15 ರ ಬಾಲಕನ ಕೈಗೆ ಬ್ಲಾಂಕ್ ಚೆಕ್?: ವಿರಾಟ್ ಕೊಹ್ಲಿ ದಾಖಲೆ ಧೂಳೀಪಟ ಮಾಡಲು ಮುಂದಾದ ಬೇಬಿ ಬಾಸ್​; ವೈಭವ್​ ಸೂರ್ಯವಂಶಿ ಬ್ಯಾಟ್​ಗೆ ಚಿನ್ನದ ಬೆಲೆ! Vaibhav Suryavanshi Bat Sponsorship

ಐಪಿಎಲ್​: ಈ ವರ್ಷದ ಐಪಿಎಲ್​ನಲ್ಲಿ ಅತಿ ಹೆಚ್ಚು ಸೌಂಡ್​ ಮಾಡಿದ ಹೆಸರೆಂದರೆ ಅದು 15 ರ ಪೋರ ರಾಜಸ್ಥಾನ್ ರಾಯಲ್ಸ್ ತಂಡ ಅಮೋಘ ಬ್ಯಾಟ್ಸ್​ಮನ್​ ವೈಭವ್ ಸೂರ್ಯವಂಶಿ ಎಂದರೆ ತಪ್ಪಾಗದು. ಮೈದಾನದಲ್ಲಿ ಕೇವಲ ಸಿಕ್ಸರ್-ಬೌಂಡರಿಗಳ ಸುರಿಮಳೆ ಮೂಲಕವೇ ಕ್ರಿಕೆಟ್​ ಅಭಿಮಾನಿಗಳನ್ನು ರಂಜಿಸಿರುವ ಈ ಬಾಲಕ ಈಗ ಮೈದಾನದ ಹೊರಗೆ ಸಹ ಹೊಸ ಇತಿಹಾಸವನ್ನು ನಿರ್ಮಿಸಲು ಮುಂದಾಗುತ್ತಿದ್ದಾನೆ.

ಹೌದು, ಐಪಿಎಲ್‌ನಲ್ಲಿ ತಮ್ಮ ಬ್ಯಾಟಿಂಗ್ ಪರಾಕ್ರಮ ತೋರಿಸಿದ ಬೆನ್ನಲ್ಲೇ ವೈಭವ್ ಸೂರ್ಯವಂಶಿ ಅವರ ಬ್ರ್ಯಾಂಡ್ ವ್ಯಾಲ್ಯೂ ರಾಕೆಟ್ ವೇಗದಲ್ಲಿ ಜಿಗಿದಿದೆ. ದೇಶದ ಪ್ರಮುಖ ಟೈರ್ ತಯಾರಕ ಕಂಪನಿಗಳು ಸೇರಿದಂತೆ ದೊಡ್ಡ ದೊಡ್ಡ ಬ್ರ್ಯಾಂಡ್‌ಗಳು ಈ ಯುವ ಆಟಗಾರನ ಬ್ಯಾಟ್ ಪ್ರಾಯೋಜಕತ್ವ (Vaibhav Suryavanshi Bat Sponsorship) ಪಡೆಯಲು ಮುಗಿಬಿದ್ದಿವೆ. ಸದ್ಯ ಸಿಗುತ್ತಿರುವ ಆಫರ್‌ಗಳನ್ನು ನೋಡಿದರೆ ವಿರಾಟ್ ಕೊಹ್ಲಿ, ಶುಭ್‌ಮನ್ ಗಿಲ್ ಅವರಂತಹ ಸೂಪರ್‌ಸ್ಟಾರ್‌ಗಳ ದಾಖಲೆಯೇ ಬ್ರೇಕ್ ಆಗಲಿವೆ ಎಂಬ ಸುದ್ದಿ ಹರಡಿದೆ.

ವರದಿಯ ಪ್ರಕಾರ, ವೈಭವ್ ಸೂರ್ಯವಂಶಿ ಸದ್ಯ ತಮಗಿರುವ ಬ್ಯಾಟ್ ಒಪ್ಪಂದದ ಮೂಲಕ ವರ್ಷಕ್ಕೆ 50 ಲಕ್ಷ ರೂಪಾಯಿ ಗಳಿಸುತ್ತಿದ್ದಾರೆ. ಆದರೆ, ಈ ಭಾರಿಯ ಐಪಿಎಲ್ ಬಳಿಕ ಅವರ ಮಾರುಕಟ್ಟೆ ಮೌಲ್ಯ ಬರೋಬ್ಬರಿ 24 ಪಟ್ಟು ಹೆಚ್ಚಾಗಿದೆ ಅಂತೆ.

ಹೌದು, ಹೆಸರಾಂತ ಕಂಪನಿಯೊಂದು ಅವರ ಬ್ಯಾಟ್‌ನಲ್ಲಿ ತಮ್ಮ ಬ್ರ್ಯಾಂಡ್ ಲೋಗೋ ಹಾಕಲು ಬರೋಬ್ಬರಿ 12 ಕೋಟಿ ರೂಪಾಯಿಗೂ ಅಧಿಕ ಮೊತ್ತದ ಆಫರ್ ನೀಡಿದೆಯಂತೆ. ಅಷ್ಟೇ ಅಲ್ಲ, ವೈಭವ್ ಒಪ್ಪಿಗೆ ನೀಡಿದರೆ ಎಷ್ಟು ಬೇಕಾದರೂ ಹಣ ತುಂಬಿಕೊಳ್ಳಿ ಎಂದು ಖಾಲಿ ಚೆಕ್ (Blank Cheque) ಕೂಡ ನೀಡಲಾಗಿದೆ ಎಂಬ ಗುಸುಗುಸು ಕೇಳಿಬರುತ್ತಿದೆ.

ಈ ಬಾರಿಯ ಐಪಿಎಲ್‌ನಲ್ಲಿ ರಾಜಸ್ಥಾನ್ ರಾಯಲ್ಸ್ ಪರ ಓಪನರ್ ಆಗಿ ಕಣಕ್ಕಿಳಿದಿದ್ದ ವೈಭವ್ ಸೂರ್ಯವಂಶಿ ತಾವೊಬ್ಬ ರನ್ ಮಷೀನ್ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಬರೋಬ್ಬರಿ 242.85ರ ಸ್ಟ್ರೈಕ್-ರೇಟ್‌ನಲ್ಲಿ 680 ರನ್ ಚಚ್ಚಿರುವ ವೈಭವ್, ಆರೆಂಜ್ ಕ್ಯಾಪ್ ಲೀಡರ್‌ಬೋರ್ಡ್‌ನಲ್ಲಿ ಮುಂಚೂಣಿಯಲ್ಲಿದ್ದಾರೆ. 15 ವರ್ಷದ ಹುಡುಗ ವಿಶ್ವದ ಶ್ರೇಷ್ಠ ಬೌಲರ್‌ಗಳನ್ನು ಮನಬಂದಂತೆ ದಂಡಿಸಿದ್ದನ್ನು ನೋಡಿ ಇಡೀ ಕ್ರಿಕೆಟ್ ಲೋಕವೇ ಫಿದಾ ಆಗಿದೆ.

ಐಪಿಎಲ್‌ನಲ್ಲಿ ಅಬ್ಬರಿಸಿದ ವೈಭವ್ ಸೂರ್ಯವಂಶಿ ಸದ್ಯದಲ್ಲೇ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡುವ ಸುವರ್ಣ ಅವಕಾಶ ಸಿಗುವ ಸಾಧ್ಯತೆ ದಟ್ಟವಾಗಿದೆ. ಜೂನ್ ಅಂತ್ಯದಲ್ಲಿ ಎರಡು ಟಿ20 ಪಂದ್ಯಗಳನ್ನಾಡಲು ಭಾರತ ತಂಡ ಐರ್ಲೆಂಡ್‌ಗೆ ಪ್ರವಾಸ ಕೈಗೊಳ್ಳಲಿದ್ದು, ಈ ಸರಣಿಗೆ ವೈಭವ್ ಆಯ್ಕೆಯಾಗುವುದು ಬಹುತೇಕ ಖಚಿತ ಎನ್ನಲಾಗುತ್ತಿದೆ, (ಏಜನ್ಸೀಸ್​).