ಇಂದು ನವದೆಹಲಿಯಲ್ಲಿ 2ನೇ ಟಿ20; ಸರಣಿ ಗೆಲುವಿನ ತವಕದಲ್ಲಿ ಟೀಮ್​ ಇಂಡಿಯಾ

ನವದೆಹಲಿ: ಅನುಭವಿ ಆಟಗಾರರ ತಂಡ ಟೆಸ್ಟ್​ ಸರಣಿಯಲ್ಲಿ ಆಕ್ರಮಣಕಾರಿ ಆಟದ ಮೂಲಕ ಪ್ರವಾಸಿ ಬಾಂಗ್ಲಾದೇಶ ತಂಡವನ್ನು ಬಗ್ಗುಬಡಿದ ಬಳಿಕ ಭಾರತದ ಯುವ ಆಟಗಾರರ ತಂಡವೂ ಮೊದಲ ಟಿ20 ಪಂದ್ಯದಲ್ಲೂ ಸ್ಪಷ್ಟ ಮೇಲುಗೈ ಸಾಧಿಸಿತು. ಇದೀಗ ಈ ಪ್ರಾಬಲ್ಯವನ್ನು ಮುಂದುವರಿಸುವತ್ತ ಸೂರ್ಯಕುಮಾರ್​ ಯಾದವ್​ ಪಡೆ ದೃಷ್ಟಿ ನೆಟ್ಟಿದೆ. ನವದೆಹಲಿಯ ಅರುಣ್​ ಜೇಟ್ಲಿ ಸ್ಟೇಡಿಯಂನಲ್ಲಿ ಬುಧವಾರ ಎರಡನೇ ಟಿ20 ಪಂದ್ಯ ನಡೆಯಲಿದ್ದು, ಟೀಮ್​ ಇಂಡಿಯಾ ಸರಣಿ ವಶಪಡಿಸಿಕೊಳ್ಳುವ ತವಕದಲ್ಲಿದೆ.

ಪ್ರಮುಖ ಆಟಗಾರರ ಗೈರಿನ ನಡುವೆ ಸಿಕ್ಕ ಅವಕಾಶಗಳನ್ನು ಬಾಚಿಕೊಳ್ಳುವಲ್ಲಿ ಯುವ ಆಟಗಾರರು ಗ್ವಾಲಿಯರ್​ನಲ್ಲಿ ಯಶಸ್ಸು ಕಂಡಿದ್ದಾರೆ. ಮಿಂಚಿನ ವೇಗದ ಬೌಲರ್​ ಮಯಾಂಕ್​ ಯಾದವ್​ ನಿರೀಕ್ಷೆಯಂತೆಯೇ ಯಶಸ್ವಿ ಪದಾರ್ಪಣೆ ಮಾಡಿದ್ದರೆ, ಮಿಸ್ಟರಿ ಸ್ಪಿನ್ನರ್​ ವರುಣ್​ ಚಕ್ರವರ್ತಿ 3 ವರ್ಷಗಳ ಬಳಿಕ ಯಶಸ್ವಿ ಪುನರಾಗಮನ ಕಂಡಿದ್ದಾರೆ. ಭಾರತೀಯ ಯುವ ತಂಡದ ದಿಟ್ಟ ನಿರ್ವಹಣೆ ಎದುರು ಬಾಂಗ್ಲಾದ ಅನುಭವಿ ತಂಡ ಸಂಪೂರ್ಣ ಮಂಕಾಗಿತ್ತು.

ರಾಹುಲ್​ ದ್ರಾವಿಡ್​-ರೋಹಿತ್​ ಶರ್ಮ ಅವರ ಕೋಚ್​&ಕ್ಯಾಪ್ಟನ್​ ಕಾಂಬಿನೇಷನ್​ನಲ್ಲಿ 17 ವರ್ಷಗಳ ಬಳಿಕ ಟಿ20 ವಿಶ್ವಕಪ್​ ಚಾಂಪಿಯನ್​ ಆಗಿ ಹೊರಹೊಮ್ಮಿದ ಭಾರತ ತಂಡವನ್ನು ಗೌತಮ್​ ಗಂಭೀರ್​-ಸೂರ್ಯಕುಮಾರ್​ ಯಾದವ್​ ಜೋಡಿ ಅದೇ ಮಾದರಿಯಲ್ಲಿ ಮುನ್ನಡೆಸುವ ಲಕ್ಷಣಗಳೂ ಕಾಣಿಸಿವೆ.

ನಮ್ಮ ಬ್ಯಾಟರ್​ಗಳಿಗೆ ಟಿ20ಯಲ್ಲಿ 180 ರನ್​ ಸ್ಕೋರ್​ ಮಾಡಲು ಗೊತ್ತಿಲ್ಲ ಎಂದು ಬಾಂಗ್ಲಾ ನಾಯಕ ನಜ್ಮುಲ್​ ಹೊಸೈನ್​ ಶಾಂಟೊ ಮೊದಲ ಪಂದ್ಯದ ಬಳಿಕ ಒಪ್ಪಿಕೊಂಡಿದ್ದರು. ಯಾಕೆಂದರೆ ತವರಿನಲ್ಲಿ 140-150 ರನ್​ ದಾಖಲಾಗುವಂಥ ಪಿಚ್​ಗಳಲ್ಲೇ ಆಡಿ ಅವರಿಗೆ ಅಭ್ಯಾಸವಾಗಿದೆ. ಹೀಗಾಗಿ ಬಾಂಗ್ಲಾ ತಂಡ ಈ ದೌರ್ಬಲ್ಯವನ್ನು ನಿವಾರಿಸಿಕೊಂಡರಷ್ಟೇ ಕೊನೇ ಪಂದ್ಯದವರೆಗೆ ಸರಣಿ ಜೀವಂತವಿಡುವ ಕನಸು ಕಾಣಬಹುದಾಗಿದೆ. ಇನ್ನು ಮಹಮುದುಲ್ಲಾಗೆ ಗೆಲುವಿನ ವಿದಾಯ ನೀಡುವುದು ಬಾಂಗ್ಲಾ ತಂಡಕ್ಕೆ ಸ್ಫೂರ್ತಿ ತುಂಬಬಹುದಾಗಿರುವ ಅಂಶವಾಗಿದೆ.

ಟೀಮ್​ ನ್ಯೂಸ್​:

ಭಾರತ: ಮೊದಲ ಪಂದ್ಯದಲ್ಲಿ ಎಲ್ಲವೂ ಭಾರತ ಬಯಸಿದಂತೆ ನಡೆದಿದ್ದರಿಂದ ಆಡುವ 11ರ ಬಳಗದಲ್ಲಿ ಬದಲಾವಣೆ ಅನುಮಾನ. ಆದರೆ ಯುವ ಆಟಗಾರರಿಗೆ ಆವರ್ತನ ಪದ್ಧತಿಯಂತೆ ಅವಕಾಶ ನೀಡಲು ಮುಂದಾದರೆ, ವೇಗಿ ಹರ್ಷಿತ್​ ರಾಣಾಗೂ ಪದಾರ್ಪಣೆ ಅವಕಾಶ ಒಲಿಯಬಹುದು. ತಿಲಕ್​ ವರ್ಮಗೂ ಅವಕಾಶ ಲಭಿಸಬಹುದು.

ಬಾಂಗ್ಲಾದೇಶ: ಮೊದಲ ಪಂದ್ಯದ ವೈಲ್ಯದ ಬಳಿಕ ಬಾಂಗ್ಲಾ ತಂಡದ ಬ್ಯಾಟಿಂಗ್​ ವಿಭಾಗದಲ್ಲಿ ಬದಲಾವಣೆಯ ನಿರೀಕ್ಷೆ ಇದೆ. ಆರಂಭಿಕ ಪರ್ವೇಜ್​ ಹೊಸೈನ್​ ಬದಲಿಗೆ ತಂಜಿದ್​ ಹಸನ್​ ಕಣಕ್ಕಿಳಿಯುವ ಸಾಧ್ಯತೆ ಇದೆ.

*ಆರಂಭ: ರಾತ್ರಿ 7.00

*ನೇರಪ್ರಸಾರ: ಸ್ಪೋರ್ಟ್ಸ್​18, ಜಿಯೋಸಿನಿಮಾ.

ಮಹಮದುಲ್ಲಾ ಟಿ20ಗೆ ವಿದಾಯ

ಬಾಂಗ್ಲಾದೇಶದ ಅನುಭವಿ ಆಲ್ರೌಂಡರ್​ ಮಹಮದುಲ್ಲಾ ಭಾರತ ವಿರುದ್ಧದ ಸರಣಿಯ ನಂತರ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್​ನಿಂದ ನಿವೃತ್ತಿ ಹೊಂದಲು ನಿರ್ಧರಿಸಿದ್ದಾರೆ. ಇದರಿಂದ ಶನಿವಾರ ಹೈದರಾಬಾದ್​ನಲ್ಲಿ ನಡೆಯಲಿರುವ ಸರಣಿಯ 3ನೇ ಪಂದ್ಯ 38 ವರ್ಷದ ಮಹಮುದುಲ್ಲಾ ವೃತ್ತೀಜಿವನದ ಕೊನೇ ಟಿ20 ಪಂದ್ಯವಾಗಿರಲಿದೆ. "ನಾನು ಈ ಮೊದಲೇ ನಿರ್ಧರಿಸಿದಂತೆ ಹಾಲಿ ಸರಣಿಯ ಕೊನೇ ಪಂದ್ಯದಲ ಬಳಿಕ ಟಿ20 ಕ್ರಿಕೆಟ್​ನಿಂದ ನಿವೃತ್ತಿಯಾಗಲಿದ್ದೇನೆ. ನಾನಿನ್ನೂ ಏಕದಿನ ಕ್ರಿಕೆಟ್​ನತ್ತ ಗಮನಕೇಂದ್ರೀಕರಿಸಲಿದ್ದೇನೆ' ಎಂದು ಮಹಮದುಲ್ಲಾ 2ನೇ ಟಿ20 ಪಂದ್ಯಕ್ಕೆ ಮುನ್ನ ಮಂಗಳವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು. 2007ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ ಮಹಮದುಲ್ಲಾ ಇದುವರೆಗೆ 50 ಟೆಸ್ಟ್​, 232 ಏಕದಿನ ಮತ್ತು 139 ಟಿ20 ಪಂದ್ಯ ಆಡಿದ್ದಾರೆ. ಅವರು 2021ರಲ್ಲೇ ಟೆಸ್ಟ್​ ಕ್ರಿಕೆಟ್​ನಿಂದ ನಿವೃತ್ತಿ ಹೊಂದಿದ್ದರು. ಮಹಮದುಲ್ಲಾ 2018ರಿಂದ 2022ರವರೆಗೆ ಬಾಂಗ್ಲಾ ನಾಯಕರಾಗಿ 43 ಟಿ20 ಪಂದ್ಯಗಳಲ್ಲಿ ಮುನ್ನಡೆಸಿದ್ದರು.

ಪಿಚ್​ ರಿಪೋರ್ಟ್​

ಕಳೆದ ಐಪಿಎಲ್​ನಲ್ಲಿ ಅರುಣ್​ ಜೇಟ್ಲಿ ಸ್ಟೇಡಿಯಂನಲ್ಲಿ ನಡೆದ 5 ಪಂದ್ಯಗಳ 10 ಇನಿಂಗ್ಸ್​ಗಳಲ್ಲಿ 8ರಲ್ಲಿ 200 ಪ್ಲಸ್​ ಮೊತ್ತ ದಾಖಲಾಗಿತ್ತು. ಇಂಪ್ಯಾಕ್ಟ್​ ಪ್ಲೇಯರ್​ ಕೂಡ ಇದರಲ್ಲಿ ಪ್ರಭಾವ ಬೀರಿರಬಹುದು ಎಂಬ ಲೆಕ್ಕಾಚಾರವನ್ನು ಬದಿಗಿಟ್ಟರೂ, ಈ ಪಂದ್ಯದಲ್ಲಿ ರನ್​ಮಳೆ ನಿರೀಕ್ಷಿಸಬಹುದಾಗಿದೆ. ಸ್ವಲ್ಪ ಮಟ್ಟಿಗೆ ಇಬ್ಬನಿ ಸಮಸ್ಯೆ ಕಾಡಬಹುದು.

8 ಬ್ಯಾಟರ್ಸ್​-10 ಬೌಲರ್ಸ್​

ವಿಶೇಷ ಕಾಂಬಿನೇಷನ್​!

ಭಾರತ ತಂಡ ಈ ಹಿಂದೆ ತಜ್ಞ ಬ್ಯಾಟರ್​&ಬೌಲರ್​ಗಳನ್ನೇ ನೆಚ್ಚಿಕೊಂಡಿತ್ತು. ಆದರೆ ಈಗ ಗೌತಮ್​ ಗಂಭೀರ್​ ಕೋಚ್​ ಆದ ನಂತರ ಬೌಲಿಂಗ್​ ಕೂಡ ಮಾಡಬಲ್ಲ ಬ್ಯಾಟರ್​ಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ. ಇದರಿಂದ ಭಾರತ ಗ್ವಾಲಿಯರ್​ ಟಿ20 ಪಂದ್ಯದಲ್ಲಿ ಒಟ್ಟು 8 ಬ್ಯಾಟರ್ಸ್​ ಮತ್ತು 9 ಬೌಲರ್​ಗಳ ವಿಶೇಷ ಕಾಂಬಿನೇಷನ್​ ರೂಪಿಸಿದಂತಾಗಿತ್ತು. ಮೂವರು (ಅರ್ಷದೀಪ್​, ಮಯಾಂಕ್​, ವರುಣ್​ ಚಕ್ರವರ್ತಿ) ಜತೆಗೆ ಹಾರ್ದಿಕ್​ ಪಾಂಡ್ಯ, ನಿತೀಶ್​ ರೆಡ್ಡಿ, ವಾಷಿಂಗ್ಟನ್​ ಸುಂದರ್​ ಬೌಲಿಂಗ್​ ಆಲ್ರೌಂಡರ್​ಗಳಾಗಿದ್ದಾರೆ. ಇನ್ನು ಕೀಪರ್​ ಸ್ಯಾಮ್ಸನ್​ ಹೊರತಾಗಿ ಅಭಿಷೇಕ್​ ಶರ್ಮ, ರಿಯಾನ್​ ಪರಾಗ್​, ರಿಂಕು ಸಿಂಗ್​ ಮತ್ತು ನಾಯಕ ಸೂರ್ಯಕುಮಾರ್​ ಕೂಡ ಅರೆಕಾಲಿಕ ಬೌಲರ್​ಗಳಾಗಿ ನೆರವಾಗಬಲ್ಲವರಾಗಿದ್ದಾರೆ. ಹೀಗಾಗಿ, ಇಷ್ಟೊಂದು ಹೆಚ್ಚುವರಿ ಬೌಲಿಂಗ್​ ಆಯ್ಕೆಗಳಿರುವುದು ನನಗೆ ಹೊಸ ತಲೆನೋವಾಗಿದೆ ಎಂದು ಸೂರ್ಯಕುಮಾರ್​ ಮೊದಲ ಪಂದ್ಯದ ಬಳಿಕ ಹೇಳಿಕೊಂಡಿದ್ದರು.

https://www.vijayavani.net/singapore-bids-farewell-to-182-year-old-horse-racing-tradition