ಮೂರನೇ ದಿನ ಚಿತ್ರಣ ಬದಲಿಸಿದ ಜುರೆಲ್​, ಅಶ್ವಿನ್​, ಕುಲದೀಪ್​; ರಾಂಚಿಯಲ್ಲಿ ಸರಣಿ ಗೆಲುವಿನ ಅಂಚಿಗೆ ಟೀಮ್​ ಇಂಡಿಯಾ

ರಾಂಚಿ: ಮೊದಲ ಎರಡು ದಿನದಾಟದಲ್ಲಿ ಪ್ರವಾಸಿ ಇಂಗ್ಲೆಂಡ್​ ತಂಡಕ್ಕೆ ಬಹುತೇಕ ಮೇಲುಗೈ ಬಿಟ್ಟುಕೊಟ್ಟಿದ್ದ ಭಾರತ ತಂಡ ಮೂರನೇ ದಿನದಾಟದಲ್ಲಿ ಯುವ ವಿಕೆಟ್​ ಕೀಪರ್​-ಬ್ಯಾಟರ್​ ಧ್ರುವ ಜುರೆಲ್​ (90 ರನ್​, 149 ಎಸೆತ, 6 ಬೌಂಡರಿ, 4 ಸಿಕ್ಸರ್​) ತೋರಿದ ಸಾಹಸಿಕ ಬ್ಯಾಟಿಂಗ್​ ನಿರ್ವಹಣೆ ಮತ್ತು ಆರ್​. ಅಶ್ವಿನ್​ (51ಕ್ಕೆ 5), ಕುಲದೀಪ್​ ಯಾದವ್​ (22ಕ್ಕೆ 4) ಜೋಡಿಯ ಅಮೋ ಸ್ಪಿನ್​ ದಾಳಿಯ ಬಲದಿಂದ ಗೆಲುವಿನತ್ತ ಮುನ್ನಡೆದಿದೆ. ಆಂಗ್ಲರ ದ್ವೀತಿಯ ಇನಿಂಗ್ಸ್​ಗೆ ಕಡಿವಾಣ ಹಾಕಿದ ಭಾರತ ತಂಡವೀಗ ಗೆಲುವಿನಿಂದ ಕೇವಲ 152 ರನ್​ ದೂರ ನಿಂತಿದೆ. ಇದರೊಂದಿಗೆ ನಾಲ್ಕನೇ ದಿನದಾಟದಲ್ಲಿ ಭಾರತ ತಂಡ, 5 ಪಂದ್ಯಗಳ ಸರಣಿಯನ್ನು ಇನ್ನೊಂದು ಪಂದ್ಯ ಬಾಕಿ ಇರುವಂತೆಯೇ 3-1ರಿಂದ ವಶಪಡಿಸಿಕೊಳ್ಳುವ ನಿರೀಕ್ಷೆ ಹೆಚ್ಚಾಗಿದೆ.

ಜೆಎಸ್​ಸಿಎ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಭಾನುವಾರ 7 ವಿಕೆಟ್​ಗೆ 219 ರನ್​ಗಳಿಂದ ಆಟ ಮುಂದುವರಿಸಿದ ಭಾರತ, ಭೋಜನ ವಿರಾಮದ ವೇಳೆಗೆ 307 ರನ್​ಗಳಿಗೆ ಸರ್ವಪತನ ಕಂಡಿತು. ಧ್ರುವ ಜುರೆಲ್​ ಹೋರಾಟದಿಂದ ಭಾರತದ ಮೊದಲ ಹಿನ್ನಡೆ 46 ರನ್​ಗಳಿಗೆ ತಗ್ಗಿತು. ಬಳಿಕ ಅಶ್ವಿನ್​&ಕುಲದೀಪ್​ ಜೋಡಿಯ ಸ್ಪಿನ್​ ದಾಳಿಗೆ ದ್ವಿತೀಯ ಇನಿಂಗ್ಸ್​ನಲ್ಲಿ ನಾಟಕೀಯ ಕುಸಿತ ಕಂಡ ಇಂಗ್ಲೆಂಡ್​ 53.5 ಓವರ್​ಗಳಲ್ಲಿ 145 ರನ್​ಗಳಿಗೆ ಆಲೌಟ್​ ಆಯಿತು. ಮತ್ತೊಮ್ಮೆ ಬಾಜ್​ಬಾಲ್​ ಆಟವನ್ನು ಮರೆತ ಇಂಗ್ಲೆಂಡ್​ ತಂಡ ಪ್ರತಿ ಓವರ್​ಗೆ 2.69ರ ಸರಾಸರಿಯಲ್ಲಷ್ಟೇ ರನ್​ ಪೇರಿಸಲು ಶಕ್ತವಾಯಿತು. ಇದರಿಂದ ಗೆಲುವಿಗೆ 192 ರನ್​ ಗುರಿ ಪಡೆದಿರುವ ಭಾರತ ತಂಡ ದಿನದಂತ್ಯಕ್ಕೆ 8 ಓವರ್​ಗಳಲ್ಲಿ ವಿಕೆಟ್​ ನಷ್ಟವಿಲ್ಲದೆ 40 ರನ್​ ಪೇರಿಸಿದೆ.

ನಾಯಕ ರೋಹಿತ್​ ಶರ್ಮ (24*) ಮತ್ತು ಯಶಸ್ವಿ ಜೈಸ್ವಾಲ್​ (16*) ಪ್ರತಿ ಓವರ್​ಗೆ 5ರ ಸರಾಸರಿಯಲ್ಲಿ ರನ್​ ಪೇರಿಸುವ ಮೂಲಕ ಭಾರತದ ಗೆಲುವಿಗೆ ಉತ್ತಮ ಬುನಾದಿ ಹಾಕಿಕೊಟ್ಟರು. ಭಾರತ ಸೋಮವಾರ ಮಧ್ಯಾಹ್ನದೊಳಗೆ ತವರಿನ ಗೆಲುವಿನ ಓಟವನ್ನು ಸತತ 17ನೇ ಸರಣಿಗೆ ವಿಸ್ತರಿಸುವ ನಿರೀೆ ಇದೆ. ದ್ವೀತಿಯ ಇನಿಂಗ್ಸ್​ ವೈಫಲ್ಯದಿಂದಾಗಿ ಸೋಲಿನಂಚಿನಲ್ಲಿ ನಿಂತಿರುವ ಆಂಗ್ಲರಿಗೆ ಸಮಬಲ ಸಾಧಿಸಿ ಸರಣಿ ಜೀವಂತವಿಡಲು ಭಾರತದ ಎಲ್ಲ 10 ವಿಕೆಟ್​ ಕಬಳಿಸಬೇಕಾದ ಒತ್ತಡವಿದೆ.

ಅಶ್ವಿನ್​-ಕುಲದೀಪ್​ ಭರ್ಜರಿ ಬೇಟೆ

ಭೋಜನ ವಿರಾಮದ ಬಳಿಕ ಆಂಗ್ಲರ 2ನೇ ಇನಿಂಗ್ಸ್​ ಆರಂಭಗೊಂಡಾಗ ಅಶ್ವಿನ್​&ಜಡೇಜಾ ಜೋಡಿ ಹೊಸ ಚೆಂಡಿನಿಂದಲೇ ದಾಳಿಗೆ ಇಳಿಯಿತು. ಅಶ್ವಿನ್​ ಇನಿಂಗ್ಸ್​ನ 5ನೇ ಓವರ್​ನ ಕೊನೇ 2 ಎಸೆತಗಳಲ್ಲಿ ಬೆನ್​ ಡಕೆಟ್​ (15) ಮತ್ತು ಒಲಿ ಪೋಪ್​ (0) ವಿಕೆಟ್​ ಕಬಳಿಸಿ ಆಂಗ್ಲರ ಲಯ ತಪ್ಪಿಸಿದರು. ನಂತರ ಮೊದಲ ಇನಿಂಗ್ಸ್​ ಶತಕವೀರ ಜೋ ರೂಟ್​ (11) ಕೂಡ ಅಶ್ವಿನ್​ ಬಲೆಗೆ ಬಿದ್ದರು. ಮತ್ತೊಂದೆಡೆ ತಂಡಕ್ಕೆ ಆಸರೆಯಾಗಿ ನಿಂತಿದ್ದ ಆರಂಭಿಕ ಜಾಕ್​ ಕ್ರೌಲಿ (60) 4ನೇ ವಿಕೆಟ್​ಗೆ ಜಾನಿ ಬೇರ್​ಸ್ಟೋ ಜತೆಗೆ 45 ರನ್​ ಸೇರಿಸಿ ಇನಿಂಗ್ಸ್​ಗೆ ಮರುಜೀವ ತುಂಬಲು ಯತ್ನಿಸಿದರು. ಆದರೆ ಚಹಾ ವಿರಾಮಕ್ಕೆ ಮುನ್ನ ಕ್ರೌಲಿ ಮತ್ತು ನಾಯಕ ಬೆನ್​ ಸ್ಟೋಕ್ಸ್​ (4) ವಿಕೆಟ್​ ಕಬಳಿಸಿದ ಕುಲದೀಪ್​ ಆಂಗ್ಲರನ್ನು ಮತ್ತೆ ಸಂಕಷ್ಟಕ್ಕೆ ಸಿಲುಕಿಸಿದರು. ವಿರಾಮದ ಬಳಿಕ ಮೊದಲ ಎಸೆತದಲ್ಲೇ ಜಾನಿ ಬೇರ್​ಸ್ಟೋ (30) ವಿಕೆಟ್​ ಕಬಳಿಸಿದ ಜಡೇಜಾ ಆಂಗ್ಲರು ಮತ್ತೆ ಚೇತರಿಸಿಕೊಳ್ಳದಂತೆ ನೋಡಿಕೊಂಡರು. 12 ರನ್​ ಅಂತರದಲ್ಲಿ ಆಂಗ್ಲರ ಕೊನೇ 4 ವಿಕೆಟ್​ಗಳನ್ನು ಹಂಚಿಕೊಂಡ ಅಶ್ವಿನ್​&ಕುಲದೀಪ್​ ಭಾರತಕ್ಕೆ 200ರೊಳಗಿನ ಸ್ಪರ್ಧಾತ್ಮಕ ಸವಾಲು ಎದುರಾಗುವಂತೆ ಮಾಡಿದರು. ಆಂಗ್ಲರ ಕೊನೇ 7 ವಿಕೆಟ್​ಗಳು ಕೇವಲ 35 ರನ್​ ಅಂತರದಲ್ಲಿ ಉರುಳಿದವು.

https://www.vijayavani.net/jasprit-bumrah-cheers-on-wife-sanjana-ganesan-as-she-resumes-broadcasting-duties