ಐಪಿಎಲ್​ ರಿಟೇನ್​ ಕುತೂಹಲ; ಹರಾಜಿಗೆ ಮುನ್ನ ಕೆಲ ಪ್ರಮುಖರ ರಿಲೀಸ್​ ನಿರೀಕ್ಷೆ; ಹೀಗಿದೆ 10 ತಂಡಗಳ ಲೆಕ್ಕಾಚಾರ...

ನವದೆಹಲಿ: ಡಿಸೆಂಬರ್​ 19ರಂದು ದುಬೈನಲ್ಲಿ ನಡೆಯಲಿರುವ ಐಪಿಎಲ್​ 17ನೇ ಆವೃತ್ತಿಯ ಆಟಗಾರರ ಹರಾಜು ಪ್ರಕ್ರಿಯೆಗೆ ಮುನ್ನ ಎಲ್ಲ 10 ತಂಡಗಳು ಉಳಿಸಿಕೊಳ್ಳಲಿರುವ ಆಟಗಾರರ ಪಟ್ಟಿಯನ್ನು ಬಿಸಿಸಿಐಗೆ ಸಲ್ಲಿಸುವ ದಿನ ಹತ್ತಿರ ಬಂದಿದೆ. ತಂಡಗಳ ನಡುವೆ ಆಟಗಾರರ ವರ್ಗಾವಣೆಗೆ ಮತ್ತು ರಿಟೇನ್​ ಮಾಡಿಕೊಳ್ಳುವ ಕುರಿತು ಆಟಗಾರರೊಂದಿಗೂ ಮಾತುಕತೆಗಳು ಭರದಿಂದ ಸಾಗಿದ್ದು, ಭಾನುವಾರದೊಳಗೆ ಎಲ್ಲವೂ ಅಂತಿಮಗೊಳ್ಳಬೇಕಿದೆ.

ಹಾಲಿ ಚಾಂಪಿಯನ್​ ಸಿಎಸ್​ಕೆ ತಂಡಕ್ಕೆ ಆಟಗಾರರ ರಿಲೀಸ್​ ನಂತರ, ಹರಾಜಿಗೆ ಹೆಚ್ಚಿನ ಹಣ ಲಭಿಸುವ ಸಾಧ್ಯತೆಗಳಿವೆ. ಯಾಕೆಂದರೆ ಕಳೆದ ಹರಾಜಿನಲ್ಲಿ 16.25 ಕೋಟಿ ರೂ.ಗೆ ಖರೀದಿಸಿದ್ದ ಇಂಗ್ಲೆಂಡ್​ ಆಲ್ರೌಂಡರ್​ ಬೆನ್​ ಸ್ಟೋಕ್ಸ್​ ಈ ಬಾರಿ ತಂಡದಿಂದ ಹೊರನಡೆಯುವುದು ಖಚಿತಗೊಂಡಿದ್ದರೆ, 6.75 ಕೋಟಿ ರೂ. ಒಪ್ಪಂದದ ಅಂಬಾಟಿ ರಾಯುಡು ಕಳೆದ ಆವೃತ್ತಿಯ ಬಳಿಕ ನಿವೃತ್ತರಾಗಿದ್ದಾರೆ.

ಕಳೆದ ಹರಾಜಿನಲ್ಲಿ ದಾಖಲೆಯ 18.50 ಕೋಟಿ ರೂ.ಗೆ ಪಂಜಾಬ್​ ಕಿಂಗ್ಸ್​ ಸೇರಿದ ಇಂಗ್ಲೆಂಡ್​ ಯುವ ಆಲ್ರೌಂಡರ್​ ಸ್ಯಾಮ್​ ಕರನ್​, 13.25 ಕೋಟಿ ರೂ.ಗೆ ಸನ್​ರೈಸರ್ಸ್​ ಸೇರಿದ್ದ ಇಂಗ್ಲೆಂಡ್​ ಬ್ಯಾಟರ್​ ಹ್ಯಾರಿ ಬ್ರೂಕ್​ ಕೂಡ ರಿಲೀಸ್​ ಸಾಧ್ಯತೆಗಳಿವೆ. ನ್ಯೂಜಿಲೆಂಡ್​ ವೇಗಿಗಳಾದ ಟಿಮ್​ ಸೌಥಿ ಮತ್ತು ಲಾಕಿ ಫಗ್ಯುರ್ಸನ್​ ಕೆಕೆಆರ್​ನಿಂದ ರಿಲೀಸ್​ ನಿರೀಕ್ಷೆ ಇದೆ. ವಿಂಡೀಸ್​ ಆಲ್ರೌಂಡರ್​ ಆಂಡ್ರೆ ರಸೆಲ್​ರನ್ನು ಕೆಕೆಆರ್​ ರಿಲೀಸ್​ ಮಾಡುವ ಊಹಾಪೋಹಗಳಿದ್ದರೂ, ಆ ಸಾಧ್ಯತೆ ಕಡಿಮೆ ಎನಿಸಿದೆ. ಡೆಲ್ಲಿ ತಂಡ ಕನ್ನಡಿಗ ಮನೀಷ್​ ಪಾಂಡೆ ಸಹಿತ ಕೆಲ ಪ್ರಮುಖ ಆಟಗಾರರನ್ನು ಕೈಬಿಡುವ ನಿರೀಕ್ಷೆ ಇದೆ.

10 ತಂಡಗಳ ಸಂಭಾವ್ಯ ರಿಲೀಸ್​:

ಆರ್​ಸಿಬಿ: ದಿನೇಶ್​ ಕಾರ್ತಿಕ್​, ಫಿನ್​ ಅಲೆನ್​, ರೀಸ್​ ಟಾಪ್ಲೆ, ವಿಲ್​ ಜಾಕ್ಸ್​.

ಸಿಎಸ್​ಕೆ: ಬೆನ್​ ಸ್ಟೋಕ್ಸ್​, ಅಂಬಟಿ ರಾಯುಡು (ನಿವೃತ್ತಿ), ಡ್ವೇನ್​ ಪ್ರಿಟೋರಿಯಸ್​, ಸಿಸಾಂಡ, ಕೈಲ್​ ಜೇಮಿಸನ್​.

ಡೆಲ್ಲಿ ಕ್ಯಾಪಿಟಲ್ಸ್​: ಮನೀಷ್​ ಪಾಂಡೆ, ಪೃಥ್ವಿ ಷಾ, ಫಿಲ್​ ಸಾಲ್ಟ್​, ರಿಲೀ ರೋಸೌ.

ರಾಜಸ್ಥಾನ ರಾಯಲ್ಸ್​: ಜೇಸನ್​ ಹೋಲ್ಡರ್​, ಜೋ ರೂಟ್​, ಕೆಸಿ ಕಾರ್ಯಪ್ಪ, ಎಂ. ಅಶ್ವಿನ್​.

ಲಖನೌ ಸೂಪರ್​ಜೈಂಟ್ಸ್​: ಮಾರ್ಕಸ್​ ಸ್ಟೋಯಿನಿಸ್​, ಇವಿನ್​ ಲೆವಿಸ್​, ಕೆ. ಗೌತಮ್​.

ಸನ್​ರೈಸರ್ಸ್​: ಹ್ಯಾರಿ ಬ್ರೂಕ್​, ಅಕೀಲ್​ ಹೊಸೈನ್​, ಆದಿಲ್​ ರಶೀದ್​.

ಮುಂಬೈ ಇಂಡಿಯನ್ಸ್​: ಜೈದೇವ್​ ಉನಾದ್ಕತ್​, ರಿಲೀ ಮೆರಿಡಿತ್​, ಪೀಯುಷ್​ ಚಾವ್ಲಾ.

ಗುಜರಾತ್​ ಟೈಟಾನ್ಸ್​: ಯಶ್​ ದಯಾಳ್​, ದಸುನ್​ ಶನಕ, ಒಡೆನ್​ ಸ್ಮಿತ್​, ಪ್ರದಿಪ್​ ಸಂಗ್ವಾನ್​.

ಕೆಕೆಆರ್​: ಲಾಕಿ ಫಗ್ಯುರ್ಸನ್​, ಟಿಮ್​ ಸೌಥಿ, ಲಿಟನ್​ ದಾಸ್​, ಡೇವಿಡ್​ ವೈಸ್​, ಎನ್​. ಜಗದೀಶನ್​.

ಪಂಜಾಬ್​ ಕಿಂಗ್ಸ್​: ಸ್ಯಾಮ್​ ಕರನ್​, ಮ್ಯಾಥ್ಯೂ ಶಾರ್ಟ್​, ಭಾನುಕಾ ರಾಜಪಕ್ಷ, ರಿಷಿ ಧವನ್​.

ಹೊಸ ಆಕರ್ಷಣೆ

ಐಪಿಎಲ್​ ಹರಾಜಿನಲ್ಲಿ ಈ ಬಾರಿ ಕೆಲ ಹೊಸ ಆಟಗಾರರ ಆಕರ್ಷಣೆಯೂ ಇರಲಿದೆ. ವಿಶ್ವಕಪ್​ ಫೈನಲ್​ ಹೀರೋ ಟ್ರಾವಿಸ್​ ಹೆಡ್​, ಪ್ಯಾಟ್​ ಕಮ್ಮಿನ್ಸ್​, ಮಿಚೆಲ್​ ಸ್ಟಾರ್ಕ್​ ಹರಾಜಿಗೆ ಮರಳುವ ನಿರೀಕ್ಷೆ ಇದ್ದರೆ, ನ್ಯೂಜಿಲೆಂಡ್​ನ ರಚಿನ್​ ರವೀಂದ್ರ ಮತ್ತು ಡೆರಿಲ್​ ಮಿಚೆಲ್​ ಮೊದಲ ಬಾರಿ ಅದೃಷ್ಟ ಪರೀಸಲಿದ್ದಾರೆ.

https://www.vijayavani.net/vvs-laxman-will-replace-rahul-dravid-as-coach-likely