ಅಭಿನವ್​ ಬಿಂದ್ರಾ ಒಲಿಂಪಿಕ್ಸ್ ಬಂಗಾರ ಗೆಲುವಿಗೆ 12 ವರ್ಷಗಳ ಸಂಭ್ರಮ

ಬೆಂಗಳೂರು: ಒಲಿಂಪಿಕ್ಸ್​ ಇತಿಹಾಸದಲ್ಲಿ ಭಾರತೀಯ ಹಾಕಿ ತಂಡ 8 ಸ್ವರ್ಣ ಪದಕಗಳನ್ನು ಜಯಿಸಿದ್ದರೂ, ವೈಯಕ್ತಿಕ ವಿಭಾಗದಲ್ಲಿ ಭಾರತಕ್ಕೆ ಸ್ವರ್ಣ ಪದಕ ಗಗನಕುಸುಮವೆನಿಸಿತ್ತು. 2008ರಲ್ಲಿ ಈ ಕೊರತೆಯನ್ನು ನೀಗಿಸಿದವರು ಶೂಟರ್​ ಅಭಿನವ್​ ಬಿಂದ್ರಾ. ಅವರು ಒಲಿಂಪಿಕ್ಸ್​ ಇತಿಹಾಸದಲ್ಲಿ ವೈಯಕ್ತಿಕ ಸ್ವರ್ಣ ಪದಕ ಜಯಿಸಿದ ಮೊದಲ ಭಾರತೀಯರೆನಿಸಿಕೊಂಡ ಐತಿಹಾಸಿಕ ಸಾಧನೆಗೆ ಮಂಗಳವಾರ (ಆಗಸ್ಟ್​ 11) 12 ವರ್ಷಗಳು ಪೂರ್ಣಗೊಂಡಿವೆ.

2008ರ ಬೀಜಿಂಗ್​ ಒಲಿಂಪಿಕ್ಸ್​ನ 10 ಮೀಟರ್​ ಏರ್​ ರೈಫಲ್​ ಸ್ಪರ್ಧೆಯಲ್ಲಿ ಅಭಿನವ್​ ಬಿಂದ್ರಾ ಸ್ವರ್ಣ ಪದಕಕ್ಕೆ ಗುರಿ ಇಟ್ಟು ಭಾರತೀಯ ಕ್ರೀಡಾಲೋಕದಲ್ಲಿ ಹೊಸ ಮೈಲುಗಲ್ಲು ಬರೆದಿದ್ದರು. ಕಳೆದ 12 ವರ್ಷಗಳಲ್ಲೂ ಭಾರತೀಯ ಕ್ರೀಡಾಪಟುಗಳಿಗೆ ಒಲಿಂಪಿಕ್ಸ್ ಸ್ವರ್ಣ ಪದಕ ಒಲಿದು ಬಂದಿಲ್ಲ. ಇದು ಬಿಂದ್ರಾ ಅವರ ಸ್ವರ್ಣ ಸಾಧನೆಯನ್ನು ಇನ್ನಷ್ಟು ವಿಶೇಷಗೊಳಿಸಿದೆ.

22 ವರ್ಷಗಳ ಶೂಟಿಂಗ್​ ವೃತ್ತಿಜೀವನದಲ್ಲಿ ಅಭಿನವ್​ ಬಿಂದ್ರಾ ಅವರು 150ಕ್ಕೂ ಅಧಿಕ ಪದಕಗಳನ್ನು ಜಯಿಸಿದ್ದಾರೆ. ಆದರೆ ಅವರ ಈ ಸ್ವರ್ಣ ಪದಕ ಗೆಲುವಿಗೆ ಯಾವ ಪದಕವೂ ಸಾಟಿಯಾಗಲಾರದು. ಉತ್ತರಾಖಂಡ ಮೂಲದವರಾದ ಬಿಂದ್ರಾ ಕುಟುಂಬ ಈಗ ಪಂಜಾಬ್​ನಲ್ಲಿ ನೆಲೆಸಿದೆ. 15ನೇ ವಯಸ್ಸಿನಲ್ಲೇ ಅಂತಾರಾಷ್ಟ್ರೀಯ ಶೂಟಿಂಗ್​ ಸ್ಪರ್ಧೆ ಆರಂಭಿಸಿದ್ದ ಬಿಂದ್ರಾ, 2000ದ ಸಿಡ್ನಿ ಒಲಿಂಪಿಕ್ಸ್​ನಲ್ಲಿ ಅತ್ಯಂತ ಕಿರಿಯ ಭಾರತೀಯರಾಗಿ ಸ್ಪರ್ಧಿಸಿದ್ದರು. 2004ರ ಅಥೆನ್ಸ್​ ಒಲಿಂಪಿಕ್ಸ್​ನಲ್ಲಿ ಅವರು ಒಲಿಂಪಿಕ್ಸ್​ ದಾಖಲೆ ಬರೆದಿದ್ದರೂ, ಪದಕ ಒಲಿಸಿಕೊಳ್ಳುವಲ್ಲಿ ವಿಫಲರಾಗಿದ್ದರು. ಆ ನೋವಿನ ಬಳಿಕ ಅವರಲ್ಲಿ ಒಲಿಂಪಿಕ್ಸ್​ ಸ್ವರ್ಣ ಪದಕ ಗೆಲುವಿನ ತುಡಿತ ಇನ್ನಷ್ಟು ಹೆಚ್ಚಾಗಿತ್ತು. 2016ರ ರಿಯೋ ಒಲಿಂಪಿಕ್ಸ್​ ಬಳಿಕ ನಿವೃತ್ತಿ ಹೊಂದಿರುವ ಬಿಂದ್ರಾ ಅವರು ಈಗ ಉದ್ಯಮಿಯಾಗಿದ್ದಾರೆ.

ಇದನ್ನೂ ಓದಿ: ಕ್ರೀಡಾತಾರೆಯರಿಂದ ಶ್ರೀಕೃಷ್ಣ ಜನ್ಮಾಷ್ಟಮಿಯ ಶುಭಾಶಯಗಳು

'ಒಲಿಂಪಿಕ್ಸ್​ ಸ್ವರ್ಣ ಪದಕ ಈಗ ನನ್ನ ಅಮ್ಮನ ಕೋಣೆಯಲ್ಲಿ ಇರುತ್ತಿತ್ತು. ಇದೀಗ ಅದನ್ನು ನನ್ನ ಟ್ರೋಫಿಗಳು ಮತ್ತು ಸ್ಕೋರ್​ ಶೀಟ್​ಗಳಿಗೆಂದೇ ಮೀಸಲಾದ ಕೋಣೆಯಲ್ಲಿ ಇಡಲಾಗಿದೆ. ನಾನು ಅದನ್ನು ಆಗಾಗ ಸ್ಪರ್ಶಿಸುತ್ತಿರುತ್ತೇನಾ ಎಂದು ಜನರು ಕೇಳುತ್ತಿರುತ್ತಾರೆ. ಅದಕ್ಕೆ ನನ್ನ ಉತ್ತರ ಇಲ್ಲ ಎಂದಾಗಿರುತ್ತದೆ. ನಾನು ಆ ಸ್ವರ್ಣ ಪದಕಕ್ಕಾಗಿ ಹಲವಾರು ಕಷ್ಟಗಳನ್ನು ಎದುರಿಸಿದ್ದೇನೆ. ಅದನ್ನು ಗೆದ್ದ ಬಳಿಕ ಅದರ ಅನುಭವ ಪಡೆದಿದ್ದೇನೆ. ಅದೊಂದು ಪ್ರಯಾಣವಾಗಿತ್ತು. ಪದಕ ಆ ಒಂದು ಕ್ಷಣಕ್ಕಾಗಿತ್ತು. 2 ಗಂಟೆಗಳ ಶೂಟಿಂಗ್​ಗೆ ಒಲಿದ ಬಹುಮಾನ ಅದಾಗಿತ್ತು. ಆದರೆ ಕ್ರೀಡಾಪಟುಗಳಿಗೆ ಆ ಗೆಲುವಿನ ಕ್ಷಣವಷ್ಟೇ ವಿಷಯವಾಗುವುದಿಲ್ಲ. ಆಗ ಗೆಲುವಿಗೆ 4, ಬಹುಶ 8 ವರ್ಷಗಳ ಶ್ರಮವಿದೆ. 250 ಅಂತಾರಾಷ್ಟ್ರೀಯ ವಿಮಾನಗಳ ಪ್ರಯಾಣವಿದೆ. ನಾನಿದನ್ನೂ ಸಾಧಿಸಬಲ್ಲೆ ಎಂಬ 600 ಕ್ಷಣಗಳಿವೆ. ನೂರಾರು ತಾಂತ್ರಿಕ ಬದಲಾವಣೆಗಳಿವೆ. 50ಕ್ಕೂ ಅಧಿಕ ಸೋಲಿನ ರುಚಿಗಳಿವೆ. ಅದರ ಹಿಂದೆ ಸಾಕಷ್ಟು ಆಂತರಿಕ ಸಂಕಷ್ಟಗಳಿವೆ. ತಾಳ್ಮೆಯ ಕೋಚ್​ಗಳ ಶ್ರಮವಿದೆ. ಕನಸೊಂದು ನನಸಾಗುವ ಹಿಂದೆ ಬೆವರಿನಲ್ಲಿ ಮುಳುಗಿ ಮೇಲೆದ್ದ ಪರಿಶ್ರಮವಿದೆ. ಕ್ರೀಡಾಪಟುಗಳಿಗೆ ಅದುವೇ ಹೆಚ್ಚು ಅರ್ಥಪೂರ್ಣವಾಗಿರುತ್ತದೆ' ಎಂದು ಅಭಿನವ್​ ಬಿಂದ್ರಾ ಅವರು ಈ ಹಿಂದೊಮ್ಮೆ ಸ್ವರ್ಣ ಪದಕ ಗೆಲುವಿನ ಪ್ರಯಾಣದ ಬಗ್ಗೆ ಹೇಳಿಕೊಂಡಿದ್ದರು.

ಬಿಂದ್ರಾ ಸ್ವರ್ಣ ಪದಕ ಗೆಲುವಿನ ಸಾಧನೆಗೆ 12 ವರ್ಷಗಳು ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಹಲವು ಕ್ರೀಡಾತಾರೆಯರು ಮತ್ತು ಅಭಿಮಾನಿಗಳು ಅವರಿಗೆ ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ. ಮಾಜಿ ಕ್ರಿಕೆಟಿಗ ಮೊಹಮದ್​ ಕೈಫ್​ ಕೂಡ ಬಿಂದ್ರಾ ಸ್ವರ್ಣ ಸಾಧನೆಯನ್ನು ನೆನಪು ಮಾಡಿಕೊಂಡಿದ್ದಾರೆ.

https://www.vijayavani.net/ravindra-jadeja-cop-in-argument-over-wearing-mask/