ತಲೆಗೂದಲು ಕಸಿ ಮಾಡಿಸಿಕೊಂಡು ಏಷ್ಯಾಕಪ್​ಗೆ ಸಜ್ಜಾದ ಟೀಮ್​ ಇಂಡಿಯಾ ವೇಗಿ ಶಮಿ!

ನವದೆಹಲಿ: ಐಪಿಎಲ್​ ನಂತರದಲ್ಲಿ ಜೂನ್​ನಲ್ಲಿ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ಫೈನಲ್​ ಪಂದ್ಯದಲ್ಲಿ ಆಡಿದ ಬಳಿಕ ಸಂಪೂರ್ಣ ವಿಶ್ರಾಂತಿಯಲ್ಲಿದ್ದ ಟೀಮ್​ ಇಂಡಿಯಾದ ವೇಗಿ ಮೊಹಮದ್​ ಶಮಿ ಈಗ ಹೊಸ ಅವತಾರದೊಂದಿಗೆ ಏಷ್ಯಾಕಪ್​ ತಂಡವನ್ನು ಕೂಡಿಕೊಂಡಿದ್ದಾರೆ. ಸಿಕ್ಕಾಪಟ್ಟೆ ಕೂದಲು ಉದುರುವ ಸಮಸ್ಯೆ ಹೊಂದಿದ್ದ ಶಮಿ ಈಗ ದುಬಾರಿ ವೆಚ್ಚದಲ್ಲಿ ತಲೆಗೂದಲಿನ ಕಸಿ ಮಾಡಿಸಿಕೊಂಡು ಮರಳಿ ಕಣಕ್ಕಿಳಿಯಲು ಸಜ್ಜಾಗಿದ್ದಾರೆ.

32 ವರ್ಷದ ಮೊಹಮದ್​ ಶಮಿ ಅವರ ತಲೆಗೂದಲು ಇತ್ತೀಚೆಗೆ ಭಾರಿ ಪ್ರಮಾಣದಲ್ಲಿ ಉದುರಲು ಆರಂಭಿಸಿತ್ತು. ಇದರಿಂದಾಗಿ ಕಳೆದ ವರ್ಷ ಸೆಪ್ಟೆಂಬರ್​ನಲ್ಲಿ ಅವರ ಜನ್ಮದಿನ ವೇಳೆ ಸಹ-ಆಟಗಾರ ರಿಷಭ್​ ಪಂತ್​, 'ನಿಮ್ಮ ಕೂದಲು ಮತ್ತು ವಯಸ್ಸು ಎರಡೂ ವೇಗವಾಗಿ ಹೋಗುತ್ತಿದೆ' ಎಂದು ಸಾಮಾಜಿಕ ಜಾಲತಾಣದಲ್ಲಿ ಕಾಲೆಳೆದಿದ್ದರು. ಇದರಿಂದಾಗಿ ಬೇಸತ್ತು ಶಮಿ ತಲೆಗೂದಲು ಕಸಿಗೆ ಮೊರೆ ಹೋಗಿದ್ದಾರೆ.

ಯುಜೆನಿಕ್ಸ್​ ಹೇರ್​ ಸೈನ್ಸಸ್​ನ ವೈದ್ಯರಿಂದ ಶಮಿ ತಲೆಗೂದಲು ಕಸಿ ಮಾಡಿಸಿಕೊಂಡಿದ್ದಾರೆ. ಡೈರೆಕ್ಟ್​ ಹೇರ್​ ಟ್ರಾನ್ಸ್​ಪ್ಲಂಟ್​ (ಡಿಎಚ್​ಟಿ) ತಂತ್ರಜ್ಞಾನದ ಮೂಲಕ ಶಮಿ ತಲೆಗೂದಲು ಕಸಿ ಮಾಡಲಾಗಿದೆ. ಇದು ಸುಮಾರು ಒಂದೂವರೆ ಲಕ್ಷ ರೂ. ಮೊತ್ತದ ಚಿಕಿತ್ಸೆಯಾಗಿದೆ ಎನ್ನಲಾಗಿದೆ. ಕಳೆದ ವೆಸ್ಟ್​ ಇಂಡೀಸ್​ ಪ್ರವಾಸ ಮತ್ತು ಐರ್ಲೆಂಡ್​ ಪ್ರವಾಸಗಳಲ್ಲಿ ಶಮಿ ಆಡಿರಲಿಲ್ಲ. ಇದೇ ಸಮಯವನ್ನು ಅವರು ತಲೆಗೂದಲು ಕಸಿ ಚಿಕಿತ್ಸೆಗೆ ಬಳಸಿಕೊಂಡಿದ್ದಾರೆ. ಬದಲಾದ ಲುಕ್​ನಲ್ಲಿ ಶಮಿ ಅವರಿಂದ ಇನ್ನಷ್ಟು ಹರಿತವಾದ ದಾಳಿಯ ನಿರೀಕ್ಷೆ ಕ್ರಿಕೆಟ್​ ಪ್ರೇಮಿಗಳದ್ದಾಗಿದೆ.

https://www.vijayavani.net/manish-pandeys-outstanding-effort-to-save-a-six-helps-his-team-win-maharaja-trophy