ಏಷ್ಯನ್​ ಗೇಮ್ಸ್​ನಲ್ಲಿ ಪದಕ ಬೇಟೆಗೆ ಸಜ್ಜಾದ ಭಾರತ; ಯಾವ ಕ್ರೀಡೆಯಲ್ಲಿ, ಯಾರಿಗಿದೆ ಚಾನ್ಸ್​?

ಹಾಂಗ್​ಝೌ: ಭಾರತ ಈ ಬಾರಿ ಸರ್ವಾಧಿಕ 655 ಕ್ರೀಡಾಪಟುಗಳ ಬಳಗದೊಂದಿಗೆ ಹಾಂಗ್​ಝೌ ಏಷ್ಯಾಡ್​ಗೆ ತೆರಳಿದ್ದು, 39 ಕ್ರೀಡೆಗಳಲ್ಲಿ ಸ್ಪರ್ಧಿಸುತ್ತಿದೆ. ದಾಖಲೆಯ 100 ಪದಕ ಗೆಲ್ಲುವ ಹಂಬಲವನ್ನು ಹೊಂದಿರುವ ಯಾವೆಲ್ಲ ಕ್ರೀಡೆಗಳಲ್ಲಿ, ಯಾವ ಯಾವ ಕ್ರೀಡಾಪಟುಗಳು ಪದಕ ಗೆಲ್ಲುವ ಅವಕಾಶವಿದೆ ಎಂಬ ಲೆಕ್ಕಾಚಾರ ಇಲ್ಲಿದೆ...

ಅಥ್ಲೆಟಿಕ್ಸ್​: ಏಷ್ಯಾಡ್​ನಲ್ಲಿ ಚೀನಾ, ಜಪಾನ್​ ಬಿಟ್ಟರೆ ಅಥ್ಲೆಟಿಕ್ಸ್​ನಲ್ಲಿ ಭಾರತವೇ ಬಲಿಷ್ಠ. ಒಲಿಂಪಿಕ್ಸ್​, ಕಾಮನ್ವೆಲ್ತ್​ ಗೇಮ್ಸ್​ನಂತೆ ಅಥ್ಲೆಟಿಕ್ಸ್​ನ ಶಕ್ತಿಕೇಂದ್ರಗಳು ಏಷ್ಯಾಡ್​ನಲ್ಲಿ ಇರುವುದಿಲ್ಲ. ಇನ್ನು ಅಥ್ಲೆಟಿಕ್ಸ್​ನಲ್ಲಿ ಇತ್ತೀಚೆಗೆ ಭಾರತ ಜಾಗತಿಕ ಮಟ್ಟದಲ್ಲೂ ಉತ್ತಮ ನಿರ್ವಹಣೆ ತೋರುತ್ತಿರುವುದರಿಂದ ಏಷ್ಯಾಡ್​ನಲ್ಲಿ ಇನ್ನಷ್ಟು ಪ್ರಾಬಲ್ಯದ ನಿರೀಕ್ಷೆ ಇದೆ. ಜಾವೆಲಿನ್​ ಎಸೆತದಲ್ಲಿ ಒಲಿಂಪಿಕ್ಸ್​-ವಿಶ್ವ ಚಾಂಪಿಯನ್​ ನೀರಜ್​ ಚೋಪ್ರಾಗೆ ಪಾಕಿಸ್ತಾನದ ಅರ್ಷದ್​ ನದೀಂ ಏಕಮಾತ್ರ ಪ್ರಮುಖ ಎದುರಾಳಿಯಾಗಿದ್ದಾರೆ. ಭಾರತಕ್ಕೆ ಗರಿಷ್ಠ ಪದಕ ನಿರೀಕ್ಷೆಯ ಸ್ಪರ್ಧೆ ಇದಾಗಿದೆ.

ಸ್ಪರ್ಧಿಗಳು: 68

ಪಣಕ್ಕಿರುವ ಸ್ವರ್ಣ: 48

ಪ್ರಮುಖರು: ನೀರಜ್​ ಚೋಪ್ರಾ, ಅವಿನಾಶ್​ ಸಾಬ್ಲೆ, ಮುರಳಿ ಶ್ರೀಶಂಕರ್​, ತೇಜಿಂದರ್​ ಪಾಲ್​, ಜ್ಯೋತಿ ಯರಾಜಿ, ಪಾರುಲ್​ ಚೌಧರಿ.

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 29-ಅಕ್ಟೋಬರ್​ 5.

ಕ್ರಿಕೆಟ್​: ಭಾರತ ಪುರುಷರ ಮತ್ತು ಮಹಿಳಾ ವಿಭಾಗಗಳೆರಡರಲ್ಲೂ ಏಷ್ಯಾದ ಅಗ್ರ ಶ್ರೇಯಾಂಕಿತ ತಂಡವಾಗಿದ್ದು, ಸ್ವರ್ಣ ಪದಕದ ನಿರೀಕ್ಷೆ ಇದೆ. ಪುರುಷರ ವಿಭಾಗದಲ್ಲಿ ಭಾರತದ ಪ್ರಮುಖ ತಂಡ ಕಣಕ್ಕಿಳಿಯುತ್ತಿಲ್ಲ. ವಿಶ್ವಕಪ್​ ಹಿನ್ನೆಲೆಯಲ್ಲಿ ಪಾಕ್​, ಶ್ರೀಲಂಕಾ, ಬಾಂಗ್ಲಾ ಕೂಡ 2ನೇ ಸ್ತರದ ತಂಡವನ್ನು ಆಡಿಸುತ್ತಿರುವುದರಿಂದ ಇದು ಹಿನ್ನಡೆಯಲ್ಲ.

ಸ್ಪರ್ಧಿಗಳು: 30

ಪಣಕ್ಕಿರುವ ಸ್ವರ್ಣ: 2

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 19-ಅಕ್ಟೋಬರ್​ 7.

ಬ್ಯಾಡ್ಮಿಂಟನ್​: ಏಷ್ಯಾಡ್​ನಲ್ಲಿ ಬ್ಯಾಡ್ಮಿಂಟನ್​ ನಿರ್ವಹಣೆಯನ್ನು ಒಲಿಂಪಿಕ್ಸ್​ಗೆ ಹೋಲಿಸಬಹುದು. ಯಾಕೆಂದರೆ ಇಲ್ಲಿ ಅಷ್ಟೇ ಕಠಿಣ ಸವಾಲು ಇದೆ. ಅವಳಿ ಒಲಿಂಪಿಕ್ಸ್​ ಪದಕ ವಿಜೇತೆ ಪಿವಿ ಸಿಂಧುಗೆ ಇತ್ತೀಚೆಗಿನ ಕಳಪೆ ಫಾಮ್​ರ್ನಿಂದ ಹೊರಬರುವ ಸವಾಲು ಇದೆ. ಪುರುಷರ ಡಬಲ್ಸ್​ನಲ್ಲಿ ಚಿರಾಗ್​ ಶೆಟ್ಟಿ-ಸಾತ್ವಿಕ್​ ಸಾಯಿರಾಜ್​, ಸಿಂಗಲ್ಸ್​ನಲ್ಲಿ ಎಚ್​ಎಸ್​ ಪ್ರಣಯ್​, ಲಕ್ಷ್ಯ ಸೇನ್​ ಮೇಲೆ ಹೆಚ್ಚಿನ ನಿರೀಕ್ಷೆಗಳಿವೆ.

ಸ್ಪರ್ಧಿಗಳು: 19

ಪಣಕ್ಕಿರುವ ಸ್ವರ್ಣ: 7

ಪ್ರಮುಖರು: ಪಿವಿ ಸಿಂಧು, ಚಿರಾಗ್​ ಶೆಟ್ಟಿ-ಸಾತ್ವಿಕ್​ ಸಾಯಿರಾಜ್​, ಎಚ್​ಎಸ್​ ಪ್ರಣಯ್​, ಲಕ್ಷ್ಯ ಸೇನ್​.

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 28-ಅಕ್ಟೋಬರ್​ 7.

ಹಾಕಿ: ಟೋಕಿಯೊ ಒಲಿಂಪಿಕ್ಸ್​ನಲ್ಲಿ ಭಾರತದ ಹಾಕಿ ತಂಡಗಳು ಗತವೈಭವ ನೆನಪಿಸುವಂಥ ನಿರ್ವಹಣೆ ತೋರಿದ್ದವು. ಇದೀಗ ಪುರುಷ-ಮಹಿಳಾ ವಿಭಾಗದಲ್ಲಿ ಭಾರತ, ಏಷ್ಯಾದ ಅಗ್ರ ಶ್ರೇಯಾಂಕಿತ ತಂಡವಾಗಿದ್ದು, ಏಷ್ಯಾಡ್​ ಚಿನ್ನದ ಪದಕದೊಂದಿಗೆ 2024ರ ಪ್ಯಾರಿಸ್​ ಒಲಿಂಪಿಕ್ಸ್​ಗೆ ನೇರಅರ್ಹತೆ ಪಡೆಯುವ ಅವಕಾಶವನ್ನೂ ಹೊಂದಿದೆ. ಹರ್ಮಾನ್​ಪ್ರೀತ್​ ಸಿಂಗ್​ ಮತ್ತು ಸವಿತಾ ಪೂನಿಯಾ ಸಾರಥ್ಯದಲ್ಲಿ ಭಾರತದ ಪುರುಷ-ಮಹಿಳಾ ತಂಡಗಳು ಅದೇ ಧ್ಯೇಯದೊಂದಿಗೆ ಕಣಕ್ಕಿಳಿಯಲಿವೆ.

ಸ್ಪರ್ಧಿಗಳು: 30

ಪಣಕ್ಕಿರುವ ಸ್ವರ್ಣ: 2

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 24-ಅಕ್ಟೋಬರ್​ 7.

ಬಾಕ್ಸಿಂಗ್​: ಒಲಿಂಪಿಕ್ಸ್​ನಲ್ಲಿ ಮಿಂಚಿದ ಲವ್ಲಿನಾ ಬೋಗೋರ್ಹೈನ್​, ನಿಖತ್​ ಜರೀನ್​ ಜತೆಗೆ ಶಿವ ಥಾಪಾ ಭಾರತದ ಸವಾಲು ಮುನ್ನಡೆಸಲಿದ್ದಾರೆ. ಭಾರತ ಎಲ್ಲ 13 ವಿಭಾಗಗಳಲ್ಲೂ ಪದಕ ಗೆಲ್ಲುವ ತವಕದಲ್ಲಿದೆ.

ಸ್ಪರ್ಧಿಗಳು: 13

ಪಣಕ್ಕಿರುವ ಸ್ವರ್ಣ: 13

ಪ್ರಮುಖರು: ಲವ್ಲಿನಾ ಬೋಗೋರ್ಹೈನ್​, ನಿಖತ್​ ಜರೀನ್​, ಶಿವ ಥಾಪಾ.

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 24-ಅಕ್ಟೋಬರ್​ 5.

ಕುಸ್ತಿ: ಹಲವು ಭವಿಷ್ಯದ ತಾರೆಯರನ್ನು ಒಳಗೊಂಡ ತಂಡದೊಂದಿಗೆ ಭಾರತ ಕುಸ್ತಿಯಲ್ಲಿ ಸ್ಪರ್ಧಿಸಲಿದೆ. ಕೂಟಕ್ಕೆ ಮುನ್ನ ಆಯ್ಕೆ ಟ್ರಯಲ್ಸ್​ ದೊಡ್ಡ ಸುದ್ದಿಯಾಗಿತ್ತು. ನೇರಆಯ್ಕೆಯೊಂದಿಗೆ ಬಂದಿರುವ ಭಜರಂಗ್​ ಪೂನಿಯಾ ಚಿನ್ನದೊಂದಿಗೆ ಅದನ್ನು ಸಮರ್ಥಿಸಬೇಕಿದೆ. ಒಲಿಂಪಿಕ್ಸ್​ ಪದಕ ವಿಜೇತ ರವಿ ದಹಿಯಾಗೆ ಆಯ್ಕೆ ಟ್ರಯಲ್ಸ್​ನಲ್ಲಿ ಅರ್ಹತೆ ತಪ್ಪಿತು ಎಂದರೆ ಭಾರತದ ಕುಸ್ತಿಯ ಸ್ಪರ್ಧಾತ್ಮಕತೆ ಗೊತ್ತಾಗುತ್ತದೆ.

ಸ್ಪರ್ಧಿಗಳು: 18

ಪಣಕ್ಕಿರುವ ಸ್ವರ್ಣ: 18

ಪ್ರಮುಖರು: ಭಜರಂಗ್​ ಪೂನಿಯಾ, ದೀಪಕ್​ ಪೂನಿಯಾ, ಅಂತಿಮ್​ ಪಾಂಗಲ್​,

ಸ್ಪರ್ಧೆಯ ದಿನಾಂಕ: ಅಕ್ಟೋಬರ್​ 4-7.

ವೇಟ್​ಲಿಫ್ಟಿಂಗ್​: ಉತ್ತರ ಕೊರಿಯಾ ಸ್ಪರ್ಧಾಕಣಕ್ಕೆ ಮರಳುತ್ತಿರುವ ಕಾರಣ ಭಾರತಕ್ಕೆ ಕಠಿಣ ಸವಾಲು ಎದುರಾಗಿದೆ. ಪುರುಷರ ವಿಭಾಗದಲ್ಲಿ ಭಾರತ ಸ್ಪರ್ಧಿಸುತ್ತಿಲ್ಲ. ಮಹಿಳಾ ವಿಭಾಗದಲ್ಲಿ ಪದಕ ಗೆಲ್ಲುವ ವಿಶ್ವಾಸದಲ್ಲಿರುವ ಒಲಿಂಪಿಕ್ಸ್​ ಪದಕ ವಿಜೇತೆ ಮೀರಾಬಾಯಿ ಚಾನು ಮತ್ತು ಬಿಂದ್ಯಾರಾಣಿ ದೇವಿ ಮಾತ್ರ ಭಾರತದ ಸ್ಪರ್ಧಿಗಳಾಗಿದ್ದಾರೆ.

ಸ್ಪರ್ಧಿಗಳು: 2

ಪಣಕ್ಕಿರುವ ಸ್ವರ್ಣ: 14

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 30-ಅಕ್ಟೋಬರ್​ 7.

ಟೆನಿಸ್​: ಚೀನಾ, ಜಪಾನ್​ ಆಟಗಾರರ ಸವಾಲಿನ ನಡುವೆ ಭಾರತಕ್ಕೆ ಪುರುಷರ ಡಬಲ್ಸ್​ನಲ್ಲಿ ಕನ್ನಡಿಗ ರೋಹನ್​ ಬೋಪಣ್ಣ-ಯೂಕಿ ಭಾಂಬ್ರಿ ಜೋಡಿಯ ಮೇಲೆ ಸ್ವರ್ಣ ನಿರೀಕ್ಷೆ ಇದೆ. ಉಳಿದಂತೆ ಸುಮಿತ್​ ನಗಾಲ್​, ಅಂಕಿತಾ ರೈನಾ ಕೂಡ ಪದಕದ ಆಕಾಂಕ್ಷಿಗಳಾಗಿದ್ದಾರೆ.

ಸ್ಪರ್ಧಿಗಳು: 9

ಪಣಕ್ಕಿರುವ ಸ್ವರ್ಣ: 5

ಪ್ರಮುಖರು: ರೋಹನ್​ ಬೋಪಣ್ಣ, ಅಂಕಿತಾ ರೈನಾ, ಸುಮಿತ್​ ನಗಾಲ್​, ಯೂಕಿ ಭಾಂಬ್ರಿ.

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 24-30.

ಟೇಬಲ್​ ಟೆನಿಸ್​: ಚೀನಾ ಸ್ಪರ್ಧಿಗಳ ಪ್ರಾಬಲ್ಯದ ನಡುವೆ ಭಾರತ ಚಿನ್ನಕ್ಕೆ ಗುರಿಯಿಡುವುದು ಕಠಿಣ ಸವಾಲು. ಆದರೆ ಅನುಭವಿಗಳಾದ ಶರತ್​ ಕಮಲ್​, ಮನಿಕಾ ಬಾತ್ರಾ ಹಾಜರಿಯಿಂದ ಪದಕದ ನಿರೀಕ್ಷೆ ಇದೆ.

ಸ್ಪರ್ಧಿಗಳು: 10

ಪಣಕ್ಕಿರುವ ಸ್ವರ್ಣ: 7

ಪ್ರಮುಖರು: ಶರತ್​ ಕಮಲ್​, ಮನಿತಾ ಬಾತ್ರಾ, ಜಿ. ಸತ್ಯನ್​.

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 22-ಅಕ್ಟೋಬರ್​ 2.

ಶೂಟಿಂಗ್​: ಭಾರತದ ಶೂಟರ್​ಗಳು ಕಳೆದೆರಡು ಒಲಿಂಪಿಕ್ಸ್​ಗಳಲ್ಲಿ ನಿರಾಸೆ ಮೂಡಿಸಿದ್ದು, ಕಳೆದ ಕಾಮನ್ವೆಲ್ತ್​ ಗೇಮ್ಸ್​ನಲ್ಲಿ ಸ್ಪರ್ಧೆ ಅವಕಾಶದಿಂದಲೂ ವಂಚಿತರಾಗಿದ್ದರು. ಹೀಗಾಗಿ ಶೂಟಿಂಗ್​ನಲ್ಲಿ ಮತ್ತೆ ಭಾರತದ ಸಾಮರ್ಥ್ಯ ತೋರಿಸಲು ಇದು ಸರಿಯಾದ ವೇದಿಕೆ. ಇತ್ತೀಚೆಗೆ ರೈಲ್​-ಪಿಸ್ತೂಲ್​ ವಿಶ್ವಕಪ್​ನಲ್ಲಿ ಉತ್ತಮ ನಿರ್ವಹಣೆ ತೋರಿಸಿರುವುದು ನಿರೀಕ್ಷೆ ಹೆಚ್ಚಿಸಿದೆ.

ಸ್ಪರ್ಧಿಗಳು: 33

ಪಣಕ್ಕಿರುವ ಸ್ವರ್ಣ: 33

ಪ್ರಮುಖರು: ಮನು ಭಾಕರ್​, ದಿವ್ಯಾಂಶ್​, ಐಶ್ವರಿ ಪ್ರತಾಪ್​ ಸಿಂಗ್​, ಮೇಹುಲಿ ಘೋಷ್​.

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 24-ಅಕ್ಟೋಬರ್​ 1.

ಕಬಡ್ಡಿ: ಭಾರತ ತನ್ನ ಮಣ್ಣಿನ ಆಟ ಕಬಡ್ಡಿಯಲ್ಲಿ ಈ ಬಾರಿ ಮತ್ತೆ ಅಧಿಪತ್ಯ ಸಾಧಿಸಲು ಹೋರಾಡಬೇಕಿದೆ. ಏಷ್ಯಾಡ್​ಗೆ ಪುರುಷರ ಕಬಡ್ಡಿ ಸೇರ್ಪಡೆಗೊಂಡ ಬಳಿಕ ಸತತ 7 ಬಾರಿ ಚಿನ್ನ ಗೆದ್ದಿದ್ದರೆ, ಮಹಿಳೆಯರಲ್ಲಿ 2010ರಿಂದ ಸತತ 2 ಬಾರಿ ಚಿನ್ನ ಗೆದ್ದಿದ್ದ ಭಾರತ ಕಳೆದ ಆವೃತ್ತಿಯಲ್ಲಿ ಎರಡೂ ವಿಭಾಗಗಳಲ್ಲಿ ಚಿನ್ನ ಗೆಲ್ಲಲು ವಿಫಲವಾಗಿತ್ತು. ಭಾರತಕ್ಕೆ ಇರಾನ್​ ಶಾಕ್​ ನೀಡಿತ್ತು. ಈ ಬಾರಿ ಭಾರತ ಮತ್ತೆ ಎರಡೂ ಚಿನ್ನ ಗೆಲ್ಲುವ ಫೇವರಿಟ್​ ಆಗಿ ಕಣಕ್ಕಿಳಿಯಲಿದೆ.

ಸ್ಪರ್ಧಿಗಳು: 24

ಪಣಕ್ಕಿರುವ ಸ್ವರ್ಣ: 2

ಸ್ಪರ್ಧೆಯ ದಿನಾಂಕ: ಅಕ್ಟೋಬರ್​ 2-7.

ಗಾಲ್ಫ್​: ಟೋಕಿಯೊ ಒಲಿಂಪಿಕ್ಸ್​ನಲ್ಲಿ ಸ್ವಲ್ಪದರಲ್ಲಿ ಪದಕ ವಂಚಿತರಾಗಿದ್ದ ಕನ್ನಡತಿ ಅದಿತಿ ಅಶೋಕ್​ ಏಷ್ಯಾಡ್​ನಲ್ಲಿ ಪದಕ ಗೆಲ್ಲುವ ನಿರೀಕ್ಷೆ ಇದೆ. ಪುರುಷರ ವಿಭಾಗದಲ್ಲಿ ಅರ್ನಿಬನ್​ ಲಹಿರಿ ಮೇಲೆ ನಿರೀಕ್ಷೆ ಇದ್ದು, ಭಾರತದ ಯುವ ತಂಡ ಗಮನಾರ್ಹ ನಿರ್ವಹಣೆ ತೋರುವ ಹಂಬಲದಲ್ಲಿದೆ.

ಸ್ಪರ್ಧಿಗಳು: 7

ಪಣಕ್ಕಿರುವ ಸ್ವರ್ಣ: 4

ಪ್ರಮುಖರು:

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 28-ಅಕ್ಟೋಬರ್​ 1.

ಚೆಸ್​: ಏಷ್ಯಾಡ್​ಗೆ 13 ವರ್ಷಗಳ ಬಳಿಕ ಮರಳಿರುವ ಚೆಸ್​ ಸ್ಪರ್ಧೆಯಲ್ಲಿ ಭಾರತ ಅನುಭವಿ&ಯುವ ತಂಡದೊಂದಿಗೆ ಸ್ಪರ್ಧಿಸುತ್ತಿದೆ. ಇತ್ತೀಚೆಗೆ ಚೆಸ್​ ವಿಶ್ವಕಪ್​ನಲ್ಲಿ ಮಿಂಚಿದ ಆರ್​. ಪ್ರಜ್ಞಾನಂದ ಜತೆಗೆ ಡಿ. ಗುಕೇಶ್​, ಮಹಿಳಾ ವಿಭಾಗದಲ್ಲಿ ಕೊನೆರು ಹಂಪಿ, ಡಿ. ಹರಿಕಾ ಮೇಲೆ ಹೆಚ್ಚಿನ ನಿರೀಕ್ಷೆಗಳಿವೆ.

ಸ್ಪರ್ಧಿಗಳು: 10

ಪಣಕ್ಕಿರುವ ಸ್ವರ್ಣ:

ಪ್ರಮುಖರು: ಆರ್​. ಪ್ರಜ್ಞಾನಂದ, ಡಿ. ಗುಕೇಶ್​, ಕೊನೆರು ಹಂಪಿ, ಡಿ. ಹರಿಕಾ.

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 24-ಅಕ್ಟೋಬರ್​ 7.

ಆರ್ಚರಿ: ಕೊರಿಯಾ ಸ್ಪರ್ಧಿಗಳ ಸವಾಲಿನ ನಡುವೆ ಹೆಚ್ಚಿನ ಪದಕ ನಿರೀಕ್ಷೆ ಇಡಬಹುದಾದ ಸ್ಪರ್ಧೆ ಇದಾಗಿದೆ. ಅತನು ದಾಸ್​, ಜ್ಯೋತಿ ಸುರೇಖಾ ಭಾರತದ ಸವಾಲು ಮುನ್ನಡೆಲಿದ್ದಾರೆ.

ಸ್ಪರ್ಧಿಗಳು: 16

ಪಣಕ್ಕಿರುವ ಸ್ವರ್ಣ: 10

ಪ್ರಮುಖರು: ಅತನು ದಾಸ್​, ಅಭಿಷೇಕ್​ ವರ್ಮ, ಜ್ಯೋತಿ ಸುರೇಖಾ.

ಸ್ಪರ್ಧೆಯ ದಿನಾಂಕ: ಅಕ್ಟೋಬರ್​ 1-7

ಸ್ಕ್ವಾಷ್​: ಏಷ್ಯಾಡ್​ನಲ್ಲಿ ಭಾರತಕ್ಕೆ ಪದಕ ನಿರೀಕ್ಷೆ ಇರುವ ಕ್ರೀಡೆಗಳಲ್ಲಿ ಒಂದಾಗಿರುವ ಸ್ಕ್ವಾಷ್​ನಲ್ಲಿ ಅನುಭವಿಗಳಾದ ಜೋಶ್ನಾ ಚಿನ್ನಪ್ಪ, ದೀಪಿಕಾ ಪಲ್ಲಿಕಲ್​, ಸೌರವ್​ ಘೋಷಾಲ್​ ಭಾರತದ ಸವಾಲು ಮುನ್ನಡೆಸಲಿದ್ದಾರೆ.

ಸ್ಪರ್ಧಿಗಳು: 8

ಪಣಕ್ಕಿರುವ ಸ್ವರ್ಣ: 5

ಸ್ಪರ್ಧೆಯ ದಿನಾಂಕ: ಸೆಪ್ಟೆಂಬರ್​ 26-ಅಕ್ಟೋಬರ್​ 5.

ಭಾರತಕ್ಕೆ ಪದಕ ನಿರೀಕ್ಷೆ ಕಡಿಮೆ ಇರುವ ಸ್ಪರ್ಧೆಗಳು

ಫುಟ್​ಬಾಲ್​ (ಸೆ.19-27), ಈಜು (ಸೆಪ್ಟೆಂಬರ್​ 24-29), ಬಾಸ್ಕೆಟ್​ಬಾಲ್​ (ಸೆ.26-ಅ.6), ಸೈಕ್ಲಿಂಗ್​ (ಸೆ. 25-ಅ.5), ಕನೋಯಿಂಗ್​ (ಸೆ.30-ಅ.7), ಈಕ್ವೆಸ್ಟ್ರಇಯನ್​ (ಸೆ.26-ಅ.6), ವಾಲಿಬಾಲ್​ (ಸೆ.19-ಅ.7), ಬ್ರಿಡ್ಜ್​ (ಸೆ. 27-ಅ. 6), ಇ-ಸ್ಪೋರ್ಟ್ಸ್​ (ಸೆ.24-ಅ.2), ಫೆನ್ಸಿಂಗ್​ (ಸೆ. 24-29), ಜಿಮ್ನಾಸ್ಟಿಕ್ಸ್​ (ಸೆ.24-29), ಹ್ಯಾಂಡ್​ಬಾಲ್​ (ಸೆ.24-ಅ.7), ಜುಡೋ (ಸೆ.24-27), ಜು-ಜಿತ್ಸು (ಅ.5-7), ಕುರಾಶ್​ (ಸೆ.30-ಅ.2), ವುಶು (ಸೆ.24-28), ಮಾಡರ್ನ್​ ಪೆಂಟಾಥ್ಲಾನ್​ (ಸೆ.20-24), ರೋಲರ್​ ಸ್ಪೋರ್ಟ್ಸ್​ (ಸೆ.30-ಅ.7), ರೋಯಿಂಗ್​ (ಸೆ.20-25), ರಗ್ಬಿ ಸೆವೆನ್ಸ್​ (ಸೆ.24-26), ಸೈಲಿಂಗ್​ (ಸೆ.21-27), ಸೆಪಕ್​ ಟಕ್ರಾ (ಸೆ.24-ಅ.1), ಸಾಫ್ಟ್​ ಟೆನಿಸ್​ (ಅ.3-7), ಸ್ಪೋಟ್ಸ್​ ಕ್ಲೈಂಬಿಂಗ್​ (ಅ.3-7).

https://www.vijayavani.net/chahal-wife-dhanashree-verma-dazzles-along-with-ranveer-singh-in-the-world-cup-anthem