ಇಂದು ದಕ್ಷಿಣ ಆಫ್ರಿಕಾ ವಿರುದ್ಧ 4ನೇ ಟಿ20 ಕಾದಾಟ; ಸರಣಿ ಗೆಲುವಿನ ತವಕದಲ್ಲಿ ಭಾರತ

ಜೊಹಾನ್ಸ್​ಬರ್ಗ್​​: ಸೆಂಚುರಿಯನ್​ನಲ್ಲಿ ಮತ್ತೆ ಗೆಲುವಿನ ಹಳಿಗೆ ಮರಳಿರುವ ಭಾರತ ತಂಡ ಆತಿಥೇಯ ದಕ್ಷಿಣ ಆಫ್ರಿಕಾ ವಿರುದ್ಧದ 4 ಪಂದ್ಯಗಳ ಟಿ20 ಸರಣಿಯನ್ನು ವಶಪಡಿಸಿಕೊಳ್ಳುವ ತವಕದಲ್ಲಿದೆ. 4ನೇ ಹಾಗೂ ಅಂತಿಮ ಟಿ20 ಪಂದ್ಯ ಶುಕ್ರವಾರ ವಾಂಡರರ್ಸ್​ ಕ್ರೀಡಾಂಗಣದಲ್ಲಿ ನಡೆಯಲಿದ್ದು, ಸದ್ಯ ಸರಣಿಯಲ್ಲಿ 2-1 ಮುನ್ನಡೆಯಲ್ಲಿರುವ ಸೂರ್ಯಕುಮಾರ್​ ಯಾದವ್​ ಪಡೆ ಮತ್ತೊಂದು ಗೆಲುವಿನೊಂದಿಗೆ ಸರಣಿ ವಶಪಡಿಸಿಕೊಳ್ಳುವ ತವಕದಲ್ಲಿದೆ. ಏಡನ್​ ಮಾರ್ಕ್ರಮ್​ ಪಡೆ ಗೆದ್ದರೂ ಸರಣಿ ಸಮಬಲ ಸಾಧಿಸುವ ಅವಕಾಶವನ್ನಷ್ಟೇ ಹೊಂದಿದೆ. ಇದು ಭಾರತ ತಂಡ 17 ವರ್ಷಗಳ ಬಳಿಕ ಟಿ20 ವಿಶ್ವ ಚಾಂಪಿಯನ್​ ಪಟ್ಟಕ್ಕೆ ಮರಳಿರುವ ವರ್ಷದಲ್ಲಿ ಆಡುತ್ತಿರುವ ಕೊನೇ ಚುಟುಕು ಕ್ರಿಕೆಟ್​ ಪಂದ್ಯವಾಗಿರಲಿದೆ.

ಭಾರತ ತಂಡದ ಪ್ರಮುಖ ಆಟಗಾರರು ಆಸ್ಟ್ರೆಲಿಯಾದಲ್ಲಿರುವ ನಡುವೆ, ವಿವಿಎಸ್​ ಲಕ್ಷ್ಮಣ್​ ಹಂಗಾಮಿ ಮಾರ್ಗದರ್ಶನದಲ್ಲಿ ಯುವ ಆಟಗಾರರ ತಂಡ ಹರಿಣಗಳ ನಾಡಿನಲ್ಲಿ ಉತ್ತಮ ನಿರ್ವಹಣೆಯನ್ನೇ ತೋರಿದೆ. ಸಂಜು ಸ್ಯಾಮ್ಸನ್​, ತಿಲಕ್​ ವರ್ಮ ಶತಕದಾಟ ಆಡಿದ್ದರೆ, ಅಭಿಷೇಕ್​ ಶರ್ಮ ಕಳೆದ ಪಂದ್ಯದಲ್ಲಿ ಲಯಕ್ಕೆ ಮರಳಿದ್ದಾರೆ. ಸ್ಪಿನ್ನರ್​ಗಳ ಜತೆಗೆ ವೇಗಿ ಅರ್ಷದೀಪ್​ ಸಿಂಗ್​ ಬೌಲಿಂಗ್​ ವಿಭಾಗಕ್ಕೆ ಬಲ ತುಂಬಿದ್ದರೆ, ಹಾರ್ದಿಕ್​ ಪಾಂಡ್ಯ ಉಪಯುಕ್ತ ಆಟವನ್ನೇ ಆಡುತ್ತಿದ್ದಾರೆ.

ರಿಂಕು ಫಾರ್ಮ್​ ಚಿಂತೆ

ಭಾರತದ ಪ್ರಮುಖ ಬ್ಯಾಟರ್​ಗಳು ರನ್​ ಗಳಿಸುತ್ತಿರುವ ನಡುವೆ ರಿಂಕು ಸಿಂಗ್​ ರನ್​ಬರ ಚಿಂತೆಯ ವಿಷಯವಾಗಿದೆ. ಸರಣಿಯ ಮೊದಲ 3 ಪಂದ್ಯಗಳಲ್ಲಿ ರಿಂಕು 11, 9, 8 ರನ್​ಗಳನ್ನಷ್ಟೇ ಗಳಿಸಿದ್ದಾರೆ. 6 ಮತ್ತು 7ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ ಮಾಡುತ್ತಿರುವುದು ಕೂಡ ಅವರಿಗೆ ಹಿನ್ನಡೆಯಾಗಿದೆ. ಕೆಕೆಆರ್​ನಲ್ಲಿ ಫಿನಿಷರ್​ ಆಗಿ ಮಿಂಚಿರುವ ರಿಂಕು, ಭಾರತ ತಂಡ ಈ ಬಾರಿ ಚೇಸಿಂಗ್​ ಅವಕಾಶ ಪಡೆದರೆ ನೆರವಿಗೆ ಬರುವ ನಿರೀಕ್ಷೆ ಇದೆ. ಮೊದಲ ಪಂದ್ಯದ ಶತಕವೀರ ಸಂಜು ಸ್ಯಾಮ್ಸನ್​ ಕಳೆದೆರಡು ಪಂದ್ಯಗಳಲ್ಲಿ ಖಾತೆಯನ್ನೇ ತೆರೆಯದೆ ಮಾಕೋರ್ ಜಾನ್ಸೆನ್​ಗೆ ವಿಕೆಟ್​ ಒಪ್ಪಿಸಿರುವುದು ಕಳವಳಕಾರಿ ಎನಿಸಿದೆ.

ಟೀಮ್​ ನ್ಯೂಸ್​:

ಭಾರತ: ಮೊದಲ 3 ಪಂದ್ಯಗಳಲ್ಲಿ 15ರ ಪೈಕಿ 12 ಆಟಗಾರರನ್ನಷ್ಟೇ ಬಳಸಿಕೊಂಡಿರುವ ಭಾರತ, ಕೊನೇ ಪಂದ್ಯದಲ್ಲಾದರೂ ಮೀಸಲು ಆಟಗಾರರಿಗೆ ಅವಕಾಶ ಕೊಡುವುದೇ ಎಂಬ ಕುತೂಹಲವಿದೆ. ವೇಗಿಗಳಾದ ಯಶ್​ ದಯಾಳ್​ ಮತ್ತು ಕನ್ನಡಿಗ ವೈಶಾಕ್​ ವಿಜಯ್​ಕುಮಾರ್​ ಪದಾರ್ಪಣೆಯ ನಿರೀಕ್ಷೆಯಲ್ಲಿದ್ದಾರೆ. ಆದರೆ ಭಾರತ ಗೆಲುವಿನ ಕಾಂಬಿನೇಷನ್​ ಉಳಿಸಿಕೊಳ್ಳುವ ಸಾಧ್ಯತೆಯೇ ಹೆಚ್ಚಿದೆ.

ದ. ಆಫ್ರಿಕಾ: ಆರಂಭಿಕರ ಅಸ್ಥಿರ ನಿರ್ವಹಣೆಯೇ ದ. ಆಫ್ರಿಕಾಕ್ಕೆ ಹಿನ್ನಡೆ ಎನಿಸಿದೆ. ಜತೆಗೆ ಬೌಲಿಂಗ್​ ವಿಭಾಗದಲ್ಲೂ ಸಮರ್ಥ ಕಾಂಬಿನೇಷನ್​ ಕಂಡುಕೊಳ್ಳಲು ದ. ಆಫ್ರಿಕಾ ಪರದಾಡುತ್ತಿದೆ. ಕಳೆದ ಪಂದ್ಯದಲ್ಲಿ ದುಬಾರಿಯಾದ ವೇಗಿ ಗೆರಾಲ್ಡ್​ ಕೋಟ್​ಜೀ ಬದಲಿಗೆ ಸ್ಥಳಿಯ ಆಟಗಾರನಾಗಿರುವ ಲೆಗ್​ ಸ್ಪಿನ್ನರ್​ ಎನ್​ಕಬಯೊಮ್ಜಿ ಪೀಟರ್​ ಮರಳಬಹುದು.

ಆರಂಭ: ರಾತ್ರಿ 8.30

ನೇರಪ್ರಸಾರ: ಸ್ಪೋರ್ಟ್ಸ್​18, ಜಿಯೋಸಿನಿಮಾ.

ಮಳೆ ಭೀತಿ

ಜೊಹಾನ್ಸ್​ರ್ಬಗ್​ನಲ್ಲಿ ಟಾಸ್​ಗೆ ಅರ್ಧ ಗಂಟೆ ಮುನ್ನ ಮಳೆ ಭೀತಿ ಇದೆ. ಇದರಿಂದ ಪಂದ್ಯ ಸ್ವಲ್ಪ ತಡವಾಗಿ ಆರಂಭವಾಗಬಹುದು.

ಮೂರನೇ ಕ್ರಮಾಂಕಕ್ಕೆ ಬಡ್ತಿ ಕೇಳಿ ಪಡೆದು ಮಿಂಚಿದ ತಿಲಕ್​!

ಮೂರನೇ ಪಂದ್ಯದಲ್ಲಿ ತಿಲಕ್​ ವರ್ಮ ಮೂರನೇ ಕ್ರಮಾಂಕಕ್ಕೆ ಬಡ್ತಿ ಪಡೆದು ಚೊಚ್ಚಲ ಶತಕ ಸಿಡಿಸುವ ಮೂಲಕ ಗೆಲುವಿನ ರೂವಾರಿಯಾಗಿ ಹೊರಹೊಮ್ಮಿದರು. ತಿಲಕ್​ಗೆ ಬಡ್ತಿ ನೀಡುವುದು ನಾಯಕ ಸೂರ್ಯಕುಮಾರ್​ ಅಥವಾ ಕೋಚ್​ ವಿವಿಎಸ್​ ಲಕ್ಷ್ಮಣ್​ ಯೋಜನೆ ಆಗಿರಲಿಲ್ಲ. ಸ್ವತ@ ತಿಲಕ್​ ಆಸೆಪಟ್ಟಂತೆ ಅವರನ್ನು 3ನೇ ಕ್ರಮಾಂಕದಲ್ಲಿ ಆಡಿಸುವ ಮೂಲಕ ಸೂರ್ಯಕುಮಾರ್​ ಯಶ ಕಂಡಿದ್ದಾರೆ. ಶಿವಂ ದುಬೆ ಗಾಯಗೊಂಡ ಕಾರಣ ಪ್ರವಾಸಕ್ಕೆ ಮುನ್ನ ಕೊನೇಕ್ಷಣದಲ್ಲಿ ಭಾರತ ತಂಡಕ್ಕೆ ಸೇರ್ಪಡೆಯಾಗಿದ್ದ ತಿಲಕ್​, ಮೊದಲ 2 ಪಂದ್ಯಗಳಲ್ಲಿ 4ನೇ ಕ್ರಮಾಂಕದಲ್ಲಿ ಆಡಿ ಹೆಚ್ಚಿನ ಕೊಡುಗೆ ನೀಡಿರಲಿಲ್ಲ. "ತಿಲಕ್​ ನನ್ನ ಹೋಟೆಲ್​ ಕೊಠಡಿಗೆ ಬಂದು 3ನೇ ಕ್ರಮಾಂಕದಲ್ಲಿ ಆಡುವ ಅವಕಾಶ ನೀಡುವಂತೆ ಕೇಳಿಕೊಂಡಿದ್ದರು. ಹೀಗಾಗಿ ನಿನ್ನ ಆಸೆಯಂತೆ ನಿನ್ನ ಆಟವಾಡು ಎಂದು 3ನೇ ಕ್ರಮಾಂಕಕ್ಕೆ ಬಡ್ತಿ ನೀಡಿದ್ದೆ' ಎಂದು ಸೂರ್ಯಕುಮಾರ್​ 3ನೇ ಪಂದ್ಯದ 11 ರನ್​ ಗೆಲುವಿನ ಬಳಿಕ ನುಡಿದರು.

ಭಾರತಕ್ಕೆ ಸ್ಮರಣೀಯ ತಾಣ

ಜೊಹಾನ್ಸ್​ರ್ಬಗ್​ನ ವಾಂಡರರ್ಸ್​ ಕ್ರೀಡಾಂಗಣ ಭಾರತದ ಟಿ20 ಕ್ರಿಕೆಟ್​ ಇತಿಹಾಸದಲ್ಲಿ ಅತ್ಯಂತ ಸ್ಮರಣೀಯವಾದ ತಾಣವೆನಿಸಿದೆ. ಭಾರತ 2006ರ ಡಿಸೆಂಬರ್​ 1ರಂದು ಇಲ್ಲೇ ತನ್ನ ಮೊಟ್ಟಮೊದಲ ಟಿ20 ಅಂತಾರಾಷ್ಟ್ರೀಯ ಪಂದ್ಯ ಆಡಿತ್ತು. 2007ರ ಸೆಪ್ಟೆಂಬರ್​ 24ರಂದು ಪಾಕಿಸ್ತಾನವನ್ನು ಕೇವಲ 5 ರನ್​ಗಳಿಂದ ಸೋಲಿಸಿ ಭಾರತ ಚೊಚ್ಚಲ ಟಿ20 ವಿಶ್ವಕಪ್​ ಎತ್ತಿ ಹಿಡಿದ ತಾಣವೂ ಇದೇ ಆಗಿದೆ. ಕಳೆದ ವರ್ಷ ಇಲ್ಲಿ ಆಡಿದ ಪಂದ್ಯದಲ್ಲೇ ಸೂರ್ಯಕುಮಾರ್​ ತನ್ನ 4ನೇ ಟಿ20 ಶತಕವನ್ನೂ ಸಿಡಿಸಿದ್ದರು. ಜೊಹಾನ್ಸ್​ರ್ಬಗ್​ನಲ್ಲಿ ಇದುವರೆಗೆ ಆಡಿದ 6 ಟಿ20 ಪಂದ್ಯಗಳಲ್ಲಿ ಭಾರತ 4ರಲ್ಲಿ ಗೆದ್ದು, 2ರಲ್ಲಿ ಸೋತಿದೆ. ಈ ಪೈಕಿ 3 ಗೆಲುವು ಆತಿಥೇಯ ದಣ ಆಫ್ರಿಕಾ ವಿರುದ್ಧವೇ ದಾಖಲಾಗಿದೆ.

ಹ್ಯಾಟ್ರಿಕ್​ ಸರಣಿ ಗುರಿ

ಟಿ20 ವಿಶ್ವಕಪ್​ ಗೆಲುವಿನ ಬಳಿಕ ಚುಟುಕು ಕ್ರಿಕೆಟ್​ ತಂಡಕ್ಕೆ ಸೂರ್ಯಕುಮಾರ್​ ಯಾವದ್​ ಪೂರ್ಣಪ್ರಮಾಣದ ನಾಯಕರಾಗಿ ನೇಮಕಗೊಂಡ ನಂತರದಲ್ಲಿ ಭಾರತ ಆಡುತ್ತಿರುವ 3ನೇ ಸರಣಿ ಇದಾಗಿದೆ. ಈ ಮುನ್ನ ಶ್ರೀಲಂಕಾ ಮತ್ತು ಬಾಂಗ್ಲಾದೇಶ ವಿರುದ್ಧದ ಸರಣಿಗಳಲ್ಲಿ 3-0ಯಿಂದ ಗೆದ್ದಿರುವ ಭಾರತ ಮತ್ತೊಂದು ಸರಣಿ ಜಯದೊಂದಿಗೆ ಹ್ಯಾಟ್ರಿಕ್​ ಸಾಧಿಸುವ ಅವಕಾಶ ಹೊಂದಿದೆ.

https://www.vijayavani.net/sachin-tendulkars-son-arjun-achieved-the-feat-in-ranji