ಧಮ್​​ ಹೊಡೆದು ಸಿಕ್ಕಿಬಿದ್ದ ಜಿಟಿ ಬೌಲರ್​ ರಬಾಡ! ಕ್ರಮ ತೆಗೆದುಕೊಳ್ತಾರಾ? IPL​ ನಿಯಮ ಏನಿದೆ? Kagiso Rabada

Kagiso Rabada : ಗುಜರಾತ್ ಟೈಟಾನ್ಸ್ ತಂಡದ ಸ್ಟಾರ್ ಬೌಲರ್ ಕಗಿಸೊ ರಬಾಡ ಇದೀಗ ವಿವಾದ ಒಂದಕ್ಕೆ ಸಿಲುಕಿದ್ದಾರೆ. ತಮ್ಮ ತಂಡದ ಸದಸ್ಯರು ತಂಗಿರುವ ಹೋಟೆಲ್​ನಲ್ಲಿ ಸಿಗರೇಟ್ ಸೇದುವ ಮೂಲಕ ಕ್ರೀಡಾಭಿಮಾನಿಗಳ ಕೆಂಗಣ್ಣಿಗೆ ರಬಾಡ ಗುರಿಯಾಗಿದ್ದಾರೆ. 

ರಬಾಡ ಅವರು ಹೋಟೆಲ್​ನ ಕಾಪೌಂಡ್​ಗೆ ಅಂಟಿಕೊಂಡಂತೆ ಕುಳಿತು ಸಿಗರೇಟ್ ಸೇದುತ್ತಿದ್ದಾರೆ. ಈ ದೃಶ್ಯವನ್ನು ಹೋಟೆಲ್​ನ ಮೇಲ್ಭಾಗದಿಂದ ಯಾರೋ ತಮ್ಮ ಮೊಬೈಲ್​ನಲ್ಲಿ ರೆಕಾರ್ಡ್​ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ರಬಾಡ ಜೊತೆ ತಂಡದ ಸಹಾಯಕ ಸಿಬ್ಬಂದಿಯೂ ಸಹ ಕಾಣಿಸಿಕೊಂಡಿದ್ದಾರೆ. ರಬಾಡ ಸಿಗರೇಟ್​ ಸೇದುವಾಗ ಎಂಟ್ರಿಕೊಟ್ಟ ರಶೀದ್​ ಖಾನ್​ ಅಸಮಾಧಾನ ವ್ಯಕ್ತಪಡಿಸುವುದನ್ನು ವಿಡಿಯೋದಲ್ಲಿ ಕಾಣಬಹುದು. ಸಹ ಆಟಗಾರರು ಕೂಡ ರಬಾಡ ವರ್ತನೆಯ ವಿರುದ್ಧ ಅಸಮಾಧಾನ ಹೊರ ಹಾಕಿದ್ದಾರೆ ಎನ್ನಲಾಗಿದೆ.

ರಬಾಡ ಸಿಗರೇಟ್​ ಸೇದುತ್ತಿರುವ ವಿಡಿಯೋ ತುಣುಕು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದು, ಅದನ್ನು ನೋಡಿದ ಅಭಿಮಾನಿಗಳು ರಬಾಡ ವಿರುದ್ಧ ಕ್ರಮ ಕೈಗೊಳ್ಳುತ್ತಾರೆಯೇ ಎಂದು ಆಶ್ಚರ್ಯ ವ್ಯಕ್ತಪಡಿಸುತ್ತಿದ್ದಾರೆ. ಆದರೆ, ಐಪಿಎಲ್ ಒಪ್ಪಂದದಲ್ಲಿ ಧೂಮಪಾನದ ಮೇಲೆ ಯಾವುದೇ ಸ್ಪಷ್ಟ ನಿಷೇಧವಿಲ್ಲ. ಇದರರ್ಥ ಸಿಗರೇಟ್ ಸೇದುವುದು ನಿಯಮಗಳಿಗೆ ವಿರುದ್ಧ ಎಂದು ಹೇಳಲಾಗದು. ಆದಾಗ್ಯೂ, ಆಟಗಾರರ ಫಿಟ್​ನೆಸ್​ ಮತ್ತು ವೃತ್ತಿಪರ ನಡವಳಿಕೆಯನ್ನು ಗಮನದಲ್ಲಿಟ್ಟುಕೊಂಡು ಇದು ಟೀಕೆಗೆ ಕಾರಣವಾಗುತ್ತಿದೆ.

ಅಂದಹಾಗೆ, ರಬಾಡ ಈ ಹಿಂದೆ ಡೋಪಿಂಗ್ ಉಲ್ಲಂಘನೆ ಮಾಡಿರುವುದರಿಂದ, ಬಿಸಿಸಿಐ ಡೋಪಿಂಗ್ ವಿರೋಧಿ ವಿಭಾಗವು ಈ ಘಟನೆಯನ್ನು ಪರಿಶೀಲಿಸುವ ಸಾಧ್ಯತೆಯಿದೆ. ರಬಾಡ ಅವರು ಬಳಸಿದ್ದ ಕೇವಲ ಸಿಗರೇಟ್ ಮಾತ್ರವೇ? ಅಥವಾ ಬೇರೆ ಯಾವುದಾದರೂ ನಿಷೇಧಿತ ವಸ್ತುವೇ? ಎಂದು ನಿರ್ಧರಿಸಬೇಕಾಗುತ್ತದೆ. ಸದ್ಯ ರಬಾಡ ಮಾತ್ರ ಸಿಗರೇಟ್​ ವಿಚಾರವಾಗಿ ಭಾರಿ ಸುದ್ದಿಯಾಗಿದ್ದಾರೆ.