ದರ್ಶನ್​ ರಕ್ಷಣೆಗೆ ಪ್ರಭಾವಿಗಳಿಂದ ನಡೆದಿತ್ತು ಇಷ್ಟೆಲ್ಲಾ ಪ್ರಯತ್ನ! ಮುಚ್ಚಿ ಹೋಗ್ತಿದ್ದ ಕೇಸ್​ ಬೆಳಕಿಗೆ ಬಂದಿದ್ದೇ ರೋಚಕ

ಬೆಂಗಳೂರು: ಇಡೀ ರಾಜ್ಯದಲ್ಲಿ ಇದೀಗ ನಟ ದರ್ಶನ್​ರದ್ದೇ ಚರ್ಚೆ. ಯಾವ ನ್ಯೂಸ್​ ಚಾನೆಲ್​ ಹಾಕಿದ್ರೂ ದರ್ಶನ್​ರದ್ದೇ ಸುದ್ದಿ. ಜನಗಳ ಬಾಯಲ್ಲೂ ದರ್ಶನ್​​ರದ್ದೇ ಮಾತು. ಅದಕ್ಕೆ ಕಾರಣ ಕೊಲೆ ಪ್ರಕರಣದಲ್ಲಿ ದರ್ಶನ್​ ಬಂಧನವಾಗಿರುವುದು. ನಟಿ ಪವಿತ್ರಾ ಗೌಡಗೆ ಅಶ್ಲೀಲ ಸಂದೇಶ ಕಳುಹಿಸಿದ ರೇಣುಕಾಸ್ವಾಮಿಯ ಕೊಲೆಯಲ್ಲಿ ದರ್ಶನ್​ ಕೈವಾಡ ಇದೆ ಎಂಬ ಆರೋಪ ಕೇಳಿಬಂದಿದೆ. ದರ್ಶನ್​ ಸೂಚನೆ ಕೊಟ್ಟಿದ್ದಕ್ಕೆ ಹಲ್ಲೆ ಮಾಡಿದೆವು ಎಂದು ಬಂಧಿತ ಆರೋಪಿಗಳು ತಪ್ಪೊಪ್ಪಿಕೊಂಡಿರುವ ಹಿನ್ನೆಲೆಯಲ್ಲಿ ದರ್ಶನ್​ರನ್ನು ಬಂಧಿಸಲಾಗಿದೆ. ಅಲ್ಲದೆ, ಒಳಸಂಚು ನಡೆಸಿದ ಆರೋಪದ ಮೇಲೆ ಪವಿತ್ರಾ ಗೌಡಳನ್ನು ಬಂಧಿಸಲಾಗಿದೆ. ಆರೋಪಿಗಳನ್ನು ನ್ಯಾಯಾಲಯ 6 ದಿನಗಳ ಪೊಲೀಸ್​ ಕಸ್ಟಡಿಗೆ ನೀಡಿದೆ. ಇದರ ನಡುವೆ ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಾಕಷ್ಟು ಸಂಗತಿಗಳು ಬಯಲಿಗೆ ಬರುತ್ತಿವೆ.

ತಾಜಾ ಸಂಗತಿ ಏನೆಂದರೆ, ಈ ಪ್ರಕರಣದಿಂದ ದರ್ಶನ್​ರನ್ನು ಬಚಾವ್​ ಮಾಡಲು ಕೆಲ ಪ್ರಭಾವಿಗಳು ತೆರೆಮರೆಯಲ್ಲಿ ಕೆಲಸ ಮಾಡುತ್ತಿದ್ದಾರೆ. ಅದರಲ್ಲಿ ಸಚಿವರು ಸಹ ಸೇರಿದ್ದಾರೆ ಎನ್ನಲಾಗಿದೆ. ಸರ್ಕಾರದ ಮೇಲೆಯೇ ತುಂಬಾ ಒತ್ತಡ ಹೇರಲಾಗುತ್ತಿದೆ ಎಂಬ ಚರ್ಚೆ ಪೊಲೀಸ್​ ವಲಯದಲ್ಲೇ ಕೇಳಿಬರುತ್ತಿದೆ. ತನಿಖೆಯ ಮೇಲೆ ಪ್ರಭಾವ ಬೀರುವ ಪ್ರಯತ್ನ ನಡೆಯುತ್ತಿದೆ ಎಂಬ ಆರೋಪ ಕೇಳಿಬಂದಿದೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ಗೃಹ ಸಚಿವ ಪರಮೇಶ್ವರ್​, ಯಾರೊಬ್ಬರು ಕೂಡ ನಮ್ಮ ಮೇಲೆ ಪ್ರಭಾವ ಬೀರುವ ಪ್ರಯತ್ನ ಮಾಡಿಲ್ಲ ಮತ್ತು ಕಾನೂನು ತನ್ನದೇಯಾದ ಕ್ರಮಗಳನ್ನು ತೆಗೆದುಕೊಳ್ಳುತ್ತದೆ ಎಂದು ಹೇಳಿದ್ದಾರೆ.

ದರ್ಶನ್​ರನ್ನು ಮಂಗಳವಾರ ಮುಂಜಾನೆ ಮೈಸೂರಿನ ಹೋಟೆಲ್​ನಲ್ಲಿ ಪೊಲೀಸರು ವಶಕ್ಕೆ ಪಡೆಯುವ ಮುನ್ನವೇ ದರ್ಶನ್​ ಆಪ್ತರಿಗೆ ಈ ವಿಚಾರವನ್ನು ಮೊದಲು ತಿಳಿಸಿದ ವ್ಯಕ್ತಿಯೇ ಓರ್ವ ಸಚಿವ ಎಂದು ತಿಳಿದುಬಂದಿದೆ. ತನ್ನ ಸೆಲೆಬ್ರಿಟಿ ಫ್ರೆಂಡ್​ ದರ್ಶನ್​ರನ್ನು ಬಂಧಿಸುತ್ತಾರೆಂದು ತಿಳಿದು ಆ ಸಚಿವ ಪೊಲೀಸ್​ ಅಧಿಕಾರಿಗೆ ನಿರಂತರವಾಗಿ ಕರೆ ಮಾಡಿದ್ದಾರೆ. ಅಲ್ಲದೆ, ಗೃಹ ಸಚಿವ ಪರಮೇಶ್ವರ್​ ಮತ್ತು ಸಿಎಂ ಸಿದ್ದರಾಮಯ್ಯ ಕಚೇರಿಗೂ ಸಹ ಕರೆ ಮಾಡಿ, ದರ್ಶನ್​ರನ್ನು ರಕ್ಷಣೆ ಮಾಡುವ ಪ್ರಯತ್ನವನ್ನು ಮಾಡಿದ್ದಾರೆ.

ತನ್ನ ಫೋನ್​ ಕರೆಗಳಿಗೆ ಯಾವುದೇ ಪ್ರತಿಕ್ರಿಯೆ ಸಿಗದೇ ಇದ್ದಾಗ ಆ ಸಚಿವ ತಕ್ಷಣ ಸದಾಶಿವನಗರದಲ್ಲಿರುವ ಡಾ. ಜಿ. ಪರಮೇಶ್ವರ್​ ಅವರ ಮನೆಗೆ ತೆರಳಿದ್ದಾರೆ. ಇದೇ ಸಂದರ್ಭದಲ್ಲಿ, ದರ್ಶನ್​ ಆಪ್ತರಾಗಿರುವ ಬಿಜೆಪಿ ಶಾಸಕರೊಬ್ಬರು ಪೊಲೀಸ್​ ಅಧಿಕಾರಿಗಳಿಗೆ ನಿರಂತರವಾಗಿ ಕರೆ ಮಾಡಿ, ಪ್ರಕರಣವನ್ನು ದುರ್ಬಲಗೊಳಿಸುವ ಪ್ರಯತ್ನವನ್ನು ಮಾಡಿದ್ದಾರೆ.

ಈ ಪ್ರಕರಣದಲ್ಲಿ ಮಹತ್ವದ ಸಾಕ್ಷ್ಯಾಧಾರಗಳು ಲಭ್ಯವಾಗಿದ್ದು, ಆರಂಭದಲ್ಲಿ ದರ್ಶನ್​ ಅವರನ್ನು ಎ1 ಆರೋಪಿಯನ್ನಾಗಿ ಮಾಡಿದ್ದರು. ಆದರೆ, ರಾಜಕಾರಣಿಗಳ ಪ್ರಭಾವದಿಂದ ದರ್ಶನ್​ ಬದಲು ಅವರ ಗೆಳತಿ ಪವಿತ್ರಾ ಗೌಡರನ್ನು ಎ1 ಆರೋಪಿಯನ್ನಾಗಿ ಮಾಡಿ ದರ್ಶನ್​ರನ್ನು ಎ2 ಆರೋಪಿಯನ್ನಾಗಿ ಬದಲಿಸಿದ್ದಾರೆ ಎಂದು ಪೊಲೀಸ್​ ಮೂಲಗಳು ತಿಳಿಸಿವೆ.

ಟ್ರಕ್​ಗೆ ತಲೆ ಡಿಕ್ಕಿ

ಕೊಲೆಯಾದ ರೇಣುಕಸ್ವಾಮಿಗೆ ಸುಮಾರು 4 ಗಂಟೆಗಳ ಕಾಲ ಕಿರುಕುಳ ನೀಡಲಾಗಿದೆ. ದೇಹದಲ್ಲಿ 15 ಗಾಯಗಳಾಗಿದ್ದು, ಶಾಕ್​ ಮತ್ತು ತೀವ್ರ ರಕ್ತಸ್ರಾವದಿಂದ ಮೃತಪಟ್ಟಿದ್ದಾರೆ ಎಂದು ಮರಣೋತ್ತರ ವರದಿಯಲ್ಲಿ ಬಹಿರಂಗವಾಗಿದೆ. ಆಂತರಿಕ ರಕ್ತಸ್ರಾವದಿಂದ ಅಸುನೀಗಿದ್ದಾರೆ ಎಂದು ವೈದ್ಯರು ಹೇಳಿದ್ದಾರೆ. ರೇಣುಕಸ್ವಾಮಿಯ ತಲೆಯನ್ನು ಅನೇಕ ಬಾರಿ ಟ್ರಕ್​ಗೆ ಗುದ್ದಿದ್ದಾರೆಂದು ತಿಳಿದುಬಂದಿದೆ.

ಪ್ರಭಾವಕ್ಕೆ ಸೊಪ್ಪು ಹಾಕದ ಖಡಕ್​ ಅಧಿಕಾರಿಗಳು

ಇಡೀ ಪ್ರಕರಣವನ್ನು ಆರಂಭದಲ್ಲೇ ಮುಚ್ಚಿಡುವ ಪ್ರಯತ್ನ ನಡೆದಿತ್ತು. ದರ್ಶನ್​ರನ್ನು ಹೇಗಾದರೂ ಮಾಡಿ ರಕ್ಷಣೆ ಮಾಡಲೇಬೇಕೆಂದು ಕಾಣದ ಕೈಗಳು ತಮ್ಮ ಕೈಚಳಕ ತೋರಿದ್ದವು. ಆದರೆ, ಡಿಸಿಪಿ ಎಸ್​. ಗಿರೀಶ್​ ಮತ್ತು ಎಸಿಪಿ ಚಂದನ್​ ಕುಮಾರ್​ ಇಡೀ ಪ್ರಕರಣವನ್ನು ಮುನ್ನೆಲೆಗೆ ತಂದರು. ಈ ಅಧಿಕಾರಿಗಳ ತನಿಖೆಯಿಂದಲೇ ಹುದುಗಿ ಹೋಗಿದ್ದ ಸತ್ಯ ಬಯಲಿಗೆ ಬಂದಿದೆ ಎಂದು ತಿಳಿದುಬಂದಿದೆ. ಇಲ್ಲವಾದಲ್ಲಿ ಈ ಪ್ರಕರಣ ಮುಚ್ಚಿ ಹೋಗುತ್ತಿತ್ತು ಎಂದು ಹೇಳಲಾಗುತ್ತಿದೆ.

https://www.vijayavani.net/meet-controversial-kannada-actor-darshan-known-for-affair-with-pavithra-gowda-to-getting-banned-by-media

https://www.vijayavani.net/how-darshan-thoogudeepa-change-like-this-who-never-before-like-this