ಬೆಂಗಳೂರು ಐಟಿಎಫ್​​ ಟೆನಿಸ್​ ಟೂರ್ನಿ: ಎಂಟರ ಘಟ್ಟಕ್ಕೇರಿದ ಕರ್ನಾಟಕದ ಸೋಹಾ ಸಾಧಿಕ್​

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಸತತ 2 ದಿನಗಳ ಮಳೆ ಅಡಚಣೆಯ ಬಳಿಕ ಎಸ್​ಕೆಎಂಇ ಐಟಿಎಫ್​ ಓಪನ್​ ಮಹಿಳಾ ಟೆನಿಸ್​ ಟೂರ್ನಿಯಲ್ಲಿ ಗುರುವಾರ ಕೊನೆಗೂ ಆರಂಭಗೊಂಡ ಪ್ರಧಾನ ಸುತ್ತಿನ ಕಾದಾಟದಲ್ಲಿ ಕರ್ನಾಟಕದ ಸೋಹಾ ಸಾಧಿಕ್​ ಕ್ವಾರ್ಟರ್​ಫೈನಲ್​ ಪ್ರವೇಶಿಸಿದರು. ಕರ್ನಾಟಕದ ಇತರ ಆಟಗಾರ್ತಿಯರಾದ ಹರ್ಷಿಣಿ ನಾಗರಾಜ್​ ಮತ್ತು ಕಾಶ್ವಿ ಸುನೀಲ್​ ಮೊದಲ ಸುತ್ತಿನಲ್ಲೇ ಹೊರಬಿದ್ದರೆ, ಶ್ರೀನಿಧಿ ಬಾಲಾಜಿ 2ನೇ ಸುತ್ತಿನಲ್ಲಿ ನಿರಾಸೆ ಅನುಭವಿಸಿದರು.

ಕೆಎಸ್​ಎಲ್​ಟಿಎ ಸ್ಟೇಡಿಯಂನಲ್ಲಿ ನಡೆದ ಸಿಂಗಲ್ಸ್​ ವಿಭಾಗದ 2ನೇ ಸುತ್ತಿನ ಪಂದ್ಯದಲ್ಲಿ ಆರನೇ ಶ್ರೇಯಾಂಕಿತೆ ಸೋಹಾ 6-0, 6-1ರಿಂದ ಬೆಲಾ ತಮ್ಹಂಕರ್​ ವಿರುದ್ಧ ಗೆಲುವು ಸಾಧಿಸಿದರು. ಇದಕ್ಕೆ ಮುನ್ನ ಮೊದಲ ಸುತ್ತಿನಲ್ಲಿ ಅಮೆರಿಕದ ಶ್ರಿಯಾ ಅಟ್ಟುರು ವಿರುದ್ಧ 6-1, 6-2ರಿಂದ ಜಯಿಸಿದರು. ಬೆಂಗಳೂರಿನ ಸೋಹಾಗೆ ಐಟಿಎಫ್​ ಟೂರ್ನಿಯಲ್ಲಿ ಇದು ಚೊಚ್ಚಲ ಕ್ವಾರ್ಟರ್​ಫೈನಲ್​ ಪ್ರವೇಶವಾಗಿದೆ.

ಅರ್ಹತಾ ಸುತ್ತಿನಿಂದ ಬಂದ ಅಭಯಾ ವೆಮುರಿ 3ನೇ ಶ್ರೇಯಾಂಕಿತೆ ಡೆನ್ಮಾರ್ಕ್​ನ ಇಲೆನಾ ಜಮ್ಶಿಡಿ ವಿರುದ್ಧ 6-2, 7-6 ವಿರುದ್ಧ ಅಚ್ಚರಿಯ ಗೆಲುವು ಸಾಧಿಸಿದರು. ತನಿಷಾ ಕಶ್ಯಪ್​, ವೈಷ್ಣವಿ ಅದ್ಕರ್​, ಆಕಾಂಕ್ಷಾ ನಿಟ್ಟುರೆ ಎಂಟರ ಘಟ್ಟಕ್ಕೇರಿರುವ ಇತರ ಭಾರತೀಯರಾಗಿದ್ದಾರೆ.

https://www.vijayavani.net/manu-bhaker-new-headache-for-star-shooter-negative-comments-on-fashion-show