ಮುಂಬೈ: ಬಾಲಿವುಡ್ ಕಲಾವಿದರಿಗೆ ಡ್ರಗ್ಸ್ ನಂಟಿರುವ ಕುರಿತು ಕಳೆದ ಕೆಲವು ದಿನಗಳಿಂದ ಚರ್ಚೆಯಾಗುತ್ತಲೇ ಇದೆ. ಈ ಕುರಿತು, ದೀಪಿಕಾ ಪಡುಕೋಣೆ ಸೇರಿದಂತೆ ನಾಲ್ವರು ಬಾಲಿವುಡ್ ನಟಿಯರಿಗೆ ವಿಚಾರಣೆಗೆ ಹಾಜರಾಗುವಂತೆ ಈಗಾಗಲೇ ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ ಅಧಿಕಾರಿಗಳು ಸಮನ್ಸ್ ನೀಡಿದ್ದಾರೆ.
ಇದನ್ನೂ ಓದಿ: ಡ್ರಗ್ಸ್ ಪೆಡ್ಲರ್ ಜತೆ ನಟ ದಿಗಂತ್ ಚಾಟಿಂಗ್…
ಈ ಮಧ್ಯೆ, ಮಾದಕ ನಟಿ ಎಂದೇ ಹೆಸರಾಗಿರುವ ಶರ್ಲಿನ್ ಚೋಪ್ರಾ ಹೊಸದೊಂದು ಬಾಂಬ್ ಸಿಡಿಸಿದ್ದಾರೆ. ಕ್ರಿಕೆಟಿಗರ ಪತ್ನಿಯರು ಡ್ರಗ್ಸ್ ತೆಗೆದುಕೊಳ್ಳುವುದನ್ನು ಅವರು ಕಣ್ಣಾರೆ ಕಂಡಿದ್ದಾರಂತೆ. ಒಂದು ಪಕ್ಷ ಎನ್ಸಿಬಿ ಕೇಳಿದರೆ, ತಾವು ಒಂದಿಷ್ಟು ವಿಷಯಗಳನ್ನು ಬಹಿರಂಗಪಡಿಸುವುದಾಗಿ ಅವರು ಹೇಳಿದ್ದಾರೆ.
ಈ ಕುರಿತು ಸಂದರ್ಶನವೊಂದರಲ್ಲಿ ಮಾತನಾಡಿರುವ ಅವರು, ‘ಒಂದೊಮ್ಮೆ ನಾನು ಕೆಕೆಆರ್ ಮ್ಯಾಚ್ ನೋಡುವುದಕ್ಕೆ ಕೊಲ್ಕತ್ತಾಗೆ ಹೋಗಿದ್ದೆ. ಮ್ಯಾಚ್ ನಂತರ ಪಾರ್ಟಿಗೆ ನನಗೆ ಆಹ್ವಾನ ಸಿಕ್ಕಿತ್ತು. ಸಾಮಾನ್ಯವಾಗಿ ಇಂತಹ ಪಾರ್ಟಿಗಳಲ್ಲಿ ಕ್ರಿಕೆಟಿಗರು ಮತ್ತು ಅವರ ಪತ್ನಿಯರು ಹಾಜರಿರುತ್ತಾರೆ. ನಾನು ಆ ಪಾರ್ಟಿಯಲ್ಲಿ ಸಾಕಷ್ಟು ಡ್ಯಾನ್ಸ್ ಮಾಡಿ, ಒಂದು ಹಂತದಲ್ಲಿ ಸುಸ್ತಾದೆ. ವಾಷ್ರೂಮ್ಗೆ ಹೋದಾಗ, ಹಲವು ಕ್ರಿಕೆಟಿಗರ ಪತ್ನಿಯರು ಕೊಕೇನ್ ತೆಗೆದುಕೊಳ್ಳುವುದನ್ನು ನೋಡಿದೆ. ಕೆಲವರು ನನ್ನನ್ನು ನೋಡಿ ಸ್ಮೈಲ್ ಮಾಡಿದರು. ನಾನು ತಪ್ಪಾದ ಜಾಗದಲ್ಲಿದ್ದೇನೆ ಎನ್ನುವುದು ನನಗೆ ಅರ್ಥವಾಯಿತು’ ಎಂದು ಅವರು ಹೇಳಿದ್ದಾರೆ.
ಬಹುಶಃ ಪುರುಷರ ವಾಶ್ರೂಮ್ಗೆ ಹೋಗಿದ್ದರೆ, ಪರಿಸ್ಥಿತಿ ಇದಕ್ಕಿಂತ ವಿಭಿನ್ನವಾಗೇನೂ ಇರುತ್ತಿರಲಿಲ್ಲ ಎಂದನಿಸುತ್ತದೆ ಎಂದು ಶರ್ಲಿನ್ ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ಡ್ರಗ್ಸ್ ಕೇಸ್; ಖ್ಯಾತ ನಿರೂಪಕಿ ಅನುಶ್ರೀಗೆ ಸಿಸಿಬಿ ಬುಲಾವ್
ಈ ವಿಷಯದಲ್ಲಿ ಶರ್ಲಿನ್ ಯಾವ ಕ್ರಿಕೆಟಿಗರ ಹೆಸರನ್ನು ಹೇಳಿದಿದ್ದರೂ, ಒಂದು ಪಕ್ಷ ಅಗತ್ಯ ಬಿದ್ದರೆ ಹೆಸರು ಹೇಳುವುದಕ್ಕೆ ಸಿದ್ಧ ಎಂದು ಅವರು ಹೇಳಿಕೊಂಡಿದ್ದಾರೆ. ‘ಈ ವಿಚಾರವಾಗಿ ಎನ್ಸಿಬಿಯವರು ನನ್ನನ್ನು ವಿಚಾರಣೆ ಮಾಡಿದರೆ, ಹೆಸರು ಹೇಳುವುದಕ್ಕೆ ಸಿದ್ಧ’ ಎಂದು ಅವರು ಹೇಳಿಕೊಂಡಿದ್ದಾರೆ.