ಐಪಿಎಲ್​ನಿಂದ ಚೀನಾ ಕಂಪನಿಗಳಿಗೆ ಪರೋಕ್ಷ ನಿಷೇಧ; ಭಾರತದ ಜತೆ ಸ್ನೇಹ ಹೊಂದಿರದ ದೇಶಗಳನ್ನು ದೂರವಿಟ್ಟ ಬಿಸಿಸಿಐ!

ನವದೆಹಲಿ: ವಿಶ್ವದ ಶ್ರೀಮಂತ ಟಿ20 ಕ್ರಿಕೆಟ್​ ಲೀಗ್​ ಎನಿಸಿರುವ ಐಪಿಎಲ್​ನ ಶೀರ್ಷಿಕೆ ಪ್ರಾಯೋಜಕತ್ವದಿಂದ ಚೀನಾದ ಕಂಪನಿಗಳಿಗೆ ಬಿಸಿಸಿಐ ಪರೋಕ್ಷ ನಿಷೇಧ ಹೇರಿದೆ. ಮುಂದಿನ 5 ವರ್ಷಗಳ ಐಪಿಎಲ್​ ಟೂರ್ನಿಯ ಶೀರ್ಷಿಕೆ ಪ್ರಾಯೋಜಕತ್ವಕ್ಕೆ ಈಗಾಗಲೆ ಟೆಂಡರ್​ ಪ್ರಕ್ರಿಯೆ ಆರಂಭಿಸಿರುವ ಬಿಸಿಸಿಐ, ಭಾರತದ ಜತೆ ಸ್ನೇಹ ಸಂಬಂಧ ಹೊಂದಿರದ ದೇಶದ ಕಂಪನಿಗಳಿಗೆ ಪ್ರಾಯೋಜಕತ್ವ ಹಕ್ಕು ನೀಡುವುದಿಲ್ಲ ಎಂಬ ಷರತ್ತು ವಿಧಿಸಿದೆ. ಇದರಿಂದಾಗಿ, ಭಾರತದ ಜತೆಗೆ ಸದಾ ಗಡಿ ಕ್ಯಾತೆ ತೆಗೆಯುತ್ತಿರುವ ಚೀನಾದ ಕಂಪನಿಗಳು ಬಿಡ್​ನಿಂದ ದೂರ ಉಳಿಯುವಂತಾಗಿದೆ. 2024ರಿಂದ 2028ರವರೆಗಿನ ಐಪಿಎಲ್​ ಟೂರ್ನಿಯ ಶೀರ್ಷಿಕೆ ಪ್ರಾಯೋಜಕತ್ವಕ್ಕೆ ಬಿಸಿಸಿಐ ಕನಿಷ್ಠ ವಾರ್ಷಿಕ 360 ಕೋಟಿ ರೂ. ಬಿಡ್​ ಮೌಲ್ಯ ನಿಗದಿಪಡಿಸಿದೆ.

ಶೀರ್ಷಿಕೆ ಪ್ರಾಯೋಜಕತ್ವಕ್ಕೆ ಬಿಡ್​ ಸಲ್ಲಿಸುವ ಕಾಪೋರ್ರೇಟ್​ ಕಂಪನಿಗಳು ಭಾರತದ ಜತೆ ಸ್ನೇಹಸಂಬಂಧ ಹೊಂದಿರದ ದೇಶಗಳಿಗೆ ಸೇರಿರಬಾರದು. ಅಲ್ಲದೆ ಭಾರತದ ಜತೆ ಸ್ನೇಹ ಹೊಂದಿರದ ದೇಶದ ಉದ್ಯಮಿಗಳು ಪಾಲುದಾರರಾಗಿರುವ ಕಂಪನಿಗಳೂ ಟೆಂಡರ್​ ಪ್ರಕ್ರಿಯೆಯಲ್ಲಿ ಭಾಗವಹಿಸುವಂತಿಲ್ಲ ಎಂದು ಬಿಸಿಸಿಐ ಷರತ್ತು ವಿಧಿಸಿದೆ. ಇದೇ ಕಾರಣಕ್ಕಾಗಿ ಬಿಡ್​ ಸಲ್ಲಿಸುವ ಕಂಪನಿಗಳು ಅಥವಾ ಅದರ ಮಾತೃಕಂಪನಿಗಳು ತನ್ನ ಕಂಪನಿಯ ಪಾಲುದಾರರ ವಿವರಗಳನ್ನೂ ಬಿಸಿಸಿಐಗೆ ಸಲ್ಲಿಸಬೇಕಾಗಿದೆ.

ವಿವೋ ಪ್ರಕರಣ ಕಾರಣ

ಚೀನಾದ ಮೊಬೈಲ್​ ಕಂಪನಿ ವಿವೋಗೆ ಈ ಹಿಂದೆ ಐಪಿಎಲ್​ ಶೀರ್ಷಿಕೆ ಪ್ರಾಯೋಜಕತ್ವ ನೀಡಿದಾಗ ಬಿಸಿಸಿಐ ಎದುರಿಸಿದ ಸಂಕಷ್ಟಗಳು ಈಗಿನ ರ್ನಿಬಂಧಕ್ಕೆ ಕಾರಣವಾಗಿದೆ. 2018ರಿಂದ 2022ರವರೆಗೆ ವಿವೋ, ಐಪಿಎಲ್​ ಶೀರ್ಷಿಕೆ ಪ್ರಾಯೋಜಕತ್ವ ಪಡೆದಿತ್ತು. ಆದರೆ, 2020ರಲ್ಲಿ ಗಡಿ ಗಲಾಟೆಯಲ್ಲಿ ಚೀನಾ ಸೈನಿಕರು ಭಾರತದ 20 ಸೈನಿಕರನ್ನು ಹತ್ಯೆ ಮಾಡಿದಾಗ ವಿವೋ ವಿರುದ್ಧವೂ ಭಾರಿ ಆಕ್ರೋಶ ವ್ಯಕ್ತವಾಗಿತ್ತು. ಇದರಿಂದಾಗಿ ಬಿಸಿಸಿಐ, ವಿವೋ ಕಂಪನಿಯನ್ನು ಐಪಿಎಲ್​ ಶೀರ್ಷಿಕೆ ಪ್ರಾಯೋಜಕತ್ವದಿಂದ ಅರ್ಧದಲ್ಲೇ ಕೈಬಿಡಬೇಕಾಗಿ ಬಂದಿತ್ತು. ನಂತರದಲ್ಲಿ ತುರ್ತಾಗಿ "ಡ್ರೀಮ್​11' ಜತೆ ಕಡಿಮೆ ಮೊತ್ತದ ಒಪ್ಪಂದ ಮಾಡಿಕೊಳ್ಳಬೇಕಾದ ಹಿನ್ನಡೆಯನ್ನು ಬಿಸಿಸಿಐ ಎದುರಿಸಿತ್ತು. ಹೀಗಾಗಿ ಬಿಸಿಸಿಐ ಈ ಬಾರಿ ಪ್ರಾಯೋಜಕತ್ವ ಹಕ್ಕು ವಿತರಿಸುವಾಗಲೇ ಎಚ್ಚರಿಕೆ ವಹಿಸಿದೆ.

ಫ್ಯಾಂಟಸಿ ಗೇಮ್​, ಬೆಟ್ಟಿಂಗ್​, ಮದ್ಯ ಕಂಪನಿಗಳಿಗೂ ರ್ನಿಬಂಧ: ಐಪಿಎಲ್​ ಶೀರ್ಷಿಕೆ ಪ್ರಾಯೋಜಕತ್ವಕ್ಕಾಗಿ ಫ್ಯಾಂಟಸಿ ಗೇಮ್ಸ್​, ಕ್ರೀಡಾ ಉಡುಪುಗಳು, ಕ್ರಿಪ್ಟೋಕರೆನ್ಸಿ ಎಕ್ಸ್​ಚೇಂಜ್​, ಮದ್ಯ, ಬೆಟ್ಟಿಂಗ್​ ಕಂಪನಿಗಳೂ ಬಿಡ್​ ಸಲ್ಲಿಸುವಂತಿಲ್ಲ ಎಂದು ಬಿಸಿಸಿಐ ಷರತ್ತು ವಿಧಿಸಿದೆ. ಬೆಟ್ಟಿಂಗ್​ ಕಂಪನಿಗಳ ಜತೆಗೆ ಪ್ರತ್ಯಕ್ಷ ಅಥವಾ ಪರೋಕ್ಷವಾಗಿ ಸಂಬಂಧ ಹೊಂದಿರುವ ಕಂಪನಿಗಳೂ ಬಿಡ್ಡಿಂಗ್​ ಸಲ್ಲಿಸುವಂತಿಲ್ಲ ಎಂದು ಸ್ಪಷ್ಟಪಡಿಸಿದೆ. ಬಿಸಿಸಿಐ ರ್ನಿಬಂಧಿಸಿರುವ ಕಂಪನಿಗಳ ಪೈಕಿ ಕ್ರೀಡಾ ಉಡುಪುಗಳ ಕಂಪನಿಗಳನ್ನೂ ದೂರವಿಟ್ಟಿರುವುದು ಅಚ್ಚರಿಗೆ ಕಾರಣವಾಗಿದೆ.

ಮೌರಿಷಸ್​ ಮತ್ತು ಬ್ರಿಟಿಷ್​ ವರ್ಜಿನ್​ ಐಸ್​ಲ್ಯಾಂಡ್​ನಂಥ ತೆರಿಗೆ ವಂಚಕರ ಪಾಲಿಗೆ ನೆಚ್ಚಿನ ದೇಶಗಳಿಂದ ವ್ಯವಹಾರ ನಡೆಸುವ ಕಂಪನಿಗಳೂ ಬಿಡ್ಡಿಂಗ್​ನಲ್ಲಿ ಪಾಲ್ಗೊಳ್ಳುವಂತಿಲ್ಲ ಎಂದು ಬಿಸಿಸಿಐ ತಿಳಿಸಿದೆ.

ಬಿಸಿಸಿಐ 5 ಲಕ್ಷ ರೂ. ಮೌಲ್ಯದ ಟೆಂಡರ್​ ದಾಖಲೆಪತ್ರಗಳನ್ನು ಜನವರಿ 8ರವರೆಗೂ ವಿತರಿಸಲಿದ್ದು, ಜನವರಿ 13 ಮತ್ತು 14ರಂದು ಬಿಡ್ಡಿಂಗ್​ ಪ್ರಕ್ರಿಯೆಯನ್ನು ನಡೆಸುವ ನಿರೀಕ್ಷೆ ಇದೆ.

https://www.vijayavani.net/plenty-of-new-faces-in-indian-womens-odi-squad-for-australia-series