ಈದ್​ ಹಬ್ಬದಂದು ಪತ್ನಿಗೆ ದುಬಾರಿ ಉಡುಗೊರೆ ನೀಡಿದ ಬಾಂಗ್ಲಾ ಕ್ರಿಕೆಟಿಗ ಶಕೀಬ್​ ಅಲ್​ ಹಸನ್​

ಢಾಕಾ: ಬಾಂಗ್ಲಾದೇಶ ಕ್ರಿಕೆಟ್​ ತಂಡದ ಮಾಜಿ ನಾಯಕ ಹಾಗೂ ಆಲ್ರೌಂಡರ್​ ಶಕೀಬ್​ ಅಲ್​ ಹಸನ್​, 'ಈದ್​-ಉಲ್​-ಅಧಾ' ಹಬ್ಬದ ಹಿನ್ನೆಲೆಯಲ್ಲಿ ಪತ್ನಿ ಉಮ್ಮೆ ಅಹ್ಮದ್​ ಶಿಶಿರ್​ಗೆ ಶನಿವಾರ ಭರ್ಜರಿ ಉಡುಗೊರೆ ನೀಡಿದ್ದಾರೆ. ಈ ಮೂಲಕ ಪತ್ನಿಗೆ ಹಬ್ಬದ ಸಂಭ್ರಮವನ್ನು ಇಮ್ಮಡಿಗೊಳಿಸಿದ್ದಾರೆ.

ಮಾರ್ಚ್​ನಲ್ಲಿ ಕರೊನಾ ಹಾವಳಿ ಶುರುವಾದಾಗಿನಿಂದಲೂ ಶಕೀಬ್​ ಮತ್ತು ಶಿಶಿರ್​ ದಂಪತಿ ಅಮೆರಿಕದಲ್ಲಿ ನೆಲೆಸಿದೆ. ಅಮೆರಿಕದಲ್ಲಿ ಕರೊನಾ ಹಾವಳಿ ಹೆಚ್ಚಾಗಿರುವ ನಡುವೆಯೂ ಅಲ್ಲಿಂದ ವಾಪಸ್​ ಬರಲು ಅವರಿಗೆ ಸಾಧ್ಯವಾಗಿಲ್ಲ. ಈ ಕಠಿಣ ಸಮಯದಲ್ಲೂ ಶಕೀಬ್​, ಪತ್ನಿಯ ಪಾಲಿಗೆ ಸ್ಮರಣೀಯಗೊಳಿಸಿದ್ದಾರೆ. ಮರ್ಸಿಡೀಸ್​-ಬೆಂಜ್​ನ ಹೊಸ ಬ್ರಾಂಡ್​ ಕಾರನ್ನು ಹಬ್ಬದ ದಿನದಂದು ಶಕೀಬ್​ ಪತ್ನಿಗೆ ಉಡುಗೊರೆಯಾಗಿ ನೀಡಿದ್ದಾರೆ. ಈ ಕಾರಿನ ಪ್ರಾರಂಭಿಕ ಬೆಲೆ 50 ಲಕ್ಷ ರೂಪಾಯಿಗೂ ಅಧಿಕ ಇದೆ ಎನ್ನಲಾಗಿದೆ.

ಇದನ್ನೂ ಓದಿ: ಐಪಿಎಲ್​ಗೆ ಯುಎಇ ಕೂಡ ಸುರಕ್ಷಿತ ಅಲ್ಲವಂತೆ!

ಹೊಸ ಕಾರಿನ ಚಿತ್ರವನ್ನು ಇನ್​ಸ್ಟಾಗ್ರಾಂನಲ್ಲಿ ಪ್ರಕಟಿಸಿರುವ 31 ವರ್ಷದ ಉಮ್ಮೆ ಅಹ್ಮದ್​ ಶಿಶಿರ್​, 'ಮೈ ಈಡಿ ಫ್ರಂ ದಿ ಹಸ್​ಬಂಡ್​' ಎಂದು ಬರೆದುಕೊಂಡಿದ್ದಾರೆ. ಶಕೀಬ್​-ಶಿಶಿರ್​ 2012ರ ಡಿಸೆಂಬರ್​ 12ರಂದು ವಿವಾಹವಾಗಿದ್ದರು. ಫಿಕ್ಸಿಂಗ್​ ಆಮಿಷದ ಬಗ್ಗೆ ಐಸಿಸಿಗೆ ಮಾಹಿತಿ ನೀಡದ ಹಿನ್ನೆಲೆಯಲ್ಲಿ ಶಕೀಬ್​ ಸದ್ಯ ನಿಷೇಧ ಶಿಕ್ಷೆ ಅನುಭವಿಸುತ್ತಿದ್ದಾರೆ. 2019ರ ಅಕ್ಟೋಬರ್​ನಲ್ಲಿ ಅವರು ಕೊನೆಯದಾಗಿ ಕ್ರಿಕೆಟ್​ ಆಡಿದ್ದಾರೆ.