ಸಿನಿಮಾ ತಾರೆಯರ, ಗಾಯರಿಗೂ ಕರೊನಾ ಅಂಟಿಕೊಂಡ ಉದಾಹರಣೆ ಈಗಿನ್ನೂ ಹಸಿಯಾಗಿರುವಾಗಲೇ ದೂರದ ಸ್ಪೇನ್ನಲ್ಲಿರುವ ಬಹುಭಾಷಾ ನಟಿ ಶ್ರೀಯಾ ಸರಣ್ ಪತಿಗೂ ಈಗ ಕರೊನಾ ಸೋಂಕು ತಗುಲಿರುವ ಸಾಧ್ಯತೆ ಇದೆ. ಪತಿ ಆ್ಯಂಡ್ರಿವ್ಗೆ ಕರೊನಾದ ಗುಣಲಕ್ಷಣಗಳಾದ ಕೆಮ್ಮು ಮತ್ತು ಜ್ವರ ಕಾಣಿಸಿಕೊಂಡಿದ್ದರಿಂದ ಆಸ್ಪತ್ರೆಗೆ ಭೇಟಿ ನೀಡಿ ಬಂದಿದ್ದಾರೆ. ಕೂಡಲೇ ಐಸೋಲೇಷನ್ನಲ್ಲಿ ಇರಿಸುವಂತೆ ವೈದ್ಯರು ಸೂಚಿಸಿದ್ದಾರೆ. ಅದರಂತೆ ಮನೆಗೆ ಬಂದು ಇಬ್ಬರು ಪ್ರತ್ಯೇಕ ಕೋಣೆಗಳಲ್ಲಿ ಕಾಲ ಕಳೆಯುತ್ತಿದ್ದಾರೆ. ಈ ಬಗ್ಗೆ ಒಂದಷ್ಟು ಮಾಹಿತಿಯನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ.
ಸ್ಪೇನ್ನಲ್ಲಿ ಕರೊನಾ ಪ್ರಕರಣಗಳ ಸಂಖ್ಯೆ ಹೆಚ್ಚಿದೆ. ಕಟ್ಟುನಿಟ್ಟಿನ ನಿಯಮಗಳನ್ನು ಪಾಲನೆ ಮಾಡಲಾಗುತ್ತಿದೆ. ಇಡೀ ಸ್ಪೇನ್ ಲಾಕ್ಡೌನ್ ಆಗಿದೆ. ಒಂದು ಮನೆಯಿಂದ ಒಬ್ಬರಿಗೆ ಮಾತ್ರ ಹೊರ ಹೋಗಿ ಬರುವ ಅವಕಾಶ. ಎಲ್ಲವೂ ಕಠಿಣವಾಗಿದೆ. ಈ ನಡುವೆ, ಆ್ಯಂಡ್ರಿವ್ಗೆ ಕೋವಿಡ್ 19 ಸೋಂಕಿನ ಲಕ್ಷಣ ಕಂಡುಬಂದಿತ್ತು. ಮೊದ ಮೊದಲಿಗೆ ಗಾಬರಿಯಾಗಿತ್ತು. ಆಸ್ಪತ್ರೆಗೆ ಹೋಗಿಬಂದಿದ್ದೇವೆ. ಐಸೋಲೇಷನ್ನಲ್ಲಿ ಪತಿಯನ್ನು ಪ್ರತ್ಯೇಕವಾಗಿರಿಸಿದ್ದೇನೆ. ಈಗ ಆತನ ಆರೋಗ್ಯದಲ್ಲಿ ಚೇತರಿಕೆ ಕಂಡುಬಂದಿದೆ ಎಂದು ಹೇಳಿಕೊಳ್ಳುತ್ತಾರೆ ಶ್ರೀಯಾ. (ಏಜೆನ್ಸೀಸ್)
