ಟಿ20 ವಿಶ್ವಕಪ್​ನಲ್ಲಿ ಡಚ್ಚರ ಎದುರು ಗೆದ್ದ ಬಾಂಗ್ಲಾದೇಶ; ಹೊರಬಿದ್ದ ಶ್ರೀಲಂಕಾ!

ಕಿಂಗ್ಸ್​ಟೌನ್​: ಶಕೀಬ್​ ಅಲ್​ ಹಸನ್​ (64*ರನ್​, 46 ಎಸೆತ, 9 ಬೌಂಡರಿ) ಅರ್ಧಶತಕ ಮತ್ತು ಬೌಲರ್​ಗಳ ಸಂಟಿತ ದಾಳಿಯ ಬಲದಿಂದ ಬಾಂಗ್ಲಾದೇಶ ತಂಡ ಐಸಿಸಿ ಟಿ20 ವಿಶ್ವಕಪ್​ನಲ್ಲಿ ನೆದರ್ಲೆಂಡ್​ ಎದುರು 25 ರನ್​ಗಳಿಂದ ಗೆದ್ದು ಸೂಪರ್​-8 ಪ್ರವೇಶ ಅವಕಾಶ ವೃದ್ಧಿಸಿಕೊಂಡಿದೆ.

ಅನೋರ್ಸ್​ ವೇಲ್​ ಗ್ರೌಂಡ್​ನಲ್ಲಿ ಗುರುವಾರ ನಡೆದ ಡಿ ಗುಂಪಿನ ಪಂದ್ಯದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಬಾಂಗ್ಲಾ ಆರಂಭಿಕ ಆಘಾತ ಎದುರಿಸಿದರೂ, ಶಕೀಬ್​ ಹೋರಾಟದಿಂದ 5 ವಿಕೆಟ್​ಗೆ 159 ರನ್​ ಕಲೆಹಾಕುವಲ್ಲಿ ಯಶಸ್ವಿಯಾಯಿತು. ಬಾಂಗ್ಲಾ ಕೊನೇ 5 ಓವರ್​ಗಳಲ್ಲಿ 54 ರನ್​ ದೋಚಿತು. ಪ್ರತಿಯಾಗಿ ನೆದರ್ಲೆಂಡ್​, ಸ್ಪಿನ್ನರ್​ ರಿಷದ್​ ಹೊಸೈನ್​ (33ಕ್ಕೆ 3) ದಾಳಿಗೆ ನಲುಗಿ 8 ವಿಕೆಟ್​ಗೆ 134 ರನ್​ ಗಳಿಸಲಷ್ಟೇ ಶಕ್ತವಾಯಿತು. ಕೊನೇ 6 ಓವರ್​ಗಳಲ್ಲಿ ಡಚ್ಚರು 30 ರನ್​ಗಳಿಗೆ 5 ವಿಕೆಟ್​ ಕಳೆದುಕೊಂಡು ಲಯತಪ್ಪಿದರು.

ಮಳೆ ಅಡಚಣೆ: ಮಳೆಯಿಂದಾಗಿ ಪಂದ್ಯದ ಟಾಸ್​ ವಿಳಂಬಗೊಂಡಿತು. ಆದರೆ ಬಳಿಕ ಟಾಸ್​ ಅರ್ಧಗಂಟೆ ತಡವಾಗಿ ನಡೆದರೂ, ಆಟ 15 ನಿಮಿಷಗಳಲ್ಲೇ ಶುರುವಾಯಿತು.

ಬಾಂಗ್ಲಾದೇಶ: 5 ವಿಕೆಟ್​ಗೆ 159 (ತಂಜಿದ್​ 35, ಶಾಂಟೊ 1, ಲಿಟನ್​ 1, ಶಕೀಬ್​ 64*, ಮಹಮುದುಲ್ಲಾ 25, ಆರ್ಯನ್​ ದತ್ತ 17ಕ್ಕೆ 2, ಮೀಕೆರೆನ್​ 15ಕ್ಕೆ 2). ನೆದರ್ಲೆಂಡ್ಸ್​: 8 ವಿಕೆಟ್​ಗೆ 134 (ಲೆವಿಟ್​ 18, ವಿಕ್ರಮ್​ಜಿತ್​ 26, ಎಂಗೆಲ್​ಬ್ರೆಚ್​ 33, ಎಡ್ವರ್ಡ್ಸ್​ 25, ಆರ್ಯನ್​ 15*, ಹೊಸೈನ್​ 33ಕ್ಕೆ 3, ಟಸ್ಕಿನ್​ ಅಹ್ಮದ್​ 30ಕ್ಕೆ 2, ಮುಸ್ತಾಫಿಜುರ್​ 12ಕ್ಕೆ 1, ತಂಜಿಮ್​ 23ಕ್ಕೆ 1).

ಶ್ರೀಲಂಕಾ ಅಧಿಕೃತವಾಗಿ ನಿರ್ಗಮನ

ಬಾಂಗ್ಲಾ ಜಯದೊಂದಿಗೆ ಮಾಜಿ ಚಾಂಪಿಯನ್​ ಶ್ರೀಲಂಕಾ ತಂಡ ಮೊದಲ ಸುತ್ತಿನಲ್ಲೇ ಹೊರಬೀಳುವುದು ಖಚಿತವೆನಿಸಿದೆ. ಇನ್ನು ಲಂಕಾ ತನ್ನ ಕೊನೇ ಪಂದ್ಯದಲ್ಲಿ ನೆದರ್ಲೆಂಡ್​ ಎದುರು ಗೆದ್ದರೂ ಸೂಪರ್​-8 ಹಂತಕ್ಕೇರದು. ಆದರೆ ನೆದರ್ಲೆಂಡ್​ ಕೊನೇ ಪಂದ್ಯ ಗೆದ್ದರೆ (ಬಾಂಗ್ಲಾ ಕೊನೇ ಪಂದ್ಯದಲ್ಲಿ ನೇಪಾಳ ವಿರುದ್ಧ ಹೀನಾಯವಾಗಿ ಸೋತರೆ) ಸೂಪರ್​-8 ಪ್ರವೇಶಿಸುವ ಅವಕಾಶ ಹೊಂದಿದೆ.

https://www.vijayavani.net/ipl-brand-value-per-cent-6-3-progress-2nd-highest-value-for-rcb-among-teams