ಬಾಂಗ್ಲಾ ಎದುರು ರೋಚಕ ಜಯ ಸಾಧಿಸಿದ ದಕ್ಷಿಣ ಆಫ್ರಿಕಾ; ಟಿ20 ವಿಶ್ವಕಪ್​ನಲ್ಲಿ ಮೊದಲ ತಂಡವಾಗಿ ಸೂಪರ್​-8 ಪ್ರವೇಶ

ನ್ಯೂಯಾರ್ಕ್​: ಬೌಲರ್​ಗಳು ನೀಡಿದ ಅಮೋಘ ತಿರುಗೇಟಿನ ನೆರವಿನಿಂದ ದಕ್ಷಿಣ ಆಫ್ರಿಕಾ ತಂಡ ಐಸಿಸಿ ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಬಾಂಗ್ಲಾದೇಶ ವಿರುದ್ಧ ಆಘಾತದಿಂದ ಪಾರಾಗಿ 4 ರನ್​ಗಳಿಂದ ರೋಚಕ ಗೆಲುವು ದಾಖಲಿಸಿದೆ. ಡಿ ಗುಂಪಿನಲ್ಲಿ ಕಂಡ ಸತತ 3ನೇ ಜಯದೊಂದಿಗೆ ಹರಿಣಗಳ ಪಡೆ ಟೂರ್ನಿಯಲ್ಲಿ ಮೊದಲ ತಂಡವಾಗಿ ಸೂಪರ್​-8 ಪ್ರವೇಶವನ್ನು ಖಾತ್ರಿಪಡಿಸಿಕೊಂಡಿದೆ.

ಬೌಲರ್​ಗಳ ಪಾಲಿಗೆ ಸ್ವರ್ಗದಂತಿರುವ ನಾಸೌ ಕೌಂಟಿ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಟಾಸ್​ ಗೆದ್ದು ಬ್ಯಾಟಿಂಗ್​ಗೆ ಇಳಿದ ದ. ಆಫ್ರಿಕಾ, ಹೆನ್ರಿಕ್​ ಕ್ಲಾಸೆನ್​ (46 ರನ್​, 44 ಎಸೆತ, 2 ಬೌಂಡರಿ, 3 ಸಿಕ್ಸರ್​) ಹೋರಾಟದ ನಡುವೆ ವೇಗಿಗಳಾದ ತಂಜಿಮ್​ ಹಸನ್​ ಸಕೀಬ್​ (18ಕ್ಕೆ 3) ಮತ್ತು ಟಸ್ಕಿನ್​ ಅಹ್ಮದ್​ (19ಕ್ಕೆ 2) ಬಿಗಿ ದಾಳಿಗೆ ಕುಸಿದು 6 ವಿಕೆಟ್​ಗೆ 113 ರನ್​ಗಳಿಗೆ ತೃಪ್ತಿಪಟ್ಟಿತು. ಪ್ರತಿಯಾಗಿ ಬಾಂಗ್ಲಾ ಕೂಡ ಚೇಸಿಂಗ್​ನಲ್ಲಿ ತಿಣುಕಾಡಿತು. ಕೇಶವ್​ ಮಹಾರಾಜ್​ (27ಕ್ಕೆ 3), ಕಗಿಸೊ ರಬಾಡ (19ಕ್ಕೆ 2), ಅನ್ರಿಚ್​ ನೋಕಿಯಾ (17ಕ್ಕೆ 2) ದಾಳಿಗೆ ನಲುಗಿದ ಬಾಂಗ್ಲಾ ಅಂತಿಮವಾಗಿ 7 ವಿಕೆಟ್​ಗೆ 109 ರನ್​ ಗಳಿಸಲಷ್ಟೇ ಶಕ್ತವಾಯಿತು. ಇದು ಟಿ20 ವಿಶ್ವಕಪ್​ ಇತಿಹಾಸದಲ್ಲಿ ತಂಡವೊಂದು ರಕ್ಷಿಸಿಕೊಂಡ ಅತ್ಯಂತ ಕನಿಷ್ಠ ಮೊತ್ತವಾಗಿದೆ.

ಆಫ್ರಿಕಾ ಬೌಲರ್​ಗಳ ತಿರುಗೇಟಿನಿಂದ ಬಾಂಗ್ಲಾ 50 ರನ್​ಗಳಿಗೆ 4 ವಿಕೆಟ್​ ಕಳೆದುಕೊಂಡು ಪರದಾಡಿತು. ಆಗ ತೌಹಿದ್​ ಹೃದಯ್​ (37) ಮತ್ತು ಮಹಮುದುಲ್ಲಾ (20) ಜೋಡಿ 5ನೇ ವಿಕೆಟ್​ಗೆ 45 ಎಸೆತಗಳಲ್ಲಿ 44 ರನ್​ ಸೇರಿಸಿ ಜಯ ಆಸೆಗೆ ಬಲ ತುಂಬಿತು.

ರೋಚಕ ಕೊನೇ ಓವರ್​: ಕೊನೇ ಓವರ್​ನಲ್ಲಿ ಬಾಂಗ್ಲಾಗೆ 11 ರನ್​ಬೇಕಿದ್ದಾಗ ಸ್ಪಿನ್ನರ್​ ಕೇಶವ್​ ಮಹಾರಾಜ್​ 6 ರನ್​ (ವೈಡ್​, 1, 2, ವಿಕೆಟ್​, 1ಲೆಗ್​ಬೈ, ವಿಕೆಟ್​, 1) ಮಾತ್ರ ಬಿಟ್ಟುಕೊಟ್ಟರು.

ತಂಜಿಮ್​ ಕಡಿವಾಣ: ಮೊದಲ ಓವರ್​ನಲ್ಲೇ ರಿಜಾ ಹೆಂಡ್ರಿಕ್ಸ್​ (0) ವಿಕೆಟ್​ ಪಡೆದ ತಂಜಿಮ್​ ಮೊದಲ ಆಘಾತ ನೀಡಿದರೆ, ಬಳಿಕ ಕ್ವಿಂಟನ್​ ಡಿಕಾಕ್​ (18) ಹಾಗೂ ಟ್ರಿಸ್ಟಾನ್​ ಸ್ಟಬ್ಸ್​ (0) ವಿಕೆಟ್​ ಕಬಳಿಸಿ ಹರಿಣಗಳಿಗೆ ದೊಡ್ಡ ಹೊಡೆತ ನೀಡಿದರು. ನಾಯಕ ಏಡನ್​ ಮಾರ್ಕ್ರಮ್​ (4) ನಿರಾಸೆ ಮೂಡಿಸಿದರು. ಆಫ್ರಿಕಾ ಸತತ 2ನೇ ಪಂದ್ಯದಲ್ಲಿ 25 ರನ್​ ಒಳಗೆ 4 ವಿಕೆಟ್​ ಕಳೆದುಕೊಂಡು ಆರಂಭಿಕ ಆಘಾತ ಎದುರಿಸಿತು. ಆಗ ಜತೆಯಾದ ಹೆನ್ರಿಕ್​ ಕ್ಲಾಸೆನ್​ (46 ರನ್​, 44 ಎಸೆತ, 2 ಬೌಂಡರಿ, 3 ಸಿಕ್ಸರ್​) ಹಾಗೂ ಅನುಭವಿ ಡೇವಿಡ್​ ಮಿಲ್ಲರ್​ (29) 5ನೇ ವಿಕೆಟ್​ಗೆ 79 ಎಸೆತಗಳಲ್ಲಿ 79 ರನ್​ಗಳಿಸಿ ಚೇತರಿಕೆ ನೀಡಿದರು.

ದಕ್ಷಿಣ ಆಫ್ರಿಕಾ: 6 ವಿಕೆಟ್​ಗೆ 113 (ಡಿಕಾಕ್​ 13, ಮಾರ್ಕ್ರಮ್​ 5, ಸ್ಟಬ್ಸ್​ 0, ಕ್ಲಾಸೆನ್​ 46, ಮಿಲ್ಲರ್​ 29, ತಂಜಿಮ್​ 18ಕ್ಕೆ 3, ಟಸ್ಕಿನ್​ 19ಕ್ಕೆ 2). ಬಾಂಗ್ಲಾದೇಶ: 7 ವಿಕೆಟ್​ಗೆ 109 (ಶಕೀಬ್​ 3, ಹೃದಯ್​ 37, ಮಹಮುದುಲ್ಲಾ 20, ಕೇಶವ್​ 27ಕ್ಕೆ 3, ರಬಾಡ 19ಕ್ಕೆ 2, ನೋಕಿಯಾ 17ಕ್ಕೆ 2).

https://www.vijayavani.net/t20-world-cup-how-pakistan-need-indias-help-in-qualifying-for-super-8-stage