ಬೆಂಗಳೂರು: ಐಪಿಎಲ್ 17ನೇ ಆವೃತ್ತಿಗೆ ಇನ್ನು ಒಂದು ವಾರವಷ್ಟೇ ಬಾಕಿ ಉಳಿದಿದ್ದು, ಎಲ್ಲ 10 ತಂಡಗಳು ಕೊನೇ ಹಂತದ ಪೂರ್ವಸಿದ್ಧತೆಯನ್ನು ಆರಂಭಿಸಿವೆ. ಇದರ ನಡುವೆ ತಂಡಗಳಿಗೆ ಕೆಲ ಆಟಗಾರರ ಅಲಭ್ಯತೆಯ ಕಿರಿಕಿರಿ ಎದುರಾಗಿದೆ. ಗಾಯ-ಫಿಟ್ನೆಸ್ ವಿಚಾರದಲ್ಲಿ ಈಗಾಗಲೆ ಕೆಲ ಆಟಗಾರರು ಸಂಪೂರ್ಣ ಟೂರ್ನಿ ತಪ್ಪಿಸಿಕೊಳ್ಳುವುದು ಖಚಿತಗೊಂಡಿದ್ದರೆ, ಇನ್ನು ಕೆಲ ಆಟಗಾರರು ಆರಂಭಿಕ ಕೆಲ ಪಂದ್ಯಗಳನ್ನು ತಪ್ಪಿಸಿಕೊಳ್ಳುವ ಭೀತಿ ಇದೆ. ಇನ್ನು ಕೆಲ ಆಟಗಾರರು ವೈಯಕ್ತಿಕ ಕಾರಣ ನೀಡಿ ಹಿಂದೆ ಸರಿಯುತ್ತಿದ್ದಾರೆ. ಇದು ತಂಡಗಳ ಲೆಕ್ಕಾಚಾರವನ್ನೂ ತಪ್ಪಿಸುತ್ತಿದ್ದು, ಹರಾಜಿನಲ್ಲಿ ಮಾರಾಟವಾಗದ ಆಟಗಾರರನ್ನು ಸೇರ್ಪಡೆಗೊಳಿಸುವ ಮೂಲಕ ಹೊಸ ಕಾರ್ಯತಂತ್ರವನ್ನು ರೂಪಿಸುತ್ತಿವೆ.
