ಬಿಗ್​ ಬಿ ಫೋಟೋ ಶೇರ್​ ಮಾಡಿ ಶೀಘ್ರ ಚೇತರಿಕೆಗೆ ಹಾರೈಸಿದ ಡಬ್ಲ್ಯುಡಬ್ಲ್ಯುಇ ದಿಗ್ಗಜ ಜಾನ್​ ಸೆನಾ

ಬೆಂಗಳೂರು: ಬಾಲಿವುಡ್​ ದಿಗ್ಗಜ ಅಮಿತಾಬ್​ ಬಚ್ಚನ್​ ಶೀಘ್ರವೇ ಗುಣಮುಖರಾಗಲೆಂದು ಹಾರೈಸಿ ಭಾನುವಾರ ಬೆಳಗ್ಗೆಯಿಂದಲೇ ಶುಭಾಶಯಗಳ ಮಹಾಪೂರವೇ ಹರಿದುಬರುತ್ತಿದೆ. ಕೋವಿಡ್​-19ಕ್ಕೆ ಒಳಗಾಗಿರುವ ಬಿಗ್​ ಬಿ ಮುಂಬೈನ ನಾನಾವತಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇದೀಗ ಡಬ್ಲ್ಯುಡಬ್ಲ್ಯುಇ ದಿಗ್ಗಜ ಜಾನ್​ ಸೆನಾ ಇನ್​ಸ್ಟಾಗ್ರಾಂನಲ್ಲಿ ಬಿಗ್​ ಬಿ ಹಾಗೂ ಅಭಿಷೇಕ್​ ಬಚ್ಚನ್​ ಫೋಟೋ ಶೇರ್​ ಮಾಡುವ ಮೂಲಕ ಶೀಘ್ರವೇ ಗುಣಮುಖರಾಗುವಂತೆ ಹಾರೈಸಿದ್ದಾರೆ. ಅಲ್ಲದೆ, ಪಾಕಿಸ್ತಾನ ಕ್ರಿಕೆಟ್​ ತಂಡದ ಮಾಜಿ ನಾಯಕ ಶಾಹಿದ್​ ಅಫ್ರಿದಿ ಹಾಗೂ ಮಾಜಿ ವೇಗಿ ಶೋಯಿಬ್​ ಅಖ್ತರ್​ ಕೂಡ ಬಿಗ್​ ಬಿ ಆರೋಗ್ಯ ಸುಧಾರಣೆಯಾಗಲಿ ಎಂದು ಟ್ವೀಟ್​ ಮಾಡಿದ್ದಾರೆ.

ಇದನ್ನೂ ಓದಿ: ಸಚಿನ್ ತೆಂಡುಲ್ಕರ್​ ಬದಲಾಗಬೇಕು ಎಂದಿರುವ ಐಸಿಸಿ ನಿಯಮ ಯಾವುದು ಗೊತ್ತೇ?

ಬಿಗ್​ ಬಿ ಕರೊನಾ ವೈರಸ್​ ಪಾಸಿಟಿವ್​ ದೃಢವಾದ ಬೆನ್ನಲ್ಲೇ ಬಾಲಿವುಡ್​ ವಲಯ, ಕ್ರೀಡಾವಲಯದ ದಿಗ್ಗಜರು ಆರೋಗ್ಯ ಸುಧಾರಣೆಗೆ ಹಾರೈಸಿದ್ದಾರೆ. ಡಬ್ಲ್ಯುಡಬ್ಲ್ಯುಇ ದಿಗ್ಗಜ ಜಾನ್​ ಸೆನಾ, ಇದೀಗ ಹಾಲಿವುಡ್​ ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಏನು ಬರೆಯದೆ, ಫೋಟೋ ಶೇರ್​ ಮಾಡುವ ಮೂಲಕ ಪರೋಕ್ಷವಾಗಿ ಬಿಗ್​ ಬಿ ಆರೋಗ್ಯ ಚೇತರಿಕೆಗೆ ಕೇಳಿಕೊಂಡಿದ್ದಾರೆ. ಕಳೆದ ಮೂರು ತಿಂಗಳಿಂದ ರಿಂಗ್​ನಿಂದ ಹೊರಗುಳಿದಿರುವ ಜಾನ್​, 2019ರ ಜನವರಿಯಲ್ಲಿ ಕಡೆ ಬಾರಿಗೆ ಸ್ಪರ್ಧಾತ್ಮಕ ಫೈಟ್​ನಲ್ಲಿ ಸ್ಪರ್ಧಿಸಿದ್ದರು. ಕರೊನಾ ವೈರಸ್​ ಭೀತಿ ನಿಂತ ಬಳಿಕವಷ್ಟೇ ಸ್ಪರ್ಧಾತ್ಮಕ ಫೈಟ್​ಗೆ ವಾಪಸಾಗುವುದಾಗಿ ಘೋಷಿಸಿದ್ದಾರೆ.

ಇದನ್ನೂ ಓದಿ: VIDEO: ಸೂಪರ್​ ಮ್ಯಾನ್​ ವೇಷ ಧರಿಸಿ ಚಪಾತಿ ಮಾಡಿದ ಧವನ್​ ಮಗ

ಬಾಲಿವುಡ್​ ಬಾದ್​ ಷಾ ಎಂದು ಕರೆಸಿಕೊಂಡಿರುವ ಅಮಿತಾಭ್​ ಬಚ್ಚನ್​ ತಮಗೆ ಕೋವಿಡ್​-19ರ ಪಾಸಿಟಿವ್​ ಇರುವುದರ ಬಗ್ಗೆ ಶನಿವಾರ ಖಚಿತಪಡಿಸಿದ್ದರು. ಬಳಿಕ ಕುಟುಂಬ ಇತರ ಸದಸ್ಯರಿಗೂ ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಅಮಿತಾಭ್​ ಪತ್ನಿ ಜಯಾ ಬಚ್ಚನ್​ ಹೊರತುಪಡಿಸಿ, ಅಭಿಷೇಕ್​, ಸೊಸೆ ಐಶ್ವರ್ಯ ಅಭಿಷೇಕ್​ ಬಚ್ಚನ್​, ಮೊಮ್ಮಗಳು ಆರಾಧ್ಯ ವರದಿ ಪಾಸಿಟಿವ್​ ಬಂದಿದೆ. ಐಶ್ವರ್ಯ ಹಾಗೂ ಆರಾಧ್ಯ ಅವರಿಗೆ ಮನೆಯಲ್ಲೇ ಕ್ವಾರಂಟೈನ್​ ಮಾಡಲಾಗಿದೆ.