ರಾಜ್ಕೋಟ್ ಟೆಸ್ಟ್ನಲ್ಲಿ 434 ರನ್ಗಳಿಂದ ಹೀನಾಯವಾಗಿ ಸೋತ ಬಳಿಕ ಆಂಗ್ಲರ ಆಕ್ರಮಣಕಾರಿ ಬಾಜ್ಬಾಲ್ ಕಾರ್ಯತಂತ್ರಕ್ಕೆ ಟೀಕೆಗಳು ಎದುರಾಗಿವೆ. ತವರಿನ ಜತೆಗೆ ನ್ಯೂಜಿಲೆಂಡ್, ದ. ಆಫ್ರಿಕಾ, ಪಾಕಿಸ್ತಾನ, ಆಸ್ಟ್ರೆಲಿಯಾದಲ್ಲಿ ಗೆಲುವು ಕಂಡಿರುವ ಬಾಜ್ಬಾಲ್ಗೆ ಭಾರತದಲ್ಲಿ ಮೊದಲ ಟೆಸ್ಟ್ ಬಳಿಕ ಯಶಸ್ಸು ದೊರೆತಿಲ್ಲ. ಇನ್ನೀಗ ಸರಣಿ ವಶಪಡಿಸಿಕೊಳ್ಳಬೇಕಾದರೆ ಕೊನೇ ಎರಡೂ ಟೆಸ್ಟ್ ಗೆಲ್ಲಬೇಕಾದ ಒತ್ತಡ ಆಂಗ್ಲರ ಮೇಲಿದೆ. ಬ್ಯಾಟಿಂಗ್ ವಿಭಾಗದಲ್ಲಿ ಆರಂಭಿಕರಾದ ಜಾಕ್ ಕ್ರೌಲಿ, ಬೆನ್ ಡಕೆಟ್, ಒಲಿ ಪೋಪ್ ಮಿಂಚಿದ್ದರೂ, ಅನುಭವಿಗಳಾದ ಜೋ ರೂಟ್ ಮತ್ತು ಜಾನಿ ಬೇರ್ಸ್ಟೋ ನಿರಾಸೆ ಮೂಡಿಸಿದ್ದಾರೆ. ಮಾಜಿ ನಾಯಕ ಜೋ ರೂಟ್ ಸರಣಿಯಲ್ಲಿ ಗಳಿಸಿರುವ ರನ್ಗಿಂತ (77), ಅರೆಕಾಲಿಕ ಬೌಲರ್ ಆಗಿ ಅಧಿಕ ಓವರ್ ಬೌಲಿಂಗ್ (107) ಮಾಡಿದ್ದಾರೆ. ಇನ್ನು ನಾಯಕ ಬೆನ್ ಸ್ಟೋಕ್ಸ್ ಬೌಲಿಂಗ್ ಮಾಡದಿರುವುದರಿಂದ, ನಾಲ್ವರು ತಜ್ಞ ಬೌಲರ್ಗಳೊಂದಿಗೆ ಆಡುತ್ತಿರುವ ಆಂಗ್ಲರ ಕಾರ್ಯತಂತ್ರಕ್ಕೆ ಹಿನ್ನಡೆಯಾಗಿದೆ. ಇದರಿಂದ ಸ್ಟೋಕ್ಸ್ ನೆಟ್ಸ್ನಲ್ಲಿ ಬೌಲಿಂಗ್ ಆರಂಭಿಸಿದ್ದು, ರಾಂಚಿಯಲ್ಲಿ ದಾಳಿಗೆ ಇಳಿದರೂ ಅಚ್ಚರಿ ಇಲ್ಲ.
