ರೋಹಿತ್ ಶರ್ಮ​ಗೆ ಬ್ರಿಸ್ಬೇನ್​ಲ್ಲಿ​ ಬಿಗ್​ ಟೆಸ್ಟ್​; ನಾಯಕತ್ವದ ಜತೆಗೆ ಬ್ಯಾಟಿಂಗ್​ ವೈಫಲ್ಯಗಳಿಂದಾಗಿ ಹೆಚ್ಚಿದ ಒತ್ತಡ

ಬ್ರಿಸ್ಬೇನ್​: ತವರಿನಲ್ಲಿ ನ್ಯೂಜಿಲೆಂಡ್​ ಎದುರು ವೈಟ್​ವಾಷ್​ ಸೋಲು ಅನುಭವಿಸಿದರೂ ಭಾರತ ತಂಡ ಪರ್ತ್​ನಲ್ಲಿ ಆಡಿದ ಆಸ್ಟ್ರೆಲಿಯಾ ಪ್ರವಾಸದ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಭರ್ಜರಿ ನಿರ್ವಹಣೆಯೊಂದಿಗೆ ಗೆದ್ದು ಬೀಗಿತ್ತು. ಆದರೆ ನಾಯಕ ರೋಹಿತ್​ ಶರ್ಮ ಪಿತೃತ್ವ ರಜೆಯಿಂದ ಮರಳಿದ ನಂತರ ಭಾರತ ತಂಡ ಅಡಿಲೇಡ್​ನಲ್ಲಿ ಮತ್ತೆ ಹಳೆಯ ತಂಡದಂತೆಯೇ ಆಡಿ ಸೋತಿದೆ. ರೋಹಿತ್​ ಶರ್ಮ ಸಾರಥ್ಯದಲ್ಲಿ ಭಾರತ ತಂಡ ಸತತ 4ನೇ ಟೆಸ್ಟ್​ ಸೋಲು ಅನುಭವಿಸಿದೆ. ಇದರೊಂದಿಗೆ ರೋಹಿತ್​ ಮೇಲೆ ಒತ್ತಡ ಹೆಚ್ಚಿದೆ. ನಾಯಕತ್ವದ ಜತೆಗೆ ಬ್ಯಾಟಿಂಗ್​ನಲ್ಲೂ ರನ್​ಬರ ಎದುರಿಸಿರುವುದು ಅವರನ್ನು ಹೆಚ್ಚಿನ ಸಂಕಷ್ಟಕ್ಕೆ ಸಿಲುಕಿಸಿದೆ. ಹೀಗಾಗಿ ಶನಿವಾರದಿಂದ ಬ್ರಿಸ್ಬೇನ್​ನಲ್ಲಿ ನಡೆಯಲಿರುವ ಸರಣಿಯ 3ನೇ ಪಂದ್ಯ ರೋಹಿತ್​ ಪಾಲಿಗೆ ಸತ್ವಪರೀಕ್ಷೆ ಎನಿಸಿದೆ.

ವರ್ಷಾರಂಭದಲ್ಲಿ ಇಂಗ್ಲೆಂಡ್​ ವಿರುದ್ಧ ಭಾರತ ರೋಹಿತ್​ ಸಾರಥ್ಯದಲ್ಲೇ ಸತತ 4 ಟೆಸ್ಟ್​ ಗೆದ್ದು ಬೀಗಿತ್ತು. ನಂತರ ಬಾಂಗ್ಲಾ ವಿರುದ್ಧವೂ ಸತತ 2 ಟೆಸ್ಟ್​ ಗೆದ್ದಿತ್ತು. ಆದರೆ ಕಿವೀಸ್​ ಸರಣಿಯ ನಂತರ ಭಾರತ ಲಯ ತಪ್ಪಿದೆ. ಪರ್ತ್​ನಲ್ಲಿ ಜಸ್​ಪ್ರೀತ್​ ಬುಮ್ರಾ ಹಂಗಾಮಿ ನಾಯಕತ್ವದಲ್ಲಿ ಭಾರತ ಗೆದ್ದು ಬೀಗಿತ್ತು. ಹೀಗಾಗಿ ರೋಹಿತ್​ ಟೆಸ್ಟ್​ ನಾಯಕತ್ವ ಉಳಿಸಿಕೊಳ್ಳಲು ತಂಡವನ್ನು ಮತ್ತೆ ಗೆಲುವಿನ ಹಳಿಗೆ ತರಬೇಕಾದ ಸವಾಲು ಎದುರಿಸುತ್ತಿದ್ದಾರೆ.

ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ನಲ್ಲಿ ಸತತ 3ನೇ ಬಾರಿ ಫೈನಲ್​ಗೇರುವ ನಿಟ್ಟಿನಲ್ಲಿ ಭಾರತಕ್ಕೆ ಬಾರ್ಡರ್​-ಗಾವಸ್ಕರ್​ ಟ್ರೋಫಿ ಸರಣಿ ನಿರ್ಣಾಯಕವೆನಿಸಿದೆ. ಈ ಸರಣಿ ಟೆಸ್ಟ್​ ತರಬೇತುದಾರರಾಗಿ ಗೌತಮ್​ ಗಂಭೀರ್​ ಭವಿಷ್ಯವನ್ನು ನಿರ್ಧರಿಸಲಿದೆ. ಅದೇ ರೀತಿ ರೋಹಿತ್​ ಟೆಸ್ಟ್​ ನಾಯಕರಾಗಿ ಮುಂದುವರಿಯುವ ನಿಟ್ಟಿನಲ್ಲೂ ಈ ಸರಣಿ ನಿರ್ಣಾಯಕ ಪಾತ್ರ ವಹಿಸುವ ನಿರೀಕ್ಷೆ ಹರಡಿದೆ.

ರೋಹಿತ್​ ನಾಯಕತ್ವಕ್ಕೆ ಟೀಕೆ

ಅಡಿಲೇಡ್​ ಟೆಸ್ಟ್​ನಲ್ಲಿ ಎರಡೂವರೆ ದಿನಗಳಲ್ಲೇ ಸೋತ ಬೆನ್ನಲ್ಲೇ ರೋಹಿತ್​ ಶರ್ಮ ನಾಯಕತ್ವದ ಬಗ್ಗೆ ಟೀಕೆಗಳು ಎದ್ದಿವೆ. ಪಿಂಕ್​ಬಾಲ್​ನಲ್ಲಿ ರೋಹಿತ್​ ಬೌಲರ್​ಗಳನ್ನು ಆವರ್ತನ ಮಾಡಿದ ರೀತಿಗೆ ಟೀಕೆಗಳು ಎದುರಾಗಿವೆ. ರೋಹಿತ್​ ಬೌಲಿಂಗ್​ನಲ್ಲಿ ರಕ್ಷಣಾತ್ಮಕ ತಂತ್ರ ಅನುಸರಿಸಿದ್ದು ಭಾರತ ಮೊದಲ ಇನಿಂಗ್ಸ್​ನಲ್ಲಿ ಹೆಚ್ಚಿನ ಹಿನ್ನಡೆ ಅನುಭವಿಸಲು ಕಾರಣವಾಯಿತು ಎಂದು ಮಾಜಿ ಕ್ರಿಕೆಟಿಗ ಆಕಾಶ್​ ಚೋಪ್ರಾ ವಿಶ್ಲೇಷಿಸಿದ್ದಾರೆ. ಸ್ಟೀವನ್​ ಸ್ಮಿತ್​ರನ್ನು ಬುಮ್ರಾ ಔಟ್​ ಮಾಡಿದ ಬೆನ್ನಲ್ಲೇ ಅವರನ್ನು ಬೌಲಿಂಗ್​ನಿಂದ ಹೊರಗಿಡಲಾಯಿತು. ಆಗ ಸ್ಪಿನ್ನರ್​ ಆರ್​. ಅಶ್ವಿನ್​ ಬೌಲಿಂಗ್​ಗೆ ಇಳಿದರು. ಮೊದಲ ದಿನದ 33 ಓವರ್​ಗಳಲ್ಲಿ ಅಶ್ವಿನ್​ ಕೇವಲ 1 ಓವರ್​ ಎಸೆದರು. 2ನೇ ದಿನವೂ ಬುಮ್ರಾ ವಿಕೆಟ್​ ಬೇಟೆಯಾಡುವ ಹಂತದಲ್ಲೇ ಅಶ್ವಿನ್​ರನ್ನು ದಾಳಿಗೆ ಇಳಿಸಲಾಯಿತು ಎಂದು ಮತ್ತೋರ್ವ ಮಾಜಿ ಕ್ರಿಕೆಟಿಗ ಜತಿನ್​ ಪರಾಂಜಪೆ ದೂರಿದ್ದಾರೆ. ಟ್ರಾವಿಸ್​ ಹೆಡ್​ ಶಾರ್ಟ್​ ಬಾಲ್​ ಎದುರು ದೌರ್ಬಲ್ಯ ಹೊಂದಿದ್ದರೂ, ಭಾರತೀಯ ಬೌಲರ್​ಗಳು ಅವರಿಗೆ ಹೆಚ್ಚಿನ ಶಾರ್ಟ್​ ಬಾಲ್​ ಎಸೆಯದೆ ಶತಕ ಸಿಡಿಸಲು ಅವಕಾಶ ಮಾಡಿಕೊಟ್ಟರು ಎಂದು ಸರಣಿಯಲ್ಲಿ ವೀಕ್ಷಕವಿವರಣೆಕಾರ ಆಗಿರುವ ಕ್ರಿಕೆಟಿಗ ಚೇತೇಶ್ವರ ಪೂಜಾರ ಟೀಕಿಸಿದ್ದಾರೆ.

ಆರು ಟೆಸ್ಟ್​ಗಳಲ್ಲಿ ಒಂದೇ ಅರ್ಧಶತಕ!

ರೋಹಿತ್​ ಶರ್ಮ ಸೆಪ್ಟೆಂಬರ್​ನಿಂದ ಇದುವರೆಗೆ ಆಡಿರುವ 6 ಟೆಸ್ಟ್​ಗಳಲ್ಲಿ ಒಂದೇ ಅರ್ಧಶತಕ ಬಾರಿಸಿದ್ದು, ಕೇವಲ 11.83 ರನ್​ ಸರಾಸರಿ ಹೊಂದಿದ್ದಾರೆ. ಬಾಂಗ್ಲಾ ಸರಣಿಯ 4 ಇನಿಂಗ್ಸ್​ಗಳಲ್ಲಿ 6, 5, 23, 8 ರನ್​ ಗಳಿಸಿ ವಿಲರಾಗಿದ್ದ ರೋಹಿತ್​, ಕಿವೀಸ್​ ವಿರುದ್ಧ ಬೆಂಗಳೂರು ಟೆಸ್ಟ್​ನಲ್ಲಿ 2, 52 ರನ್​ ಗಳಿಸಿದ್ದರು. ನಂತರದ 2 ಟೆಸ್ಟ್​ಗಳಲ್ಲಿ 0, 8, 18, 11 ರನ್​ ಗಳಿಸಿದ್ದರು. ಮಧ್ಯಮ ಕ್ರಮಾಂಕದಲ್ಲಿ ಆಡಿದ ಅಡಿಲೇಡ್​ ಟೆಸ್ಟ್​ನಲ್ಲೂ 3, 6 ರನ್​ ಗಳಿಸಿ ಔಟಾಗಿದ್ದರು. ಹಾಲಿ ವರ್ಷ 3 ಟೆಸ್ಟ್​ಗಳಲ್ಲಿ ರೋಹಿತ್​ ಎರಡೂ ಇನಿಂಗ್ಸ್​ಗಳಲ್ಲಿ ಒಂದಂಕಿಗೆ ಔಟ್​ ಆಗಿದ್ದಾರೆ. ಕೊನೇ 12 ಇನಿಂಗ್ಸ್​ಗಳಲ್ಲಿ 8 ಬಾರಿ ಒಂದಂಕಿಗೆ ಔಟಾಗಿದ್ದಾರೆ.

ಆರಂಭಿಕನ ಸ್ಥಾನಕ್ಕೆ ವಾಪಸ್​?

ಪರ್ತ್​ ಟೆಸ್ಟ್​ ಯಶಸ್ಸಿನ ಬಳಿಕ ಕನ್ನಡಿಗ ಕೆಎಲ್​ ರಾಹುಲ್​ರನ್ನು (37, 7) ಅಡಿಲೇಡ್​ನಲ್ಲೂ ಆರಂಭಿಕರಾಗಿ ಮುಂದುವರಿಸಿದರೂ, ಅದೇ ನಿರ್ವಹಣೆ ಪುನರಾವರ್ತಿಸಲು ವಿಫಲರಾಗಿದ್ದರು. ಇತ್ತ ರೋಹಿತ್​ ಶರ್ಮ 6ನೇ ಕ್ರಮಾಂಕದಲ್ಲಿ ಆಡಿ ವೈಫಲ್ಯ ಅನುಭವಿಸಿದರು. ಇದರಿಂದ ಬ್ರಿಸ್ಬೇನ್​ ಟೆಸ್ಟ್​ನಿಂದ ರೋಹಿತ್​ ಮತ್ತೆ ಆರಂಭಿಕರಾಗಿ ಆಡುವ ಸಾಧ್ಯತೆ ಕಾಣಿಸಿದೆ. ಮಾಜಿ ಕ್ರಿಕೆಟಿಗರಾದ ಸುನೀಲ್​ ಗಾವಸ್ಕರ್​, ರವಿಶಾಸ್ತ್ರಿ ಕೂಡ ರೋಹಿತ್​ ಮತ್ತೆ ಆರಂಭಿಕರಾಗಿ ಆಡಬೇಕೆಂದು ಅಭಿಪ್ರಾಯಪಟ್ಟಿದ್ದಾರೆ. ರೋಹಿತ್​ 2018ರಿಂದಲೂ ಟೆಸ್ಟ್​ನಲ್ಲಿ ಆರಂಭಿಕರಾಗಿಯೇ ಆಡುತ್ತ ಬಂದಿದ್ದಾರೆ.

*ರೋಹಿತ್​ ತನ್ನ ಸಾಮರ್ಥ್ಯ ನಿರೂಪಿಸುವ ಅಗತ್ಯವಿಲ್ಲ. ಅವರು ಪುಟಿದೇಳುವ ಬಗ್ಗೆಯೂ ಅನುಮಾನ ಬೇಡ. ಅವರು ಶ್ರೀ ಾಮ್​ರ್ಗೆ ಮರಳುವ ಭರವಸೆ ಇದೆ. ರೋಹಿತ್​ ನಾಯಕತ್ವವನ್ನೂ ಒಂದೆರಡು ಪಂದ್ಯಗಳಿಂದ ಅಂದಾಜಿಸುವುದು ಬೇಡ. 6 ತಿಂಗಳ ಹಿಂದಷ್ಟೇ ಅವರು ಟಿ20 ವಿಶ್ವಕಪ್​ ಗೆದ್ದುಕೊಟ್ಟಿದ್ದಾರೆ ಎಂಬುದನ್ನು ಮರೆಯಬಾರದು.

| ಕಪಿಲ್​ ದೇವ್​

*ಕೊನೇ 6 ಟೆಸ್ಟ್​ಗಳಲ್ಲಿ ರೋಹಿತ್​

ಬಾಂಗ್ಲಾ ಎದುರು ಚೆನ್ನೈ: 6, 5

ಬಾಂಗ್ಲಾ ಎದುರು ಕಾನ್ಪುರ: 23, 8

ಕಿವೀಸ್​ ಎದುರು ಬೆಂಗಳೂರು: 2, 52

ಕಿವೀಸ್​ ಎದುರು ಪುಣೆ: 0, 8

ಕಿವೀಸ್​ ಎದುರು ಮುಂಬೈ: 18, 11

ಆಸೀಸ್​ ಎದುರು ಅಡಿಲೇಡ್​: 3, 6

https://www.vijayavani.net/pv-sindhu-fiance-venkata-datta-sai-invite-sachin-tendulkar-for-wedding