ್ಲಿ ನಿಂತು ಬ್ಯಾಟಿಂಗ್ ಮಾಡಿದ ಕಾರಣ ಸ್ನಾಯು ಸೆಳೆತದಿಂದ ಬಳಲಬೇಕಾಯಿತು. ಆದರೆ, ಗಿಲ್ ಅವರಿಗಿಂತ ಹೆಚ್ಚು ಕಾಲ ಅಂದರೆ 50 ಓವರ್ ಫೀಲ್ಡಿಂಗ್ ಮುಗಿಸಿ, ಬಳಿಕ ಕ್ರೀಸ್‌ನಲ್ಲಿ ದೀರ್ಘಕಾಲ ನಿಂತು ಅಜೇಯ ಶತಕ ಸಿಡಿಸಿ ಗೆಲುವಿನ ರೂವಾರಿಯಾದ 37 ವರ್ಷದ ವಿರಾಟ್ ಕೊಹ್ಲಿಗೆ ಮಾತ್ರ ಯಾವುದೇ ದಣಿವಿನ ಲಕ್ಷಣಗಳು ಕಾಣಿಸಲಿಲ್ಲ.

ತಮ್ಮ ವಯಸ್ಸಿನ ಹಂಗಿಲ್ಲದೆ 37ರ ಹರೆಯದಲ್ಲೂ ವಿರಾಟ್ ಕೊಹ್ಲಿ ಪ್ರದರ್ಶಿಸಿದ ಈ ಅದ್ಭುತ ಫಿಟ್‌ನೆಸ್ ಎಲ್ಲರ ಹುಬ್ಬೇರಿಸುವಂತೆ ಮಾಡಿದೆ. ಕೇವಲ 27 ವರ್ಷ ವಯಸ್ಸಿನ ಯುವ ಆಟಗಾರ ಹಾಗೂ ಟೀಮ್ ಇಂಡಿಯಾದ ನಾಯಕನಾಗಿರುವ ಶುಭಮಾನ್ ಗಿಲ್, ದೀರ್ಘಕಾಲ ಬ್ಯಾಟಿಂಗ್ ಮಾಡಿದಾಗ ಸುಸ್ತಾಗಿ ಸೆಳೆತಕ್ಕೆ ಒಳಗಾಗಿದ್ದು ಚರ್ಚೆಗೆ ಗ್ರಾಸವಾಗಿದೆ. ತಿರುವನಂತಪುರದ ಬಿಸಿಲಿನ ವಾತಾವರಣವೂ ಇದಕ್ಕೆ ಕಾರಣವಾಗಿರಬಹುದು, ಆದರೆ, ಭಾರತ ತಂಡದ ನಾಯಕನಾಗಿರುವ ಗಿಲ್ ಭವಿಷ್ಯದಲ್ಲಿ ದೊಡ್ಡ ಮಟ್ಟದಲ್ಲಿ ಬೆಳೆಯಬೇಕಾದರೆ ಫಿಟ್‌ನೆಸ್ ವಿಷಯದಲ್ಲಿ ಮತ್ತಷ್ಟು ಗಮನಹರಿಸುವುದು ಅತ್ಯಗತ್ಯವಾಗಿದೆ.

ಭಾರತೀಯ ಕ್ರಿಕೆಟ್ ಅಭಿಮಾನಿಗಳ ಆಶಯದಂತೆ ಯುವ ಆಟಗಾರ ಗಿಲ್ ಅವರು ವಿರಾಟ್ ಕೊಹ್ಲಿ ಅವರನ್ನು ಮಾದರಿಯಾಗಿಟ್ಟುಕೊಳ್ಳಬೇಕು. ಯಾವ ಮುಜುಗರವೂ ಇಲ್ಲದೆ ಕೊಹ್ಲಿ ಅವರಿಂದ ಫಿಟ್‌ನೆಸ್ ಸಲಹೆಗಳನ್ನು ಪಡೆದುಕೊಂಡು ತಮ್ಮ ದೈಹಿಕ ಸಾಮರ್ಥ್ಯವನ್ನು ಸುಧಾರಿಸಿಕೊಳ್ಳಬೇಕು. ಈ ಸಣ್ಣ ಸಮಸ್ಯೆಯನ್ನು ಯಶಸ್ವಿಯಾಗಿ ಮೆಟ್ಟಿ ನಿಂತರೆ ಮಾತ್ರ ಗಿಲ್ ತಮ್ಮ ಸುದೀರ್ಘ ಕ್ರಿಕೆಟ್ ಜೀವನದಲ್ಲಿ ಇನ್ನಷ್ಟು ಎತ್ತರಕ್ಕೆ ಏರಲು ಸಾಧ್ಯ ಎಂಬುದನ್ನು ಈ ಪಂದ್ಯದ ಘಟನೆಯು ಸ್ಪಷ್ಟವಾಗಿ ತೋರಿಸಿಕೊಟ್ಟಿದೆ. ಇನ್ನೊಂದೆಡೆ ಕೊಹ್ಲಿಯ ಫಿಟ್​ನೆಸ್​ ನೋಡಿದ ಅಭಿಮಾನಿಗಳು ಕಿಂಗ್​ ಯಾವತ್ತಿದ್ರೂ ಕಿಂಗ್​ ಎಂದು ಕೊಂಡಾಡುತ್ತಿದ್ದಾರೆ, (ಏಜೆನ್ಸೀಸ್​).