ಬೆಂಗಳೂರು: ಈಗಾಗಲೇ ಮೂರು ದಶಕಗಳ ಹಿಂದಿನ ಧಾರಾವಾಹಿಗಳು ಕರೊನಾ ಲಾಕ್ಡೌನ್ ಹಿನ್ನಲೆಯಲ್ಲಿ ಮತ್ತೆ ಮರುಪ್ರಸಾರ ಕಾಣುತ್ತಿವೆ. ರಾಮಾಯಣ, ಮಹಾಭಾರತ, ಶಕ್ತಿಮಾನ್, ಭ್ಯೂಮಕೇಶ್ ಭಕ್ಷಿ ಸೇರಿ ಹತ್ತಾರು ಹಿಂದಿ ಧಾರಾವಾಹಿಗಳು ಆ ಜನರೇಷನ್ ಜನರನ್ನು ಮತ್ತೆ ಆ ದಿನಗಳಿಗೆ ಕರೆದೊಯ್ಯುತ್ತಿವೆ. ಅಷ್ಟೇ ಯಾಕೆ, ಕ್ರಿಕೆಟ್ ಸರಣಿಗಳು ಸಹ ಮರುಪ್ರಸಾರ ಆರಂಭಿಸಿವೆ. ಇದೀಗ ಕನ್ನಡದಲ್ಲೂ ಅಂತ ಕಾರ್ಯ ಆರಂಭವಾಗಿದೆ. ಆರಂಭದಲ್ಲಿ ಈಟಿವಿಯಲ್ಲಿ ಪ್ರಸಾರವಾಗುತ್ತಿದ್ದ ಸಿಲ್ಲಿ ಲಲ್ಲಿ ಸೀಸನ್ 1 ಧಾರಾವಾಹಿ ಇದೀಗ ಕಲರ್ಸ್ ಕನ್ನಡದಲ್ಲಿ ಪ್ರೇಕ್ಷಕರ ಒತ್ತಾಯದ ಮೇರೆಗೆ ಮರುಪ್ರಸಾರ ಆರಂಭಿಸಿದೆ.
ಡಾ. ವಿಠಲ್ ರಾವ್ ಫೇಮಸ್ ಇನ್ ಸರ್ಜರಿ ಆ್ಯಂಡ್ ಭರ್ಜರಿ ಎಂಬ ಡೈಲಾಗ್ ಮತ್ತೆ ಕಿವಿಗಪ್ಪಳಿಸಲಿದೆ. ಸಮಾಜ ಸೇವಕಿ ಲಲಿತಾಂಬಾ ಸಮಾಜ ಸೇವೆಯ, ರಂಗ, ಲಲ್ಲಿ ಹೀಗೆ ಎಲ್ಲ ಪಾತ್ರಗಳು ಮತ್ತೆ ಮೋಡಿ ಮಾಡಲಿವೆ. ಅಂದಹಾಗೆ, ಈ ಧಾರಾವಾಹಿ ಸೋಮವಾರದಿಂದ ಶುಕ್ರವಾರದ ವರೆಗೆ ಬೆಳಗ್ಗೆ 10ಕ್ಕೆ ಪ್ರಸಾರವಾಗಲಿದೆ. ಈ ಧಾರಾವಾಹಿ ಮರು ಪ್ರಸಾರ ಆಗುತ್ತಿದ್ದಂತೆ ಸೀರಿಯಲ್ನ ಮುಖ್ಯ ಪಾತ್ರಧಾರಿ ಡಾ. ವಿಠಲ್ ರಾವ್ ಅಲಿಯಾಸ್ ರವಿಶಂಕರ್ ಗೌಡ, ಟ್ವಿಟರ್ನಲ್ಲಿ ಖುಷಿ ಹಂಚಿಕೊಂಡಿದ್ದಾರೆ. ಅಭಿಮಾನಿಗಳ ಅಭಿಮಾನಕ್ಕೆ ಸ್ಪಂದಿಸಿ ಅವರ ನೆಚ್ಚಿನ ಧಾರವಾಹಿ ಸಿಲ್ಲಿ ಲಲ್ಲಿ ಮರು ಪ್ರಸಾರ ಮಾಡುತ್ತಿರುವದಕ್ಕೆ ಧನ್ಯವಾದ ಎಂದಿದ್ದಾರೆ.
