ಈವರೆಗೂ ಗೌತಿಯನ್ನು ಬೈಯುತ್ತಿದ್ದವರು ನಿನ್ನೆ ಅವರ​ ಪ್ಲಾನ್​ ನೋಡಿ ಗಪ್​ಚುಪ್: ಗಂಭೀರ ಹೆಣೆದ ಬಲೆಗೆ ಬಿತ್ತು ಇಂಗ್ಲೆಂಡ್​​! Gautam Gambhir

Gautam Gambhir : ನಿನ್ನೆ (ಮಾರ್ಚ್​ 06) ಇಂಗ್ಲೆಂಡ್ ವಿರುದ್ಧ ನಡೆದ ನಿರ್ಣಾಯಕ ಸೆಮಿಫೈನಲ್ ಪಂದ್ಯದಲ್ಲಿ ಭಾರತ ಅಂತಿಮ ಹಂತದಲ್ಲಿ ರೋಚಕ ಗೆಲುವು ಸಾಧಿಸಿತು. ಕೇವಲ ಏಳು ರನ್‌ಗಳ ಅಂತರದಿಂದ ಟೀಮ್​ ಇಂಡಿಯಾ ಗೆಲುವು ಸಾಧಿಸಿತು. ಈ ಗೆಲುವಿಗೆ ಅದ್ಭುತ ಬ್ಯಾಟಿಂಗ್​, ಫೀಲ್ಡಿಂಗ್​ ಹಾಗೂ ಬೌಲಿಂಗ್ ಈ ಮೂರೂ ಕಾರಣ. ಅಷ್ಟೇ ಇಲ್ಲದೇ ಇನ್ನೂ ಒಂದು ಕಾರಣವಿದೆ. ಅದೇನೆಂದರೆ, ನಿನ್ನೆಯ ಪಂದ್ಯದಲ್ಲಿ ಹೆಡ್​ ಕೋಚ್​ ಗೌತಮ್​ ಗಂಭೀರ್​ ಅವರ ಪ್ಲಾನ್​ ಫಲ ನೀಡಿದೆ.​

ಕೆಲವು ತಿಂಗಳ ಹಿಂದೆ, ಟೀಮ್ ಇಂಡಿಯಾ ಕೋಚ್ ಗೌತಮ್ ಗಂಭೀರ್ ಒಂದು ಹೇಳಿಕೆ ನೀಡಿದ್ದರು. ಅದೇನೆಂದರೆ, ಶಾರ್ಟ್ ಫಾರ್ಮ್ಯಾಟ್‌ನಲ್ಲಿ, ವಿಶೇಷವಾಗಿ ಮಧ್ಯಮ ಕ್ರಮಾಂಕದಲ್ಲಿ, ಆಟಗಾರರನ್ನು ಪರಿಸ್ಥಿತಿಗಳಿಗೆ ಅನುಗುಣವಾಗಿ ಕಳುಹಿಸಬೇಕು ಎಂದು ಗಂಭೀರ್ ಹೇಳಿದ್ದರು. ತಮ್ಮ ಈ ಪ್ಲಾನ್​ನಿಂದಾಗಿ ಕೆಲವು ಪಂದ್ಯಗಳು ಕೈ ತಪ್ಪಿದರು ಕೂಡ ಈ ಪ್ಲಾನ್​ ಅನ್ನು ಬದಲಾಯಿಸುವ ಯಾವುದೇ ಉದ್ದೇಶವಿಲ್ಲ ಎಂದು ಗಂಭೀರ್ ಸ್ಪಷ್ಟಪಡಿಸಿದರು. ಆ ಸಮಯದಲ್ಲಿ, ಗಂಭೀರ್​ ಮಾಡಿದ್ದ ಈ ಒಂದು ಕಾಮೆಂಟ್ ಭಾರಿ ಚರ್ಚೆಗೆ ಗ್ರಾಸವಾಗಿತ್ತು.

ಆದರೆ, ನಿನ್ನೆ ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ, ಗಂಭೀರ್ ಅವರ ತಂತ್ರವು ಸೂಪರ್ ಹಿಟ್ ಆಯಿತು. ಇಂಗ್ಲೆಂಡ್ ನಾಯಕ ಹ್ಯಾರಿ ಬ್ರೂಕ್ ಟಾಸ್ ಗೆದ್ದು ಬೌಲಿಂಗ್ ಆಯ್ಕೆ ಮಾಡಿಕೊಂಡರು. ಭಾರತ ಬ್ಯಾಟಿಂಗ್ ಮಾಡಬೇಕಾಯಿತು. ಇಂಗ್ಲೆಂಡ್​ ಸ್ಪಿನ್ನರ್​ ಆದಿಲ್ ರಶೀದ್ ಹತ್ತನೇ ಓವರ್‌ನಲ್ಲಿ ಇಶಾನ್ ಕಿಶನ್ ವಿಕೆಟ್ ಪಡೆದಾಗ, ಸೂರ್ಯಕುಮಾರ್ ಯಾದವ್ ಬ್ಯಾಟಿಂಗ್‌ಗೆ ಬರುತ್ತಾರೆ ಎಂದು ಎಲ್ಲರೂ ನಿರೀಕ್ಷಿಸಿದ್ದರು. ಆದರೆ, ಟೀಮ್​ ಇಂಡಿಯಾ, ಎಡಗೈ ಬ್ಯಾಟ್ಸ್‌ಮನ್ ಶಿವಂ ದುಬೆಯನ್ನು ನಾಲ್ಕನೇ ಸ್ಥಾನದಲ್ಲಿ ಕಳುಹಿಸಿತು. ಅದಕ್ಕೊಂದು ಸ್ಪಷ್ಟ ಕಾರಣವಿದೆ. ಅದೇನೆಂದರೆ, ದುಬೆ ಅವರು ಲೆಗ್-ಸ್ಪಿನ್ ಬೌಲಿಂಗ್ ಅನ್ನು ಸಮರ್ಥವಾಗಿ ಎದುರಿಸಬಲ್ಲ ಬ್ಯಾಟ್ಸ್‌ಮನ್‌ಗಳಲ್ಲಿ ಒಬ್ಬರೆಂದು ಹೆಸರುವಾಸಿಯಾಗಿದ್ದಾರೆ.

ಸಂಜು ಸ್ಯಾಮ್ಸನ್ ಅವರು ರಶೀದ್ ಬೌಲಿಂಗ್​ನಲ್ಲಿ ಎಚ್ಚರಿಕೆಯಿಂದ ಆಡುತ್ತಿದ್ದಾಗ, ದುಬೆ ತಮ್ಮ ಬ್ಯಾಟಿಂಗ್​ ದಾಳಿಯನ್ನು ಪ್ರಾರಂಭಿಸಿದರು. ಅವರು ಕೇವಲ ಎಂಟು ಎಸೆತಗಳಲ್ಲಿ ಇಪ್ಪತ್ತೆರಡು ರನ್ ಗಳಿಸಿದರು ಮತ್ತು ಮೂರು ಬೃಹತ್ ಸಿಕ್ಸರ್‌ಗಳನ್ನು ಬಾರಿಸಿದರು. ಇನ್ನೂ ಸಂಜು ಔಟಾದ ನಂತರವೂ ಭಾರತ ತನ್ನ ತಂತ್ರವನ್ನು ಬದಲಾಯಿಸಲಿಲ್ಲ. ಎಡಗೈ ಮತ್ತು ಬಲಗೈ ಬ್ಯಾಟ್ಸ್‌ಮನ್‌ಗಳ ಸಂಯೋಜನೆ ಮುಂದುವರಿಯಬೇಕೆಂದು ಭಾವಿಸಿ, ಹಾರ್ದಿಕ್ ಪಾಂಡ್ಯ ಅವರನ್ನು ಕ್ರೀಸ್‌ಗೆ ಕಳುಹಿಸಿತು. ಪರಿಣಾಮವಾಗಿ, ಇಂಗ್ಲೆಂಡ್‌ನ ಬೌಲರ್‌ಗಳಿಗೆ ಲೈನ್ ಮತ್ತು ಲೆಂಗ್ತ್ ಸಿಗಲಿಲ್ಲ. ದುಬೆಯ ದಾಳಿಯಿಂದಾಗಿ, ಹ್ಯಾರಿ ಬ್ರೂಕ್ ಅವರು ಜೋಫ್ರಾ ಆರ್ಚರ್ ಅವರನ್ನು ಬೇಗನೆ ಕರೆತರಬೇಕಾಯಿತು. ಆದಾಗ್ಯೂ, ಭಾರತವು ಪರಿಸ್ಥಿತಿಗೆ ಅನುಗುಣವಾಗಿ ಬ್ಯಾಟರ್‌ಗಳನ್ನು ಬದಲಾಯಿಸುವ ಮೂಲಕ ಇಂಗ್ಲೆಂಡ್ ತಂಡವನ್ನು ಗೊಂದಲಗೊಳಿಸಿತು.

ಗಂಭೀರ್​ ತೆಗೆದುಕೊಂಡ ಮತ್ತೊಂದು ಕುತೂಹಲಕಾರಿ ನಿರ್ಧಾರವೆಂದರೆ ತಿಲಕ್ ವರ್ಮಾ ಅವರನ್ನು ಕೊನೆಯ ಓವರ್‌ಗಳವರೆಗೆ ಉಳಿಸಿಕೊಳ್ಳುವುದು. ತಿಲಕ್ ಅವರು ವೇಗದ ಬೌಲರ್‌ ಅನ್ನು ಚೆನ್ನಾಗಿ ನಿಭಾಯಿಸುತ್ತಾರೆ ಎಂಬ ವಿಶ್ವಾಸ ತಂಡಕ್ಕಿತ್ತು. ಈ ತಂತ್ರ ಚೆನ್ನಾಗಿ ಕೆಲಸ ಮಾಡಿತು. ಈ ರೀತಿಯಾಗಿ, ಭಾರತವು ಪ್ರತಿ ಹಂತದಲ್ಲೂ ಪರಿಸ್ಥಿತಿಗೆ ಸೂಕ್ತವಾದ ಬ್ಯಾಟರ್ ಅನ್ನು ಕಳುಹಿಸುವ ಮೂಲಕ ಪಂದ್ಯವನ್ನು ತಮ್ಮ ಕೈಯಲ್ಲಿ ಇಟ್ಟುಕೊಂಡಿತ್ತು.

ಅಂದಹಾಗೆ, ಭಾರತದ ತಂತ್ರ ಬ್ಯಾಟಿಂಗ್‌ನಲ್ಲಿ ಮಾತ್ರವಲ್ಲ ಬೌಲಿಂಗ್‌ನಲ್ಲಿಯೂ ಅದ್ಭುತವಾಗಿ ಕೆಲಸ ಮಾಡಿದವು. ವಾಂಖೆಡೆ ಕ್ರೀಡಾಂಗಣದ ಪಿಚ್ ರಾತ್ರಿಯ ವೇಳೆ ಬ್ಯಾಟ್ಸ್‌ಮನ್‌ಗಳಿಗೆ ಸುಲಭವಾಗುತ್ತದೆ ಎಂದು ಭಾರತೀಯ ತಂಡ ನಿರೀಕ್ಷಿಸಿತ್ತು. ಅದಕ್ಕಾಗಿಯೇ ಅವರು ಬೇಗನೆ ವಿಕೆಟ್ ತೆಗೆದುಕೊಳ್ಳಲು ನಿರ್ಧರಿಸಿದರು ಮತ್ತು ಇಂಗ್ಲೆಂಡ್ ಅನ್ನು ಒತ್ತಡಕ್ಕೆ ಒಳಪಡಿಸಿದರು. ಭಾರತವು ಹಾರ್ದಿಕ್ ಪಾಂಡ್ಯ ಅವರನ್ನು ಬೇಗನೆ ಕರೆತಂದು ಮೊದಲ ಎಸೆತದಲ್ಲಿ ಫಿಲ್ ಸಾಲ್ಟ್ ಅವರ ವಿಕೆಟ್ ಪಡೆದರು. ಮತ್ತೊಂದೆಡೆ, ಹ್ಯಾರಿ ಬ್ರೂಕ್ ಅನ್ನು ಔಟ್ ಮಾಡಲು ಪವರ್ ಪ್ಲೇನಲ್ಲಿ ಜಸ್​ಪ್ರೀತ್​ ಬುಮ್ರಾ ಅವರನ್ನು ಬಳಸಲು ಯೋಜಿಸಿತ್ತು. ಬುಮ್ರಾ ಬೌಲಿಂಗ್ ಮಾಡಿದ ಚೆಂಡನ್ನು ಬ್ರೂಕ್ ತಪ್ಪಾಗಿ ಆಡಿದರು ಮತ್ತು ಅಕ್ಷರ್ ಪಟೇಲ್ ಓಡಿಬಂದು ಅದ್ಭುತ ಕ್ಯಾಚ್ ಪಡೆದರು.

ವಿಶೇಷವಾಗಿ, ಕೊನೆಯ ಹತ್ತು ಓವರ್‌ಗಳಿಗೆ ಬುಮ್ರಾ ಮೂರು ಓವರ್‌ಗಳನ್ನು ಬೌಲಿಂಗ್ ಮಾಡುವುದು ಭಾರತದ ಉತ್ತಮ ತಂತ್ರವಾಗಿತ್ತು. ಹದಿನಾರನೇ ಮತ್ತು ಹದಿನೆಂಟನೇ ಓವರ್‌ಗಳಲ್ಲಿ ಬುಮ್ರಾ ಅವರು ಮಾಡಿದ ಖಡಕ್​ ಬೌಲಿಂಗ್, ಇಂಗ್ಲೆಂಡ್‌ನ ಭರವಸೆಯನ್ನು ಬಹುತೇಕ ಕೊನೆಗೊಳಿಸಿತು. ಇಂಗ್ಲೆಂಡ್‌ಗೆ ಅಷ್ಟರಲ್ಲಾಗಲೇ ಪ್ರತಿ ಓವರ್‌ಗೆ ಹದಿನಾಲ್ಕು ರನ್‌ಗಳು ಬೇಕಾಗಿದ್ದವು. ಆದರೆ ಬುಮ್ರಾ ಕೇವಲ ಹದಿನಾಲ್ಕು ರನ್‌ಗಳನ್ನು ಬಿಟ್ಟುಕೊಟ್ಟು ಪಂದ್ಯವನ್ನು ಸಂಪೂರ್ಣವಾಗಿ ಭಾರತದ ಪರವಾಗಿ ತಿರುಗಿಸಿದರು, (ಏಜೆನ್ಸೀಸ್​).