ಮೌಂಟ್ ಮೌಂಗನುಯಿ: ನ್ಯೂಜಿಲೆಂಡ್ ವಿರುದ್ಧದ ನಾಲ್ಕನೇ ಏಕದಿನ ಪಂದ್ಯದಲ್ಲಿ ಟೀಮ್ ಇಂಡಿಯಾ ಅನುಭವಿಸಿದ 244 ರನ್‌ಗಳ ಹೀನಾಯ ಸೋಲಿಗೆ ಪಿಚ್‌ನಲ್ಲಾದ ಅನಿರೀಕ್ಷಿತ ಬದಲಾವಣೆಯೇ ಪ್ರಮುಖ ಕಾರಣ ಎಂದು ಭಾರತೀಯ ಏಕದಿನ ತಂಡದ ಹಂಗಾಮಿ ನಾಯಕ ಶ್ರೇಯಸ್ ಅಯ್ಯರ್ (Shreyas Iyer) ಹೇಳಿದ್ದಾರೆ. ಸೋಲಿನ ಹೊಣೆ ಹೊತ್ತಿದ್ದೇ ಆದರೂ ಮೂವರು ಸ್ಟಾರ್ ಬ್ಯಾಟ್ಸ್ಮನ್ಗಳ ಡಕ್ಔಟ್ ಬಗ್ಗೆ ಕೇಳಿದ ಪ್ರಶ್ನೆಗೆ ಅವರು ಕೊಟ್ಟ ಉತ್ತರ ಮಾತ್ರ ಇದೀಗ ಚರ್ಚೆಗೆ ಕಾರಣವಾಗಿದೆ.
ಶ್ರೇಯಸ್ ಅಯ್ಯರ್ ಮಾತು
ಪಂದ್ಯದ ಬಳಿಕ ಮಾತನಾಡಿದ ಅಯ್ಯರ್, ಮೊದಲ ಇನ್ನಿಂಗ್ಸ್‌ನಲ್ಲಿ ಬ್ಯಾಟಿಂಗ್‌ಗೆ ಅತ್ಯಂತ ಪೂರಕವಾಗಿದ್ದ ಪಿಚ್, ನಂತರ ವೇಗದ ಬೌಲರ್‌ಗಳಿಗೆ ನೆರವಾಗುವ ಸೀಮಿಂಗ್ ಟ್ರ್ಯಾಕ್ ಆಗಿ ಬದಲಾಯಿತು ಎಂದು ಅಯ್ಯರ್ ವಿವರಿಸಿದ್ದಾರೆ. ಮೊದಲ ಎರಡು ಪಂದ್ಯಗಳ ಪ್ರದರ್ಶನದಿಂದ ಸ್ಫೂರ್ತಿ ಪಡೆದು ಮುಂದಿನ ಪಂದ್ಯದಲ್ಲಿ ಬಲಿಷ್ಠವಾಗಿ ಕಮ್‌ಬ್ಯಾಕ್ ಮಾಡುವ ಮೂಲಕ ಸರಣಿಯನ್ನು ಸಮಬಲಗೊಳಿಸಲಿದ್ದೇವೆ ಎಂಬ ಭರವಸೆಯನ್ನು ವ್ಯಕ್ತಪಡಿಸಿದರು.
ಭಾರತ ಬ್ಯಾಟಿಂಗ್ ಆರಂಭಿಸಿದಾಗ ಚೆಂಡು ಪಿಚ್‌ನ ಎರಡೂ ಬದಿಗಳಿಗೆ ಅಸಾಮಾನ್ಯವಾಗಿ ಸ್ವಿಂಗ್ ಆಗಲು ಶುರುಮಾಡಿತು. ಇದರಿಂದ ಬ್ಯಾಟರ್‌ಗಳಿಗೆ ತಮ್ಮ ಶಾಟ್‌ಗಳನ್ನು ಆಯ್ಕೆ ಮಾಡಿಕೊಳ್ಳುವುದು ಅತ್ಯಂತ ಕಷ್ಟಕರವಾಯಿತು. ಅಲ್ಲದೆ, ಭಾರತೀಯ ಬ್ಯಾಟರ್‌ಗಳು ಸುಮ್ಮನೆ ತಮ್ಮ ವಿಕೆಟ್‌ಗಳನ್ನು ಕೈಚೆಲ್ಲಿಲ್ಲ. ಯಾರೊಬ್ಬರೂ ಬೇಕಾಬಿಟ್ಟಿ ಆಡಲಿಲ್ಲ ಎಂದು ಅಯ್ಯರ್ ತಮ್ಮ ಸಹ ಆಟಗಾರರನ್ನು ಸಮರ್ಥಿಸಿಕೊಂಡರು. ಈ ಹೇಳಿಕೆ ಹೊರಬಿದ್ದ ಬೆನ್ನಲ್ಲೇ ಅನೇಕರು ಇದು ಕೋಚ್ ಗೌತಮ್ ಗಂಭೀರ್ ಮಾತಿಗೆ ಕೊಟ್ಟ ತಿರುಗೇಟು ಎಂದು ಬೆಟ್ಟು ಮಾಡಿದ್ದಾರೆ.
