ಮಗುವಾಯಿತೆಂದು ಸುಳ್ಳು ಸುದ್ದಿ ಹಬ್ಬಿಸಿದವರಿಗೆ ಮೇಘನಾ ರಾಜ್​ ಮನವಿ

ಬೆಂಗಳೂರು: ಚಿರು ಸರ್ಜಾ ನಿಧನರಾದ ಬಳಿಕ ಸರ್ಜಾ ಕುಟುಂಬದ ಬಗ್ಗೆ ಸೋಷಿಯಲ್​ ಮೀಡಿಯಾದಲ್ಲಿ ಸುಳ್ಳು ಸುದ್ದಿಯನ್ನು ಹಬ್ಬಿಸಲಾಗುತ್ತಿದೆ. ಅದರಲ್ಲೂ ಗರ್ಭಿಣಿಯಾಗಿರುವ ಮೇಘನಾ ರಾಜ್​ ಹೆರಿಗೆಯ ವಿಚಾರವನ್ನೂ ಕೆಲ ಯೂಟ್ಯೂಬ್​ ವಾಹಿನಿಗಳು ಇಲ್ಲಸಲ್ಲದ ರೀತಿಯಲ್ಲಿ ಬಿಂಬಿಸುತ್ತಿವೆ. ಇದೆಲ್ಲದರ ವಿರುದ್ಧ ಇದೀಗ ಮೇಘನಾ ಗರಂ ಆಗಿದ್ದಾರೆ.

ಇದನ್ನೂ ಓದಿ: ಡ್ರಗ್​ ಮಾಫಿಯಾ: ‘ಗಂಡಸರು ಪವಿತ್ರ ಹಸುಗಳು’ ಹೇಳಿಕೆಗೆ ನಟಿ ರಮ್ಯಾ ಪ್ರತಿಕ್ರಿಯೆ ಹೀಗಿದೆ…

ಸೋಷಿಯಲ್​ ಮೀಡಿಯಾದಲ್ಲಿ ಎರಡು ಯೂಟ್ಯೂಬ್​ ವಾಹಿನಿಗಳ ಸ್ಕ್ರೀನ್​ ಶಾಟ್​ ಶೇರ್ ಮಾಡಿಕೊಂಡಿರುವ ಮೇಘನಾ, ಇಂಥ ಸುಳ್ಳು ಸುದ್ದಿಯನ್ನು ನಂಬಬೇಡಿ ಎಂದು ಅಭಿಮಾನಿಗಳಿಗೆ ಮತ್ತು ಸೋಷಿಯಲ್​ ಮೀಡಿಯಾ ಫಾಲೋವರ್ಸ್​​ಗಳಲ್ಲಿ ಮನವಿ ಮಾಡಿದ್ದಾರೆ.

ಅಷ್ಟಕ್ಕೂ ಹರಿದಾಡಿದ ಸುದ್ದಿಯಾದರೂ ಏನು? ‘ಮೇಘನಾಗೆ ಅವಳಿ ಮಕ್ಕಳಾಗಿವೆ. ಮಗು ಹಿಡಿದು ಕಣ್ಣೀರು ಹಾಕಿದ್ದಾರೆ. ಬೆಳ್ಳಂಬೆಳಗ್ಗೆ ಹೆರಿಗೆಗೆ ಹೋಗುವ ಮುನ್ನ ಚಿರು ಸಮಾಧಿ ಬಳಿ ಹೋಗಿ ಮೇಘನಾ ಮಾಡಿದ್ದೇನು.. ಎಂಬಿತ್ಯಾದಿ ಪ್ರಶ್ನೆಗಳನ್ನು ಸೇರಿಸಿ ವಿಡಿಯೋ ಹಂಚಿಕೊಂಡಿದ್ದಾರೆ.

ಈ ಸುದ್ದಿಗಳನ್ನು ಕಂಡ ಮೇಘನಾ, ‘ಎಲ್ಲರಿಗೂ ನಮಸ್ಕಾರ, ಆದಷ್ಟು ಬೇಗನೇ ನಾನೇ ಈ ವಿಚಾರದ ಬಗ್ಗೆ ಮಾತನಾಡುತ್ತೇನೆ. ಅಲ್ಲಿಯವರೆಗೂ ದಯಮಾಡಿ ನನ್ನ ಅಭಿಮಾನಿಗಳು ಮತ್ತು ಫಾಲೋವರ್ಸ್​​ಗಳಲ್ಲಿ ಮಾಡಿಕೊಳ್ಳುವ ಮನವಿ ಏನೆಂದರೆ, ಇಂಥ ಸುಳ್ಳು ಸುದ್ದಿಗಳತ್ತ ಗಮನ ಹರಿಸಬೇಡಿ. ಸತ್ಯ ಏನೆಂದು ತಿಳಿಯದೇ ವೀಕ್ಷಕರನ್ನು ಹೆಚ್ಚಿಸಿಕೊಳ್ಳಲು ನನ್ನ ಮತ್ತು ನನ್ನ ಕುಟುಂಬದ ಬಗ್ಗೆ ಈ ರೀತಿ ಮಾಡುತ್ತಿರುತ್ತಾರೆ. ಹಾಗೇನಾದರೂ ಹೇಳುವುದಿದ್ದರೆ ನಾನೇ ಪೋಸ್ಟ್ ಮಾಡುತ್ತೇನೆ ಎಂದಿದ್ದಾರೆ.

https://www.vijayavani.net/drugcase-ccb-notice-for-anchor-anushree/