2027ರ ವಿಶ್ವಕಪ್​ ತನಕ ಏಕದಿನ ಕ್ರಿಕೆಟ್​ನಲ್ಲಿ ಮುಂದುವರಿಕೆ; ವಿರಾಟ್​ ಕೊಹ್ಲಿ ನೀಡಿದ ಖಚಿತತೆ ಹೀಗಿದೆ...

ಬೆಂಗಳೂರು: ಟೀಮ್​ ಇಂಡಿಯಾದ ಸ್ಟಾರ್​ ಬ್ಯಾಟರ್​ ವಿರಾಟ್​ ಕೊಹ್ಲಿ 2027ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆಯಲಿರುವ ವಿಶ್ವಕಪ್​ವರೆಗೆ ಏಕದಿನ ಕ್ರಿಕೆಟ್​ನಲ್ಲಿ ಮುಂದುವರಿಯುವುದನ್ನು ಖಚಿತಪಡಿಸಿದ್ದಾರೆ. ಕಳೆದ ವರ್ಷ ಟಿ20 ವಿಶ್ವಕಪ್​ ಗೆಲುವಿನ ಬಳಿಕ ಕೊಹ್ಲಿ ಅಂತಾರಾಷ್ಟ್ರೀಯ ಚುಟುಕು ಕ್ರಿಕೆಟ್​ಗೆ ವಿದಾಯ ಹೇಳಿದ್ದರು. ಆದರೆ ಏಕದಿನ ಕ್ರಿಕೆಟ್​ನಿಂದ ಸದ್ಯಕ್ಕೆ ನಿರ್ಗಮಿಸುವ ಸಾಧ್ಯತೆಯನ್ನು ಅವರು ತಳ್ಳಿಹಾಕಿದ್ದಾರೆ.

ಐಪಿಎಲ್​ ಟೂರ್ನಿಯ ನಡುವೆ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಂಡಿರುವ ಕೊಹ್ಲಿಗೆ ನಿರೂಪಕಿ, ನಿಮ್ಮ ಮುಂದಿನ ದೊಡ್ಡ ಹೆಜ್ಜೆ ಏನು ಎಂದು ಕೇಳಿದ್ದಾರೆ. ಇದಕ್ಕೆ ಪ್ರತಿಯಾಗಿ ಕೊಹ್ಲಿ, "ಗೊತ್ತಿಲ್ಲ, ಬಹುಶಃ ಮುಂದಿನ ವಿಶ್ವಕಪ್​ ಗೆಲುವು ಆಗಿರಬಹುದು' ಎಂದು ಉತ್ತರಿಸಿದ್ದಾರೆ. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಮಂಗಳವಾರ ವೈರಲ್​ ಆಗಿದ್ದು, ಕೊಹ್ಲಿ 2027ರ ವಿಶ್ವಕಪ್​ವರೆಗೆ ಏಕದಿನ ಕ್ರಿಕೆಟ್​ ಆಡುವುದು ಕೂಡ ಖಚಿತಗೊಂಡಿದೆ.

36 ವರ್ಷದ ಕೊಹ್ಲಿ, 2027ರ ವಿಶ್ವಕಪ್​ ವೇಳೆ 39ನೇ ವರ್ಷಕ್ಕೆ ಕಾಲಿಡಲಿದ್ದಾರೆ. 2011ರಲ್ಲಿ ತಾನಾಡಿದ ಮೊದಲ ವಿಶ್ವಕಪ್​ನಲ್ಲೇ ಪ್ರಶಸ್ತಿ ಗೆಲುವು ಕಂಡಿದ್ದ ಕೊಹ್ಲಿಗೆ 2027ರ ಆವೃತ್ತಿ 5ನೇ ವಿಶ್ವಕಪ್​ ಆಗಿರಲಿದೆ. ಅಲ್ಲದೆ ಆಡಿದ ಮೊದಲ ಮತ್ತು ಕೊನೇ ವಿಶ್ವಕಪ್​ನಲ್ಲಿ ಪ್ರಶಸ್ತಿ ಗೆದ್ದ ವಿಶೇಷ ಸಾಧನೆಯ ಅವಕಾಶವೂ ಅವರಿಗೆ ಲಭಿಸಲಿದೆ. ಏಕದಿನ ವಿಶ್ವಕಪ್​ನಲ್ಲಿ ಇದುವರೆಗೆ 37 ಇನಿಂಗ್ಸ್​ಗಳಲ್ಲಿ 1,795 ರನ್​ ಗಳಿಸಿರುವ ಕೊಹ್ಲಿ, 2027ರ ಆವೃತ್ತಿಯಲ್ಲಿ 484 ರನ್​ ಗಳಿಸಿದರೆ, ಸಚಿನ್​ ತೆಂಡುಲ್ಕರ್​ರನ್ನು (2,278) ಹಿಂದಿಕ್ಕಿ ವಿಶ್ವಕಪ್​ನಲ್ಲಿ ಸರ್ವಾಧಿಕ ರನ್​ ಗಳಿಸಿದ ದಾಖಲೆಯನ್ನೂ ಬರೆಯಬಹುದಾಗಿದೆ.

https://www.vijayavani.net/dhoni-was-a-match-finisher-then-now-a-loser-the-fans-are-becoming-the-critics