ರಾಜ್ಕೋಟ್: ಟೀಮ್ ಇಂಡಿಯಾ ಆಲ್ರೌಂಡರ್ ರವೀಂದ್ರ ಜಡೇಜಾ ಮಾಸ್ಕ್ ಧರಿಸದೆ ಓಡಾಡುತ್ತಿದ್ದ ಬಗ್ಗೆ ಮಹಿಳಾ ಪೊಲೀಸರೊಬ್ಬರು ಪ್ರಶ್ನಿಸಿದ ಸಂದರ್ಭ ಅನುಚಿತ ವರ್ತನೆ ತೋರಿ ವಿವಾದಕ್ಕೀಡಾಗಿದ್ದಾರೆ. ಮಹಿಳಾ ಪೊಲೀಸ್ ಜತೆಗೆ ಜಡೇಜಾ ಮತ್ತು ಅವರ ಪತ್ನಿ ರಿವಾಬಾ ವಾಗ್ವಾದ ನಡೆಸಿದ್ದಾರೆ ಎಂದು ದೂರಲಾಗಿದೆ.
ಮಹಿಳಾ ಪೊಲೀಸ್ ಠಾಣೆಯ ಹೆಡ್ ಕಾನ್ಸ್ಟೇಬಲ್ ಸೋನಲ್ ಗೋಸೈ ಎಂಬವರು ಕಿಸಾನ್ಪರ ಚೌಕ್ನಲ್ಲಿ ಸೋಮವಾರ ರಾತ್ರಿ 9 ಗಂಟೆಯ ವೇಳೆಗೆ ರವೀಂದ್ರ ಜಡೇಜಾ ಅವರ ಕಾರನ್ನು ತಡೆದಿದ್ದರು. ಕಾರಿನಲ್ಲಿ ಜಡೇಜಾ ಮತ್ತು ಅವರ ಪತ್ನಿ ರಿವಾಬಾ ಇದ್ದರು. ಈ ವೇಳೆ ಅವರಿಬ್ಬರು ಮಾಸ್ಕ್ ಧರಿಸಿರಲಿಲ್ಲ. ಹೀಗಾಗಿ ದಂಡ ಕಟ್ಟುವಂತೆ ಪೊಲೀಸರು ಸೂಚಿಸಿದ್ದರು. ಈ ವೇಳೆ ಜಡೇಜಾ ಅನುಚಿತ ವರ್ತನೆ ತೋರಿದ್ದಾರೆ ಎನ್ನಲಾಗಿದೆ. ಘಟನೆಯ ಬಳಿಕ ಸೋನಲ್ ಗೋಸೈ ಮತ್ತು ಜಡೇಜಾ ಪತ್ನಿ ರಿವಾಬಾ ಅವರು ಬಳಿಕ ಸ್ಥಳೀಯ ಖಾಸಗಿ ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆದಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಇದನ್ನೂ ಓದಿ: ಪತಂಜಲಿ ಐಪಿಎಲ್! ಟ್ವಿಟರ್ನಲ್ಲಿ ಭರ್ಜರಿ ಟ್ರೆಂಡಿಂಗ್, ಟ್ರೋಲ್!
ಜಡೇಜಾ ಮತ್ತು ಮಹಿಳಾ ಪೊಲೀಸ್ ಇಬ್ಬರೂ ಅನುಚಿತ ವರ್ತನೆಯ ಬಗ್ಗೆ ಪರಸ್ಪರ ಆರೋಪಿಸಿದ್ದಾರೆ ಎಂದು ಡಿಎಸ್ಪಿ ಮನೋಹರ್ಸಿನ್ಹಾ ಜಡೇಜಾ ತಿಳಿಸಿದ್ದಾರೆ. ಆದರೆ ಇದುವರೆಗೆ ಇಬ್ಬರಿಂದಲೂ ಅಧಿಕೃತವಾಗಿ ದೂರು ದಾಖಲಾಗಿಲ್ಲ ಎಂದು ಅವರು ತಿಳಿಸಿದ್ದಾರೆ. ಜತೆಗೆ ತಮಗೆ ಬಂದ ಮಾಹಿತಿಯ ಪ್ರಕಾರ ಘಟನೆಯ ವೇಳೆ ರವೀಂದ್ರ ಜಡೇಜಾ ಅವರು ಮಾಸ್ಕ್ ಧರಿಸಿರಲಿಲ್ಲ. ಆದರೆ ಅವರ ಪತ್ನಿ ಮಾಸ್ಕ್ ಧರಿಸಿದ್ದರೇ ಎಂಬ ಬಗ್ಗೆ ತನಿಖೆ ನಡೆಸುತ್ತಿದ್ದೇವೆ ಎಂದು ತಿಳಿಸಿದ್ದಾರೆ. ಜಡೇಜಾ ಪತ್ನಿ ರಿವಾಬಾ ವರ್ಷದ ಹಿಂದೆಯಷ್ಟೇ ಬಿಜೆಪಿಗೆ ಸೇರ್ಪಡೆಗೊಂಡಿದ್ದರು. ಜಡೇಜಾ ಅವರು ಮುಂಬರುವ ಐಪಿಎಲ್ನಲ್ಲಿ ಚೆನ್ನೈ ಸೂಪರ್ಕಿಂಗ್ಸ್ ಪರ ಆಡಲಿದ್ದಾರೆ.