Virat Kohli: ವಿರಾಟ್ ಕೊಹ್ಲಿ ತಮ್ಮ ಏಕದಿನ ವೃತ್ತಿಜೀವನದಲ್ಲಿ 306 ಇನಿಂಗ್ಸ್‌ಗಳಿಂದ 58.84 ರ ಸರಾಸರಿಯಲ್ಲಿ 15,183 ರನ್‌ಗಳನ್ನು ಕಲೆಹಾಕಿದ್ದಾರೆ. ಒಡಿಐ ಇತಿಹಾಸದಲ್ಲೇ ಗರಿಷ್ಠ 55 ಶತಕ ಹಾಗೂ 80 ಅರ್ಧಶತಕಗಳನ್ನು ಬಾರಿಸಿದ ಕೀರ್ತಿ ಅವರದ್ದಾಗಿದೆ. ಆದರೆ, ಈ ಎಲ್ಲಾ ದೊಡ್ಡ ಇನಿಂಗ್ಸ್‌ಗಳ ಮಧ್ಯೆ ಕೊಹ್ಲಿ ತಮ್ಮ ವೃತ್ತಿಜೀವನದ ಅತ್ಯುತ್ತಮ ಇನಿಂಗ್ಸ್ ಯಾವುದು ಎಂದು ಆರಿಸಿದ್ದಾರೆ. ಅದು ಯಾವುದೇ ಶತಕ ಅಥವಾ ಅರ್ಧಶತಕವಲ್ಲ ಎನ್ನುವುದು ಅಚ್ಚರಿಯ ಸಂಗತಿ.
ತಮ್ಮ 38ನೇ ಜನ್ಮದಿನದ ಅಂಗವಾಗಿ ಸ್ಟಾರ್ ಸ್ಪೋರ್ಟ್ಸ್ ನಡೆಸಿದ ಸಂವಾದದಲ್ಲಿ, ತಮ್ಮ ಪ್ರಮುಖ ಇನಿಂಗ್ಸ್‌ಗಳ ನಡುವಿನ ಹೋಲಿಕೆಯಲ್ಲಿ ಕೊಹ್ಲಿ 2013ರ ಚಾಂಪಿಯನ್ಸ್ ಟ್ರೋಫಿ ಫೈನಲ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ಬಾರಿಸಿದ 43 ರನ್‌ಗಳ ಇನಿಂಗ್ಸ್ ಅನ್ನು ತಮ್ಮ ಅತ್ಯುತ್ತಮ ಪ್ರದರ್ಶನ ಎಂದು ಆಯ್ಕೆ ಮಾಡಿದ್ದಾರೆ. 2012ರಲ್ಲಿ ಏಷ್ಯಾಕಪ್‌ನಲ್ಲಿ ಪಾಕಿಸ್ತಾನ ವಿರುದ್ಧ ಗಳಿಸಿದ 183 ರನ್, ಹೊಬಾರ್ಟ್‌ನಲ್ಲಿ ಶ್ರೀಲಂಕಾ ವಿರುದ್ಧ ಬಾರಿಸಿದ 133 ರನ್ ಅಥವಾ 2011ರ ವಿಶ್ವಕಪ್ ಫೈನಲ್‌ನ 35 ರನ್‌ಗಳಿಗಿಂತಲೂ ಈ ಇನಿಂಗ್ಸ್ ಅವರಿಗೆ ನೆಚ್ಚಿನ ಇನ್ನಿಂಗ್ಸ್ ಆಗಿದೆ.
ಫೈನಲ್ ಪಂದ್ಯದ ರೋಚಕ ಕ್ಷಣಗಳು ಹೇಗಿದ್ವು ನೋಡಿ!
ಎಡ್ಜ್‌ಬಾಸ್ಟನ್‌ನಲ್ಲಿ ನಡೆದ ಆ ಫೈನಲ್ ಪಂದ್ಯವು ಮಳೆಯಿಂದಾಗಿ 20 ಓವರ್‌ಗಳಿಗೆ ಕಡಿತಗೊಂಡಿತ್ತು. ಟಾಸ್ ಗೆದ್ದ ಇಂಗ್ಲೆಂಡ್ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಆರಂಭಿಕ ಆಟಗಾರ ಶಿಖರ್ ಧವನ್ (31 ರನ್) ಔಟ್ ಆದ ಬಳಿಕ, ಟೀಮ್ ಇಂಡಿಯಾ 66 ರನ್‌ಗಳಿಗೆ 5 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಈ ಹಂತದಲ್ಲಿ ಕ್ರೀಸ್‌ಗೆ ಬಂದ ವಿರಾಟ್ ಕೊಹ್ಲಿ, ರವೀಂದ್ರ ಜಡೇಜಾ ಜೊತೆಗೂಡಿ 47 ರನ್‌ಗಳ ಮಹತ್ವದ ಜೊತೆಯಾಟ ನಡೆಸಿದರು.
34 ಎಸೆತಗಳನ್ನು ಎದುರಿಸಿದ ಕಿಂಗ್ ಕೊಹ್ಲಿ 4 ಬೌಂಡರಿ ಹಾಗೂ 1 ಸಿಕ್ಸರ್ ನೆರವಿನಿಂದ 43 ರನ್ ಗಳಿಸಿ ತಂಡಕ್ಕೆ ಆಸರೆಯಾದರು. ಜಡೇಜಾ (ಅಜೇಯ 33) ಅವರ ಅಂತಿಮ ಹಂತದ ಸಾಹಸದಿಂದ ಭಾರತ 20 ಓವರ್‌ಗಳಲ್ಲಿ 129/7 ರನ್‌ಗಳ ಸವಾಲಿನ ಮೊತ್ತ ಕಲೆಹಾಕಿತು.
