T20 ವಿಶ್ವಕಪ್​ ಗೆದ್ದ 68 ದಿನದ ಬಳಿಕ ಭಾರತಕ್ಕೆ ಅಭಿನಂದನೆ ಸಲ್ಲಿಸಿದ ಪಾಕ್​ ಆಟಗಾರ್ತಿ! ಆಕೆ ಕೊಟ್ಟ ಕಾರಣ ಹೀಗಿದೆ…

ನವದೆಹಲಿ: ವೆಸ್ಟ್​ಇಂಡೀಸ್​ ಮತ್ತು ಅಮೆರಿಕ ಜಂಟಿಯಾಗಿ ಆಯೋಜನೆ ಮಾಡಿದ್ದ ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಗೆದ್ದು, ಟೀಮ್​ ಇಂಡಿಯಾ ಟ್ರೋಫಿ ಎತ್ತಿಹಿಡಿದು ನೂರಕ್ಕೂ ಹೆಚ್ಚು ದಿನಗಳೇ ಕಳೆದಿವೆ. ಕಿರು ವಿಶ್ವಕಪ್​ ಮುಗಿದು ಜಿಂಬಾಬ್ವೆ ಹಾಗೂ ಶ್ರೀಲಂಕಾ ವಿರುದ್ಧ ಸರಣಿಯನ್ನು ಮುಗಿಸಿ, ಇದೀಗ ಬಾಂಗ್ಲಾದೇಶದ ವಿರುದ್ಧದ ಟೆಸ್ಟ್​ ಸರಣಿಗೆ ಟೀಮ್​ ಇಂಡಿಯಾ ಅಣಿಯಾಗುತ್ತಿದೆ. ಈ ಹೊತ್ತಿನಲ್ಲಿ ಪಾಕಿಸ್ತಾನದ ಮಾಜಿ ನಾಯಕಿ ನಿದಾ ದಾರ್​, ವಿಶ್ವಕಪ್​ ಗೆದ್ದಿದ್ದಕ್ಕೆ ಭಾರತ ತಂಡಕ್ಕೆ ಅಭಿನಂದನೆಗಳನ್ನು ಎನ್ನುವ ಮೂಲಕ ಟ್ರೋಲ್​ಗೆ ಗುರಿಯಾಗಿದ್ದಾರೆ. ಇದರ ಬೆನ್ನಲ್ಲೇ ನಿದಾ ಅವರ ಸ್ಪಷ್ಟನೆ ಸಹ ನೀಡಿದ್ದಾರೆ.

ಸೆ.5ರಂದು ತಮ್ಮ ಎಕ್ಸ್​ ಖಾತೆಯಲ್ಲಿ ಪೋಸ್ಟ್​ ಮಾಡಿರುವ ನಿದಾ, ಟಿ20 ವಿಶ್ವಕಪ್​ ಗೆದ್ದಿದ್ದಕ್ಕೆ ಟೀಮ್​ ಇಂಡಿಯಾಗೆ ಧನ್ಯವಾದಗಳು. ವಿಶ್ವ ಕ್ರಿಕೆಟ್​ಗೆ ತಮ್ಮದೇ ಕೊಡುಗೆ ನೀಡಿದ ರೋಹಿತ್​ ಶರ್ಮ ಮತ್ತು ವಿರಾಟ್​ ಕೊಹ್ಲಿಗೆ ವಿಶೇಷ ಅಭಿನಂದನೆಗಳು. ನಿಮ್ಮ ನಾಯಕತ್ವ, ಕೌಶಲ ಹಾಗೂ ಸಮರ್ಪಣಾ ಮನೋಭಾಗ ಜಗತ್ತಿನ ಲಕ್ಷಾಂತರ ಜನರಿಗೆ ಸ್ಫೂರ್ತಿ ನೀಡುತ್ತದೆ. ನಿವೃತ್ತಿಯ ಶುಭಾಶಯಗಳು ಲೆಂಜೆಂಡ್ಸ್​ ಎಂದು ಬರೆದು ಪೋಸ್ಟ್​ ಮಾಡಿದ್ದರು.

ವಿಶ್ವಕಪ್​ ಗೆದ್ದು 100ಕ್ಕೂ ಅಧಿಕ ದಿನಗಳು ಕಳೆದುಹೋಗಿವೆ. ಈ ಸಂದರ್ಭದಲ್ಲಿ ಅಭಿನಂದನೆ ಸಲ್ಲಿಸಿದ್ದಕ್ಕೆ ನಿದಾ ಅವರು ಸಿಕ್ಕಾಪಟ್ಟೆ ಟ್ರೋಲ್​ಗೆ ಗುರಿಯಾದರು. ಪಾಕಿಸ್ತಾನದಲ್ಲಿ ಇಂಟರ್​ನೆಟ್​ ನಿಧಾನ ಇರಬೇಕು ಅದಕ್ಕಾಗಿ, ಇಷ್ಟು ದಿನ ತೆಗೆದುಕೊಂಡಿದೆ. ನಿದಾ ಅವರು ಮಂಗಳ ಗ್ರಹಕ್ಕೆ ಹೋಗಿದ್ದರು ಅನಿಸುತ್ತದೆ. ಭೂಮಿಗೆ ಬಂದ ಬಳಿಕ ವಿಚಾರ ತಿಳಿದು ಪೋಸ್ಟ್​ ಮಾಡಿದ್ದಾರೆ ಎಂದು ನೆಟ್ಟಿಗರು ಕಮೆಂಟ್​ ಮಾಡಿ ಟೀಕಿಸಿದ್ದಾರೆ.

ಸ್ಪಷ್ಟನೆ ನೀಡಿದ ನಿದಾ ತೀವ್ರ ಟ್ರೋಲ್​​ ಆಗುತ್ತಿದ್ದಂತೆ ಪೋಸ್ಟ್​ ಡಿಲೀಟ್​ ಮಾಡಿರುವ ನಿದಾ, ಸ್ಪಷ್ಟನೆ ನೀಡಿದ್ದಾರೆ. ನಾನು ಈ ಪೋಸ್ಟ್ ಅನ್ನು 2024ರ ಜೂನ್ 30ರಂದೇ ಮಾಡಿದ್ದೇನೆ ಆದರೆ, ಪಾಕಿಸ್ತಾನದಲ್ಲಿ ಎಕ್ಸ್​ಗೆ ಹೇರಿದ ನಿರ್ಬಂಧಗಳಿಂದಾಗಿ ಅದು ಕಳೆದ ರಾತ್ರಿ ಪೋಸ್ಟ್​ ಆಗಿದೆ. ಈ ಬಗ್ಗೆ ಮಾಧ್ಯಮಗಳಿಂದ ತಿಳಿದ ಕೂಡಲೇ ಪೋಸ್ಟ್​ ಡಿಲೀಟ್​ ಮಾಡಿ, ನನ್ನ ಹಳೆಯ ಮತ್ತು ಈಗಿನ ಎರಡೂ ಪೋಸ್ಟ್​ಗಳ ಚಿತ್ರವನ್ನು ಲಗತ್ತಿಸಿದ್ದೇನೆ ಎಂದು ನಿದಾ ತಿಳಿಸಿದ್ದಾರೆ.

ಅಂದಹಾಗೆ ಸುಮಾರು 17 ವರ್ಷಗಳ ನಂತರ ಟೀಮ್​ ಇಂಡಿಯಾ ಎರಡನೇ ಬಾರಿಗೆ ಟಿ20 ವಿಶ್ವ ಚಾಂಪಿಯನ್ ಆಗಿದ್ದು ಎಲ್ಲರಿಗೂ ಗೊತ್ತೇ ಇದೆ. ಅಮೆರಿಕ-ವೆಸ್ಟ್ ಇಂಡೀಸ್ ಜಂಟಿಯಾಗಿ ಆಯೋಜಿಸಿದ್ದ ಟಿ20 ವಿಶ್ವಕಪ್​ನಲ್ಲಿ ರೋಹಿತ್ ಶರ್ಮ ನಾಯಕತ್ವದ ಭಾರತ ತಂಡ ಅದ್ಭುತ ಪ್ರದರ್ಶನ ನೀಡಿ ಅಜೇಯ ತಂಡವಾಗಿ ಕಪ್ ಗೆದ್ದುಕೊಂಡಿತು. ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಫೈನಲ್ ಪಂದ್ಯದಲ್ಲಿ ಅಮೋಘ ಹೋರಾಟ ನಡೆಸಿ, ಸೋಲಿನ ದವಡೆಯಲ್ಲಿದ್ದ ಪಂದ್ಯವನ್ನು ಗೆದ್ದು ಟೀಮ್​ ಇಂಡಿಯಾ ಎರಡನೇ ಬಾರಿ ಚಾಂಪಿಯನ್ ಆಯಿತು. (ಏಜೆನ್ಸೀಸ್)

https://www.vijayavani.net/anant-ambanis-vantara-foundation-reaches-out-to-namibia-to-prevent-wildlife-loss-amid-drought

https://www.vijayavani.net/wolf-attacks-wolves-revenge-on-humans-for-killing-their-children-the-reason-behind-up-attacks