ಏಷ್ಯಾಡ್​ನಲ್ಲಿ ಇಂದಿನಿಂದ ಅಥ್ಲೆಟಿಕ್ಸ್​; ಭಾರತದ ಪದಕ ಬೇಟೆ ವೇಗ ಪಡೆದುಕೊಳ್ಳುವ ನಿರೀಕ್ಷೆ

ಹಾಂಗ್​ಝೌ: ಏಷ್ಯಾಡ್​ನಲ್ಲಿ ಭಾರತ ತಂಡದ ಪದಕ ಬೇಟೆಗೆ ವೇಗ ತುಂಬಬಲ್ಲ ಅಥ್ಲೆಟಿಕ್ಸ್​ ಸ್ಪರ್ಧೆಗಳು ಶುಕ್ರವಾರ ಆರಂಭಗೊಳ್ಳಲಿವೆ. ಒಲಿಂಪಿಕ್ಸ್​-ವಿಶ್ವ ಚಾಂಪಿಯನ್​ ಜಾವೆಲಿನ್​ ಥ್ರೋ ತಾರೆ ನೀರಜ್​ ಚೋಪ್ರಾ ಸಾರಥ್ಯದ ಭಾರತ ತಂಡ 65 ಅಥ್ಲೀಟ್​ಗಳ ದೊಡ್ಡ ತಂಡದೊಂದಿಗೆ ಪದಕ ಸ್ಪರ್ಧೆಗೆ ಪ್ರವೇಶಿಸುತ್ತಿದ್ದು, ಅಥ್ಲೆಟಿಕ್ಸ್​ನಲ್ಲೇ ಕೂಟದ ಗರಿಷ್ಠ ಪದಕಗಳನ್ನು ಬಾಚಿಕೊಳ್ಳುವ ನಿರೀಕ್ಷೆ ಇದೆ. ಕಳೆದ ಆವೃತ್ತಿಯ ಅಥ್ಲೆಟಿಕ್ಸ್​ ಸ್ಪರ್ಧೆಗಳಲ್ಲಿ 8 ಚಿನ್ನ ಸಹಿತ 20 ಪದಕ ಗೆದ್ದುಕೊಂಡಿದ್ದ ಭಾರತ ಈ ಬಾರಿ ಕನಿಷ್ಠ 25 ಪದಕ ಗೆಲ್ಲುವ ಹಂಬಲದಲ್ಲಿದೆ.

ನೀರಜ್​ ಚೋಪ್ರಾ ಜತೆಗೆ ಶಾಟ್​ಪುಟ್​ ಪಟು ತೇಜಿಂದರ್​ ಸಿಂಗ್​ ಟೂರ್​, 3,000 ಮೀ. ಸ್ಟೀಪಲ್​ ಚೇಸ್​ ಓಟಗಾರ ಅವಿನಾಶ್​ ಸಾಬ್ಲೆ, ಪುರುಷ-ಮಹಿಳೆಯರ 4/400 ಮೀ. ರಿಲೇ ತಂಡಗಳು ಈ ಬಾರಿ ಪದಕ ಗೆಲ್ಲುವ ನಿರೀಕ್ಷೆ ಇದೆ. ಅಂದರೆ ಕಳೆದ ಆವೃತ್ತಿಯ 8 ಚಿನ್ನದ ಸಾಧನೆಯನ್ನು ಭಾರತ ಈ ಬಾರಿ ಸರಿಗಟ್ಟುವುದು ತುಸು ಕಷ್ಟವೆನಿಸಿದೆ. ಪುರುಷರ ಲಾಂಗ್​ಜಂಪ್​ನಲ್ಲಿ ಮುರಳಿ ಶ್ರೀಶಂಕರ್​ ಮತ್ತು ಜೆಸ್ವಿನ್​ ಅಲ್ಡ್​ರಿನ್​, ಚೀನಾ ಮತ್ತು ಚೀನಾ ತೈಪೆ ಸ್ಪರ್ಧಿಗಳ ಸವಾಲು ಹಿಮ್ಮೆಟ್ಟಿಸಿದರೆ ಚಿನ್ನದ ನೆಗೆತ ಕಾಣಬಹುದಾಗಿದೆ. 4/400 ಮೀ. ರಿಲೇಯಲ್ಲಿ ಭಾರತ ಏಷ್ಯನ್​ ದಾಖಲೆ ಹೊಂದಿರುವುದರಿಂದ ಚಿನ್ನ ಗೆಲ್ಲುವ ಫೇವರಿಟ್​ ಎನಿಸಿದೆ.

ಟ್ರಿಪಲ್​ ಜಂಪ್​ನಲ್ಲಿ ಪ್ರವಿಣ್​ ಚಿತ್ರವೆಲ್​, 1,500 ಮೀ. ಓಟದಲ್ಲಿ ಅಜಯ್​ ಕುಮಾರ್​ ಸರೋಜ್​, ಮಹಿಳೆಯರ 100 ಮೀ. ಹರ್ಡರ್ಲ್ಸ್​ನಲ್ಲಿ ಜ್ಯೋತಿ ಯರಾಜಿ, 400 ಮೀ. ಹರ್ಡಲ್ಸ್​ನಲ್ಲಿ ವಿದ್ಯಾ ರಾಮರಾಜ್​, ಲಾಂಗ್​ ಜಂಪ್​ನಲ್ಲಿ ಶೈಲಿ ಸಿಂಗ್​, ಸ್ಟೀಪಲ್​ಚೇಸ್​ನಲ್ಲಿ ಪಾರುಲ್​ ಚೌಧರಿ, ಹೆಪ್ಟಾಥ್ಲಾನ್​ನಲ್ಲಿ ಸ್ವಪ್ನಾ ಬರ್ಮನ್​ ಪದಕದ ಆಕಾಂಕ್ಷಿಗಳಾಗಿದ್ದಾರೆ.

ಅಕ್ಟೋಬರ್​ 4ರಂದು ನೀರಜ್​ ಕಣಕ್ಕೆ

ಟೋಕಿಯೊ ಒಲಿಂಪಿಕ್ಸ್​ ಬಳಿಕ ಇತ್ತೀಚೆಗೆ ವಿಶ್ವ ಚಾಂಪಿಯನ್​ಷಿಪ್​ನಲ್ಲೂ ಚಿನ್ನ ಗೆದ್ದಿರುವ ನೀರಜ್​ ಚೋಪ್ರಾ ಏಷ್ಯಾಡ್​ನಲ್ಲಿ 2018ರಲ್ಲಿ ಗೆದ್ದ ಸ್ವರ್ಣ ಪದಕವನ್ನು ರಕ್ಷಿಸಿಕೊಳ್ಳಬೇಕಾಗಿದೆ. ಈ ನಿಟ್ಟಿನಲ್ಲಿ ಅವರು ಅಕ್ಟೋಬರ್​ 4ರಂದು ನಡೆಯಲಿರುವ ಸಂಜೆ 4.30ರಿಂದ ನಡೆಯಲಿರುವ ಜಾವೆಲಿನ್​ ಥ್ರೋ ಸ್ಪರ್ಧೆಯಲ್ಲಿ ಕಣಕ್ಕಿಳಿಯಲಿದ್ದು, ಪಾಕಿಸ್ತಾನದ ಅರ್ಷದ್​ ನದೀಂ ಪ್ರಮುಖ ಪ್ರತಿಸ್ಪರ್ಧಿ ಎನಿಸಿದ್ದಾರೆ. ಒಡಿಶಾದ ಕಿಶೋರ್​ ಜೆನಾ ಜಾವೆಲಿನ್​ ಎಸೆತದಲ್ಲಿ ಭಾರತದ ಮತ್ತೋರ್ವ ಸ್ಪರ್ಧಿಯಾಗಿದ್ದಾರೆ.

ಕಣದಲ್ಲಿ ರಾಜ್ಯದ 6 ಅಥ್ಲೀಟ್​ಗಳು

ಅಥ್ಲೆಟಿಕ್ಸ್​ನಲ್ಲಿ ರಾಜ್ಯದ 6 ಅಥ್ಲೀಟ್​ಗಳು ಕಣಕ್ಕಿಳಿಯಲಿದ್ದಾರೆ. ಅವರೆಂದರೆ ಬೆಳ್ಳಿಯಪ್ಪ ಎಬಿ (ಮ್ಯಾರಥಾನ್​), ಮಿಜೋ ಚಾಕೋ ಕುರಿಯನ್​ (4/400 ಮೀ. ರಿಲೇ), ಸಿಂಚಲ್​ ಕಾವೇರಮ್ಮ (400 ಮೀ. ಹರ್ಡಲ್ಸ್​), ಜೆಸ್​ ಸಂದೇಶ್​ (ಹೈಜಂಪ್​), ಯಶಸ್​ ಪಾಲಾಕ್ಷ (400 ಮೀ. ಹರ್ಡಲ್ಸ್​), ನಿಹಾಲ್​ ಜೋಯೆಲ್​ (ಮಿಶ್ರ ರಿಲೇ).

https://www.vijayavani.net/host-china-continues-asian-games-dominance-by-surpassing-150-medals-on-day-5-of-the-two-week-event