ಇದೇ ವೇಳೆ ಮೈದಾನದಲ್ಲಿದ್ದ ಅಂಪೈರ್ ಕ್ರಿಸ್ ಬ್ರೌನ್ ಕೂಡ ಮಧ್ಯಪ್ರವೇಶಿಸಿ, ಗುರ್ನೂರ್ ಬ್ರಾರ್ ಅವರನ್ನು ಕರೆದು ಮಾತನಾಡಿದರು. ಸ್ಪರ್ಧಾತ್ಮಕ ಮನೋಭಾವ ಮತ್ತು ಕ್ರೀಡಾಸ್ಫೂರ್ತಿಯ ಗೆರೆಯನ್ನು ದಾಟದಂತೆ ಬ್ರಾರ್ ಅವರಿಗೆ ಅಂಪೈರ್ ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿದರು. ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ವೇಗದ ಬೌಲರ್‌ಗಳ ಆಕ್ರಮಣಕಾರಿ ಶೈಲಿಗೆ ಅವಕಾಶವಿದ್ದರೂ, ಎದುರಾಳಿ ಆಟಗಾರರನ್ನು ಕೆಣಕುವಂತಹ ವರ್ತನೆ ಐಸಿಸಿ ನೀತಿ ಸಂಹಿತೆಯ ಉಲ್ಲಂಘನೆಯಾಗಬಹುದು ಎಂಬುದನ್ನು ಅಂಪೈರ್ ಮನವರಿಕೆ ಮಾಡಿಕೊಟ್ಟರು.
ಸೀಫರ್ಟ್ ವಿಕೆಟ್ ಪತನದೊಂದಿಗೆ ಪಂದ್ಯದ ಮೇಲೆ ಹಿಡಿತ ಸಾಧಿಸಲು ಆರಂಭಿಸಿದ ಭಾರತಕ್ಕೆ, ಕೆಲವೇ ಹೊತ್ತಿನಲ್ಲಿ ಮತ್ತೊಂದು ಯಶಸ್ಸು ಸಿಕ್ಕಿತು. ಎಡಗೈ ಸ್ಪಿನ್ನರ್ ಅಕ್ಷರ್ ಪಟೇಲ್ ಅವರ ಎಸೆತದಲ್ಲಿ ನ್ಯೂಜಿಲೆಂಡ್‌ನ ಯುವ ಬ್ಯಾಟರ್ ನಿಕ್ ಕೆಲ್ಲಿ ಕ್ರೀಸ್ ಬಿಟ್ಟು ಮುಂದೆ ಬಂದು ಆಡಲು ಯತ್ನಿಸಿದರು. ಈ ವೇಳೆ ವಿಕೆಟ್ ಕೀಪರ್ ಇಶಾನ್ ಕಿಶನ್ ಅವರು ಚುರುಕಿನ ಸ್ಟಂಪ್ ಮಾಡಿ ವಿಕೆಟ್ ಪಡೆದರು. ಕೇವಲ 4 ರನ್ ಗಳಿಸಿದ್ದ ಕೆಲ್ಲಿ ಔಟಾಗುವುದರೊಂದಿಗೆ, ಉತ್ತಮ ಆರಂಭ ಪಡೆದಿದ್ದ ನ್ಯೂಜಿಲೆಂಡ್ ತಂಡಕ್ಕೆ ಭಾರತೀಯ ಬೌಲರ್‌ಗಳು ಸತತ ಎರಡು ಆಘಾತಗಳನ್ನು ನೀಡಿ ರನ್ ವೇಗಕ್ಕೆ ಕಡಿವಾಣ ಹಾಕಿದರು. ಆದರೂ, ಕಿವೀಸ್ ತಂಡ ಉತ್ತಮವಾಗಿ ಬ್ಯಾಟ್ ಬೀಸುವ ಮೂಲಕ ನಿಗದಿತ 50 ಓವರ್ಗಳಲ್ಲಿ 333 ರನ್ಗಳ ಬೃಹತ್ ಮೊತ್ತ ಕಲೆಹಾಕಿದೆ. ವಿಲ್ ಯಂಗ್ (125 ರನ್ ) ಶತಕದ ಮೂಲಕ ತಂಡಕ್ಕೆ ಆಸರೆಯಾದರು.
ಸದ್ಯ ಟೀಮ್ ಇಂಡಿಯಾ ಗುರಿ ಬೆನ್ನಟ್ಟಿದ್ದು, ಕೇವಲ 9 ಓವರ್ಗಳಲ್ಲಿ 22 ರನ್ಗೆ 4 ಪ್ರಮುಖ ವಿಕೆಟ್ಗಳನ್ನು ಕಳೆದುಕೊಂಡು ಸಂಕಷ್ಟದ ಸ್ಥಿತಿಯಲ್ಲಿದೆ. ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ ಹಾಗೂ ಶ್ರೇಯಸ್ ಅಯ್ಯರ್ ಶೂನ್ಯಕ್ಕೆ ಔಟಾಗುವ ಮೂಲಕ ನಿರಾಸೆ ಮೂಡಿಸಿದ್ದಾರೆ.
