ಭಾರತದಲ್ಲಿನ ಕ್ರಿಕೆಟ್​ ಸರಣಿಗಳ ಪ್ರಸಾರ ಹಕ್ಕು ಮಾರಾಟ ಇಂದು; ಜಾಕ್​ಪಾಟ್​ ನಿರೀಕ್ಷೆಯಲ್ಲಿ ಬಿಸಿಸಿಐ

ಮುಂಬೈ: ಭಾರತದಲ್ಲಿ ಮುಂದಿನ 5 ವರ್ಷಗಳ ಕಾಲ ನಡೆಯಲಿರುವ ಕ್ರಿಕೆಟ್​ ಪಂದ್ಯಗಳ ನೇರಪ್ರಸಾರದ ಹಕ್ಕು ಮಾರಾಟಕ್ಕೆ ಬಿಸಿಸಿಐ ಸಜ್ಜಾಗಿದ್ದು, 6 ಸಾವಿರ ಕೋಟಿ ರೂಪಾಯಿಗೂ ಅಧಿಕ ಮೊತ್ತದ ಬಿಡ್​ ಸಲ್ಲಿಕೆಯಾಗುವ ನಿರೀೆಯಲ್ಲಿದೆ. ಪ್ರತಿ ಪಂದ್ಯಕ್ಕೆ ಕನಿಷ್ಠ 60 ಕೋಟಿ ರೂ. ಮೊತ್ತದ ಬಿಡ್​ ನಿರೀಕ್ಷೆ ಹೊಂದಿದೆ.

ಬಿಸಿಸಿಐ ಇದೇ ಮೊದಲ ಬಾರಿಗೆ ಟಿವಿ ಮತ್ತು ಡಿಜಿಟಲ್​ ಪ್ರಸಾರ ಹಕ್ಕುಗಳನ್ನು ಪ್ರತ್ಯೇಕವಾಗಿ ಮಾರಾಟ ಮಾಡಲಿದೆ. ಐಪಿಎಲ್​ನಲ್ಲಿ ಇದೇ ರೀತಿಯ ತಂತ್ರ ಅನುಸರಿಸಿ ಯಶಸ್ಸು ಕಂಡಿರುವ ಹಿನ್ನೆಲೆಯಲ್ಲಿ ಈ ಬಾರಿ ಟೀಮ್​ ಇಂಡಿಯಾದ ಪಂದ್ಯಗಳಿಗೂ ಇದನ್ನೇ ಅಳವಡಿಸಿಕೊಳ್ಳಲಾಗಿದೆ.

ಕಳೆದ ವರ್ಷ ಐಪಿಎಲ್​ ಪ್ರಸಾರ ಹಕ್ಕು ಬರೋಬ್ಬರಿ 48,490 ಕೋಟಿ ರೂ.ಗಳಿಗೆ ಮಾರಾಟವಾಗಿತ್ತು. ಅಂದರೆ ಪ್ರತಿ ಪಂದ್ಯದ ಮೌಲ್ಯ 118 ಕೋಟಿ ರೂ. ಆಗಿತ್ತು. ಈ ಬಾರಿ ಟೀಮ್​ ಇಂಡಿಯಾದ ಪಂದ್ಯವೊಂದು 90 ಕೋಟಿ ರೂ. ಮೌಲ್ಯ ತಲುಪಬಹುದು ಎಂಬ ಲೆಕ್ಕಾಚಾರವಿದೆ.

ಬಿಸಿಸಿಐ 2018ರಲ್ಲಿ ಭಾರತ ತಂಡದ 5 ವರ್ಷಗಳ ಪ್ರಸಾರ ಹಕ್ಕನ್ನು ಸ್ಟಾರ್​ ಸ್ಪೋರ್ಟ್ಸ್​ಗೆ 6,138.1 ಕೋಟಿ ರೂ.ಗೆ (102 ಪಂದ್ಯ) ನೀಡಿತ್ತು. ಅಂದರೆ ಆಗಲೂ ಪ್ರತಿ ಪಂದ್ಯದ ಮೌಲ್ಯ 60.18 ಕೋಟಿ ರೂ. ಆಗಿತ್ತು. ವಿಶ್ವಕಪ್​ ಪೂರ್ವಭಾವಿಯಾಗಿ ಸೆಪ್ಟೆಂಬರ್​ 22ರಿಂದ ಪ್ರವಾಸಿ ಆಸ್ಟ್ರೆಲಿಯಾ ವಿರುದ್ಧ ನಡೆಯಲಿರುವ 3 ಪಂದ್ಯಗಳ ಏಕದಿನ ಸರಣಿಯೊಂದಿಗೆ ಹೊಸ ಪ್ರಸಾರ ಹಕ್ಕಿನ ಅವಧಿ ಶುರುವಾಗಲಿದೆ.

ತ್ರಿಕೋನ ಸ್ಪರ್ಧೆ

ಪ್ರಸಾರ ಹಕ್ಕು ಖರೀದಿಗೆ ಡಿಸ್ನಿ ಸ್ಟಾರ್​, ಸೋನಿ ಸ್ಪೋರ್ಟ್ಸ್​ ಜತೆಗೆ ರಿಲಯನ್ಸ್​ ಗ್ರೂಪ್​ನ ವಯಾಕಾಮ್​18 ರೇಸ್​ನಲ್ಲಿವೆ. ಡಿಸ್ನಿ ಸ್ಟಾರ್​ ಭಾರತದಲ್ಲಿನ ಪ್ರಸಾರ ಹಕ್ಕನ್ನು ತನ್ನಲ್ಲಿಯೇ ಉಳಿಸಿಕೊಳ್ಳುವ ಹಂಬಲದಲ್ಲಿದ್ದರೆ, ವಯಾಕಾಮ್​18 ಡಿಜಿಟಲ್​ ಹಕ್ಕುಗಳ ಖರೀದಿಗೆ ಹೆಚ್ಚಿನ ಪೈಪೋಟಿ ನಡೆಸಲಿದೆ. ಇತ್ತೀಚೆಗೆ ಐಸಿಸಿಯಿಂದ ಪ್ರಸಾರ ಹಕ್ಕು ಪಡೆದುಕೊಂಡಿರುವ ಸೋನಿ ಸ್ಪೋರ್ಟ್ಸ್​ ನೆಟ್​ವರ್ಕ್​ ಈಗ ಬಿಸಿಸಿಐನಿಂದಲೂ ಹಕ್ಕು ಬಾಚಿಕೊಳ್ಳುವ ತವಕದಲ್ಲಿದೆ.

*ಪ್ರಸಾರ ಹಕ್ಕು ಅವಧಿ: 2023 ಸೆಪ್ಟೆಂಬರ್​-2028 ಮಾರ್ಚ್​

*ಪಂದ್ಯಗಳು: 88 (25 ಟೆಸ್ಟ್​, 27 ಏಕದಿನ, 36 ಟಿ20).

*ರೇಸ್​ನಲ್ಲಿರುವವರು: ಡಿಸ್ನಿ ಸ್ಟಾರ್​, ಸೋನಿ ಸ್ಪೋರ್ಟ್ಸ್​, ವಯಾಕಾಮ್​18

*ಮೂಲಬೆಲೆ (ಪ್ರತಿ ಪಂದ್ಯಕ್ಕೆ): ಒಟ್ಟು 45 ಕೋಟಿ ರೂ.

ಪ್ಯಾಕೇಜ್​ ಎ: ಉಪಖಂಡದ ಟಿವಿ ಪ್ರಸಾರ ಹಕ್ಕು: 20 ಕೋಟಿ ರೂ.

ಪ್ಯಾಕೇಜ್​ ಬಿ: ಉಪಖಂಡದ ಡಿಜಿಟಲ್​ ಮತ್ತು ಶೇಷ ವಿಶ್ವದ ಟಿವಿ-ಡಿಜಿಟಲ್​ ಹಕ್ಕು: 25 ಕೋಟಿ ರೂ.

ಕನಿಷ್ಠ 60 ಕೋಟಿ ರೂ. ಬಿಡ್​ ಸಲ್ಲಿಸದಿದ್ದರೆ ಪ್ರಕ್ರಿಯೆ ರದ್ದು!

ಬಿಸಿಸಿಐ ಪ್ರತಿ ಪಂದ್ಯಕ್ಕೆ 45 ಕೋಟಿ ರೂ. ಮೂಲಬೆಲೆ ನಿಗದಿಪಡಿಸಿದ್ದು, ಒಟ್ಟಾರೆ ಕನಿಷ್ಠ 60 ಕೋಟಿ ರೂ. ಮೊತ್ತದ ಬಿಡ್​ ಸಲ್ಲಿಕೆಯಾಗದಿದ್ದರೆ ಇಡೀ ಪ್ರಕ್ರಿಯೆಯನ್ನೇ ರದ್ದುಗೊಳಿಸುವ ಅಧಿಕಾರವನ್ನೂ ಬಿಸಿಸಿಐ ತನ್ನ ಬಳಿ ಇಟ್ಟುಕೊಂಡಿದೆ. ಆದರೆ ಕೆಲ ಲೆಕ್ಕಾಚಾರಗಳ ಪ್ರಕಾರ ಪ್ರತಿ ಪಂದ್ಯದ ಮೌಲ್ಯ 100 ಕೋಟಿ ರೂ. ದಾಟಲಿದೆ. ಯಾಕೆಂದರೆ, ಇತ್ತೀಚೆಗೆ ಇಂಗ್ಲೆಂಡ್​ ಮತ್ತು ಆಸ್ಟ್ರೆಲಿಯಾದ ಕ್ರಿಕೆಟ್​ ಮಂಡಳಿಗಳೇ ಭಾರತ ವಿರುದ್ಧದ ಪಂದ್ಯವೊಂದರ ಪ್ರಸಾರ ಹಕ್ಕನ್ನು 80 ಕೋಟಿ ರೂ.ಗೂ ಅಧಿಕ ಮೊತ್ತಕ್ಕೆ ಮಾರಾಟ ಮಾಡಿತ್ತು.

ಆಸೀಸ್​ ವಿರುದ್ಧ ಗರಿಷ್ಠ 21 ಪಂದ್ಯ

ಐಸಿಸಿ ವೇಳಾಪಟ್ಟಿಯ ಅನ್ವಯ ಭಾರತ ತಂಡ ಮುಂದಿನ 5 ವರ್ಷಗಳಲ್ಲಿ ತವರಿನಲ್ಲಿ 25 ಟೆಸ್ಟ್​, 27 ಏಕದಿನ ಮತ್ತು 36 ಟಿ20 ಸಹಿತ ಒಟ್ಟು 88 ಪಂದ್ಯಗಳನ್ನು ಆಡಲಿದೆ. ಈ ಪೈಕಿ ಆಸ್ಟ್ರೆಲಿಯಾ ವಿರುದ್ಧ ಗರಿಷ್ಠ 21 ಪಂದ್ಯ ಆಡಲಿದ್ದರೆ, ಇಂಗ್ಲೆಂಡ್​ ವಿರುದ್ಧ 18, ದಕ್ಷಿಣ ಆಫ್ರಿಕಾ ವಿರುದ್ಧ 10, ನ್ಯೂಜಿಲೆಂಡ್​ ವಿರುದ್ಧ 11 ಪಂದ್ಯ ಆಡಲಿದೆ. ಶ್ರೀಲಂಕಾ ವಿರುದ್ಧ ಕೇವಲ 6 ಪಂದ್ಯ ಆಡಲಿದ್ದರೆ, ವೆಸ್ಟ್​ ಇಂಡೀಸ್​ ವಿರುದ್ಧ 10, ಅಫ್ಘಾನಿಸ್ತಾನ ವಿರುದ್ಧ 7 ಮತ್ತು ಬಾಂಗ್ಲಾದೇಶ ವಿರುದ್ಧ 5 ಪಂದ್ಯ ಆಡಲಿದೆ.

https://www.vijayavani.net/asia-cup-2023-mohammed-shami-undergoes-hair-transplant